![](https://pppkhmer.sgp1.digitaloceanspaces.com/image/main/20247/2_7_2024_meng_siekliv_poses_for_a_photo_in_kunming_city_capital_of_china_s_yunnan_province_niem_chheng.jpg)
និស្សិតកម្ពុជា កញ្ញា ម៉េង សៀកលីវ នៅក្នុងទីក្រុងគុនមីង ខេត្តយូណាន ប្រទេសចិន។ រូបថត នៀម ឆេង
នៅពេលនិយាយពីការសិក្សាផ្នែកច្បាប់នៅបរទេសសម្រាប់និស្សិតកម្ពុជា គេអាចនឹកទៅដល់ប្រទេសបារាំងដែលមានប្រព័ន្ធច្បាប់ស៊ីវិលដូចគ្នាដោយសារតែកម្ពុជាធ្លាប់ស្ថិតនៅក្រោមអាណានិគមបារាំង ឬនឹកទៅដល់សហរដ្ឋអាមេរិក ឬអូស្ត្រាលី ដែលជាទិសដៅពេញនិយម។
ប៉ុន្តែ សម្រាប់កញ្ញា ម៉េង សៀកលីវ វិញបានសម្រេចចិត្តសិក្សាច្បាប់នៅប្រទេសចិន ដោយមើលឃើញឱកាសធំៗចំនួនពីរនៅពេលវិលត្រឡប់មកកម្ពុជាវិញក្រោយបញ្ចប់ការសិក្សា។
កញ្ញា សៀកលីវ មានស្រុកកំណើតនៅស្រុកកោះធំ ខេត្តកណ្ដាល និងបានបញ្ចប់ការសិក្សាធម្យមសិក្សាទុទិយភូមិនៅវិទ្យាល័យ ហ៊ុន សែន កោះធំ ក្នុងឆ្នាំ ២០២១។ បន្ទាប់ពីបានបញ្ចប់ថ្នាក់វិទ្យាល័យ កញ្ញាបានចាប់យកការសិក្សាច្បាប់នៅសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច បានរយៈពេល ២ ឆ្នាំ ដោយកំណត់គោលដៅក្លាយជាមេធាវីនាពេលអនាគត។
នៅឆ្នាំ ២០២៣ កញ្ញាបានឃើញការជូនដំណឹងរបស់ក្រសួងអប់រំ យុវជន និងកីឡា អំពីអាហារូបករណ៍ទៅសិក្សានៅសាកលវិទ្យាល័យយូណាន ក្នុងខេត្តយូណាន ប្រទេសចិន។ ដោយមានការជំរុញទឹកចិត្តពីពូរបស់ខ្លួន និងមើលឃើញឱកាសពីអាហារូបករណ៍នេះ សៀកលីវ ក៏បានដាក់ពាក្យស្នើសុំហើយក៏ទទួលបានអាហារូបករណ៍នេះ ទោះបីជា កញ្ញាមិនចេះភាសាចិនសូម្បីមួយម៉ាត់ក៏ដោយ។
បើតាម សៀកលីវ ដើម្បីទទួលបានអាហារូបករណ៍នេះ អ្នកដាក់ពាក្យស្នើសុំត្រូវមានសញ្ញាប័ត្របញ្ជាក់ពីសមត្ថភាពភាសាចិន ឬ HSK។ ប៉ុន្តែ ករណីរបស់កញ្ញា គឺមិនមាន HSK ទេ ប៉ុន្តែកញ្ញាមានកម្រិតពិន្ទុ GPA ល្អនៅពេលរៀននៅវិទ្យាល័យ ដែលជាកត្តាមួយជួយឲ្យកញ្ញាទទួលបានអាហារូបករណ៍នេះ។
នៅដើមឆ្នាំ ២០២៤ កញ្ញាបានទៅដល់ខេត្តយូណាន ប្រទេសចិន ហើយចាប់ផ្ដើមរៀនភាសាចិន ដែលជាផ្នែកមួយនៃអាហារូបករណ៍រយៈពេល ៤ ឆ្នាំ។ ត្រឹមតែ ៦ ខែ សៀកលីវ អាចនិយាយភាសាចិនបានល្អសម្រាប់ការទំនាក់ទំនងប្រចាំថ្ងៃ ព្រមទាំងទទួលបានការកោតសរសើរពីគ្រូភាសាចិនផងដែរ។
សៀកលីវនិយាយថា៖ «នៅសាកលវិទ្យាល័យនេះ មានតែខ្ញុំម្នាក់ទេដែលរៀនច្បាប់។ និស្សិតខ្មែរផ្សេងទៀតគាត់រៀនផ្នែកធុរកិច្ច ឬផ្នែកសេដ្ឋកិច្ច។ ខ្ញុំមានចំណាប់អារម្មណ៍ខាងច្បាប់ ដូច្នេះក៏បន្តរៀនច្បាប់តទៅទៀត»។
បច្ចុប្បន្ននេះ មាននិស្សិតកម្ពុជាប្រហែល៨នាក់កំពុងសិក្សានៅសាកលវិទ្យាល័យយូណាន ដោយខ្លះស្ទើរតែបញ្ចប់ការសិក្សារបស់ពួកគេទៅហើយ ខណៈខ្លះទៀតដូចជា សៀកលីវ ជាដើម ទើបតែមកដល់នៅក្នុងឆ្នាំនេះ។
សៀកលីវ បន្តថា៖ «ខ្ញុំចង់ធ្វើជាមេធាវី ពីព្រោះវាជាក្ដីស្រមៃរបស់ខ្ញុំ ហើយគ្រួសារខ្ញុំក៏គាំទ្រខាងហ្នឹងដែរ»។
នៅពេលសួរថា ហេតុអ្វីនាងសម្រេចចិត្តមកសិក្សានៅប្រទេសចិន សៀកលីវ និយាយថា កញ្ញាចាប់អារម្មណ៍ក្នុងការសិក្សានៅក្រៅប្រទេសដើម្បីយល់ដឹងឲ្យបានកាន់តែច្រើនបន្ថែមទៀតទៅលើមុខវិជ្ជាដែលកញ្ញារៀននៅស្រុកខ្មែរ។ លើសពីនេះទៀត កញ្ញាក៏មើលឃើញឱកាសធំៗចំនួនពីរទៀតដែល នោះគឺភាសាចិន និងតម្រូវការទីផ្សារសេវាកម្មច្បាប់ ជាពិសេសក្នុងចំណោមពលរដ្ឋចិនដែលទៅវិនិយោគនៅកម្ពុជា។
កញ្ញានិយាយថា៖ «ទី១ ខ្ញុំឃើញថា ភាសាចិនមានសារៈសំខាន់។ នៅកម្ពុជា បើយើងចេះភាសាចិនវាជួយឲ្យយើងអាចរកការងារបានឆាប់រហ័ស។ ទី២ ខ្ញុំមើលឃើញថាក្នុងវិស័យច្បាប់នៅកម្ពុជា សេវាកម្មច្បាប់ជាភាសាចិននៅមានតិចតួច។ ដូច្នេះ បើសិនជាខ្ញុំចេះ ខ្ញុំមានឱកាសច្រើន»។
សៀកលីវបន្តថា៖ «មានគេឆ្ងល់ដែរ ហើយគេឆាតសួរថា ម៉េចបានជាទៅរៀនច្បាប់នៅប្រទេសចិនអីចឹង។ ប៉ុន្តែខ្ញុំគិតថា វាជាឱកាស។ បើយើងតាំងចិត្តរៀន ទោះទៅដល់កន្លែងណាក៏យើងអាចរៀនបានដែរ»។
យោងតាមគេហទំព័ររបស់ខ្លួន សាកលវិទ្យាលយូណាន ដែលមានទីតាំងក្នុងទីក្រុងគុនមីង មានប្រវត្តិ ១០២ ឆ្នាំមកហើយ៕