![](https://pppkhmer.sgp1.digitaloceanspaces.com/image/main/20248/15_8_2024_spring.jpg)
កុមារី ឃាងសុផានី ព ស្ព្រីង ឈ្នះមេដាយមាសលើវិញ្ញាសា knowledge quizz។ រូបថត សហការី
ភ្នំពេញ៖ នៅក្នុងសមិទ្ធផលដ៏គួរឱ្យកត់សម្គាល់ដែលបាននាំមកនូវមោទនភាពដល់ប្រទេសជាតិ កុមារី ឃាងសុផានី ព ស្ព្រីង អាយុ ១១ ឆ្នាំ ទទួលបានចំណាត់ថ្នាក់លេខ ២ សម្រាប់ជើងឯកពិភពលោកក្នុងកម្មវិធី TeenEagle Global Round ដ៏មានកិត្យានុភាពនៅចក្រភពអង់គ្លេស ជាអ្នកគ្រងពានមួយក្នុងចំណោមម្ចាស់ពានរង្វាន់កំពូលទាំង ៣។
ការប្រកួតប្រជែងក្នុងចំណោមសិស្សអន្តរជាតិជាង ៣០០ នាក់ មកពីជាង ១០ ប្រទេសសមត្ថភាពដ៏ឆ្នើមរបស់ ស្ព្រីង ទទួលបានពានរង្វាន់ចំនួន ៣ និងមេដាយមាសចំនួន ២ ដែលធ្វើឱ្យកុមារីរូបនេះក្លាយជាម្ចាស់ពានកំពូលម្នាក់ក្នុងការប្រកួតប្រជែងជាសកលនេះ។
ស្ព្រីង ទទួលបានចំណាត់ថ្នាក់លេខ ២ ដ៏គួរឱ្យចាប់អារម្មណ៍ ចំណែកឯចំណាត់ថ្នាក់លេខ១ បានទៅលើ Ayla Garakhanli មកពីប្រទេស អាហ្សាក់បាហ្សង់ (Azerbaijan) ខណៈដែល Mahvendra Nava Murali មកពីម៉ាឡេស៊ីទទួលបានចំណាត់ថ្នាក់លេខ ៣។
កម្មវិធី TeenEagle Global Round ដែលបានរៀបចំឡើងរយៈពេលពីរថ្ងៃនៅចន្លោះថ្ងៃទី ៥-៦ ខែសីហា ឆ្នាំ២០២៤ បានបើកឱកាសឱ្យមានការប្រកួតប្រជែងក្នុងមុខវិជ្ជាផ្សេងៗ ចាប់ពីកម្រងសំណួរចំណេះដឹង រហូតដល់ការសិល្បៈនៃនិយាយ។
ស្ព្រីង ដែលនឹងត្រូវឡើងថ្នាក់ទី ៦ នៅសាលា DK SchoolHouse បានចែករំលែកក្តីរំភើបថា៖ «វាជាកិត្តិយសសម្រាប់ខ្ញុំ និងមិត្តកម្ពុជារបស់ខ្ញុំ ដែលតំណាងឱ្យប្រទេសរបស់យើង និងបង្ហាញពីទិដ្ឋភាពវិជ្ជមាននៃប្រទេសកម្ពុជា។ គ្រួសាររបស់ខ្ញុំតែងតែស្រឡាញ់ខ្ញុំ ផ្ដល់កម្លាំងចិត្ដដល់ខ្ញុំ និងគាំទ្រទស្សនៈរបស់ខ្ញុំ។ ខ្ញុំរំភើបចិត្តពេលខ្ញុំទទួលបានចំណាត់ថ្នាក់លេខ២សម្រាប់ Global Overall Champion Winner រួមទាំងពាន ៣ និងមេដាយ ២»។
ស្ព្រីង បានសម្តែងការកោតសរសើរចំពោះមនុស្សល្អៗដែលបានជួបនៅ TeenEagle ដោយបង្ហាញពីការបង្កើតមិត្តភាពជាមួយសិស្សានុសិស្សកម្ពុជា និងអន្ដរជាតិ។
កុមារីរូបនេះក៏បានលើកសរសើរគ្រូបង្រៀន ដោយចាត់ទុកពួកគេជាអ្នកផ្ដល់ការអប់រំគួរឱ្យគោរព និងបង្ហាញចំណាប់អារម្មណ៍ចំពោះការពេញចិត្ដនឹងថ្នាក់រៀន។
នៅពេលសួរថាតើមិត្តភក្តិ និងគ្រូបង្រៀនមានប្រតិកម្មយ៉ាងណាចំពោះភាពជោគជ័យនេះ ស្ព្រីង បានចែករំលែកថា ពួកគេរំភើបចិត្តដោយបង្ហាញទំនុកចិត្តជាមួយនឹងពាក្យពេចន៍ថា៖ «ខ្ញុំដឹងថាអ្នកអាចធ្វើបាន» និង «គ្មានអ្វីអាចជាឧបសគ្គសម្រាប់អ្នកទេ» ដែលធ្វើឱ្យកុមារី សប្បាយចិត្តណាស់ដែលមានមិត្តគាំទ្របែបនេះ។
អ្នកម្តាយរបស់ ស្ព្រីង គឺអ្នកស្រី សៅ សុផានី បានបង្ហាញនូវមោទនភាពយ៉ាងខ្លាំងចំពោះសមត្ថភាពកូនស្រីដែលមិនត្រឹមតែទទួលបានពានរង្វាន់ប៉ុណ្ណោះទេ ថែមទាំងការខិតខំប្រឹងប្រែងទៀតផង។
អ្នកស្រី សុផានី បានប្រាប់ភ្នំពេញប៉ុស្តិ៍៖ «ក្នុងនាមខ្ញុំជាម្តាយ ខ្ញុំមានអារម្មណ៍រំភើបរីករាយ មោទនភាពចំពោះកូនយ៉ាងខ្លាំង។ មោទនភាពរបស់ខ្ញុំក្នុងនាមជាម្តាយ មិនមែននៅក្នុងសមិទ្ធផលផ្ទាល់ខ្លួនរបស់ខ្ញុំទេ ប៉ុន្តែនៅក្នុងការមើលឃើញពីភាពជោគជ័យ សេចក្តីសប្បុរស ភាពរឹងមាំ និងប្រាជ្ញារបស់កូនខ្ញុំក្នុងកម្មវិធី TeenEagle Global Round នៅចក្រភពអង់គ្លេស»។
![](https://pppkhmer.sgp1.cdn.digitaloceanspaces.com/image/main/20248/15_8_2024_spring1.jpg)
កុមារីស្ព្រីង កាន់បង្ហាញពានរបស់ខ្លួន។ រូបថត សហការី
អ្នកស្រី បានបង្ហាញអារម្មណ៍មោទនភាព និងសុទិដ្ឋិនិយមយ៉ាងខ្លាំងដែលឃើញកូនស្រីតំណាងឱ្យប្រទេសកម្ពុជានៅលើឆាកអន្តរជាតិ ព្រោះវាជាឱកាសមួយដើម្បីបង្ហាញពីទេពកោសល្យ ការខិតខំប្រឹងប្រែង វិន័យ និងការលះបង់របស់និស្សិតកម្ពុជា។
លោក ហាក់ សូហ្វី ប្រធានផ្នែកទំនាក់ទំនងនៃក្រុមហ៊ុន Bright Education Consultant and Travel ដែលរៀបចំដំណើរទៅប្រកួតប្រជែងនេះ បានកោតសរសើរចំពោះស្នាដៃរបស់សិស្សានុសិស្សកម្ពុជាក្នុងការប្រកួតប្រជែង TeenEagle នៅចក្រភពអង់គ្លេស។
លោក សូហ្វី បាននិយាយថា៖ «សិស្សកម្ពុជាទទួលបានជោគជ័យគួរឱ្យកត់សម្គាល់ ដោយឈ្នះជើងឯក Global Winner Champion Trophy មួយ និងពានចំនួន ១៣ មេដាយមាស ៩ មេដាយប្រាក់ ១១ និងមេដាយសំរិទ្ធ ៣ គ្រឿង»។
លោកបានបន្ថែមថា សមិទ្ធផលទាំងនេះឆ្លុះបញ្ចាំងពីទេពកោសល្យ និងការលះបង់របស់សិស្សានុសិស្សកម្ពុជា ដែលមានសក្តានុពលបញ្ចេញសមត្ថភាពលើឆាកពិភពលោក។
សម្រាប់ការប្រកួត TeenEagle នៅចក្រភពអង់គ្លេស សិស្សានុសិស្សទាំងនេះមកពីសាលារដ្ឋ និងឯកជន ត្រូវការកាត់ការជ្រើសរើសពីរដំណាក់កាលទាំងក្នុងស្រុក និងអន្ដរជាតិ។
លោក សូហ្វី បានឱ្យដឹងថា៖ «សិស្សានុសិស្សជាង ៦០០ នាក់មកពីសាលារដ្ឋ និងឯកជនបានចូលរួមក្នុងការប្រឡងតាមប្រព័ន្ធអ៊ីនធឺណែត។ អ្នកដែលប្រឡងជាប់មានឱកាសទៅប្រកួតប្រជែងនៅចក្រភពអង់គ្លេស និងសហរដ្ឋអាមេរិក»។
TeenEagle Global Round ដែលត្រូវបានគេស្គាល់ថាសម្រាប់ការប្រកួតប្រជែងយ៉ាងម៉ត់ចត់ មានវិញ្ញាសាជាច្រើន ដូចជា Knowledge Quiz, Persuasive Speaking, និង Writing Challenge។
ការប្រកួតប្រជែងនៅឆ្នាំនេះក៏បានលើកឡើងពីបញ្ហាសកលលោក ដោយលើកទឹកចិត្តឱ្យអ្នកចូលរួមវ័យក្មេងគិតពិចារណាអំពីពិភពលោកជុំវិញពួកគេ និងថ្លែងចេញពីគំនិតយោបល់លើប្រធានបទសំខាន់ៗ ដូចជា ការប្រែប្រួលអាកាសធាតុ និងការប្រើប្រាស់ប្រកបដោយការទទួលខុសត្រូវ។
ជម្នះឧបសគ្គ
ដំណើរឆ្ពោះទៅរកភាពជោគជ័យរបស់ Spring គឺមិនមែនដោយគ្មានបញ្ហាប្រឈមនោះទេ។ នាងបាននិយាយដោយស្មោះត្រង់អំពីការលំបាកដែលនាងជួបប្រទះ រួមទាំងការសង្ស័យនៅពេលសិក្សាសម្រាប់ការប្រកួតប្រជែង។
![](https://pppkhmer.sgp1.cdn.digitaloceanspaces.com/image/main/20248/15_8_2024_img_1886.jpg)
ស្ព្រីង បានប្រាប់ភ្នំពេញប៉ុស្ដិ៍ថា៖ «មានឧបសគ្គលំបាកជាច្រើនដែលខ្ញុំបានជួបប្រទះ ដូចជា ពេលដែលខ្ញុំមើលសៀវភៅ ខ្ញុំស្ទើរតែបោះបង់ចោលម្ដងៗ។ ប៉ុន្តែខ្ញុំក៏មិនចង់ជឿលើខ្លួនឯងដែរ ដែលខ្ញុំនៅតែអាចបន្ដឈ្នះលើឧបសគ្គនេះ»។
ស្ព្រីង បានបង្ហាញពីបទពិសោធន៍នៅ TeenEagle ដោយកត់សម្គាល់ថា ការប្រកួតប្រជែងគឺពោរពេញទៅដោយបេក្ខជនមានការអប់រំខ្ពស់ជាច្រើន និងឧបសគ្គផ្សេងៗ។
កុមារីរូបនេះ បានទទួលស្គាល់ថា ទោះបីជាមានការលំបាកយ៉ាងណាក៏ដោយ ក៏នៅតែមានបរិយាកាសរីករាយ ហើយអ្នកចូលរួមបានចែករំលែកនូវភាពស្និទ្ធស្នាល ហាក់បីដូចជាក្រុមគ្រួសារតែមួយ។
ក្នុងនាមជាម្តាយម្នាក់ អ្នកស្រី សុផានី បានលើកឡើងពីបញ្ហាប្រឈមដែលពួកគេបានជួបប្រទះក្នុងការរៀបចំ ជាពិសេស ភាពខុសគ្នានៃពេលវេលា និងការទទួលបានប្រភពមេរៀន។
អ្នកស្រី សុផានី បានឱ្យដឹងថា ពួកគេបានរៀបចំយ៉ាងហ្មត់ចត់សម្រាប់សំណួរ និងចម្លើយ ដោយកូនស្រីរបស់អ្នកស្រីឧស្សាហ៍រៀន និងទន្ទេញវាក្យសព្ទ ហាត់សរសេរលើប្រធានបទផ្សេងៗ និងហាត់សមការនិយាយ រហូតដល់សិស្សថ្នាក់ទី ៧ រូបនេះមានអារម្មណ៍ជឿជាក់ និងមានលក្ខណៈសម្បត្តិគ្រប់គ្រាន់ដើម្បីចូលរួមការប្រកួត។
ថ្វីបើមានឧបសគ្គទាំងនេះក៏ដោយ ក៏ការប្តេជ្ញាចិត្តរបស់ ស្ព្រីង និងការគាំទ្រឥតងាករេរបស់អ្នកម្តាយ និងឪពុកធានាបានជោគជ័យរបស់កូនស្រី។
អ្នកស្រី សុផានី បានសង្កត់ធ្ងន់លើសារៈសំខាន់នៃការលើកទឹកចិត្តកូនស្រីឱ្យមានតុល្យភាពការប្រកួតប្រជែងជាមួយនឹងសកម្មភាពផ្សេងទៀតដែលកុមារីចូលចិត្ត ដូចជា ការហាត់ប្រាណ ការចំណាយពេលជាមួយមិត្តភក្តិ ឬជាមួយក្រុមគ្រួសារជាដើម។
អ្នកស្រីជឿជាក់ថា ការរក្សាតុល្យភាពនេះនឹងជួយឱ្យកូនស្រីមានសុភមង្គល និងមានសុខភាពល្អ ខណៈពេលដែលត្រៀមខ្លួនសម្រាប់ការប្រកួតប្រជែងដោយមិនមានអារម្មណ៍ធុញថប់។
អ្នកស្រីបានកត់សម្គាល់ថា៖ «ខ្ញុំតែងតែផ្តោតលើការខិតខំប្រឹងប្រែង មិនមែនជាគោលដៅចុងក្រោយនោះទេ»។ អ្នកស្រីបន្ថែមថា ជាមួយនឹងការគាំទ្រពីអ្នកម្ដាយ កូនស្រីអាចទទួលបានជោគជ័យ និងនៅតែរីករាយនឹងកុមារភាព។
សមត្ថភាពនាពេលអនាគត
ភាពជោគជ័យនៅ TeenEagle Global Round បានបង្កើតមូលដ្ឋានគ្រឹះដ៏រឹងមាំសម្រាប់អនាគតរបស់ ស្ព្រីង។ កុមារីបានប្ដេជ្ញាថានឹងបន្តការសិក្សាឱ្យបានល្អ ដើម្បីសម្រេចបានភាពជោគជ័យកាន់តែច្រើន។
ស្ព្រីង បាននិយាយថា៖ «ខ្ញុំមានយុទ្ធសាស្ត្រដើម្បីទទួលបានពិន្ទុល្អនៅសាលា ដូច្នេះខ្ញុំនឹងអានសៀវភៅឱ្យបានច្រើន សាកល្បងធ្វើលំហាត់ និងមើលវីដេអូលើមុខវិជ្ជានេះ»។
ម្តាយរបស់ស្ព្រីង ជឿជាក់ថា សមិទ្ធផលនេះនឹងមានឥទ្ធិពលយូរអង្វែងដល់អនាគតកូនស្រី និងលើកទឹកចិត្តដល់កុមារកម្ពុជាដទៃទៀត។
![](https://pppkhmer.sgp1.cdn.digitaloceanspaces.com/image/main/20248/15_8_2024_use_2.jpg)
អ្នកស្រី សុផានី បានឱ្យដឹងថា៖ «ស្ព្រីង នឹងចែករំលែកនូវអ្វីដែលគាត់បានរៀន និងបទពិសោធន៍ជាមួយកុមារកម្ពុជាដទៃទៀត ក្នុងគោលបំណងសិក្សា និងអភិវឌ្ឍការអប់រំ»។
អ្នកស្រី ជឿជាក់ថា កុមារកាន់តែច្រើននឹងចូលរួមក្នុងការប្រកួតនេះ ហើយនាំមកនូវក្តីសង្ឃឹម និងកិត្តិយសដល់ប្រទេស និងក្រុមគ្រួសាររបស់ពួកគេ បន្ទាប់ពីបានដឹងព័ត៌មាននេះពីភ្នំពេញប៉ុស្តិ៍។
អ្នកស្រីបានសង្កត់ធ្ងន់ថា ឪពុកម្តាយដើរតួនាទីយ៉ាងសំខាន់ក្នុងការចូលរួមរបស់កូនៗ ដោយសារពួកគេផ្តល់ការគាំទ្រទាំងរូបី និងអារម្មណ៍ពេញមួយការប្រកួតអន្តរជាតិ។
អ្នកស្រី សុផានី បាននិយាយថា៖ «ក្នុងនាមជាម្តាយរបស់ ស្ព្រីង ខ្ញុំជឿថា វាចាំបាច់ណាស់ក្នុងការចូលរួមក្នុងការប្រកួតប្រជែង និងការអប់រំរបស់កូនស្រីខ្ញុំ ពីព្រោះការចូលរួមរបស់ឪពុកម្តាយផ្តល់នូវអត្ថប្រយោជន៍ជាច្រើន»។
ទោះជាយ៉ាងណាក៏ដោយ អ្នកស្រីបានទទួលស្គាល់ពីសារៈសំខាន់របស់ឪពុកម្តាយក្នុងការរក្សាទស្សនវិស័យ ដើម្បីធានាថា ការប្រកួតប្រជែងនៅតែមានសុខភាពល្អ និងមិនដាក់សម្ពាធខ្លាំងពេកលើកុមារ។
នៅឆ្នាំ២០២៣ សិស្សានុសិស្សកម្ពុជាចំនួន ៣៧ នាក់ក្នុងចំណោមបេក្ខជន ៤២៧នាក់ បានទទួលជោគជ័យគួរឱ្យកត់សម្គាល់នៅក្នុងការប្រកួតប្រជែងភាសាអង់គ្លេស TeenEagle ដែលធ្វើឡើងនៅចក្រភពអង់គ្លេសចាប់ពីថ្ងៃទី ៣០ ខែកក្កដាដល់ថ្ងៃទី ៦ ខែសីហា។
ពួកគេបានត្រឡប់មកមាតុប្រទេសវិញជាមួយនឹងមេដាយមាស១១ គ្រឿង មេដាយប្រាក់១៧គ្រឿង និងមេដាយសំរឹទ្ធ២៤គ្រឿង ហើយកាលឆ្នាំ២០២២ សិស្សានុសិស្សកម្ពុជាចំនួន ៨០ នាក់បានចូលរួមប្រកួតប្រជែងជាមួយបេក្ខជនចំនួន ៤១៦ នាក់មកពី ២១ ប្រទេសក្នុងការប្រកួតដូចគ្នានៅទីក្រុងឡុងដ៍។
ក្រុមកម្ពុជាបានបង្ហាញសមត្ថភាពដ៏ពិសេស ដោយនាំមកវិញជាមួយមេដាយមាសចំនួន ១១ គ្រឿង ប្រាក់ ១៩ គ្រឿង សំរឹទ្ធ ១៨ គ្រឿង និងមេដាយកិត្តិយសចំនួន ២៧៕