កីឡាករបាល់ទាត់ដ៏ល្បីជនជាតិបារាំង Antoine Griezmann បើកភោជនីយដ្ឋានដ៏ថ្មីសន្លាងមួយនៅអេស្ប៉ាញ។
ទីក្រុងម៉ាឌ្រីតៈ បង្កើតភាពភ្ញាក់ផ្អើលខ្លាំង ដោយស្ងាត់ៗ ស្រាប់តែកីឡាករបាល់ទាត់ដ៏ល្បីជនជាតិបារាំង Antoine Griezmann វ័យ ៣២ ឆ្នាំ ដែលកំពុងលេងក្លិប Atlético Madrid នៃលីគកំពូលក្នុងប្រទេសអេស្ប៉ាញ ឆ្លៀតមកបើកភោជនីយដ្ឋានដ៏ថ្មីសន្លាងមួយ នាពេលថ្មីៗ ដើមឆ្នាំ២០២៤ នេះ។
ភោជនីយដ្ឋានថ្មីនោះឈ្មោះ Rhudo ដែលមាននៅទីតាំងលើផ្ទះលេខ ៦៤ វិថី Velázquez ស្ថិតនៅក្នុងទីក្រុងម៉ាឌ្រីត ប្រទេសអេស្ប៉ាញ ដែលជាកម្មសិទ្ធិរបស់កីឡាករ Antoine Griezmann និងមានការស្រាក់ដៃគ្នាជាមួយក្រុមតារាបាល់ទាត់ តារាសិល្បៈល្បីល្បាញដទៃផងដែរ។
កីឡាករបាល់ទាត់ Antoine Griezmann និង Marcos Llorente បានចូលរួមជាមួយតារាសម្ដែង Álex González និង Miguel Ángel Silvestre រួមជាមួយមេចុងភៅ Paco Roncero ដើម្បីបើកកន្លែងអាហារដ្ឋានដ៏ថ្មីបំផុតនេះ នៅក្នុងទីក្រុងម៉ាឌ្រីត ប្រទេសអេស្ប៉ាញ។
វាស្ថិតនៅផ្ទៃដីទំហំ ១ ៨០០ ម៉ែត្រការ៉េ និងអាចទទួលភ្ញៀវបានរហូតដល់ ៣០០ នាក់ ហើយមានទីតាំងនៅជិតសណ្ឋាគារ Bless Hotel Madrid ដ៏ប្រណិតបំផុត។ វាសេវាកម្មបែបបារ៍ មានផ្ទះបាយ និងជាកន្លែងតាំងបង្ហាញរួមមានកន្លែងអង្គុយសម្រាប់ភោជនីយដ្ឋាន។
ទោះបីជាមិនទាន់ដឹងច្បាស់ថា កន្លែងនោះយ៉ាងណាទេ ប៉ុន្តែយោងទៅតាមការផ្សព្វផ្សាយនៅលើប្រព័ន្ធផ្សព្វផ្សាយសង្គមអ៊ីនស្តាក្រាម ភោជនីយដ្ឋានថ្មី Rhudo ផ្តោតលើគ្រឿងផ្សំឆៅ និងការប្តេជ្ញាចិត្ត ចំពោះរសជាតិបែបអ្នកមេឌីទែរ៉ាណេ ជាមួយនឹងរសជាតិ avant-garde។
គេក៏ឃើញមានបញ្ជីស្រាក្រហមល្បីនាំមកពីប្រទេសជាអ្នកផលិតដ៏ល្អឥតខ្ចោះនៅក្នុងពិភពលោកដូចជាប្រទេសអេស្ប៉ាញ អ៊ីតាលី បារាំង អូស្ត្រាលី អាហ្សង់ទីន អាហ្រ្វិកខាងត្បូង និងសហរដ្ឋអាមេរិក បូករួមទាំងស្រាក្រឡុកដែលរចនាឡើងដោយអ្នកជំនាញចម្រុះវិជ្ជាជីវៈ Miguel Pastor ។
បើតាមការបង្ហើបពីបណ្តាញសង្គម ភោជនីយដ្ឋាននេះ បានបើកទ្វារនៅថ្ងៃសុក្រ ទី១២ ខែមករា ឆ្នាំ២០២៤ កន្លងមកថ្មីៗនេះតែម្តង៕PR
