ការសម្ដែងសិល្បៈនៅក្នុងពិធិបើកមហោស្រពគីហ្សូណាជប៉ុន-កម្ពុជា២០២៥ នៅ CJCC កាលពីថ្ងៃទី១៣ កុម្ភៈ។ ស្ថានទូតជប៉ុន
មហោស្រពគីហ្សូណាជប៉ុន-កម្ពុជា២០២៥ កំពុងប្រព្រឹត្តទៅនៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ពីថ្ងៃទី១៣ ដល់ ១៦ ខែកុម្ភៈនេះ ក្រោមប្រធានបទ «សុខដុមនៃភាពចម្រុះ»។
មហោស្រពនេះមានព្រឹត្តិការណ៍ជាច្រើនរាប់ចាប់ពីវប្បធម៌របស់បុរាណនិងសម័យ របស់ជប៉ុន និងកម្ពុជា រហូតដល់ការចែករំលែកបទពិសោធន៍ និងចំណេះដឹងនានាទាំងផ្នែកវប្បធម៌ និងជំនាញនានានាសម័យបច្ចេកវិទ្យានេះ។
ព្រឹត្តិការណ៍នេះមានទាំងការបង្ហាញម្ហូបជប៉ុន ការតាំងពិព័រណ៍សិល្បៈ សិក្ខាសាលាសរសេរអក្សរដោយដៃ ក្បាច់គុន និងការសម្ដែងតាមបែបប្រពៃណី រួមមានទាំងល្ខោនខោលវត្តស្វាយអណ្ដែតផងដែរ។
ព្រឹត្តិការណ៍ឆ្នាំនេះជាការរៀបចំលើកទី១៤ ហើយក្រោមប្រធានបទ «សុខដុមនៃភាពចម្រុះ» ដែលបង្ហាញពីសុខដុមរមនានៃវប្បធម៌រវាងប្រទេសទាំងពីរ។
ព្រឹត្តិការណ៍នេះដើរតួនាទីជាវេទិកាសម្រាប់ការផ្លាស់ប្ដូរវប្បធម៌ ជំរុញលើកកម្ពស់ការស្វែងយល់ពីគ្នាទៅវិញទៅមក និងពង្រឹងមិត្តភាពរវាងជប៉ុន និង កម្ពុជា។
លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជាបានថ្លែងថា៖ «កិច្ចសហប្រតិបត្តិការជប៉ុននិងកម្ពុជា ដែលបានឈានដល់ភាពជាដៃគូយុទ្ធសាស្ត្រគ្រប់ជ្រុងជ្រោយកាលពីឆ្នាំ២០២៣ មិនផ្ដោតទៅលើតែនយោបាយ និង សេដ្ឋកិច្ចនោះទេ ប៉ុន្តែក៏ផ្ដោតទៅលើការពង្រឹងផ្នែកវប្បធម៌នេះផងដែរ»។
អ្នកស្រី ប៉ែន មុនីមករា រដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា មហោស្រពនេះគឺជាសក្ខីភាពនៃចំណងមិត្តភាពដ៏ជ្រាលជ្រៅ និងយូរអង្វែងរវាងកម្ពុជានិងជប៉ុន ដោយឈរលើមូលដ្ឋានគោរព និង ជឿទុកចិត្តគ្នាទៅវិញទៅមក៕
