ភ្នំពេញ៖ តារាចម្រៀងរ៉េបកម្ពុជា វណ្ណដា ត្រូវបានទទួលស្វាគមន៍យ៉ាងកក់ក្ដៅនៅព្រឹកនេះ ខណៈដែលលោកបានត្រឡប់មកមាតុប្រទេសវិញ បន្ទាប់ពីការសម្តែងក្នុងពិធីបិទអូឡាំពិកទីក្រុងប៉ារីសកាលពីថ្ងៃទី ១១ ខែសីហា ឆ្នាំ ២០២៤។
លោក ថោង ខុន ជាប្រធានគណៈកម្មាធិការជាតិអូឡាំពិកកម្ពុជា (NOCC) និងលោក វ៉ាត់ ចំរើន អគ្គលេខាធិការ NOCC បានស្វាគមន៍សិល្បករនៅអាកាសយានដ្ឋានអន្តរជាតិភ្នំពេញ។
លោកបានថ្លែងប្រាប់អ្នកសារព័ត៌មាននៅអាកាសយានដ្ឋានអន្ដរជាតិភ្នំពេញថា៖ «ក្នុងនាមជាម្ចាស់ផ្ទះ បារាំងបានផ្ដល់កិត្ដិយសពីរដ៏ធំសម្រាប់កម្ពុជាទោះបីជាអត្ដពលិកកម្ពុជាមានចំនួនតិច តែផ្ដល់ទូកមួយយ៉ាងស្អាតសម្រាប់ពិធីហែក្បូន ហើយវត្ដមានតារារ៉េបកម្ពុជា គឺ វណ្ណដា ក្នុងព្រឹត្ដិការណ៍បិទកីឡាអូឡាំពិក គឺជាមហាកិត្ដិយសមួយសម្រាប់កម្ពុជា ក្នុងពេលកម្ពុជាមិនទាន់មានឧស្សាហកម្មតន្ដ្រីធំទូលំទូលាយ»។
លោក ខុន បានបន្ដថា នេះគឺជាគោលនយោបាយកីឡាអូឡាំពិកអន្ដរជាតិដែលជួយលើកទឹកចិត្ដដល់ប្រទេសកំពុងមានការអភិវឌ្ឍ។
លោកបានបន្ថែមថា ក្នុងនាមជាគណកម្មការកីឡាអូឡាំពិកកម្ពុជា លោកបានថ្លែងអំណរគុណដល់លោក វណ្ណដា ដែលបានផ្ដល់កិត្ដិយសមហាធំធេងដល់ប្រទេសកម្ពុជា ខណៈ វណ្ណដា តែងតែចូលរួមព្រឹត្ដិការណ៍កីឡាផ្សេងៗទាំងជាតិ និងអន្ដរជាតិ។
លោក ខុន បានថ្លែងថា៖ «វត្ដមានរបស់ក្មួយ វណ្ណដា ក្នុងព្រឹត្ដិការណ៍បិទកីឡាអូឡាំពិកនេះ បានធ្វើឱ្យគេចាប់អារម្មណ៍ខ្លាំងចំពោះចលនាកីឡាអូឡាំពិកពិភពលោក ជាពិសេស ចលនាកីឡាអូឡាំពិកកម្ពុជាយើង។ នេះគឺជាចលករមួយយ៉ាងធំសម្រាប់ឱ្យយុវជនយើង ជាពិសេស សិល្បៈរ៉េបជាចំណង់ចំណូលចិត្ដរបស់យុវជនបច្ចុប្បន្ន ខណៈកីឡាអូឡាំពិកនៅបារាំងក៏មានការប្រកួតប្រភេទកីឡា Break Dance»។
ចំពោះចំណាប់អារម្មណ៍ផ្ទាល់របស់ វណ្ណដា លោកបានឱ្យដឹងថា លោកមានមោទនភាពដែលបាននាំយកទង់ជាតិខ្មែរ និងភាសាទៅលើឆាកអន្ដរជាតិ និងឱកាសនៃការសម្ដែងក្នុងព្រឹត្ដិការណ៍កីឡាអូឡាំពិករដូវក្ដៅ។
លោកបានបញ្ជាក់ថា៖ «ខ្ញុំអត់ដឹងថា ព្រឹត្ដិការណ៍នេះ ប៉ុន្មានឆ្នាំមានម្ដងនោះទេ ពីព្រោះនេះជាឱកាសមួយជីវិត។ វាអាច ពេលខ្លះ មានតែម្ដងទេ។ អ៊ីចឹង វាគឺមោទនភាពមែនទែនសម្រាប់ខ្ញុំផ្ទាល់ សម្រាប់ប្រជាជាតិ ប្រទេសយើង។ ខ្ញុំគិតថា នេះគឺជាភាពឈ្នះដ៏ធំមួយ ហើយខ្ញុំសង្ឃឹមថា នឹងមានអ្វី Surprise បន្ដទៀត»។
វណ្ណដា បានថ្លែងពីអារម្មណ៍សប្បាយ និងបានអរគុណដល់ថ្នាក់ដឹកនាំ ក៏ដូចជា លោក ថោង ខុន ដែលមកទទួលស្វាគមន៍តារារ៉េបរូបនេះដោយផ្ទាល់។
ជាមួយការចាប់កាន់ក្បាលមេក្រូច្រៀងបទ «Time to Rise» ដែលលោកសម្រេចចិត្ដលើកយកបទចម្រៀងនេះដោយខ្លួនឯង ខណៈព្រឹទ្ធាចារ្យដៃគូរបស់លោកទើបលាចាកលោក វណ្ណដា បានថ្លែងថា បទ «Time to Rise» ពិតជាល្អឥតខ្ចោះសម្រាប់ព្រឹត្ដិការណ៍កីឡាអូឡាំពិកនេះ។
លោកបានឱ្យដឹងថា៖ «នេះគឺជារឿងដ៏ធំមួយដែលខ្ញុំធ្វើសម្រាប់លោកគ្រូ។ មុននឹង perform ខ្ញុំបាននិយាយ [ឧទ្ទិស] ប្រាប់គាត់ថា ចៅបានធ្វើរឿងមួយទៀតហើយសម្រាបលោកគ្រូ ហើយខ្ញុំនាំយកវត្ថុអនុស្សាវរិយជូនគាត់។ ខ្ញុំសង្ឃឹមថា លោកគ្រូនឹងសប្បាយចិត្ដជាមួយអ្វីដែលខ្ញុំបានធ្វើលើរឿងមួយនេះ»។
លោកក៏បានក្ដីសប្បាយរីករាយនៅពេលកាសែតបរទេសចង់ដឹងអំពីតារារ៉េបកម្ពុជា ដោយលោកលើកឡើងថា វាជាចំណុចមួយដ៏ល្អដែលគេចង់ដឹងអំពីសិល្បៈ និងភាសាខ្មែរ។
វណ្ណដា ដែលមានឈ្មោះពិតថា ម៉ាន់ វណ្ណដា បានក្លាយជាសិល្បករដ៏មានឥទ្ធិពលមួយរូបរបស់កម្ពុជា។ ដោយស្គាល់ពីស្ទីលពិសេសចំពោះទេពកោសល្យដែលលាយបញ្ចូលតន្ត្រីបុរាណខ្មែរជាមួយនឹងការរ៉េបសហសម័យ ស្នាដៃរបស់ វណ្ណដា បានទាក់ចិត្តទស្សនិកជនទាំងក្នុង និងក្រៅប្រទេស។
បទចម្រៀងដ៏ល្បីរបស់លោក "Time to Rise" ដែលមានអ្នកចូលមើលជាង ១២៣ លានដងនៅលើយូធូប បានបង្ហាញពីភាពអស្ចារ្យ និងមោទនភាពវប្បធម៌សម្រាប់ប្រជាជនកម្ពុជា។
ការច្រៀងបទ "Time to Rise" ក្នុងអំឡុងពេលពិធីបិទអូឡាំពិកបានទាក់ទាញទស្សនិកជនទូទាំងពិភពលោក ដោយបង្ហាញពីបេតិកភណ្ឌវប្បធម៌ដ៏សម្បូរបែបរបស់កម្ពុជា និងនាំយកសំឡេងរបស់វាទៅកាន់ឆាកពិភពលោក។
នេះជាពេលវេលាប្រវត្តិសាស្ត្រមួយសម្រាប់ព្រះរាជាណាចក្រកម្ពុជា ព្រោះ វណ្ណដា បានក្លាយជាសិល្បករខ្មែរដំបូងដែលបានសម្តែងក្នុងព្រឹត្តិការណ៍ដ៏មានកិត្យានុភាពបែបនេះ។
កាលពីយប់មិញ លោកក៏បានសរសេរសារថ្លែងអំណរគុណដល់ថ្នាក់នាំដែលបានបង្ហាញការកោតសរសើរចំពោះរូបដោយបានលើកឡើងថា៖ «ជាដំបូង សូមគោរពអរគុណសម្តេចមហាបវរធិបតី ហ៊ុន ម៉ាណែត។ ក្នុងនាមជាសិល្បករមួយរូបតំណាងឱ្យផលិតកម្ម បារមី និងក្រុមការងារទាំងអស់ ពួកយើងពិតជាមានមោទកភាពបំផុត ដែលត្រូវបានអញ្ជើញជាកិត្តិយសទៅសម្តែងតំណាងប្រទេសកម្ពុជានៅលើឆាក នៃកម្មវិធីបិទការប្រកួតកីឡាអូឡាំពិករដូវក្តៅ ២០២៤ នៅទីក្រុងប៉ារីស ប្រទេសបារាំង ហើយពួកយើងនឹងបន្តខំប្រឹងប្រែង ដើម្បីនាំយកសំឡេងតន្ត្រីខ្មែរឱ្យកាន់តែល្បីរន្ទឺនៅលើឆាកអន្តរជាតិ»។
លោកក៏បានសរសេរសារដាច់ដោយឡែកមួយទៀតដោយថ្លែងអំណរគុណចំពោះលោក ហ៊ុន សែន ប្រធានព្រឹទ្ធសភាដែលបានបង្ហាញការអបអរសាទរ និងកោតសរសើរផងដែរ។
កញ្ញា ឡូរ៉ា ម៉ម ម្ចាស់ផលិតកម្មបារមី បាននិយាយទៅអ្នកគាំទ្រ និងអ្នកសារព័ត៌មានថា៖ «ខ្ញុំមានមោនទភាពខ្លាំងមែនទែនសម្រាប់ផលិតកម្មបារមី សម្រាប់ខ្ញុំ និងសម្រាប់ វណ្ណដា។ ខ្ញុំអរគុណដល់លោកគ្រូ គង់ ណៃ និងប្រពន្ធរបស់គាត់។ អ្វីដែលខ្ញុំសប្បាយចិត្ដគឺកេរតំណែលរបស់ខ្មែរ ពេលវត្ដមានរបស់គាត់នៅលើឆាកកម្មវិធីនោះ»។
ជាមួយអារម្មណ៍រំភើបរំជើបរំជួល កញ្ញា ឡូរ៉ា បានបន្ដថា៖ «ថ្ងៃនេះជាថ្ងៃជោគជ័យខ្លាំង ហើយខ្ញុំសង្ឃឹមថា ខ្មែរយើងនឹងមើលរូបភាពរបស់ វណ្ណដា ហើយជឿជាក់លើខ្លួនថា យើងធ្វើបាន»។
កញ្ញាបានថ្លែងអំណរគុណដល់ថ្នាក់ដឹកនាំ ក្រុមការងារ និងអ្នកគាំទ្រទាំងអស់។ កញ្ញាសារភាពថា ខ្មែរមានតន្ដ្រីល្អ និងវប្បធម៌ល្អផូរផង់ តែមិននឹកស្មានថា សិល្បករខ្មែរអាចមានវត្ដមាននៅក្នុងព្រឹត្ដិការណ៍បិទកីឡាអូឡាំពិកនេះឡើយ។
កញ្ញាបានបញ្ជាក់ថា៖ «ខ្ញុំមិនដែលគិតថា វាអាចទៅរួចទេ ហើយខ្ញុំគិតថា ក្ដីសុបិនរបស់យើងកាន់តែរីកធំទៅៗ។ សម្រាប់ខ្ញុំ ខ្ញុំសប្បាយជាពិសេស ពីព្រោះវាជាថ្ងៃខួបកំណើតរបស់ម៉ាក់ ដែលគាត់ស្រឡាញ់សិល្បៈខ្មែរយើងមែនទែន»។
ម្ចាស់ផលិតកម្មរូបនេះ បានបន្ដថា ជាមួយមរកតសិល្បៈបុរាណខ្មែរ លោកគ្រូ គង់ ណៃ បានប្រាប់ថា វាជាពេលវេលា «Time to Rise» ជាពិសេសក្រោកឡើងជាថ្មីម្ដងទៀត ហើយនេះគ្រាន់តែជាការចាប់ផ្ដើមប៉ុណ្ណោះ។
កញ្ញាអះអាងថា ផលិតកម្មនឹងផលិតបទចម្រៀងដោយបញ្ចូលទម្រង់សិល្បៈប្រពៃណីខ្មែរជាច្រើនបន្ថែមទៀត។
ជាសិល្បកររ៉េបតែបង្ហាញអប្បកិរិយាសុភាពរាបសា វណ្ណដា បានក្លាយទៅជានិមិត្តរូបនៃតន្ត្រីខ្មែរសម័យទំនើប ខណៈពេលប្រកាន់ភ្ជាប់នូវការផ្សព្វផ្សាយសិល្បៈប្រពៃណីខ្មែរ។
ការសម្តែងរបស់ វណ្ណដា នៅអូឡាំពិកទីក្រុងប៉ារីសមិនមែនគ្រាន់តែជាជ័យជំនះផ្ទាល់ខ្លួនទេ ប៉ុន្តែជានិមិត្តរូបនៃឥទ្ធិពលដែលកំពុងកើនឡើងរបស់កម្ពុជានៅលើឆាកពិភពលោក។
ឥទ្ធិពលនៃការសម្តែងរបស់ វណ្ណដា លើឆាកអន្ដរជាតិនឹងបន្តជំរុញទឹកចិត្តសិល្បករខ្មែរជំនាន់ថ្មី ឱ្យចង់ចែករំលែកវប្បធម៌ និងទេពកោសល្យរបស់ពួកគេទៅកាន់ពិភពលោក៕