មជ្ឈមណ្ឌលឯកសារកម្ពុជាបានបោះពុម្ពសៀវភៅ «រឿងរ៉ាវក្នុងភូមិសម័យខ្មែរក្រហម» ដែលរៀបរាប់ពីសាច់រឿងជីវិតនៅក្នុងសម័យខ្មែរក្រហម។ ក្នុងដំណាក់កាលដំបូងនេះ សៀវភៅនេះមានរឿងរ៉ាវចំនួន ៦៨ រឿងដែលបង្ហាញទិដ្ឋភាពផ្សេងនាសម័យនោះ។
សាច់រឿងទាំងនេះបានកើតឡើងនៅក្នុងភូមិនាសម័យខ្មែរក្រហម ដែលទទួលបានពីអ្នករស់រានមានជីវិត ហើយត្រូវបានសរសេរដោយអ្នកឆ្លងកាត់របបខ្មែរក្រហមផ្ទាល់ ឬសរសេរដោយគ្រូបង្រៀន អ្នកស្រាវជ្រាវ ឬអ្នកនិពន្ធជំនាន់ក្រោយ។ នេះបើតាមលោក ផេង ពង្សរាស៊ី នាយកកម្មវិធីស្ដីពីការអប់រំអំពើប្រល័យពូជសាសន៍នៅកម្ពុជា និងជានាយកមជ្ឈមណ្ឌលឯកសារកម្ពុជាសាខាខេត្តព្រៃវែង និងខេត្តតាកែវ។
លោក ពង្សរាស៊ី ប្រាប់ភ្នំពេញប៉ុស្តិ៍ថា៖ «បើយើងមើលទៅលើសាច់រឿងទាំង ៦៨រឿង មានគ្រប់រស់ជាតិជីវិតទាំងអស់ ដូចជាការនិរាសព្រាត់ប្រាស់ ការហូបចុកមិនគ្រប់គ្រាន់ ការជម្លៀស ការបង្ខំឲ្យធ្វើការ និងការធ្វើទារុណកម្មជាដើម។ ដូច្នេះរឿងរ៉ាវទាំងអស់ឆ្លុះបញ្ចាំងពីជីវិតនៅក្រោមរបបខ្មែរក្រហម ដែលពោរពេញទៅដោយសោកនាដកម្ម ជីវិតជូរចត់ និងអំពើព្រៃផ្សៃរបស់ខ្មែរក្រហម»។
លោក ពង្សរាស៊ី ពន្យល់ថា មូលហេតុដែលមជ្ឈមណ្ឌលចងក្រងសៀវភៅនេះឡើងគឺដើម្បីបង្ហាញពីការយកចិត្តទុកដាក់ដល់អ្នកដែលបានរស់រានមានជីវិតពីសម័យខ្មែរក្រហម ការថែរក្សាសាច់រឿងទាំងនោះទុកជាប្រវត្តិសាស្ត្រដើម្បីឲ្យក្មេងៗជំនាន់ក្រោយបានយល់ដឹង ក៏ដូចជាដើម្បីការចងចាំអ្វីដែលកើតឡើងនៅក្នុងរបបខ្មែរក្រហម។
លោកបានឲ្យដឹងថា នេះជាការបោះពុម្ពលើកទី១ ហើយរឿងរ៉ាវផ្សេងៗទៀតដែលបានកើតឡើងក្នុងរបបខ្មែរក្រហមនឹងត្រូវបោះពុម្ពជាបន្តបន្ទាប់នៅពេលមជ្ឈមណ្ឌលទទួលបាននាពេលខាងមុខពីគ្រប់ទីកន្លែងទូទាំងប្រទេសកម្ពុជា។
លោក ពង្សរាស៊ី ពន្យល់ថា ការបោះពុម្ពសៀវភៅនេះគឺជាការបន្តទៅលើអ្វីដែលមជ្ឈមណ្ឌលរបស់លោកបានធ្វើកាលពីកន្លងទៅ តាមរយៈការបណ្ដុះបណ្ដាលឲ្យលោកគ្រូអ្នកគ្រូ និង អ្នករស់រានមានជីវិត ក៏ដូចជាអ្នកស្រាវជ្រាវវ័យក្មេង ចេះសរសេរសាច់រឿងដែលបានកើតឡើងនៅក្នុងភូមិនៅសម័យខ្មែរក្រហមដោយខ្លួនឯង។ លើសពីនេះទៀត លោកគ្រូអ្នកគ្រូ អាចយករឿងរ៉ាវទាំងនោះទៅបញ្ចូលក្នុងការបង្រៀនរបស់គាត់៕