![](https://pppkhmer.sgp1.digitaloceanspaces.com/image/main/20248/12_8_2024_vannda_at_closing_olympic.jpg)
លោក វណ្ណដា សម្ដែងនៅក្នុងកម្មវិធីបិទព្រឹត្ដិការណ៍កីឡាអូឡាំពិកទីក្រុងប៉ារីស ប្រទេសបារាំង ថ្ងៃទី ១១ ខែសីហា ឆ្នាំ២០២៤ និងឈុតសម្លៀកបំពាក់ច្នៃពីផាមួងខ្មែរ។ រូបសហការី
ភ្នំពេញ៖ នៅក្នុងពិធីបិទកីឡាអូឡាំពិកទីក្រុងប៉ារីសឆ្នាំ២០២៤ តារាចម្រៀងរ៉េបកម្ពុជា វណ្ណដា បានបង្កើតប្រវត្ដិសាស្ដ្រសម្រាប់ប្រទេសកម្ពុជាក្នុងការចូលរួមសម្ដែងនៅលើឆាកដោយជ្រើសរើសបទចម្រៀង «Time to Rise»។
បទចម្រៀងដែលទទួលបានការសាទរជាអន្តរជាតិ គួបនឹងសម្លៀកបំពាក់ច្នៃពីផាមួងនៃវប្បធម៌ខ្មែរ បានអង្រួនអារម្មណ៍មហាជនទូទាំងពិភពលោកឱ្យបានស្ដាប់នូវសូរ្យសៀងចាប៉ីបុរាណខ្មែរជាមួយនឹងចង្វាក់រ៉េបទំនើប។
កញ្ញា ណុប ដាណេ ជាម្ចាស់សម្អាងការ ជាអ្នកច្នៃម៉ូដសម្រាប់តារារ៉េប វណ្ណដា ក្នុងព្រឹត្ដិការណ៍ប្រវត្ដិសាស្ដ្រ ដែលសិល្បករកម្ពុជាបានចូលរួមសម្ដែងក្នុងកម្មវិធីកីឡាអូឡាំពិកនៅទីក្រុងប៉ារីសប្រទេសបារាំង។
កញ្ញា ដាណេ បានប្រាប់ភ្នំពេញប៉ុស្ដិ៍ថា៖ «ខ្ញុំច្នៃម៉ូដសម្លៀកបំពាក់ដោយប្រើផាមួងនេះឱ្យ វណ្ណដា ទៅតាមការចង់បានរបស់គាត់។ កាលពីនៅស៊ីហ្គេម ដែលកម្ពុជាធ្វើជាម្ចាស់ផ្ទះ វណ្ណដា គ្រងឈុតហូល ហើយព្រឹត្ដិការណ៍នៅទីក្រុងប៉ារីសនេះ យើងចង់ផ្លាស់ប្ដូរមកប្រើផាមួងសូត្រសុទ្ធ តែរំលេចជរជើង»។
ខណៈពិធីនេះបានបង្វែរការយកចិត្តទុកដាក់ចំពោះព្រឹត្តិការណ៍កីឡាអូឡាំពិកនៅទីក្រុង Los Angeles ២០២៨ នាពេលខាងមុខ ការសម្តែងរបស់ វណ្ណដា មានភាពលេចធ្លោក្នុងចំណោមតារាល្បីៗជាច្រើនរូបទៀត រួមទាំង H.E.R. ការលេងភ្លេងជាតិរបស់សហរដ្ឋអាមេរិកត្រៀមធ្វើជាម្ចាស់ផ្ទះ តារាចម្រៀង Snoop Dogg, Billie Eilish និង Red Hot Chili Peppers។
យោងតាមសារព័ត៌មាន NBC News ក្រុមតន្ត្រីបារាំង Phoenix បានភាពលេចធ្លោរជាងគេក្នុងការអបអរសាទរសិល្បៈបារាំងជាមួយការសម្តែង «Lisztomania» និងការសម្ដែងផ្សេងៗច្រើនទៀត។ នៅមានសិល្បករ Ezra Koenig នៃក្រុមតន្ដ្រី Vampire Weekend និង វណ្ណដា កាន់តែបន្ថែមភាពទាក់ទាញជាសកលដល់ព្រឹត្តិការណ៍លាគ្នានេះ»។
វណ្ណដា ស្លៀកសម្លៀកបំពាក់ទាន់សម័យ ច្នៃពីផាមួងដែលស័ក្តិសមជាមរតកខ្មែរ ធ្វើឱ្យទស្សនិកជនចាប់អារម្មណ៍ ទាំងទឹកដមសម្លេង និងរូបរាងដ៏ទាក់ទាញ។
ការស្លៀកពាក់របស់តារារ៉េបរូបនេះ ជានិមិត្តរូបនៃការបញ្ចូលគ្នារវាងអតីតកាល និងបច្ចុប្បន្នរបស់ប្រទេសកម្ពុជា ដែលនាំមកនូវភាពសម្បូរបែបនៃវប្បធម៌ទៅកាន់វេទិកាពិភពលោក។
![](https://pppkhmer.sgp1.cdn.digitaloceanspaces.com/image/main/20248/12_8_2024_untitled_2.jpg)
តារារ៉េបកម្ពុជា វណ្ណដា និងកញ្ញា ណុប ដាណេ ជាអ្នកសម្អាងកាយ និងឌីហ្សាញសម្លៀកបំពាក់។ រូបសហការី
ស្ថានទូតបារាំងប្រទេសក្រុងភ្នំពេញ ក៏បានសម្ដែងការអបអរសាទរចំពោះវត្ដមានរបស់តារារ៉េបកម្ពុជាក្នុងព្រឹត្ដិការណ៍បិទកីឡាអូឡាំពិកនេះផងដែរ។
យោងតាមទំព័រហ្វេសប៊ុករបស់ស្ថានទូតបារាំងបានឱ្យដឹងថា៖ «អស្ចារ្យណាស់ Vann Da - វណ្ណដា! តារារ៉េបកម្ពុជាដ៏ល្បីឈ្មោះបានច្រៀងនៅចំពោះមុខពិភពលោកកាលពីយប់មិញក្នុងពិធីបិទកីឡាអូឡំាពិកប៉ារីស៍២០២៤»។
ស្ថានទូតបារាំងបានបន្ដថា៖ «មុនពេលកម្ពុជាដណ្តើមបានមេដាយអូឡាំពិកលើកដំបូងរបស់ខ្លួននៅថ្ងៃណាមួយ ឈ្មោះរបស់ វណ្ណដា នឹងចារឹកទុកក្នុងប្រវត្តិសាស្រ្តនៃការចូលរួមរបស់កម្ពុជាក្នុងព្រឹត្តិការណ៍កីឡាអូឡាំពិក»។
លីហ្សា ជានិស្សិតខ្មែរដែលកំពុងសិក្សានៅទីក្រុងប៉ារីស មិនអាចទប់អារម្មណ៍រំភើបរបស់ខ្លួនបានទេ ខណៈដែលនាងបានចូលរួមក្នុងពិធីនៅ Stade De France។ ជាមួយនឹងទូរស័ព្ទនៅក្នុងដៃ នាងបានឆ្លៀតផ្ដិតយកសកម្មភាពនៅលើឆាកតន្ដ្រីដ៏កក្រើកនេះចែកជូនប្រជាជនកម្ពុជានៅលើបណ្ដាញសង្គមផងដែរ។
ខាងក្រោមវីដេអូ លីហ្សាបានសរសេរថា៖ «Omgggg, វណ្ណដា កំពុងតែច្រៀងនៅក្នុងកម្មវិធីអូឡាំពិកក្រុងប៉ារីស ឆ្នាំ២០២៤។ ខ្ញុំពិតជាមានមោទនភាពណាស់ដែលបានស្ដាប់ឮចម្រៀងខ្មែរនៅលើឆាកដ៏អស្ចារ្យនេះ»។
បទចម្រៀង «Time to Rise» ដែលមានការចូលទស្សនាច្រើនជាង ១២៣ លានដងនៅលើ YouTube។
យោងតាមកាសែតបារាំង Le Parisien បានឱ្យដឹងថា៖ «ក្នុងអំឡុងពេលបង្ហាញមុខនៅលើឆាករបស់តារាចម្រៀងរ៉េបកម្ពុជា វណ្ណដា នៅថ្ងៃអាទិត្យនេះ ក្នុងពិធីបិទកីឡាអូឡាំពិក ច្បាស់ណាស់ថា ប្រជាជនបារាំងភាគច្រើនមិនធ្លាប់បានឮពីសិល្បករដែលមានដើមកំណើតមកពីប្រទេសកម្ពុជា។ តារារ៉េបវ័យ២៧ឆ្នាំរូបនេះច្រៀងបទចម្រៀង «Time to Rise» ជាពីរភាសាគឺភាសាអង់គ្លេស និងភាសាខ្មែរ»។
ចំពោះវត្ដមាននៃការចូលរួមរបស់តារាចម្រៀង វណ្ណដា យោងតាមលក្ខខណ្ឌ និងដំណើរការក្នុងការជ្រើសរើសសិល្បករទៅសម្ដែងនៅព្រឹត្តិការណ៍កីឡាអូឡាំពិកកន្លងមក បេក្ខភាពតារាចម្រៀងដែលត្រូវបានពិចារណាត្រូវមានភាពតំណាងឱ្យវប្បធម៌ជាតិសាសន៍ខ្លួន ប្រភេទតន្ត្រី សាវតាចម្រៀងដែលអាចទាក់ទាញអ្នកស្ដាប់ជាសកល។
ចំណុចបន្ទាប់តារាចម្រៀងនោះមានការទទួលស្គាល់ជាអន្តរជាតិ ដោយមានការផ្សព្វផ្សាយទូលំទូលាយ។ បទចម្រៀងត្រូវមានភាពស៊ីសង្វាក់គ្នានឹងប្រធានបទនៃការសម្ដែងក្នុងព្រឹត្តិការណ៍បិទ។
តារាចម្រៀងនោះចាំបាច់ត្រូវមានឆន្ទៈ និងធានាឱ្យបាននូវវត្តមានក្នុងការឡើងឆាក ខណៈដែលការចរចាចុះកុងត្រាអាចមានភាពស្មុគស្មាញជាមួយតារាចម្រៀងដែលត្រូវបានគេចាត់ទុកថា មានឈ្មោះបោះសម្លេង។
ចំពោះតំណាក់កាលក្នុងការជ្រើសរើស ត្រូវចាប់ផ្ដើមពីគណៈកម្មាធិការជាអ្នកនិពន្ធតន្ត្រីក្នុងឧស្សាហកម្មអាជីព រួមជាមួយអ្នករៀបចំព្រឹត្តិការណ៍អូឡាំពិក និងអ្នកជំនាញផ្នែកវប្បធម៌។ តារាចម្រៀងត្រូវបានស្រាវជ្រាវ និងកំណត់ថាតើ បេក្ខភាពនោះអាចបំពេញតាមលក្ខខណ្ឌដូចដែលបានរៀបរាប់ខាងលើដែរឬទេ។
ក្រោយពីជាប់ក្នុងបញ្ជីសម្រាំង ការចរចា និងកុងត្រាត្រូវបានធ្វើឡើងជាមួយទីភ្នាក់ងារតំណាងដើម្បីធានាវត្តមានពុំអាក់ខាន។ ដំណាក់កាលបន្ទាប់ ព័ត៌មានលម្អិតពីផែនការសម្ដែង ការរចនាឆាក ប្រព័ន្ធពន្លឺ និងសម្លេងត្រូវបានផ្ដល់ជូនដល់តារាចម្រៀងអន្តរជាតិដែលត្រូវបានជ្រើសរើស។
ក្នុងចំណោមនោះ វណ្ណដា បានបំពេញលក្ខខណ្ឌយ៉ាងពេញលេញជាមួយកេរ្តិ៍ឈ្មោះល្បីល្បាញនៅអាស៊ីអាគ្នេយ៍ ដោយមានចំនួន Subscriber ៤ លាននាក់នៅលើយូធូបរបស់លោក៕