.jpg)
សមត្ថកិច្ចក្នុងពេលកំពុងដុតកម្ទេចសាច់ខូចគុណភាពដែលនាំចូលពីថៃ កាលពីថ្ងៃ ទី១៩ មិថុនា ។ រូបថត ក.ប.ប.
បាត់ដំបងៈ សមត្ថកិច្ចចម្រុះខេត្តបាត់ដំបង បានដុតកម្ទេចសាច់ខូចគុណភាពជិត ២ តោនដែលឈ្មួញបាននាំចូលពីប្រទេសថៃ តាមច្រកព្រំដែនក្នុងស្រុក កំរៀង ហើយជនល្មើសត្រូវបានឃាត់ខ្លួន។ នេះបើតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម។
ក.ប.ប. បានបញ្ជាក់លើហ្វេសប៊ុករបស់ខ្លួន កាលពីថ្ងៃទី ១៩ ខែមិថុនាថា៖ «សាច់មាន់ ស្លាបមាន់ សាច់ជ្រូកគ្រឿងក្នុងជ្រូក និង ប្រហិតចម្រុះខូចគុណភាពប្រមាណជិត ២ តោន ដែលនាំចូលពីបរទេសត្រូវបានសមត្ថកិច្ចចម្រុះចាប់ដុត
កម្ទេចចោល»។
ហ្វេសប៊ុកដដែលឱ្យដឹងថា កាលពីថ្ងៃទី១៩ មិថុនា កម្លាំងជំនាញរបស់សាខា (ក.ប.ប.) ខេត្តបាត់ដំបង បានសហការជាមួយកម្លាំងនៃអធិការដ្ឋាននគរបាលនិងអាជ្ញាធរស្រុក កំរៀង បានចុះត្រួតពិនិត្យសាច់ទាំងនេះសរុបចំនួន ១ ៩០០ គីឡូក្រាមដែលត្រូវបានសមត្ថកិច្ចឃាត់ចាប់បាន កាលពីយប់ថ្ងៃទី១៨ ខែមិថុនា។
ប្រភពដដែលបញ្ជាក់ថា ក្រោយការត្រួតពិនិត្យ មន្រ្តីជំនាញ (ក.ប.ប.) បានសន្និដ្ឋានថា ការដឹកជញ្ជូន ការវេចខ្ចប់និងសីតុណ្ហភាពទំនិញមិនត្រឹមត្រូវតាមលក្ខណៈបច្ចេកទេសធ្វើឱ្យទំនិញដែលជាសាច់ស្រស់ប្រែប្រួលខូចគុណភាពមានចម្លងមេរោគនិងមិនសមស្របសម្រាប់យកទៅធ្វើជាអាហារសម្រាប់មនុស្សបរិភោគបានឡើយ។
ហ្វេសប៊ុកដដែលបន្ថែមថា៖ «ដើម្បីការពារសុខភាពជូនប្រជាពលរដ្ឋនិងដោយមានការឯកភាពពីឯកឧត្តមព្រះរាជអាជ្ញាអមសាលាដំបូងខេត្តបាត់ដំបង សមត្ថកិច្ចចម្រុះបានធ្វើការដុតកម្ទចចោលទំនិញខូចគុណភាពទាំងនោះនៅរសៀលថ្ងៃខែ និងឆ្នាំដដែល (១៩ មិថុនា)»។
លោក ហាក់ សុខរិន ប្រធានសាខា(ក.ប.ប.)ខេត្តបាត់ដំបងប្រាប់ភ្នំពេញប៉ុស្តិ៍នៅថ្ងៃទី២០ខែមិថុនាថា សាច់ខូចគុណភាពទាំងនេះត្រូវបានឈ្មួញនាំចូលពីប្រទេសថៃ ហើយត្រូវបានព្រះរាជអាជ្ញាអមសាលាដំបូងខេត្តបាត់ដំបង ចេញដីកាឱ្យនគរបាលស្រុកកំរៀងឃាត់ខ្លួនបណ្តោះអាសន្នដែលរួមមាន អ្នកបើកបររថយន្ត ព្រូ និងម្ចាស់ទំនិញ។
លោកថា៖ «ប៉ូលិសនៅស្រុកកំរៀង គាត់ចាប់បាន។ ម្សិលមិញខាងខ្ញុំទៅដុតកម្ទេចចោលនៅ (ស្រុក) កំរៀងហ្នឹង ១ ៩០០ គីឡូក្រាម»។
លោក ហាក់ សុខរិន បានបន្តថា ទំនិញទាំងនេះមិនសមស្របនឹងលក្ខខណ្ឌនៃការដឹកជញ្ជូននិងអនាម័យទេហើយពេលមន្ត្រីរបស់លោកចុះទៅត្រួតពិនិត្យគឺមានធុំក្លិនហើយទំនិញនេះក៏មិនមានឯកសារបញ្ជាក់ដែរ។ការងារនេះ(ក.ប.ប.)របស់លោកនឹងបន្តសហការជាមួយមន្ត្រីនគរបាលនិងព្រះរាជអាជ្ញាតុលាការខេត្តដើម្បីស្រាវជ្រាវនិងបង្រ្កាបទំនិញនាំចូលដែលខូចគុណភាពគ្រប់ពេលដែលទទួលបានព័ត៌មាន។
លោកផាន រតនា អ្នកនាំពាក្យអយ្យការអមសាលាដំបូងខេត្ដបាត់ដំបងមិនអាចទាក់ទងបានដើម្បីសុំការបញ្ជាក់បានទេកាលពីថ្ងៃទី២០ ខែមិថុនា។
កាលពី៧ ខែមិថុនាថ្មីៗនេះ សមត្ថកិច្ចអគ្គនាយកដ្ឋាន(ក.ប.ប.)និងមន្ត្រីគយចល័តខេត្តបាត់ដំបងក៏ធ្លាប់ស្ទាក់ចាប់បាននិងដុតបំផ្លាញសាច់ចម្រុះខូចគុណភាពជាង៥តោន នៅច្រកទ្វារអន្តរជាតិដូងនៃស្រុកកំរៀងនេះផងដែរ។
ដោយឡែកកាលពីថ្ងៃទី១៧ខែមិថុនាមន្ត្រីសាខា(ក.ប.ប.)ខេត្តបន្ទាយមានជ័យបានបំផ្លាញស្រាថ្នាំតាំងគួយចំនួន ២ ៣១៣យួរ ស្មើ ២៧ ៧៥៦ដប នៅក្រុងប៉ោយប៉ែត ដោយសារមានកម្រិតជាពុលខ្ពស់។
អគ្គនាយកដ្ឋាន(ក.ប.ប.)បញ្ជាក់លើហ្វេសប៊ុករបស់ខ្លួនពីថ្ងៃទី១៧ ខែមិថុនាថា ស្រាថ្នាំតាំងគួយនេះបានបណ្តាលឱ្យមនុស្សពុលស្លាប់ចំនួន៧នាក់ក្នុងនោះមានជនជាតិថៃចំនួន១នាក់ផង។ករណីនេះដោយសារស្រានេះមានសារធាតុមេតាណុលកម្រិតខ្ពស់រហូតដល់១៤ភាគរយ ។
បើតាមអគ្គនាយកដ្ឋាន(ក.ប.ប.) ស្រាថ្នាំតាំងគួយនេះល្មើសនឹងច្បាប់ស្តីពីការគ្រប់គ្រងគុណភាពសុវត្ថិភាពលើផលិតផលទំនិញនិងសេវា ត្រង់មាត្រា១៨ ជំពូកទី៤ ចែងថាត្រូវហាមឃាត់ការធ្វើពាណិជ្ជកម្មនូវផលិតផលម្ហូបអាហារដែលមានសភាពប្រែប្រួលខូចគុណភាពឬមានជាតិពុលឬផលិតផលនោះមិនស្របនឹងលក្ខណៈវិនិច្ឆ័យគុណភាពផ្នែកអតិសុខុមជីវសាស្រ្តឬអនាម័យ ដែលកំណត់តាមបទប្បញ្ញត្តិនៃក្រសួងពាក់ព័ន្ធ ។
មាត្រា៦៣នៃច្បាប់ដដែលចែងថា ជនណាដែលប្រព្រឹត្តល្មើសនឹងមាត្រា ១៦ ១៧ ១៨ និង ២១ នៃច្បាប់នេះត្រូវផ្តន្ទាទោសដាក់ពន្ធនាគារពី១ខែដល់១ឆ្នាំនិងពិន័យជាប្រាក់ពី៥លានរៀលដល់១០លានរៀលឬទោសណាមួយនៃទោសទាំង២៕
