ការដាក់តាំងបង្ហាញសៀវភៅក្នុងកម្មវិធីសប្បុរសធម៌«២៥ថ្ងៃ ២៥ខេត្តក្រុង» របស់យុទ្ធនាការសៀវភៅមួយ សហគមន៍មួយ (OBOC)។ រូបថត OBOC
ភ្នំពេញៈ យុទ្ធនាការសៀវភៅមួយ សហគមន៍មួយ (OBOC) បាននឹងកំពុងតែធ្វើបេសកម្មសប្បុរសធម៌«២៥ថ្ងៃ ២៥ខេត្តក្រុង»ដើម្បីលើកកម្ពស់និងជំរុញវប្បធម៌ការអាននៅតាមសហគមន៍ តាមរយៈការបន្តចែកសៀវភៅជាង ២ម៉ឺនក្បាល។
បេសកម្មនេះចាប់ផ្តើមពីថ្ងៃទី១០ ខែសីហា ដល់ថ្ងៃទី១០ ខែកញ្ញា ឆ្នាំ២០២៤នេះ ដោយធ្វើការបែងចែកទិសដៅខុសៗគ្នា ដើម្បីចែកសៀវភៅចំនួន ២៥ ០០០ក្បាលទៅដល់សហគមន៍នានាទូទាំងប្រទេស ជាពិសេសទៅដល់ក្រុមយុវជន ដែលមានអាយុចាប់ពី១៥ឆ្នាំ ទៅដល់៣៥ឆ្នាំ។ នេះបើយោងតាម លោក សុខ ឡាក់ សហស្ថាបនិកយុទ្ធនាការសៀវភៅមួយ សហគមន៍មួយ។
លោកបានឱ្យដឹងពីកន្លែងធ្វើបេសកម្មក្នុងខេត្តប៉ៃលិនមកថា ក្នុងអំឡុងពេលបេសកម្មក៏រួមមានទាំងការធ្វើសិក្ខាសាលា ឬការផ្សព្វផ្សាយពីការត្រៀមខ្លួនក្នុងការចូលរួមប្រកួតជើងឯកអំណាន ការជំរុញឱ្យមានអ្នកអាន២ ៥០០នាក់ និងអ្នកអានឆ្នើម២៥០ក្នុង ២៥ខេត្តក្រុង។ ក្រៅពីនោះក៏មានបេសកម្ម អភិវឌ្ឍបណ្ណាល័យស ហគមន៍៥០ក្នុង២៥ខេត្តក្រុងផងដែរ។
លោកបញ្ជាក់ថា៖ «សៀវភៅហ្នឹងមានច្រើនប្រភេទ ដែលចម្រុះគ្នា ដូចជា សៀវភៅប្រវត្តិសាស្ត្រ ប្រលោមលោក អក្សរសិល្បិ៍ អភិវឌ្ឍខ្លួន ភាសាអង់គ្លេស ភាសាខ្មែរ និងយុទ្ធសាស្រ្ត...១ខេត្តយើងគម្រោងចែក១ពាន់ក្បាល។ ហើយយើងព្យាយាមជួបក្រុមយុវជន»។
បេសកម្មធ្វើឡើងនៅតាមសាលារៀន បណ្តាល័យសហគមន៍ និងតាមទីសាធារណៈជាដើម ដែលអាស្រ័យទៅលើដៃគូសហការ។
បេសកកម្មនេះរំពឹងថា នឹងមានអ្នកចូលរួមប្រហែល ២ ៥០០នាក់ ដែលរួមមានយុវជន អ្នកនិពន្ធ សហគ្រិន និងដៃគូសហការលើផ្លូវដ៏វែងឆ្ងាយប្រមាណ ៣ ០០០ គីឡូម៉ែត្រជុំវិញប្រទេស។
លោកស្រី ហ៊ាង វត្ថី សហស្ថាបនិកយុទ្ធនាការសៀវភៅមួយសហគមន៍មួយសង្ឃឹមថា បេសកកម្មនេះ នឹងរួមចំណែក ជំរុញវប្បធម៌ការអានតាមសហគមន៍ និងពង្រឹងបន្ថែមនូវធនធានមនុស្សនៅក្នុងសង្គមកម្ពុជាឱ្យកាន់តែប្រសើរជាងមុន។
លោកស្រីរំពឹងដូច្នេះថា៖ «ក្រោយចប់សកម្មភាពជំរុញការអាន និង បណ្តុះវប្បធម៌ថ្លៃថ្នូររបស់យើងក្នុងពេលនេះ វានឹងមានភាពសកម្ម និងឯករាជ្យក្នុងការជំរុញឱ្យសហគមន៍ទាំងនោះអាចរៀបចំសកម្មភាពនានាបានដោយខ្លួនឯងនៅសហគមន៍ពួកគេ ជាពិសេសឱ្យយុវជនកាន់តែស្រឡាញ់អក្សរសាស្ត្រ អក្សរសិល្ប៍ និងវប្បធម៌ខ្មែរ»។
លោក ហុក សុទ្ធិ ប្រធានសមាគមបណ្ណាល័យកម្ពុជា និងជានាយកអង្គការស៊ីប៉ា (Sipar) បានលើកឡើងក្នុងពិធីបើកបេសកម្មនេះនាថ្ងៃទី៩ ខែសីហាថា សៀវភៅមួយសហគមន៍មួយ ជាសកម្មភាពមួយល្អ និងជាគំរូរបស់យុវជនកម្ពុជា ដែលព្យាយាមយកសៀវភៅទៅដល់ជនបទ។
លោកបញ្ជាក់ថា៖ «បញ្ហានៅកម្ពុជាយើង គឺសៀវភៅមិនបានទៅដល់ដៃមនុស្សគ្រប់ស្រទាប់វណ្ណៈនៅគ្រប់ទិសទីទេ ហើយគំនិតរបស់ប្អូនៗ ពាក់ព័ន្ធនឹងការធ្វើយ៉ាងណាយកសៀវភៅឱ្យបានទៅដល់សហគមន៍ ឬទីជនបទ ទោះក្នុងរូបភាពណាក៏ដោយ គឺជាសកម្មភាពមួយល្អ ហើយជាការចូលរួមចំណែកយ៉ាងសកម្មមួយក្នុងការអភិវឌ្ឍការអាន និងការលើកស្ទួយចំណេះដឹងនៅកម្ពុជា»។
ចាប់ពីឆ្នាំ ២០២២ រហូតដល់ពេលបច្ចុប្បន្ននេះ យុទ្ធនាការសៀវភៅមួយសហគមន៍មួយ បានចូលរួមគាំទ្របណ្ណាល័យសហគមន៍ជាង ៤០កន្លែង ខណៈការចែកសៀវភៅបានប្រហែល ១ម៉ឺនក្បាលនៅទូទាំងប្រទេស។
យុទ្ធនាការសៀវភៅមួយសហគមន៍មួយគឺជាយុទ្ធនាការមួយដែលមានសកម្មភាពបណ្តុះវប្បធម៌អាន និងការរៀនសូត្រឯករាជ្យតាមរយៈកម្មវិធីមួយចំនួនដូចជា កម្មវិធីប្រកួតអំណាន ២៥ខេត្តក្រុង និងជើងឯកបំបែកជើងឯកនៅរាជធានីភ្នំពេញ, កម្មវិធីចែកសៀវភៅ, កម្មវិធីបណ្ណាល័យចល័ត, កម្មវិធីអភិវឌ្ឍបណ្ណាល័យនិង សិក្ខាសាលាចែករំលែកចំណេះដឹង៕
