សកម្មភាពសិស្ស និស្សិត និងសាធារណៈជនចូលរួមអានសៀវភៅក្នុងយុទ្ធនាការទេសចរណ៍អំណានក្នុងខេត្តពោធិ៍សាត់។ រូបភាព ឆែមស្រីគា
ភ្នំពេញៈ ជានិស្សិតឆ្នាំទី៣ សិក្សាមុខវិជ្ជាអក្សរសាស្ត្រខ្មែរ កញ្ញា ឆែម ស្រីគា បានបង្កើតនូវស្នាដៃ «ទេសចរណ៍អំណាន» ដែលជាសកម្មភាពមួយក្នុងការនាំយកសៀវភៅសិក្សា សៀវភៅសម្រាប់កុមារ និងសៀវភៅលើកទឹកចិត្ត ទៅតាំងបង្ហាញនៅតាមបណ្តាខេត្តនានា ដើម្បីលើកកម្ពស់ការអាន ដោយសាធារណជនអាចអានសៀវភៅបានដោយសេរី។
ចាប់ផ្តើមសកម្មភាពទេសចរណ៍អំណាននៅក្នុងអំឡុងខែកក្កដា ឆ្នាំ២០២៤នេះ កញ្ញា ឆែម ស្រីគា បានឱ្យដឹងថា ទេសចរណ៍អំណាន គឺផ្តោតទៅលើការដាក់តាំងសៀវភៅឱ្យសាធារណជនអាន ដោយឥតគិតថ្លៃ នៅតាមទីប្រជុំជន និងក្រុងតាមបណ្តាខេត្តនានា។ សកម្មភាពនេះត្រូវបានធ្វើឡើងតាមរយៈម៉ូតូ ដោយចំណាយថវិកាផ្ទាល់ខ្លួន និងមិនរកប្រាក់ចំណេញអ្វីឡើយ។
កញ្ញា ឆែម ស្រីគា ដែលជាអ្នកផ្ដួចផ្ដើមចលនាទេសចរណ៍អំណាន បានបញ្ជាក់ប្រាប់សារព័ត៌មានភ្នំពេញប៉ុស្ដិ៍ថា៖ «ការធ្វើទេសចរណ៍អំណានគឺខ្ញុំធ្វើនៅក្នុងក្រុង ព្រោះខ្ញុំមើលឃើញថានៅទីសាធារណៈ យុវជនម្នាក់ៗឈ្ងោកចុចតែទូរស័ព្ទ និងអ្នកមានដៃគូមួយចំនួន ប្រព្រឹត្តនៅប្រការអសីលធម៌ជាដើម។ អ៊ីចឹងនៅពេលយើងមានតាំងសៀវភៅតាមទីសាធារណៈ វាល្អម្យ៉ាង ព្រោះមានក្មេងៗ យុវជន យុវនារី អាណាព្យាបាលជាច្រើន នាំកូនកាន់សៀវភៅអាន ដែលខ្ញុំគិតថាវាពិតជាល្អមែនទែន»។
ខេត្តពោធិ៍សាត់ គឺជាគោលដៅដំបូងក្នុងការចាប់ផ្តើមសកម្មភាពទេសចរណ៍អំណាន ការតាំងសៀវភៅជាសាធារណៈរបស់និស្សិតអក្សរសាស្ត្រខ្មែរខាងលើនេះ ដោយមានអ្នកចូលរួម អានសៀវភៅជាច្រើន ហើយកញ្ញាក៏បន្តទៅខេត្តគោលដៅទី២។
កញ្ញា ស្រីគា រៀបរាប់ដូច្នេះថា៖ «ខ្ញុំបានឆ្លៀតពេលមួយល្ងាច ចាប់ផ្ដើមទេសចរណ៍អំណានជាលើក ដំបូងនៅសួនច្បារកោះសំពៅមាសក្នុងក្រុងពោធិ៍សាត់។ មានមនុស្សចាប់អារម្មណ៍ច្រើន អ្នកចូលអាន ជាង១០០នាក់ ខ្ញុំសប្បាយចិត្តពេលឃើញបែបនេះ ហើយមានអ្នកសុំទិញសៀវភៅដែរ តែខ្ញុំអត់លក់ទេ គឺជូនគាត់ជាអនុស្សាវរីយ៍ ហើយបន្ទាប់មក ខ្ញុំបានខេត្តទី២ គឺកែប ដែលមានអ្នកអានសៀវភៅ ជាង៣០នាក់»។
«ទេសចរណ៍អំណាន» នាពេលបច្ចុប្បន្នបានធ្វើដំណើរប្រមាណ១២ខេត្ត និងកំពុងរៀបចំទៅកាន់ខេត្តបែកខាង ឦសានបន្តនាពេលខាងមុខ។
សកម្មភាពសិស្ស និស្សិត និងសាធារណៈជនចូលរួមអានសៀវភៅក្នុងយុទ្ធនាការសួនអំណាន មុខវត្តបុទ។ រូបភាព ឆែមស្រីគា
និស្សិតអក្សរសាស្ត្រខ្មែរឆ្នាំទី៣រូបនេះបានឱ្យដឹងទៀតថា ការរៀបចំទេសចរណ៍អំណាន ពុំមានការលំបាក អ្វីឡើយអំឡុងពេលចុះទៅតាមបណ្តាខេត្តនីមួយៗ តួយ៉ាងកន្លែងស្នាក់នៅ ម្ហូបអាហារ បងប្អូនប្រជាពលរដ្ឋនៅទីនោះ ពុំមានការយកប្រាក់អ្វីឡើយ ដែលទង្វើទាំងអស់នេះ កើតចេញពីការគាំទ្រសកម្មភាពរបស់កញ្ញា។
«ទេសចរណ៍អំណានបច្ចុប្បន្នយើងទៅបាន១២ខេត្តហើយរួមមាន ប៉ៃលិន ពោធិ៍សាត់ បន្ទាយមានជ័យ សៀមរាប តាកែវ កណ្ដាល ព្រៃវែង កំពង់ចាម ត្បូងឃ្មុំ ស្វាយរៀង កែប កំពត នៅចុងខែកុម្ភៈនេះ ខ្ញុំមានគម្រោងទៅខាងឦសានប្រទេស រួមមាន ក្រចេះ ស្ទឹងត្រែង មណ្ឌលគិរី រតនគិរី និងព្រះវិហារ និងបើកការរ៉ៃអង្គាសថវិកាសម្រាប់ធ្វើដំណើរខ្លះផងដែរ»។ នេះជាការលើកឡើងរបស់កញ្ញា ឆែម ស្រីគា។
សៀវភៅដែលតាំងបង្ហាញសម្រាប់បងប្អូនប្រជាពលរដ្ឋអានមានសៀវភៅជាច្រើនដូចជា សៀវភៅលើទឹកចិត្ត សៀវភៅពាណិជ្ជកម្ម សាសនា ប្រលោមលោក រឿងនិទានសម្រាប់កុមារ និងមានសៀវភៅជាច្រើនទៀតដែលបានមកពីការបរិច្ចាគពីអ្នកនិពន្ធ សិស្សនិស្សិត និងប្រជាពលរដ្ឋ។
ស្រីគា យល់ឃើញថា យុវជនដែលអានសៀវភៅបែបលើទឹកចិត្តរួចហើយ គួរតែអានសៀវភៅបែបប្រវត្តិសាស្ដ្រ ព្រោះថាយុវជនបច្ចុប្បន្ននេះមានការធ្លាក់ទឹកចិត្តច្រើន ប្រសិនបើស្មារតីពួកគាត់អត់នឹងទេ ពួកគាត់មិនអាចរកអ្វីដែលថ្មីទេ អ្វីដែលជួយជំនួយស្មារតីគាត់ទាំងហ្នឹងទេ»។
សកម្មភាពសិស្ស និស្សិត និងសាធារណៈជនចូលរួមអានសៀវភៅក្នុងយុទ្ធនាការទេសចរណ៍អំណាន។ រូបភាព ឆែមស្រីគា
ទាក់ទងដំណើរការនៃទេសចរណ៍អំណានវិញ យុវតីវ័យ២៣ឆ្នាំរូបនេះ អះអាងថា កញ្ញាគ្រោងនឹងរៀបចំទេសចរណ៍អំណានទៅកាន់ខេត្តក្រុងទូទាំងប្រទេស ដោយនឹងធ្វើឡើងទៅតាមពេលវេលា និងលទ្ធភាពដែលកញ្ញាមាន។
ស្រីគា គឺជាកូនពៅក្នុងចំណោមបងប្អូន៥នាក់ និងជាកូនអ្នកខេត្តប៉ៃលិនដែលស្រលាញ់ការអានសៀវភៅម្នាក់។
អំឡុងពេលកញ្ញាកំពុងសិក្សាថ្នាក់វិទ្យាល័យនៅខេត្តប៉ៃលិនកញ្ញាក៏បានផ្ដូចផ្ដើមបង្កើត «សួនអំណាន»ក្នុងឆ្នាំ២០២០ហើយកញ្ញាបានជ្រើសរើសខេត្តនេះជាគោលដៅដំបូងប៉ុន្តែសកម្មភាពសួនអំណានហាក់ពុំសូវមានអ្នកចាប់អារម្មណ៍ច្រើនឡើយលុះដល់ឆ្នាំ២០២២គ្រាដែលកញ្ញាបន្តការសិក្សានៅរាជធានីភ្នំពេញ កញ្ញាបានយកគំនិតសួនអំណាននេះមកធ្វើនៅក្នុងក្រុងដ៏ពេញនិយមនេះដោយទទួលបានការគាំទ្រយ៉ាងច្រើន។
ទោះបីការចាប់ផ្តើមធ្វើសួនអំណានជាលើកដំបូងមានអ្នកគាំទ្រចូលរួមអានសៀវភៅច្រើនក៏ពិតមែន ប៉ុន្តែសកម្មភាពសួនអំណាននេះក៏ត្រូវបានអាជ្ញាធររារាំងនិងហាមឃាត់ផងដែរក្រោមហេតុផលខូចសណ្តាប់ធ្នាប់សារធារណៈតែទោះយ៉ាងណាកញ្ញានៅតែបន្តសកម្មភាពសួនអំណានរហូតដំណើរការមកទល់នឹងពេលបច្ចុប្បន្ន។
យុវតី ឆែម ស្រីគា ក្នុងបណ្ណាល័យសាខាទី៧ របស់យុទ្ធនាការសួនអំណាន។ រូបភាព ឆែម ស្រីគា
កញ្ញាឆែមស្រីគាបានរំឭកប្រាប់ថា៖ «ធ្វើលើកទី១អាជ្ញាធរហាមឃាត់។ ខ្ញុំអត់បាននិយាយអីច្រើនទេគឺធ្វើតាមគាត់ គាត់ដេញយើងឱ្យទៅសុំការអនុញ្ញាតពេលនោះភ័យដែរតែលើកទី២ខ្ញុំឡាយវីដេអូនិយាយពីដើមចមថា ខ្ញុំធ្វើដោយស្មគ្រចិត្តធ្វើដោយក្តីស្រឡាញ់ចង់ចែករំលែកការអាននិងឱ្យសិស្សនិស្សិតដែលអត់លុយអាចអានសៀវភៅបាន។ ក្រោយមកខ្ញុំផ្អាកសកម្មភាពរយៈពេល១ខែហើយក្រោយៗមកខ្ញុំធ្វើវាឡើងវិញគឺអត់មានបញ្ហាទេព្រោះមានការគាំទ្រច្រើន»។
មិនត្រឹមតែទទួលបានការគាំទ្រពីសាធារណជន សិស្សនិស្សិត ប៉ុណ្ណោះទេ សកម្មភាពរបស់យុវតីខ្មែររូបនេះក៏ទទួលការសាទរពីលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈផងដែរ ដោយលោកស្រីលើកទឹកចិត្តឱ្យបន្តសកម្មភាពអំណាននេះបន្ថែមទៀត។
ផ្តើមចេញពីការគាំទ្រច្រើនរាជធានីភ្នំពេញ ពេលនេះយុវតី ឆែម ស្រីគា បានពង្រីកនូវសួនអំណានឬបណ្តាល័យចល័តនេះទៅតាមបណ្តាខេត្តចំនួន៦ដែលមាន៧ទីតាំងរួមមានសៀមរាប២ទីតាំង កំពង់ចាម១ទីតាំង បាត់ដំបង១ទីតាំង កណ្តាល១ទីតាំង ស្វាយរៀង១ទីតាំង និងនៅពោធ៍សាត់១ទីតាំង។
ក្នុងនោះមានសមាជិកចំនួន១០នាក់ដែលជាបណ្ណារក្សស្មគ្រចិត្តដោយមិនទទួលបានប្រាក់កម្រៃអ្វីទាំងអស់។
សម្រាប់ថវិកាទ្រទ្រង់សួនអំណាន ស្រីគា បញ្ជាក់ថា៖ «ថវិកាចំណាយលើសួនអំណានភាគច្រើនជាថវិកាផ្ទាល់ខ្លួនខ្ញុំ ទាល់តែខ្វះខាតបានខ្ញុំរៃអង្គាសពីសប្បុរសជនដើម្បីបំពេញចំនួនខ្វះខាត ដូចជាបើខ្វះ៥០ដុល្លារទៅ១០០ដុល្លារគឺរៃអង្គាសតែចំនួនកំណត់ប៉ុណ្ណឹងទេ»។
ឆែម ស្រីគា ចាត់ទុកការអានសៀវភៅ ថាមានសារៈសំខាន់ណាស់ព្រោះការអានសៀវភៅអាចជួយឱ្យមនុស្សអភិវឌ្ឍចំណេះដឹង ចេះគិតគូពិចារណានិងអាចដកស្រង់ភាពវិជ្ជមាននៅក្នុងសៀវភៅមកអនុវត្តក្នុងជីវិតផ្ទាល់ខ្លួន។
មិនតែប៉ុណ្ណោះប្រទេសជាតិអាចរីកចម្រើនទៅបានទាល់តែមានធនធានមនុស្សល្អៗដែលកើតចេញពីការអានសៀវភៅនេះឯង៕
