ភ្នំពេញ៖ អមដោយដំណើរតារារ៉េប វណ្ណដា ពេលត្រឡប់មកមាតុប្រទេសវិញ កញ្ញា ឡូរ៉ា ម៉ម បានបង្ហាញមនោសញ្ចតនា និងអារម្មណ៍រំភើបក្ដុកក្ដួលចំពោះការគាំទ្ររបស់មហាជន និងក្ដីរំភើបរីករាយដែលសិល្បករខ្មែរបានបង្ហាញវត្ដមាននៅលើឆាកអន្ដរជាតិក្នុងព្រឹត្ដិការណ៍បិទកីឡាអូឡាំពិកក្រុងប៉ារីស កាលពីថ្ងៃទី ១១ ខែសីហាកន្លងទៅ។
នៅព្រលានយន្ដហោះភ្នំពេញ នាព្រឹកថ្ងៃទី១៤ ខែសីហានេះ កញ្ញា ឡូរ៉ា ម៉ម ម្ចាស់ផលិតកម្មបារមី បាននិយាយទៅអ្នកគាំទ្រ និងអ្នកសារព័ត៌មានថា៖ «ខ្ញុំមានមោនទភាពខ្លាំងមែនទែនសម្រាប់ផលិតកម្មបារមី សម្រាប់ខ្ញុំ និងសម្រាប់ វណ្ណដា។ អ្វីដែលខ្ញុំសប្បាយចិត្ដគឺកេរតំណែលរបស់ខ្មែរ ពេលវត្ដមានរបស់គាត់នៅលើឆាកកម្មវិធីនោះ»។
ជាមួយអារម្មណ៍រំភើបរំជើបរំជួល កញ្ញា ឡូរ៉ា បានបន្ដថា៖ «ថ្ងៃនេះជាថ្ងៃជោគជ័យខ្លាំង ហើយខ្ញុំសង្ឃឹមថា ខ្មែរយើងនឹងមើលរូបភាពរបស់ វណ្ណដា ហើយជឿជាក់លើខ្លួនថា យើងធ្វើបាន»។
កញ្ញាបានថ្លែងអំណរគុណដល់ថ្នាក់ដឹកនាំ ក្រុមការងារ និងអ្នកគាំទ្រទាំងអស់។ កញ្ញាសារភាពថា ខ្មែរមានតន្ដ្រីល្អ និងវប្បធម៌ល្អផូរផង់ តែមិននឹកស្មានថា សិល្បករខ្មែរអាចមានវត្ដមាននៅក្នុងព្រឹត្ដិការណ៍បិទកីឡាអូឡាំពិកនេះឡើយ។
កញ្ញាបានបញ្ជាក់ថា៖ «ខ្ញុំមិនដែលគិតថា វាអាចទៅរួចទេ ហើយខ្ញុំគិតថា ក្ដីសុបិនរបស់យើងកាន់តែរីកធំទៅៗ។ សម្រាប់ខ្ញុំ ខ្ញុំសប្បាយជាពិសេស ពីព្រោះវាជាថ្ងៃខួបកំណើតរបស់ម៉ាក់ ដែលគាត់ស្រឡាញ់សិល្បៈខ្មែរយើងមែនទែន»។
ក្នុងការវិលត្រឡប់របស់សិល្បកររ៉េបរូបនេះ មានវត្ដមានស្វាគមន៍ពីសំណាក់លោក ថោង ខុន ជាប្រធានគណៈកម្មាធិការជាតិអូឡាំពិកកម្ពុជា (NOCC) និងលោក វ៉ាត់ ចំរើន អគ្គលេខាធិការ NOCC នៅអាកាសយានដ្ឋានអន្តរជាតិភ្នំពេញ៕