តួឯកស្រី ម៉េង ហ្សីយី ដើរតួជា យីសា ក្នុងរឿងភាគទូរទស្សន៍ កំពុងអានស្គ្រីបភាពយន្ត ខណះតួឯកប្រុង វ៉ាង ហុងយី ដើរតួជា ហ្សុង ហាំង បង្ហាញការសំពះបែកខ្មែរនៅប្រាសាទ។ រូបថត សហការី
ភ្នំពេញ៖ ថ្មីៗនេះ មានផ្ទុះការចាប់អារម្មណ៍ពេលដែលផលិតកម្មភាពយន្ដចិនមកថតរឿងភាគទូរទស្សន៍ «វត្ដត្រកូល ៣តំណរ» «Three Lines of Reincarnation» នៅក្នុងទីក្រុងប្រវត្តិសាស្ត្រនៃខេត្តសៀមរាប។
ការផលិតភាពយន្ដនៅប្រទេសកម្ពុជាបាននាំមកនូវឱកាសពិសេសមួយក្នុងការផ្សព្វផ្សាយបេតិកភណ្ឌវប្បធម៌ដ៏សម្បូរបែបរបស់ព្រះរាជាណាចក្រ និងសម្រស់ធម្មជាតិទៅកាន់ទស្សនិកជនទូទាំងពិភពលោក។
ផលិតកម្មដែលបានជ្រើសរើសទីតាំងល្បីៗ ដូចជា អាកាសយានដ្ឋានអន្តរជាតិសៀមរាបអង្គរ អាកាសយានដ្ឋានអន្តរជាតិសៀមរាបចាស់ ផាប់ស្ទ្រីត និងទីតាំងជាច្រើនក្នុងទីក្រុង គឺជាសញ្ញាយ៉ាងច្បាស់ថាប្រទេសកម្ពុជាកំពុងក្លាយជាគោលដៅដ៏ពេញនិយមសម្រាប់ផលិតករបរទេស។
ខ្សែភាពយន្តភាគទូរទស្សន៍នេះបង្ហាញពីតារាចិនល្បីៗដែលមានអ្នកគាំទ្រជាង ៣០ លាននាក់នៅលើប្រព័ន្ធផ្សព្វផ្សាយសង្គមចិន Weibo តំណាងឱ្យព្រឹត្តិការណ៍ដ៏សំខាន់មួយសម្រាប់ឧស្សាហកម្មភាពយន្ត និងទេសចរណ៍កម្ពុជា។
ដោយសារកម្ពុជាបន្តដាក់ខ្លួនជាមជ្ឈមណ្ឌលសម្រាប់ផលិតកម្មអន្តរជាតិ ការថតរឿង «វត្ដត្រកូល ៣តំណរ» ត្រូវបានមើលឃើញថាជាឱកាសមាសដើម្បីទាក់ទាញភ្ញៀវទេសចរ ជាពិសេសមកពីប្រទេសចិន តៃវ៉ាន់ ហុងកុង និងម៉ាឡេស៊ី។
លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានឱ្យដឹងថា៖ «ការថតភាពយន្ដនៅក្នុងតំបន់មួយ ឬប្រទេសមួយជាការចូលរួមចំណែកផ្សព្វផ្សាយពីគោលដៅនោះទៅដល់អ្នកទស្សនា។
នេះជាការផ្សព្វផ្សាយដ៏សំខាន់ក្នុងការទាក់ទាញភ្ញៀវទេសចរចិន។ ទេសចរនៃប្រទេសមួយចំនួនកំណត់គោលដៅទេសចរណ៍តាមរយៈការទស្សនាភាពយន្ដ។
លោកទទួលស្គាល់ថា ការផលិតវីដេអូ ឬភាពយន្ដដែលបង្ហាញពីសង្គមអសន្ដិសុខ ឬមិនល្អដោយប្រការណាមួយ ច្បាស់ណាស់ថា ព័ត៌មានទាំងនេះនឹងជះឥទ្ធិពលទៅដល់អ្នកទស្សនា។
លោក បូរក្ស បានបញ្ជាក់ថា៖ «ខ្ញុំចង់ទាញចំណាប់អារម្មណ៍ថា ឈុតឆាកនៅក្នុងភាពយន្ដគឺជាសិល្បៈ ដែលមិនមែនជាប្រភេទឯកសារ ឬឆ្លុះបញ្ចាំងពីតថភាពពិតក្នុងសង្គមនោះទេ។ នៅក្នុងភាពយន្ដ វាមានទាំងឈុតវិជ្ជមាន និងអវិជ្ជមាន ដោយមិនផ្ដោតលើតែភាពវិជ្ជមាន ឬអវិជ្ជមានសុទ្ធនោះទេ»។
ប្រសិនបើមានឈុតឆាកសម្លាប់មនុស្ស ឬធ្វើអត្ដឃាត ដំណោះស្រាយនៅក្នុងសាច់រឿងប្រាកដជាត្រូវបកស្រាយថា តើមានកិច្ចអន្ដរាគមពីប៉ូលិស ឬមន្ដ្រីជំនាញឬទេ។
ជាការផ្សព្វផ្សាយសក្ដានុពលទេសចរណ៍ លោក បូរក្ស បានលើកឡើងថា រាជរដ្ឋាភិបាលយកចិត្ដទុកដាក់ខ្ពស់ក្នុងការជំរុញ និងលើកកម្ពស់ការទាក់ទាញផលិតករអន្ដរជាតិមកប្រើប្រាស់កម្ពុជាជាគោលដៅថតភាពយន្ដ។
លោកបានប្រាប់ភ្នំពេញប៉ុស្ដិ៍ថា៖ «យើងព្យាយាមសម្របសម្រួលនីតិវិធីផ្ទៃក្នុងដើម្បីពន្លឿន សម្រួលដោយធ្វើយ៉ាងណាផលិតករអន្ដរជាតិមានភាពងាយស្រួល ហើយយើងខិតខំពង្រឹងធនធានមនុស្សក្នុងការបម្រើដល់ការជំរុញផលិតករបរទេសផងដែរ»។
រឿងនេះបង្ហាញពីទំនាក់ទំនងវប្បធម៌ និងភូមិសាស្ត្រជិតស្និទ្ធរវាងកម្ពុជា និងចិន ដែលធ្វើឱ្យប្រទេសកម្ពុជាហាក់ដូចជាគោលដៅជិតខាង ដែលងាយស្រួលទៅទស្សនា។
កំលោះ Hang ធ្វើដំណើរតាមយន្ដហោះរយៈពេល ពីរម៉ោងកន្លះពីទីក្រុងគុនមីង ទៅកាន់ខេត្តសៀមរាប ជាជើងហោះហើរជិតជាងក្នុងស្រុករបស់លោក។
នៅក្នុងសាច់រឿង លោកបាននិយាយថា៖ «ប្រសិនបើមិនបានឃើញការបរិច្ចេទនៅលើផ្លាកសញ្ញាទេ ខ្ញុំប្រហែលជាគិតថា ខ្ញុំកំពុងតែធ្វើដំណើរត្រឡប់ទៅប្រទេសចិនវិញក្នុងទសវត្សរ៍ឆ្នាំ១៩៨០»។
រៀមច្បងរបស់លោកម្នាក់ បានប្រាប់ថា៖ «កម្ពុជាមានភ្ញៀវទេសចរចិនច្រើនឥឡូវនេះ។ វិស័យទេសចរណ៍បាននាំមកនូវឱកាសថ្មីៗ»។
នេះឆ្លុះបញ្ចាំងពីវត្តមានកាន់តែច្រើនឡើងនៃវប្បធម៌ និងការវិនិយោគរបស់ចិននៅក្នុងខេត្តសៀមរាប ដែលធ្វើឱ្យវាក្លាយជាគោលដៅស្វាគមន៍សម្រាប់ភ្ញៀវទេសចរចិន៕
