លោក Billy Gorter ស្ថាបនិក និងជានាយកប្រតិបត្តិនៃអង្គការជីវិតនៅកម្ពុជា ឬ This Life។ រូបថត សហការី
ភ្នំពេញ៖ លោក Billy Gorter ស្ថាបនិក និងជានាយកប្រតិបត្តិនៃអង្គការជីវិតនៅកម្ពុជា ឬ This Life ជាអង្គការមិនមែនរដ្ឋាភិបាលកម្ពុជាដែលមានបេសកកម្មអបរំកុមារឱ្យចៀសឆ្ងាយពីទោសទណ្ឌដែលនាំឱ្យជាប់ពន្ធនាគារ និងគាំទ្រសហគមន៍ដែលងាយរងគ្រោះ បានទទួលកិត្តិយសដោយឈ្នះពានរងក្នុងកម្មវិធី Veblen Directors Awards ដ៏មានកិត្យានុភាព។
កម្មវិធី Veblen Directors ត្រូវបានប្រារឰឡើងដើម្បីជ្រើសរើសអ្នកដឹកនាំពិសេសម្នាក់ ដែលមានការដឹកនាំ និងការច្នៃប្រឌិតទៅតាមប្រភេទនីមួយៗ ដូចជា ភាគហ៊ុនឯកជន សហគ្រាសធុនតូច និងមធ្យម តួនាទីមិនស្ថិតក្នុងតំណែងប្រតិបត្តិ និងច្រើនទៀត។
ស្ថាបនិកកម្មវិធីលោក Callum Laing ត្រូវបានដកស្រង់សម្តីដោយកាសែត Street Insider ដោយនិយាយថា៖ «យើងមានក្ដីរំភើបរីករាយណាស់ពីព្រោះកម្មវិធីនេះ ជាឆ្នាំដំបូងនៃប្រារឱពានរង្វាន់ Veblen Directors Awards។ ខ្ញុំដឹងថា អ្នកឈ្នះចំនួន ៧ នាក់ និងជើងឯករងចំនួន ១៤ នាក់ កំពុងអបអរសាទរសមិទ្ធផលនេះជាមួយស្ថាប័ន និងក្រុមការងាររបស់ពួកគេ»។
លោកបានបន្ដថា៖ «ពានទាំងនេះនឹងបន្ថែមទម្ងន់ដល់កេរ្តិ៍ឈ្មោះអាជីព និងបេសកកម្មដ៏ភ្លឺស្វាងរបស់ពួកគេទៅមុខទៀត។ ខ្ញុំក៏សូមអរគុណដល់ម្ចាស់ឧបត្ថម្ភដ៏សប្បុរសរបស់យើងផងដែរ ដែលបានជួយធ្វើឱ្យពានរង្វាន់ទាំងនេះអាចទៅរួច»។
យោងតាមកាសែត Street Insider បានឱ្យដឹងថា អ្នកឈ្នះពាន រួមមាន បុគ្គលក្នុងវិស័យបច្ចេកវិទ្យាប្រកបដោយនិរន្តរភាព វេជ្ជបណ្ឌិត Reji Kurien Thomas (គ្រងពាន ESG ប្រចាំឆ្នាំ និង អ្នកណែនាំល្អបំផុត) ដែលលោកបានផលិតជីវឧស្ម័ន បានរួមចំណែកយ៉ាងសំខាន់ក្នុងការប្រមូលឧស្ម័នកាបូនិកប្រមាណ ៥០ម៉ឺនតោនជារៀងរាល់ឆ្នាំ។
Ayanda Mafuleka (Diversity & Inclusion) គ្រប់គ្រងកម្មវិធីផ្តល់សិទ្ធិអំណាចស្ត្រី និងភាពជាអ្នកដឹកនាំក្នុងប្រទេសអាហ្វ្រិកខាងត្បូង ដោយបណ្ដុះបណ្ដាលដល់នាយកប្រតិបត្តិ និងអ្នកគ្រប់គ្រងចំនួន ២ពាន់នាក់។
លោក Gorter ត្រូវបានទទួលស្គាល់នៅក្នុងប្រភេទ ESG (បរិស្ថាន សង្គម និងអភិបាលកិច្ច) ជានាយកឆ្នើមប្រចាំឆ្នាំ ដែលបានរួមចំណែកសំខាន់ចំពោះការអនុវត្តប្រកបដោយនិរន្តរភាព និងសីលធម៌នៅក្នុងអង្គការ។
លោក Gorter ដែលបានចាប់ផ្តើមសកម្មភាពនៅអាយុ ១៩ ឆ្នាំដោយការតស៊ូមតិសម្រាប់ការអភិរក្ស Old Growth Forests ក្នុងប្រទេសអូស្ត្រាលីគឺជាកម្លាំងផ្លាស់ប្តូរនៅកម្ពុជាចាប់តាំងពីការបង្កើតអង្គការជីវិតនៅកម្ពុជាក្នុងឆ្នាំ២០០៧។
ចាប់ផ្តើមជាមួយមនុស្សតែម្នាក់ លោក Gorter បានពង្រីកទៅជាអង្គភាពដ៏រឹងមាំមួយដែលមានបុគ្គលិកចំនួន ៩០ នាក់ ជះឥទ្ធិពលវិជ្ជមានដល់ជីវិតរាប់ម៉ឺននាក់នៅទូទាំងប្រទេស។
ក្រោមការដឹកនាំរបស់លោក Gorter អង្គការសម្រេចបាននូវព្រឹត្តិការណ៍សំខាន់ៗនៅក្នុងបេសកកម្មរបស់ខ្លួនក្នុងការជួយសហគមន៍ និងការពារការជាប់ឃុំឃាំងរបស់យុវជន។
អង្គការក្រៅរដ្ឋាភិបាលដែលមានមូលដ្ឋាននៅខេត្តសៀមរាប បានបំពេញការងារលើកកម្ពស់គុណភាពជីវិតនៅក្នុងសហគមន៍កម្ពុជា តាមរយៈការអប់រំ ការអភិវឌ្ឍន៍សហគមន៍ និងការតស៊ូមតិ។
ពួកគេធ្វើការយ៉ាងជិតស្និទ្ធជាមួយសហគមន៍ក្នុងស្រុក ដើម្បីរៀបចំ និងអនុវត្តកម្មវិធីប្រកបដោយនិរន្តរភាព ដែលដោះស្រាយបញ្ហាប្រឈមសង្គម សេដ្ឋកិច្ច និងការអប់រំ ដោយផ្តោតលើការផ្តល់សិទ្ធិអំណាចដល់កុមារងាយរងគ្រោះ គ្រួសារ និងការលើកកម្ពស់សិទ្ធិមនុស្ស និងយុត្តិធម៌សង្គម។
នៅឆ្នាំ២០២៤ អង្គការជីវិតនៅកម្ពុជា បានជួយដល់កុមារ ៤ នាក់ដំបូងក្នុងប្រទេសកម្ពុជា ដោយបញ្ចៀសពួកគេគេចពីកំណត់ត្រាឧក្រិដ្ឋកម្ម។
លោក Gorter បានពណ៌នាសមិទ្ធិផលនេះថា ជា «នេះជាជោគជ័យសំខាន់» សម្រាប់កំណែទម្រង់យុត្តិធម៌អនីតិជននៅក្នុងប្រទេស។
កម្មវិធីប្រកបដោយភាពច្នៃប្រឌិតរបស់អង្គការ ដូចជា This Life Beyond Bars បានកាត់បន្ថយយ៉ាងខ្លាំងនូវអត្រាការរើសអើងនៅក្នុងប្រទេសកម្ពុជាពី ៦០ភាគរយ មកនៅក្រោម ២ភាគរយ ដែលផ្តល់នូវគំរូសម្រាប់ការស្តារនីតិសម្បទាប្រកបដោយប្រសិទ្ធភាព។
អង្គការលើកកម្ពស់ការយល់ដឹងអំពីអំពើហឹង្សាលើយេនឌ័រ ជាមួយនឹងយុទ្ធនាការដែលបានទៅដល់ប្រជាជនកម្ពុជាម្នាក់ក្នុងចំណោមបីនាក់។
តាមរយៈការពង្រឹងទំនាក់ទំនងដ៏រឹងមាំជាមួយសហគមន៍មូលដ្ឋាន ក្រសួងរដ្ឋាភិបាល និងស្ថាប័នអន្តរជាតិ អង្គការជីវិតនៅកម្ពុជា បានតាំងខ្លួនជាអ្នកដឹកនាំក្នុងអភិបាលកិច្ច និងការអភិវឌ្ឍន៍សហគមន៍។
លោក Gorter បានប្រាប់ភ្នំពេញប៉ុស្ដិ៍ថា៖ «កិត្តិយសនេះគឺមិននឹកស្មានដល់ និងពិតជាអស្ចារ្យ។ វាជាសក្ខីភាពមួយចំពោះការងាររបស់ក្រុមរបស់យើងនៅអង្គការ និងភាពធន់របស់សហគមន៍ដែលយើងបម្រើ។ សាវតារបស់ខ្ញុំបានបង្ហាញពីការប្តេជ្ញាចិត្តរបស់ខ្ញុំក្នុងការបង្កើតការផ្លាស់ប្តូរជាវិជ្ជមាន»៕
