![](https://pppkhmer.sgp1.digitaloceanspaces.com/image/main/20247/3_7_2024_tiv_dara_rith.jpg)
កង់សម្រាប់ដំណើរផ្សងព្រេងរបស់ តារារិទ្ធិ បានរងការខូចខាតពេលជួបគ្រោះថ្នាក់ចរាចរណ៍ក្នុងប្រទេសឡាវ។ សហការី
ភ្នំពេញ៖ នៅលើដំណើររយៈពេលជាង១០ថ្ងៃដំបូងក្នុងផែនការជិះកង់ ៣៦៥ថ្ងៃ លោក ទីវ តារារិទ្ធិ បានជួបគ្រោះថ្នាក់ចរាចរណ៍នៅទីក្រុងវៀងចន្ទន៍ ដែលធ្វើឱ្យកង់របស់លោកមានការខូចខាតផ្នែកខាងមុខ។
កាលពីថ្ងៃទី៣ ខែកក្កដា លោក តារារិទ្ធិ បានសម្រេចចិត្ដលាតត្រដាងអំពីឧប្បត្ដិហេតុគ្រោះថ្នាក់ចរាចរណ៍នៅប្រទេសឡាវ សប្ដាហ៍មុន ទោះបីជាលោកប្រឈមការព្រួយបារម្ភពីប្រជាពលរដ្ឋខ្មែរ ជាពិសេស ក្រុមគ្រួសាររបស់លោកផ្ទាល់។
លោកបាននិយាយនៅក្នុងវីដេអូផ្ញើជូនដល់អ្នកគាំទ្រដំណើរផ្សងព្រេងរបស់លោកថា៖ «ខ្ញុំបានជិះកង់ទាំងស្មារតីងងុយគេ បានទៅបុកគូទឡានដែលចតនៅមួយកន្លែងពេញទំហឹង ធ្វើឱ្យខ្ញុំបែកមាត់ ញ៉ាំអីកើតប៉ុន្មានថ្ងៃ»។
ឧប្បត្ដិហេតុនេះបានធ្វើឱ្យលោក តារារិទ្ធិ ខាតពេលវេលាធ្វើដំណើរមួយសប្ដាហ៍ដោយនៅបន្ដព្យាបាលរបួសមាត់ធ្ងន់ធ្ងរនៅទីក្រុងវៀងចន្ទន៍ ។
លោកបានបន្ដថា ក្រៅពីរបួសលើរាងកាយ កង់ជាជំនិះដែលនាំរូបលោកឆ្លងកាត់ផ្លូវលំបាក ឆ្លងព្រំដែន និងឆ្លងទ្វីប រងនូវការខូចខាតយ៉ាងខ្លាំង។
![](https://pppkhmer.sgp1.cdn.digitaloceanspaces.com/image/main/20247/3_7_2024_tiv_dara_rith1.jpg)
លោក ទីវ តារារិទ្ធិ ចូលសួរសុខទុក្ខកុមារស្ថិតក្នុងស្ថានភាពសង្គ្រោះបន្ទាន់មុនពេលលោកចេញដំណើរផ្សងព្រេងជិះកង់សម្បុរសធម៌កម្ពុជា-អឺរ៉ុប។ សហការី
យុវជន ដែលគ្រោងចំណាយពេលមួយឆ្នាំជិះកង់រៃអង្គាសប្រាក់ជួយមន្ទីរពេទ្យកុមារអង្គរ បានឱ្យដឹងថា៖ «ខ្ញុំពិបាកពន្យល់អារម្មណ៍មួយនេះណាស់។ ពេលជួបគ្រោះថ្នាក់ភ្លាម ខ្ញុំស្លុត ស្រឡាំងកាំងផង ពេលវាឈាមមាត់ច្រើន ហើយខ្ញុំអត់ចេះនិយាយភាសាឡាវ។ ខ្ញុំមានកំហុស និងចង់ចេញថ្លៃជួសជុលឡានសងគេវិញ»។
លោកបានអរគុណដល់យុវជនខ្មែរមួយរូបដែលតែងតែជួយយកអាសា និងសម្រួលជាមួយម្ចាស់រថយន្ដនូវសំណងនៃការខូចខាត។
កិច្ចសំខាន់មួយគឺលោក តារារិទ្ធិ យកកង់ទៅជួសជុល ដែលអរគុណដល់ជាងកង់ជនជាតិឡាវមានជំនាញក្នុងការតោន និងបាញ់ថ្នាំឡើងវិញ ក៏ដូចជា ត្រួតពិនិត្យប្រព័ន្ធសុវត្ថិភាព។
លោកបានបញ្ជាក់ថា៖ «កំហុសឆ្គងមួយនេះបានដាស់តឿនខ្ញុំឱ្យមានការប្រុងប្រយ័ត្នជាងមុន ដោយមិនខំជិះកង់ទាំងស្មារតីងងុយដេកនេះទៀតទេ»។
ឆ្លៀតពេលវេលាសម្រាកព្យាបាលរបួស និងជួសជុលនេះ លោក តារារិទ្ធិ បានជួបប្រជាពលរដ្ឋខ្មែរក្នុងក្រុង ក៏ដូចជាខេត្ដជុំវិញ ដោយពួកគេបានចូលរួមបរិច្ចាគថវិកាជួយដល់មន្ទីរកុមារអង្គរផងដែរ។
![](https://pppkhmer.sgp1.cdn.digitaloceanspaces.com/image/main/20247/3_7_2024_449715298_992400936005150_3173479649276892977_n.jpg)
លោក ទីវ តារារិទ្ធិ នៅមុខស្ថានទូតព្រះរាជាណាចក្រកម្ពុជាក្នុងក្រុងវៀងចន្ទន៍ ប្រទេសឡាវ។ សហការី
លោកបានសរសេរនៅលើទំព័រហ្វេសប៊ុកថា តាមរយៈបេសកកម្មជិះកង់ដើម្បីកុមារកម្ពុជា តំណាងឱ្យយុវជនខ្មែរជិះកង់ឆ្លងកាត់តាមប្រទេសឡាវ លោក តារារិទ្ធិ បានជួបសម្ដែងការគួរសម ឯកអគ្គរាជទូតខ្មែរប្រចាំនៅរដ្ឋធានី វៀងចន្ទន៍។
លោក តារារិទ្ធិ កំពុងតែបង្កើតប្រវត្ដិសាស្ដ្រមួយគឺការធ្វើដំណើររយៈពេលមួយឆ្នាំ ជិះកង់ចម្ងាយ ២ម៉ឺនគីឡូម៉ែត្រពីប្រទេសកម្ពុជាទៅកាន់ទ្វីបអឺរ៉ុប។
បេសកកម្មដ៏មានមហិច្ឆតានេះ គ្រោងនឹងចាប់ផ្តើមនៅថ្ងៃទី៩ ខែមិថុនា ក្នុងគោលបំណងរៃអង្គាសប្រាក់ចំនួន ២៥ម៉ឺនដុល្លារអាមេរិក ដល់មន្ទីរពេទ្យកុមារអង្គរ (AHC) ដើម្បីអបអរសាទរខួបលើកទី ២៥ របស់មន្ទីរពេទ្យសម្រាប់ជួយដល់កុមារ។
ការជិះកង់របស់យុវជនរូបនេះ នឹងធ្វើដំណើរឆ្លងកាត់ ២៥ប្រទេស ដោយបញ្ជាក់ពីការប្តេជ្ញាចិត្តក្នុងការរៃអង្គាសប្រាក់ដល់កុមារកម្ពុជាដែលប្រឈមនឹងជំងឺធ្ងន់ធ្ងរ៕