យុវជន ជា លឹមហេង ផលិតករភាពយន្ត វ័យ២០ឆ្នាំ កំពុងផលិតភាពយន្ដដើម្បីស្ត្រីខ្មែរ «ជម្នះ»។ រូបថត សហការី
ភ្នំពេញ៖ យុវជន ជា លឹមហេង ផលិតករភាពយន្ត វ័យ២០ឆ្នាំ កំពុងផលិតភាពយន្ដដើម្បីស្ត្រីខ្មែរ តាមរយៈការបង្ហាញស្នាដៃសិល្បៈ។ ភាពយន្តដំបូង «ជម្នះ» និយាយអំពីបញ្ហាប្រឈមជាច្រើនដែលស្ត្រីជួបប្រទះទាំងនៅក្នុងទីក្រុង និងជនបទ ក្នុងគោលបំណងបំផុសគំនិត និងលើកកម្ពស់ការយល់ដឹងអំពីការតស៊ូរបស់ពួកគេ និងភាពធន់ដែលពួកគេបង្ហាញជារៀងរាល់ថ្ងៃ។
លោក លឹមហេង ពន្យល់ថា៖ «ខ្ញុំចង់ចែករំលែកចំណេះដឹង និងដោះស្រាយបញ្ហាសង្គមតាមរយៈវិធីសាស្ត្រងាយៗ ដែលឆ្លុះបញ្ចាំងពីសង្គមបច្ចុប្បន្ន និងការតស៊ូរបស់វា”។ ភាពយន្តខ្លីបែបអប់រំអាចជួយបង្កើតអត្ថន័យសំខាន់ៗសម្រាប់មនុស្សគ្រប់វ័យដែលបានទស្សនា។
យុវជន លឹមហេង ជានិស្សិតបញ្ចប់ថ្នាក់បរិញ្ញាបត្រផ្នែករចនាក្រាហ្វិកនៅសាលា Max Real និងដេប៉ាតឺម៉ង់ភាពយន្តខ្លីក្នុងខេត្តសៀមរាប មានបទពិសោធន៍ច្រើនក្នុងការផលិតភាពយន្ត។ លោកបានចូលរួមក្នុងការថតខ្សែភាពយន្ត និងវីដេអូចម្រៀង ហើយថែមទាំងបានបើកអាជីវកម្មទាក់ទងនឹងប្រព័ន្ធផ្សព្វផ្សាយផ្ទាល់ខ្លួនទៀតផង។
លោកបានប្រាប់ភ្នំពេញប៉ុស្ដិ៍ថា៖ «អ្វីដែលជំរុញទឹកចិត្តខ្ញុំឱ្យផលិតខ្សែភាពយន្តអំពីការតស៊ូរបស់ស្ត្រីមួយចំនួននៅក្នុងប្រទេសកម្ពុជា គឺការចង់ផ្សព្វផ្សាយ និងបង្ហាញពីសក្ដានុពលដ៏អស្ចារ្យរបស់ស្ត្រីដែលបានជម្នះឧបសគ្គជាច្រើន។ ស្ត្រីនៅកម្ពុជាមានតួនាទីសំខាន់ក្នុងគ្រួសារ សេដ្ឋកិច្ច និងសង្គម»។
ហេង ជឿជាក់ថា ភាពយន្តនេះនឹងបង្ហាញមិនត្រឹមតែបញ្ហាប្រឈមដែលពួកគេស៊ូទ្រាំប៉ុណ្ណោះទេ ប៉ុន្តែពួកគេដើរតួនាទីក្នុងការកសាងអនាគតរបស់ប្រទេសផងដែរ។
យុវជន លឹមហេង ថតភាពយន្ដលើកដំបូងស្ដីពីស្រី «ជម្នះ»។ រូបថត សហការី
លោកបានបន្ថែមថា៖ «ភាពយន្តនេះជាមធ្យោបាយសម្រាប់ខ្ញុំដើម្បីបង្ហាញពីសិទ្ធិស្ត្រី និងផ្ញើសារដល់សង្គមថា ស្ត្រីគួរតែត្រូវបានគាំទ្រ និងផ្តល់សិទ្ធិអំណាច»។
ខណៈពេលដែលទទួលស្គាល់ពីសមត្ថភាពនៃខ្សែភាពយន្តផ្សេងទៀតដែលនិយាយអំពីការពង្រឹងអំណាចរបស់ស្ត្រី លោក លឹមហេង ជឿជាក់ថា ភាពយន្តរបស់លោកនឹងលេចធ្លោដោយផ្តោតលើប្រធានបទពិសេសមួយ ពោលគឺបញ្ហាប្រឈមជាក់លាក់ដែលស្ត្រីប្រឈមមុខនៅក្នុងទីក្រុង និងជនបទ។
លោកក៏សង្កត់ធ្ងន់ផងដែរ ពីសារៈសំខាន់នៃការតំណាងជាក់ស្តែង ដោយបង្ហាញពីជីវិតរបស់ស្ត្រីពិតប្រាកដ ដោយមិនមានការប្រឌិតបន្ថែម។
លើសពីនេះ យុវជន លឹមហេង ជឿជាក់លើថាមពលនៃផលិតកម្មដែលមានគុណភាពខ្ពស់ ដោយសង្កត់ធ្ងន់ទៅលើរូបភាពច្បាស់ និងការរចនាសំឡេង ដើម្បីបង្កើនការនិទានរឿង។ ជាចុងក្រោយ លោកបានសង្កត់ធ្ងន់លើសារៈសំខាន់នៃការបញ្ចេញសារដ៏ច្បាស់លាស់ និងមានឥទ្ធិពល ដែលឆ្លើយតបនឹងទស្សនិកជន និងជំរុញសកម្មភាព។
លោកបាននិយាយថា៖ «ខ្ញុំជឿថា ភាពយន្តរបស់ខ្ញុំនឹងផ្តល់ឱ្យអ្នកទស្សនានូវការយល់ដឹងដ៏មានតម្លៃ រួមទាំងការយល់ដឹងកាន់តែស៊ីជម្រៅអំពីតម្លៃ និងសិទ្ធិរបស់ស្ត្រីក្នុងសង្គម ជំរុញការទទួលស្គាល់តម្លៃស្មើគ្នា និងសិទ្ធិរបស់ស្ត្រីគ្រប់រូប។ ភាពយន្តនេះមានគោលបំណងជួយអ្នកទស្សនាកំណត់អត្តសញ្ញាណ និងប្រឈមនឹងករណីនៃភាពអយុត្តិធម៌ និងការប្រើអំណាចខុសឆ្គងលើស្ត្រី»។
តាមរយៈការធ្វើជាសាក្សីស្ត្រីជម្នះឧបសគ្គដោយភាពក្លាហាន និងការតាំងចិត្ត អ្នកមើលអាចរៀនអំពីការតស៊ូ។ ជាចុងក្រោយ លឹមហេង សង្ឃឹមថា ភាពយន្តរបស់លោកនឹងផ្តល់កម្លាំងចិត្តដល់យុវនារីឱ្យបន្តក្តីសុបិន និងសេចក្តីប្រាថ្នារបស់ពួកគេ ដោយផ្តល់ការបំផុសគំនិតដើម្បីជម្នះឧបសគ្គ និងសម្រេចបាននូវសក្តានុពលពេញលេញរបស់ពួកគេ។
លោក លឹមហេង និងក្រុមការងារផ្នែកផលិតកំពុងតែរៀបចំប្លង់ថតសកម្មភាពក្នុងរឿង «ជម្នះ»។ រូបថត សហការី
លោកបានកត់សម្គាល់ថា៖ «បទពិសោធន៍របស់ខ្ញុំក្នុងការគ្រប់គ្រងគម្រោងជាច្រើនបានផ្តល់ឱ្យខ្ញុំនូវជំនាញខ្ពស់ ដូចជា ការរៀបចំគម្រោង ការសម្របសម្រួលក្រុម និងការធានាគុណភាពបច្ចេកទេសនៃផលិតកម្ម»។
បញ្ហាប្រឈមសំខាន់ៗរបស់ផលិតកម្មរួមមានការគ្រប់គ្រងថវិកា ការស្វែងរកទីតាំងសមស្រប ការសម្របសម្រួលកាលវិភាគជាមួយតួសម្តែង និងធានាបាននូវគុណភាពបច្ចេកទេសខ្ពស់ក្នុងវិស័យ ដូចជា ការថតភាពយន្ត ការថតសំឡេង និងការកែសម្រួលជាដើម។
បញ្ហាប្រឈមទាំងនេះនឹងត្រូវបានដោះស្រាយតាមរយៈការធ្វើផែនការយ៉ាងល្អិតល្អន់ ការសហការប្រកបដោយប្រសិទ្ធភាពជាមួយក្រុមដែលមានការយកចិត្តទុកដាក់ ការកក់ទីតាំងជាមុន និងការគ្រប់គ្រងពេលវេលាយ៉ាងល្អិតល្អន់។
ជាមួយថវិកាផលិតភាពយន្ត ៤០០០ដុល្លារ លឹមហេង ជឿជាក់ថា ការផ្តោតខ្លាំងលើសាច់រឿង និងការផ្សព្វផ្សាយប្រកបដោយប្រសិទ្ធភាពនឹងធានាបាននូវភាពជោគជ័យរបស់ខ្សែភាពយន្ត។ ថវិកានឹងត្រូវបានគ្រប់គ្រងតាមរយៈការសហការជាមួយអង្គការជាតិ និងអន្តរជាតិ និងដោយការស្វែងរកការគាំទ្រពីសហគមន៍។
លោកបានបន្តថា៖ «ជាមួយនឹងភាពយន្តដំបូងនេះ យើងមិនរំពឹងថាអាចរកចំណូលបានទេ ប៉ុន្តែគោលដៅគឺដើម្បីត្រួសត្រាយផ្លូវសម្រាប់គម្រោងភាពយន្តខ្លីនាពេលអនាគត»៕
