ភ្នំពេញ៖ ថវិកាជាង ៥លានដុល្លារអាមេរិកត្រូវបានបរិច្ចាគសម្រាប់ការងារមនុស្សធម៌នៅក្នុងព្រឹត្តិការណ៍កីឡាបាល់ទាត់មិត្តភាពសប្បុរសធម៌ក្រោមមូលបទ «រួមគ្នា ដើម្បីសប្បុរសធម៌ និង ការប្រយុទ្ធប្រឆាំងគ្រឿងញៀន» ដែលមានអ្នកចូលរួមជាង ៣ ម៉ឺននាក់កាលពីរសៀលថ្ងៃពុធ ទី១ ខែឧសភា ឆ្នាំ ២០២៤នេះ។
ព្រឹត្តិការណ៍កីឡាបាល់ទាត់មិត្តភាពនេះ ត្រូវបានធ្វើឡើងនៅពហុកីឡដ្ឋានជាតិ អូឡាំពិក ក្រោមអធិបតីភាព លោក ហ៊ុន សែន ប្រធានព្រឹទ្ធសភាកម្ពុជា និងជាគ្រូបង្វឹកកិត្តិយសក្រុមបាល់ទាត់តារាកម្ពុជា (Cambodia football Super Stars) ដើម្បីប្រមូលថវិកាជួយដល់មន្ទីរពេទ្យគន្ធបុប្ផា។
យោងតាមហ្វេសប៊ុក លោក ហ៊ុន សែន បានឱ្យដឹងថា គិតត្រឹមថ្ងៃទី ១ ឧសភា ២០២៤ នេះ មានប្រាក់រៀលចំនួន ៦០៥ 000 000រៀល និងជាប្រាក់ដុល្លារអាមេរិកចំនួន ៤ ៨៥០ ០០០ដុល្លា។ បើសរុបគិតជាប្រាក់ដុល្លារមានចំនួន ៥ ០០១ ២៥០។
ថវិកាទាំងនេះត្រូវបានបែងចែកសម្រាប់មន្ទីរពេទ្យកុមារអង្គរចំនួន ៥០០ ០០០ ដុល្លារ មជ្ឈមណ្ឌលព្យាបាលកុមារបេះដូងជប៉ុនចំនួន ៣០០ ០០០ដុល្លា គ្រួសារយុទ្ធជនពលី ២០ គ្រួសារចំនួន ២០០ ០០០ដុល្លារ ដែលសរុបមាន ១ ០០០ ០០០ ដុល្លារ។ ក្រៅពីនោះមន្ទីរពេទ្យគន្ធបុប្ផានិងទទួលបានថវិកាចំនួន ៤ ០០១ ២៥០ដុល្លារជាបណ្តោះអាសន្ន ហើយប្រសិនជាទទួលបានបន្ថែមទៀតក៏នឹងប្រគល់ជូនមន្ទីរពេទ្យគន្ធបុប្ផាទាំងអស់ផងដែរ។
លោក ហ៊ុន សែន បានលើកឡើងថា ព្រឹត្តិការណ៍កីឡាបាល់ទាត់មិត្តភាព ជាព្រឹត្តិការណ៍ដ៏សំខាន់ដែលឆ្លុះបញ្ចាំងពីសាមគ្គីភាព ហើយជំរុញប្រជាពលរដ្ឋស្រលាញ់កីឡា និង ជៀសផុតពីគ្រឿងញៀន និង ទឹកចិត្តសប្បុរសធម៌ ជាពិសេស ដើម្បីប្រមូលថវិកាជួយដល់មន្ទីរពេទ្យគន្ធបុប្ផា ដែលជាការបង្ហាញឱ្យឃើញពីភាពសប្បាយរីករាយរបស់ប្រជាពលរដ្ឋកម្ពុជាក្រោមម្លប់សន្តិភាព និង ស្របទៅតាមពាក្យស្លោក «កីឡារស់ក្នុងសន្តិភាព»។
លោកបញ្ជាក់ថា៖ «បាល់ទាត់ល្ងាចនេះ បង្ហាញនូវសមិទ្ធផលសន្តិភាព ស្ថិរភាពនយោបាយនិងការអភិវឌ្ឍ ជាពិសេស បង្ហាញនូវស្មារតីសាមគ្គីភាពក្នុងចំណោមជនរួមជាតិយើង»។
លោកបានអរគុណដល់សប្បុរសជន ក្រុមបាល់ទាត់ទាំង ៤ ក្រុម ដែលចូលរួមប្រកួត សិល្បករសិល្បការិនី អ្នកចូលរួមរៀបចំបម្រើការងារទាំងអស់ ជាពិសេសសាលារាជធានីភ្នំពេញ និង កងកម្លាំងប្រដាប់អាវុធគ្រប់ប្រភេទ និងអរគុណអ្នកគាំទ្រដែលចូលរួមទស្សនាទាំងនៅពហុកីឡដ្ឋានទាំងមើលការផ្សាយផ្ទាល់។
លទ្ធផលនៃការប្រកួតគឺ កីឡាបាល់ទាត់ក្រុមតារាកម្ពុជា (Cambodia football Super Stars) បានទទួលជ័យជម្នះលើក្រុមបាល់ទាត់ Kun Khmer All Stars ក្នុងលទ្ធផល ២-០។
លោក មាស សុវណ្ណ ប្រធានសមាគមសង្រ្គោះជនរងគ្រោះ ដោយសារគ្រឿងញៀន (DARAC) បានសំដែងការគាំទ្រចំពោះការរៀបចំឱ្យមានព្រឹត្តិការណ៍កីឡាបែបនេះ ដោយសារតែវាបានផ្តល់អត្ថប្រយោជន៍ជាច្រើនដល់សង្គម ដូចជា ការទទួលបានការបរិច្ចាគពីសប្បុរសជន និង ការជួយផ្សព្វផ្សាយឱ្យមានការចូលរួមទប់ស្កាត់បញ្ហាគ្រឿងញៀនផងដែរ។
លោកបានបញ្ជាក់ថា៖ «កីឡាមានការផ្សាភ្ជាប់ទៅនឹងគ្រឿងញៀនដែរ។ ការលេងកីឡាក៏ជាវិធីសាស្រ្តមួយ ដើម្បីកាត់ជួយបន្ថយការប្រើប្រាស់គ្រឿងញៀន ក៏ដូចជា ចំណែកមួយជួយឱ្យអ្នកញៀនផ្តាច់បានផងដែរ»។
លោកបានសង្កេតឃើញថា ថ្នាក់ដឹកនាំប្រទេសតែងតែរិះរកវិធីសាស្រ្តថ្មីៗ ដើម្បីឱ្យមានការចូលរួមពីភាគីពាក់ព័ន្ធទាំងអស់ឱ្យធ្វើការស្វែងយល់ ហើយនំាគ្នាទប់ស្កាត់បញ្ហាគ្រឿងញៀនទាំងអស់គ្នា៕