ល្បែងចាប់កូនខ្លែង ជាល្បែងប្រពៃណី ដែលប្រជាពលរដ្ឋខ្មែរតែងតែនិយមលេងអំឡុងពេលបុណ្យចូលឆ្នាំថ្មី។ រូបថត សហការី
ភ្នំពេញ៖ ស្របពេលការប្រកាសរៀបចំសង្ក្រាន្ដសៀមរាប ជាព្រឹត្ដិការណ៍ដ៏ធំប្រចាំឆ្នាំ កម្ពុជាត្រៀមដាក់ថ្ងៃបុណ្យប្រពៃណី និងទំនៀមទម្លាប់បរមបុរាណខ្មែរក្នុងបញ្ជីបេតិកភណ្ឌពិភពលោក។
លោកនាយករដ្ឋមន្ដ្រី ហ៊ុន ម៉ាណែត បានថ្លែងជាថ្មីថា៖ «រាជរដ្ឋាភិបាលបានរៀបចំចុះបញ្ជីសង្ក្រាន្តនៅកម្ពុជា ជាសម្បត្តិបេតិកភណ្ឌពិភពលោក ហេតុនេះ សូមរដ្ឋបាលរាជធានី ខេត្ត ក្រុង ស្រុក ខណ្ឌ រៀបចំសង្ក្រាន្តឱ្យបានច្រើន និងស្របតាមប្រពៃណីជាតិខ្មែរ នៅតាមមូលដ្ឋានរបស់ខ្លួន នាឱកាសសង្ក្រាន្តឆ្នាំថ្មីខាងមុខនេះ»។
លោកនាយករដ្ឋមន្ដ្រី បានបញ្ជាក់ថា៖ «សង្ឃឹមថា សង្ក្រាន្ដនៅកម្ពុជានឹងអាចចុះក្នុងបេតិកភណ្ឌពិភពលោកក្នុងពេលឆាប់ៗខាងមុខនេះ។ សង្ក្រាន្ដមិនមែនជាកម្មសិទ្ធិផ្ដាច់មុខរបស់ប្រទេសណាទេ។ ប្រទេសដែលមានវប្បធម៌ស្រដៀងគ្នា គាត់មានសិទ្ធិជារបស់គាត់ មិនខុសពីគុនខ្មែរ មួយថៃ ឬក្បាច់គុនប្រទេសផ្សេងនោះទេ»។
ជាមួយការលើកឡើងក្នុងពិធី «អបអរសាទរទិវាវប្បធម៌ជាតិ ៣មីនា លើកទី ២៧ និងសំណេះសំណាល ពិសាអាហារសាមគ្គីជាមួយសិល្បករ សិល្បការិនី» កាលពីថ្ងៃទី៥ ខែមីនា លោកនាយករដ្ឋមន្ដ្រី បានលើកទឹកចិត្តឱ្យក្រសួងវប្បធម៌ និងវិចិត្រសិល្បៈ និងវិស័យឯកជនបញ្ជូនមន្ត្រី សិល្បករ សិល្បការិនី ទៅសិក្សា ដកពិសោធន៍ និងសហការជាមួយដៃគូ ក្នុងការរៀបចំវគ្គបណ្តុះបណ្តាលជំនាញក្នុងស្រុក។
លោក ឈត ប៊ុនថង អ្នកជំនាញផ្នែកវប្បធម៌ និងសង្គម នៃរាជបណ្ឌិតសភាកម្ពុជា បានឱ្យដឹងថា ការដាក់បញ្ចូលសង្ក្រាន្ដចូលក្នុងបញ្ជីបេតិកភណ្ឌពិភពលោកគឺជារឿងល្អ ដែលកម្ពុជាបាននិងកំពុងធ្វើមកជាបន្ដបន្ទាប់។
លោកបានប្រាប់ភ្នំពេញប៉ុស្ដិ៍ថា៖ «ជាការពិត ការរៀបចំដាក់សង្ក្រាន្ដខ្មែរចូលក្នុងបញ្ជីវប្បធម៌អរូបីពិភពលោក ក្រសួង ស្ថាប័ន និងជំនាញពាក់ព័ន្ធចាំបាច់ត្រូវធ្វើការងារស្នូល ដែលតម្រូវតាមអង្គការ UNESCO។ ប៉ុន្ដែវាទាមទារឱ្យមានការចូលរួមពីប្រជាពលរដ្ឋផងដែរ ដោយសារមរតកអរូបីនេះ វាជាចំណេះដឹង ផ្នត់គំនិត ការយល់ឃើញ និងទេពកោសល្យរបស់មនុស្ស»។
ប្រជាពលរដ្ឋខ្មែរខិតខំបញ្ចេញសិល្បៈ ប្រពៃណីទាំងនេះឱ្យពិភពលោកបានស្គាល់អំពីសង្ក្រាន្ដខ្មែរ តាមរយៈល្បែងប្រជាប្រិយ ច្រៀងចម្រៀងប្រពៃណីជាដើម។
ចំពោះសង្ក្រាន្ដឆ្នាំថ្មីខាងមុខដែលត្រៀមរៀបចំគ្រប់ទីកន្លែងទូទាំងប្រទេសនេះ លោក ប៊ុនថង បានថ្លែងថា រាល់ទម្រង់ត្រូវតែជារបស់ខ្មែរ ពលរដ្ឋ អាជ្ញាធរ អ្នកជំនាញ សិល្បករខ្មែរត្រូវចូលរួមគគ្រឹកគគ្រែង ចៀសវាងការយល់ច្រឡំទម្រង់សិល្បៈរបស់ប្រទេសថៃ។
លោកបានបន្ដថា៖ «បើសិនអ្នកជំនាញរបស់អង្គការ UNESCO សិក្សាជ្រាវជ្រាវ ក៏ដូចជាបង្ហាញពីលទ្ធផលនៃការស្រាវជ្រាវ នោះវាមិនមានអ្វីគួរឱ្យព្រួយបារម្ភទេ ពីព្រោះប្រវត្ដិសាស្ដ្រខ្មែរ ទឹកដីខ្មែរ ប្រពៃណីទំនៀមទម្លាប់ខ្មែរនេះមានតាំងពីបុរាណកាល មុនទាំងថៃមាននគរ មានរដ្ឋទៅទៀត»។
លោក ប៊ុនថង យល់ឃើញថា សង្ក្រាន្ដខ្មែរក្នុងបញ្ជីបេតិកភណ្ឌមិនមានភាពចម្រូងចម្រាសជាមួយសង្ក្រាន្ដប្រទេសដទៃនោះទេ ដោយសារការចុះបញ្ជីក្នុងអង្គការ UNESCO ទម្រង់សិល្បៈមានលក្ខណៈខុសគ្នា ដែលអាស្រ័យលើមូលដ្ឋាន ក៏ដូចជាប្រវត្ដិច្បាស់លាស់។
លោកបានបញ្ជាក់ថា៖ «ប្រទេសជិតខាងគ្នាប្រាកដជាមានសិល្បៈវប្បធម៌ស្រដៀងគ្នាខ្លះ តែមិនដូចគ្នានោះទេ។ វាមិនចម្រូងចម្រាសទេ តែអាចមានអត្ថាធិប្បាយខុសៗគ្នា»។
លោកនាយករដ្ឋមន្ដ្រី បានថ្លែងថា ទាំងយុវជន និងពលរដ្ឋទូទៅ រួមទាំងសិល្បករជើងចាស់ និងជំនាន់ថ្មីចូលរួមយ៉ាងផុសផុលដើម្បីគាំទ្រដល់ល្បែងប្រពៃណីខ្មែរ។
លោកបានថ្លែងថា៖ «ឆ្នាំនេះ យើងរៀបចំអង្គរសង្ក្រាន្ដ ដោយមានការសម្ដែងសិល្បៈប្រពៃណី រួមទាំងថ្នាក់ខេត្ដ និងស្រុកត្រូវរៀបចំឱ្យបានច្រើន ជំរុញការលេងល្បែងប្រជាប្រិយរបស់យើងឱ្យបានច្រើន ដើម្បីលើកស្ទួយសិល្បៈ វប្បធម៌»។
ពាក់ព័ន្ធនឹងវិស័យសិល្បៈនេះ លោកនាយករដ្ឋមន្ដ្រី លើកទឹកចិត្តដល់ការកែច្នៃ ការបង្កើតថ្មី ការប្រើប្រាស់បច្ចេកវិទ្យាជំនាន់ថ្មី ដោយឈរលើការរក្សាអត្តសញ្ញាណជាតិជាគោល បន្តការស្រាវជ្រាវ និងចងក្រងនូវសិល្បវប្បធម៌ ជាពិសេសប្រភេទសិល្បៈដែលមានហានិភ័យខ្ពស់៕
