អ្នកស្រី សូ ភីណា អ្នកនិពន្ធ និងជាអ្នកបោះពុម្ពនៅគ្រឹះស្ថានបោះពុម្ពផ្សាយកម្ពុមេរា។ សហការី
ភ្នំពេញៈ អ្នកនិពន្ធដ៏មានប្រជាប្រិយភាព សូ ភីណា នឹងពន្យល់និងចែករំលែកបទពិសោធក្នុងការសរសេរអត្ថបទរឿងខ្លី នាខែកុម្ភៈ ឆ្នាំ២០២៥ ខាងមុខនេះ ដើម្បីចូលរួមចំណែកក្នុងការលើកកម្ពស់វិស័យអក្សរសាស្ត្រខ្មែរ នៅក្នុងសិក្ខាសាលាស្តីពី «របៀបសរសេររឿងខ្លី» រៀបចំឡើងនៅវិទ្យាស្ថានបារាំងនៅកម្ពុជា (IFC។
អ្នកស្រី សូ ភីណា ដែលជាអ្នកបោះពុម្ពនៅគ្រឹះស្ថានបោះពុម្ពផ្សាយកម្ពុមេរាផងនោះ បានប្រាប់សារព័ត៌ មានភ្នំពេញប៉ុស្តិ៍ថា សិក្ខាសាលាខាងលើនេះ នឹងរៀបចំឡើងនៅថ្ងៃទី ០៨ ខែកុម្ភៈ ឆ្នាំ២០២៥ វេលាម៉ោង ២ ដល់ម៉ោង ៤ រសៀល នៅវិទ្យាស្ថានបារាំងនៅកម្ពុជា (IFC) ក្នុងគោលបំណងជំរុញឱ្យអ្នកដែលស្រឡាញ់ខាងផ្នែកតែងនិពន្ធ បានយល់កាន់តែច្បាស់ពីការសរសេរសាច់រឿង ជាប្រភេទអត្ថបទអក្សរសិល្ប៍រឿងខ្លី។
អ្នកស្រីបញ្ជាក់ថា៖ «នៅក្នុងសិក្ខាសាលានេះ យើងជ្រើសរើសសិក្ខាកាមចំនួន១៥នាក់ ដោយសារយើងចង់រក្សាគុណភាព យើងធ្វើឡើងត្រឹមតែរយៈពេល២ម៉ោងប៉ុណ្ណោះ ណាមួយនៅក្នុងចំណោមអ្នកដែលចូលរួមហ្នឹង ខ្ញុំជឿថា ប្រាកដជាមានអ្នកនិពន្ធដែលធ្លាប់សរសេររួចខ្លះហើយ និងមានអ្នកចូលចិត្តអាន ក៏ដូចជាអ្នកចង់សរសេរផងដែរ ដែលមកចម្រុះគ្នា»។
នៅក្នុងសិក្ខាសាលានេះ នឹងមានរៀបចំនូវបទបង្ហាញស្តីពី «អ្វីទៅជារឿងខ្លី?» ការណែនាំខ្លីអំពីមូលដ្ឋានគ្រឹះនៃរចនាសម្ព័ន្ធរឿងខ្លី ដោយផ្តោតលើធាតុសំខាន់ៗដូចជាគ្រោងឆ្អឹងរឿងខ្លី ការវិវត្ត តួអង្គ និងការកំណត់ទំនាស់ និងដំណោះស្រាយ បន្ថែមពីនេះក៏មាននូវការណែនាំ និងដកស្រង់សម្រង់សម្តីមួយចំនួនពីអ្នកនិពន្ធរឿងខ្លីទាំងនៅក្នុងប្រទេសកម្ពុជា និងនៅជុំវិញពិភពលោក និងការអនុវត្តលំហាត់ទាក់ទងនឹងរឿងខ្លីផងដែរ។
អ្នកនិពន្ធ សូ ភីណា បញ្ជាក់បន្ថែមថា បទបង្ហាញខាងលើនេះនឹងធ្វើឱ្យសិក្ខាកាមទាំងអស់បានដឹងថា តើអ្នកនិពន្ធរឿងខ្លីរូបណា មានលក្ខណៈពិសេសអ្វីខ្លះ, រឿងខ្លីដែលគាត់អានមានលក្ខណៈសម្បត្តិអ្វីខ្លះ, និងស្ថិតនៅក្នុងបែបបទណា, ដែលចំណុចទាំងនេះ នឹងនាំឱ្យពួកគាត់ បានយល់អំពីលំនាំនៃការសរសេរ រឿងខ្លី និងឈានដល់ការចាប់ផ្តើមធ្វើការសរសេរ ដែលជាការបំផុសគំនិតសម្រាប់ការបង្កើតសាច់រឿង។
អ្នកនិពន្ធ សូ ភីណា និងអ្នកគាំទ្រ ក្នុងកម្មវិធី តាំងពិព័រណ៍សៀវភៅ។សហការី
នៅក្នុងសិក្ខាសាលា «របៀបសរសេររឿងខ្លី» នេះក៏មានបញ្ជូលនូវប្រធានបទមួយទៀតផងដែរ គឺទំនាក់ទំនងបែបវិជ្ជមាន ដែលជាការបញ្ជូលនូវគំនិតរបស់អ្នកនិពន្ធទៅក្នុងស្នាដៃធ្វើយ៉ាងណាមិនឱ្យ ប៉ះពាល់ដល់សង្គម ស្របពេលដែល ទិវាបុណ្យនៃក្តីស្រឡាញ់ ១៤ កុម្ភៈ ជិតចូលមកដល់ផងដែរ។
អ្នកនិពន្ធ សូ ភីណា បានសម្គាល់ថា៖ «មួយរយៈនេះ ខ្ញុំឃើញមានអក្សរសិល្ប៍ ដែលវាឆ្លុះបញ្ចាំងអំពី អំពើហិង្សាផ្លូវភេទទៅលើស្ត្រីច្រើន ដែលមិនបង្ហាញការអនុញាតពីតួស្រីមុន តួប្រុសទៅចាប់ឱបគេហើយ បានតួស្រីហ្នឹងរុញច្រានវិញ»។
តាមរយៈសាច់រឿងតែងនិពន្ធបែបនេះ អ្នកស្រីបានគូសបញ្ជាក់ថា៖ «អ៊ីចឹងវាបង្ហាញពីវប្បធម៌ចាប់រំលោភ ឬចាប់បង្ខំ គ្មានការអនុញាត ខ្ញុំចង់ផ្តោតទៅលើអត្ថន័យហ្នឹង ដើម្បីឱ្យអ្នកចូលរួម (សិក្ខាកាម) មានអារម្មណ៍អំពីមនោសញ្ចេតនា គាត់ត្រូវដឹងថា ទំនាក់ទំនងបែបវិជ្ជមានគេសរសេរបែបម៉េច មិនមែនត្រូវតែចាប់គេបានមុន ថើបគេមុនទេ ការសរសេរបែបនេះ វាអត់ល្អ វាប៉ះពាល់ដល់សង្គម វាដូចជាលើកទឹកចិត្ត ឱ្យមានការចាប់បង្ខំ ចាប់រំលោភគេ»។
ប្រកបអាជីពជាអ្នកនិពន្ធជាង១២ឆ្នាំ និងចូលចិត្តសរសេររឿងខ្លី អ្នកនិពន្ធពូកែវោហារូបនេះយល់ឃើញ ថា បច្ចុប្បន្ន ការសរសេររឿងខ្លីក្នុងប្រទេសកម្ពុជា នៅមានកម្រិតតិចតួចនៅឡើយ ដោយមានស្ថាប័ន និងគ្រឹះស្ថានប្រមាណ ៤ ទៅ ៥ ប៉ុណ្ណោះ ដែលបន្តស្នាដៃបោះពុម្ពកម្រងរឿងខ្លី ដូចជា កម្ពុជមេរា និងមន្តទឹកខ្មៅជាដើម។
អ្នកស្រី សូ ភីណា ចូលរួមកម្មវិធីមហោស្រព អក្សរសិល្ប៍ខ្មែរលើកទី៥។ សហការី
ទោះជាយ៉ាងណា អ្នកនិពន្ធ សូ ភីណា យល់ថា សិក្ខាសាលាស្តីពី «របៀបសរសេររឿងខ្លី» នេះនឹងក្លាយ ជាផ្នែកមួយក្នុងការជំរុញ និងលើកកម្ពស់វិស័យតែងនិពន្ធនៅក្នុងប្រទេសកម្ពុជា ដ្បិតសិក្ខាសាលានេះ នឹងជួយឱ្យពួកគាត់អាចសរសេពីរឿងខ្លីបាន និងអាចពង្រីកចំណេះដឹងពួកគាត់ឈានទៅសរសេរអត្ថបទវែងបន្ថែមទៀត។
អ្នកស្រី សូ ភីណា បានលើកឡើងថា៖ «ខ្ញុំជឿថា ពួកគាត់យល់ពីរបៀបសរសេរ ពួកគាត់នឹងមានទំនុកចិត្តក្នុងការសរសេរ មែនទែនការសរសេរ រឿងខ្លី និងរឿងវែងមិនសូវខុសគ្នាប៉ុន្មានទេ របៀបសរសេរ និងទ្រឹស្តីស្រដៀងៗគ្នា ពួកគាត់សរសេររឿងខ្លី អាចឈ្វេងយល់ដោយខ្លួនឯង អាចសរសេររឿងវែងបាន»។
អ្នកនិពន្ធរូបនេះបន្តថា៖ «ដូច្នេះនៅពេលដែលគាត់សរសេរច្រើន លទ្ធភាពក្នុងការបោះពុម្ពកាន់តែច្រើន មានការគាំទ្រច្រើន មានអ្នកអាន អ៊ីចឹង វាចូលរួមនៅក្នុងសម្រួចអក្សរសិល្ប៍ខ្មែរឱ្យមានភាពរស់រវើកជាងមុន។ កាលណាវាមានអ៊ីចឹង នាំឱ្យមានចរន្តសេដ្ឋកិច្ច និងការគិតគូរស៊ីជម្រៅ ហើយវាក៏អាស្រ័យលើអក្សរសិល្ប៍របស់អ្នកនិពន្ធហ្នឹងផងដែរ»៕
