តារាម៉ូដែល Hamza ពាក់សំលៀកបំពាក់ Ambre Men។ Photo by Sophea Ke
ភ្នំពេញ៖ កម្មវិធី Phnom Penh Designer Week ដែលប្រារព្ធឡើងពីរដងក្នុងមួយឆ្នាំ បានត្រៀមរៀបចំការបង្ហាញម៉ូដដ៏អស្ចារ្យរយៈពេលពីរថ្ងៃនៅឯសណ្ឋាគាររ៉ូសវូដភ្នំពេញដ៏ប្រណីត នឹងនាំមកនូវការបង្ហាញពីទេពកោសល្យ និងភាពច្នៃប្រឌិតដោយអ្នកច្នៃម៉ូដ ៧ រូប នៅថ្ងៃទី ៣០ និង ៣១ ខែឧសភា ឆ្នាំ២០២៥។
នេះបើតាមការប្រកាសក្នុងសន្និសីទកាសែតនៅសណ្ឋាគាររ៉ូសវូដភ្នំពេញ កាលពីថ្ងៃទី ២២ ខែមេសា ឆ្នាំ២០២៥។
អ្នករៀបចំកម្មវិធីសន្យាថានឹងរៀបចំព្រឹត្តិការណ៍មួយដែលនឹងប្រឹងប្រែងអស់ពីសមត្ថភាពដើម្បីទទួលស្វាគមន៍ភ្ញៀវកិត្តិយសដែលចូលចិត្តម៉ូដ។
សប្តាហ៍អ្នករចនាម៉ូដភ្នំពេញឆ្នាំនេះនឹងផ្ដោតលើប្រធានបទដ៏គួរឱ្យចាប់អារម្មណ៍គឺ «មរតកផុយស្រួយ» (Fragile Heritage)។ ប្រធានបទនេះគឺជាការអំពាវនាវដោយផ្ទាល់ដល់អ្នករចនាម៉ូដឱ្យលើកកម្ពស់សាវតាមរតកក្នុងការបំផុសគំនិតច្នៃម៉ូដរបស់ពួកគេ ស្របទៅនឹងនិន្នាការច្នៃម៉ូដសកល។
សារសំខាន់នៃភាពច្នៃប្រឌិតត្រូវផ្សារភ្ជាប់យ៉ាងជិតស្និទ្ធទៅនឹងភាពសម្បូរបែបនៃវប្បធម៌ និងការប្រារព្ធអបអរភាពចម្រុះនៃសាវតាមរតកមនុស្សជាតិ។
អ្នករចនាម៉ូដជនជាតិហ្វីលីពីន Don Protasio ដែលជាសហស្ថាបនិក PPDW ជាមួយនឹងលោក Sophea Ke បានក្លាយជាកម្លាំងចលករនៅពីក្រោយព្រឹត្តិការណ៍ ដែលប្រារព្ធឡើងពីរដងក្នុងមួយឆ្នាំ ដើម្បីផ្ដល់ជាវេទិកាសំខាន់សម្រាប់អ្នកជំនាញច្នៃម៉ូដទាំងក្នុងស្រុក និងអន្តរជាតិ។
តារាម៉ូដែល Sofia ពាក់សំលៀកបំពាក់ A.N.D.។ Photo by Sophea Ke
ថ្លែងនៅក្នុងសន្និសីទកាសែត លោក Protasio បានពណ៌នាព្រឹត្តិការណ៍សន្និសីទកាសែតកាលពីថ្ងៃទី ២២ ខែមេសាថាជា៖ «សន្និសីទកាសែតជាពិធីជប់លៀងស្រាក្រឡុកនេះជាឱកាសអ្នកស្រឡាញ់វិស័យម៉ូដ និងអ្នកច្នៃម៉ូដបានជួបជុំគ្នា ដែលជាឱកាសដ៏កម្រ ព្រោះយើងមិនបានជួបអ្នកញឹកញាប់ទេ នៅពេលដែលយើងរៀបចំកម្មវិធីបង្ហាញម៉ូដ យើងរវល់ខ្លាំងនៅខាងក្រោយឆាក គ្មានពេលនិយាយគ្នា ហើយកម្មវិធីចប់ម្នាក់ៗគ្រាន់តែចង់ត្រឡប់ទៅផ្ទះវិញសម្រាក»។
លោកបានបន្តថា៖ «វាពិតជាអស្ចារ្យណាស់ដែលបានឃើញអ្នកក្នុងឧស្សាហកម្មម៉ូដអ្នកទាំងអស់គ្នានៅទីនេះ រួមជាមួយអ្នកស្នងរបស់ពួកគេ សម្រាប់កម្មវិធីបង្ហាញម៉ូដនាពេលខាងមុខនៅថ្ងៃទី ៣០ និង ៣១ ខែឧសភានៅរ៉ូសវូដ ដែលខ្ញុំជឿជាក់ថា កម្មវិធីនេះនឹងបន្តមានច្រើនលើកទៀត»។
បើយើងក្រឡេកមកមើលម៉ូដរបស់ស្ត្រី និងការបង្កើតលំនាំប្លែកៗនៅពេលរាត្រី សម្លៀកបំពាក់ស្ត្រីដែលបានបង្ហាញដោយ AND, ESSK, SCT និង Alfredo Vaez ជាសម្លៀកបំពាក់ស៊ីវិល័យក្នុងទីក្រុង រ៉ូបរាត្រីសមោសរ ដែលប្លែកពីគេ វាជាអ្វីដែលគួរឱ្យចាប់អារម្មណ៍ជាខ្លាំង។
ការពិសោធន៍រូបរាងម៉ូដ និងរចនាប័ទ្មទាន់សម័យជាមួយនឹងភាពស្រទន់ជាងមុនសម្រាប់សម្លៀកបំពាក់បុរស និងបង្ហាញពីការប្រមូលផ្ដុំម៉ូដរបស់ Ambre Men, Drewe Taylor Designs និង Don Protasio ភាពជាបុរសដ៏ត្រេកត្រអាល និងរូបរាងឆ្ពោះទៅមុខ គឺជាសំណើដ៏គួរឱ្យរំភើបសម្រាប់បុរសទាន់សម័យទាំងអស់។
គោលបំណងសំខាន់នៃសប្តាហ៍អ្នករចនាម៉ូដភ្នំពេញគឺដើម្បីផ្តល់នូវវេទិកាសំខាន់មួយសម្រាប់អ្នករចនាម៉ូដ និងម៉ាកយីហោដែលខិតខំកសាងអត្តសញ្ញាណច្បាស់លាស់ តាមរយៈការបង្កើតយុទ្ធសាស្ត្រអាជីវកម្មដែលមានសុខភាពល្អ និងការបណ្តុះវត្តមានទីផ្សាររបស់ពួកគេសម្រាប់ការរីកចម្រើនប្រកបដោយនិរន្តរភាព។
កញ្ញា កុយ អេណា ពាក់សំលៀកបំពាក់ Alfredo Vaez។ Photo by Sophea Ke
អតីតបវរកញ្ញារងទីមួយនៃការប្រឡង Miss Grand Cambodia ឆ្នាំ ២០២៣ កញ្ញា កុយ អេណា បានសម្តែងនូវភាពរីករាយក្នុងឱកាសចូលរួម PPDW រដូវក្ដៅឆ្នាំនេះ។
តារាម៉ូដែល និងតារាសម្តែងរូបនេះបានប្រាប់ថា៖ «ម្មវិធីបែបខ្ញុំ ខ្ញុំធ្លាប់ស្រមៃដែរ កាលពីពីរទៅបីឆ្នាំមុនចង់មកចូលរួមបែបចឹងៗ។ អាចនិយាយបានថា សប្បាយចិត្ត រំភើបរីករាយមែនទែន ព្រោះថាកម្មវិធីនេះប្រជុំទៅដោយអ្នកឌីហ្សាញកំពូលៗនៅស្រុកខ្មែរ ក៏ដូចជាមកពីបណ្ដាប្រទេសផ្សេងទៀត។ អ៊ីចឹងក្នុងនាមខ្ញុំជាម៉ូដែលម្នាក់ ហើយខ្ញុំចង់អភិវឌ្ឍខ្លួនឯងជាម៉ូដែលដ៏ពេញលេញម្នាក់»។
មានដើមកំណើតមកពីអាហ្វ្រិកខាងត្បូង អ្នកច្នៃម៉ូដ Drewe Taylor បញ្ចូលគ្នានូវការ ច្នៃម៉ូដប្រកបដោយសិល្បៈជាមួយនឹងវត្ថុធាតុដើមប្រណីត ក្នុងឧស្សាហកម្មហ្វេសសិនគិតគូរដល់សង្គម និងនិរន្តរភាព។
លោក Drewe Ryan Taylor បានលើកឡើងថា៖ «ម៉ូដមានសោភ័ណភាពបែបត្រូពិច។ ផ្ទុយពីការបង្ហាញម៉ូដលើកមុនៗដែលបង្ហាញពីពណ៌ស្រទន់ និងស្រាល រដូវកាលថ្មីទទួលបានការបំផុសគំនិតពីប្រទេសឥណ្ឌា និងឆ្លុះបញ្ចាំងពីបញ្ហាសំខាន់ៗនៃការប្រែប្រួលអាកាសធាតុ និងការឡើងកំដៅផែនដី តាមរយៈរចនាប័ទ្មនៃការច្នៃម៉ូដ និងជម្រើសនៃក្រណាត់»។
តារាម៉ូដែល ចំរើន ចំរ៉ុង ដែលបានចូលរួមសន្និសីទកាសែត បានចែករំលែកនូវភាពរំភើបរបស់គាត់ចំពោះការបង្ហាញសំលៀកបំពាក់របស់ Drewe Taylor ជាលើកទីពីរ ដោយកត់សម្គាល់ថា៖ «ឈុតរបស់គាត់គឺមានការ បំផុសគំនិតមកលក្ខណៈ Colorful មានលក្ខណៈបែប LGBT ច្រើន បើនិយាយពី Concept ដែលធ្វើឱ្យខ្ញុំចូលចិត្តខូលិកសិនរបស់គាត់ថ្មីៗដែលគាត់មានភាពច្នៃប្រឌិតច្រើនដែលពាក់ព័ន្ធនឹងការប្រែប្រួលអាកាសធាតុ ដូចជាស្ទាយបែបឥណ្ឌា ដែលធ្វើឱ្យអតិថិជនរបស់គាត់ចាប់អារម្មណ៍នឹងឈុតរបស់គាត់កាន់តែច្រើន»។
តារាម៉ូដែលដើរលើវេទិកានៃសប្តាហ៍អ្នករចនាម៉ូដភ្នំពេញឆ្នាំ ២០២៣ នៅសណ្ឋាគាររ៉ូសវូដភ្នំពេញ។ Post Staff
តារាម៉ូដែលម្នាក់ទៀត គង់ យ៉ាងណាន បានគាំទ្រនូវអារម្មណ៍នេះ ដោយបញ្ជាក់ថា៖ «ខ្ញុំរីករាយមែនទែនដែលបានចូលរួមបង្ហាញម៉ូដឱ្យខូលិកសិនបស់គាត់។ អ្វីដែលត្រៀមខ្លួនគឺសម្រាប់រូបរាងកាយ គឺខូលិកសិនរបស់គាត់មានបែបស៊ិចស៊ីជាច្រើន អ៊ីចឹងយើងព្យាយាម Gym ឱ្យបានច្រើនដើម្បីទទួលបានរាងកាយដ៏ស្រស់ស្អាតដើម្បីដើរម៉ូតក្នុងថ្ងៃខាងមុខហ្នឹង»។
លោក អាឡិច ដែលជាតារាម៉ូដែល និងអ្នកច្នៃម៉ូដមួយរូបដែលបានចូលរួមកម្មវិធី PPDW ជាច្រើនលើករួចមកហើយនោះ បានលើកឡើងថា កម្មវិធីនេះតែងតែនាំមកនូវអ្វីដែលប្លែកជារៀងរាល់ឆ្នាំ។
លោកនិយាយថា៖ «ជារៀងរាល់ឆ្នាំ ខ្ញុំចូលរួមជាតារាម៉ូដែលក្នុងកម្មវិធី ប៉ុន្តែថ្ងៃណាមួយខ្ញុំសង្ឃឹមថានឹងចូលរួមជាអ្នករចនាម៉ូដែលក្នុងកម្មវិធីនេះដែរ។ ខ្ញុំត្រៀមខ្លួនរួចជាស្រេចសម្រាប់កម្មវិធីនេះ ព្រោះខ្ញុំបានចូលរួមក្នុងឧស្សាហកម្មនេះជាយូរមកហើយក្នុងនាមជាតារាម៉ូដែល"។
ជាមួយនឹងការទន្ទឹងរង់ចាំកាន់តែខ្លាំងឡើង សប្តាហ៍អ្នករចនាម៉ូដភ្នំពេញសន្យាថានឹងក្លាយជាពេលវេលាដ៏សំខាន់មួយនៅក្នុងប្រតិទិនម៉ូដ ដោយប្រារព្ធនូវមរតក ភាពច្នៃប្រឌិត និងទេពកោសល្យដែលកំពុងរីកចម្រើននៅក្នុងប្រទេសកម្ពុជា។
កម្មវិធី PPDW ត្រូវផលិតឡើងដោយ Fashion Lab ក្នុងកិច្ចសហការជាមួយ Rosewood Phnom Penh, Minerva TV និងដៃគូប្រព័ន្ធផ្សព្វផ្សាយដ៏រឹងមាំ រួមមាន Phnom Penh Post, Khmerer និង Sovrin Magazine៕
អ្នកច្នៃម៉ូដលោក Ryan និងកញ្ញា កុយ អេណា ក្នុងសន្និសីទកាសែតកាលពីថ្ងៃទី ២២ ខែមេសា ឆ្នាំ ២០២៥។ សហការី
