ភ្នំពេញ៖ ក្រោយវត្ដមានតារាចម្រៀងរ៉េប វណ្ណដា ឬម៉ាន់ វណ្ណដា ក្នុងព្រឹត្ដិការណ៍បិទការប្រកួតកីឡាអូឡាំពិកក្រុងប៉ារីស ឆ្នាំ ២០២៤ កាលពីថ្ងៃទី ១២ ខែសីហាកន្លងមក ធ្វើឱ្យប្រជាជនខ្មែរ ក៏ដូចជាប្រទេសជិតខាងមានការភ្ញាក់ផ្អើលយ៉ាងខ្លាំង ខណៈមហាជនបន្ដជជែកថាតើ វណ្ណដា ច្រៀងតំណាងឲ្យប្រទេសកម្ពុជា ឬតំណាងអាស៊ីទាំងមូល។
នៅពេលនេះ លោក វណ្ណដា បានសរសេរនៅលើបណ្ដាញសង្គម Facebook របស់លោកនៅថ្ងៃទី ១៣ សីហានេះ ដោយលោកពិតជាច្រៀងតំណាងប្រទេសរបស់ខ្លួន។
លោកបានសរសេរដោយភ្ជាប់ជាមួយសារថ្លែងអំណរគុណចំពោះការចែករំលែក ការអបអររបស់ថ្នាក់ដឹកនាំថា៖ «ជាដំបូង សូមគោរពអរគុណសម្តេចមហាបវរធិបតី ហ៊ុន ម៉ាណែត។ ក្នុងនាមជាសិល្បករមួយរូបតំណាងឱ្យផលិតកម្ម បារមី និងក្រុមការងារទាំងអស់ ពួកយើងពិតជាមានមោទកភាពបំផុត ដែលត្រូវបានអញ្ជើញជាកិត្តិយសទៅសម្តែងតំណាងប្រទេសកម្ពុជានៅលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ២០២៤ នៅទីក្រុងប៉ារីស ប្រទេសបារាំង ហើយពួកយើងនឹងបន្តខំប្រឹងប្រែង ដើម្បីនាំយកសំឡេងតន្ត្រីខ្មែរឱ្យកាន់តែល្បីរន្ទឺនៅលើឆាកអន្តរជាតិ»។
ថ្នាក់ដឹកនាំកំពូលៗ ដូចជា លោក ហ៊ុន សែន ប្រធានព្រឹទ្ធសភា និងលោក ហ៊ុន ម៉ាណែត នាយករដ្ឋមន្ដ្រីកម្ពុជា ក៏ដូចជា រដ្ឋមន្ដ្រី ស្ថាប័នរដ្ឋ និងឯកជនជាច្រើនក៏បានសរសេរសារលើបណ្ដាញសង្គម អបអរសាទរ និងកោតសរសើរចំពោះការលើកមុខមាត់ជាតិរបស់តារាចម្រៀងរ៉េប វណ្ណដា។
វណ្ណដា នឹងមកដល់ប្រទេសកម្ពុជាវិញនៅថ្ងៃស្អែកព្រឹក ថ្ងៃទី ១៤ ខែសីហា ដែលនឹងមានការស្វាគមន៍ពីសំណាក់មន្ដ្រីជាន់ខ្ពស់កម្ពុជា រួមទាំងអ្នកគាំទ្រជាច្រើននាក់។
គួរបញ្ជាក់ថា ទាំងផលិតកម្មបារមី និង វណ្ណដា ខ្លួនឯងក៏៏មិនបានបង្ហើប ឬបង្ហាញព័ត៌មានអ្វីទាំងអស់ ទាំងមុននិងក្រោយ ដែលតារារ៉ាបរូបនេះ បានឡើងច្រៀងដ៏គួរឱ្យភ្ញាក់ផ្អើលនោះ។
អតីតកីឡាការិនីហែលទឹក ហែមថុន វិទីនី ដែលបច្ចុប្បន្នជាគ្រូបង្វឹក ខណៈកម្ពុជាមានកីឡាករតែ ៣ នាក់គត់ ដែលបានចូលរួមប្រកួតកីឡាអូឡាំពិក បានបង្ហាញអារម្មណ៍រំភើបជាមួយការថតវីដេអូរបស់ខ្លួនឯង ពេលឃើញ វណ្ណដា ច្រៀងនៅពេលបិទព្រឹត្ដិការណ៍កីឡាអូឡាំពិកនោះ។
អតីតកីឡាការិនីបាននិយាយក្នុងវីដេអូនោះថា៖ «ខ្ញុំពិតជារំភើប និងគាំង ១៥នាទី។ យើងជាកីឡាករ និងគ្រូបង្វឹក ៨នាក់នាំគ្នាមើលមុខគ្នាដោយស្រឡាំងកាំង»។
ទាំងក្រុមចម្រៀង K-pop ដ៏ល្បីល្បាញរបស់ប្រទេសកូរ៉េខាងត្បួង BTS និងកញ្ញា Lisa របស់ក្រុមតារាស្រីកូរ៉េខាងត្បូង Blank Pink គ្មានមុខនៅក្នុងព្រឹត្ដិការណ៍ដ៏អស្ចារ្យនេះទេ។ តារារ៉េបកម្ពុជា វណ្ណដា បែរជាបានសម្តែងក្នុងពិធីបិទកីឡាអូឡាំពិកក្រុងប៉ារីស។ នេះបើយោងតាមការចុះផ្សាយរបស់គេហទំព័ររបស់ថៃ Pantip។
ចំពោះការផ្សព្វផ្សាយសិល្បៈ និងវប្បធម៌ខ្មែរនៅលើឆាកអន្ដរជាតិនេះ វណ្ណដា ធ្លាប់បានផ្ដល់បទសម្ភាសជាមួយ Bandwagon កាលពីឆ្នាំ២០២១ ដោយបាននិយាយថា មនុស្សភាគច្រើនមិនស្គាល់ថា អ្វីទៅជាខ្មែរ ឬមកពីណាផង។ នៅពេលពួកគេបានស្ដាប់តន្ដ្រីរបស់ខ្មែរ និងបានឃើញវប្បធម៌របស់ខ្មែរ ភាគច្រើនពួកគេនិយាយថា សិល្បៈនោះមកពីអាស៊ី តែតាមពិតវាជាវប្បធម៌ដើមរបស់ខ្មែរ៕
