មន្ត្រី ក.ប.ប ចុះត្រួតពិនិត្យតាមឱសថស្ថានក្នុងរាជធានីភ្នំពេញកន្លងមក។ រូប ក.ប.ប
ភ្នំពេញៈ មន្ដ្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ (ក.ប.ប) នៅថ្ងៃទី ២៩ ខែមិថុនា បានបើកយុទ្ធនាការចុះផ្សព្វផ្សាយ និងត្រួតពិនិត្យហាមឃាត់ ការដាក់លក់ឧបករណ៍សម្រាប់ធ្វើតេស្តរកអង់ទីគ័រការពារជំងឺកូវីដ ១៩ នៅតាមទីផ្សារ ឱសថស្ថាននានានៅរាជធានីភ្នំពេញ ក្រោយពីក្រសួងសុខាភិបាល មិនអនុញ្ញាតឱ្យប្រើប្រាស់ និងដាក់លក់ឧបករណ៍សម្រាប់ធ្វើតេស្តនេះ។
លោក ហេង មាលី ប្រធានសាខា ក.ប.ប រាជធានីភ្នំពេញថ្លែងប្រាប់ ភ្នំពេញ ប៉ុស្ដិ៍ នាថ្ងៃទី ៣០ ខែមិថុនាថា ក្នុងពេលចុះអនុវត្ដយុទ្ធនាការផ្សព្វផ្សាយ និងត្រួតពិនិត្យហាមឃាត់ការដាក់លក់ឧបករណ៍សម្រាប់ធ្វើតេស្តរកអង់ទីគ័រការពារជំងឺកូវីដ ១៩ កាលពីថ្ងៃទី ២៩ ខែមិថុនា ឱសថស្ថានចំនួន ៨៦ ក្នុងខណ្ឌចំនួន ៣ នៅក្នុងរាជធានីភ្នំពេញត្រូវបានមន្ត្រីជំនាញចុះផ្សព្វផ្សាយ និងត្រួតពិនិត្យហាមដាក់លក់ឧបករណ៍សម្រាប់ធ្វើតេស្តរកអង់ទីគ័រការពារជំងឺកូវីដ ១៩។
លោកថ្លែងថា៖ «ការអនុវត្ដយុទ្ធនាការនេះ គឺមន្ត្រីជំនាញបានចុះផ្សព្វផ្សាយ និងត្រួតពិនិត្យការដាក់លក់ឧបករណ៍សម្រាប់ធ្វើតេស្តរកអង់ទីគ័រការពារជំងឺកូវីដ ១៩ យោងតាមសេចក្តីប្រកាសរបស់ក្រសួងសុខាភិបាលមិនអនុញ្ញាតឱ្យប្រើប្រាស់ និងដាក់លក់ឧបករណ៍សម្រាប់ធ្វើតេស្តរកអង់ទីគ័រការពារជំងឺកូវីដ ១៩ លើទីផ្សារទេ»។
ឱសថស្ថានដែលមានទីតាំងស្ថិតនៅម្តុំផ្សារអូឡាំពិក និងផ្សារតាប៉ាង ដែលមានឱសថស្ថានចំនួន ៨៦ ក្នុងខណ្ឌចំនួន ៣ ក្នុងនោះមានខណ្ឌបឹងកេងកង ខណ្ឌ ៧ មករា និងខណ្ឌដូនពេញត្រូវបានមន្ដ្រីជំនាញចុះអនុវត្ដយុទ្ធនាការ។
លោក មាលី បញ្ជាក់ថា៖ «ជាលទ្ធផល ឱសថស្ថានទាំងអស់នោះពុំមានដាក់លក់ និងពុំដែលធ្លាប់មានលក់ឧបករណ៍តេស្តរកអង់ទីគ័រការពារជំងឺកូវីដ ១៩ ឡើយ និងបានណែនាំឱសថស្ថានទាំង ៨៦ ទីតាំង មិនឱ្យមានការដាក់លក់បើមិនមានការអនុញ្ញាត និងទទួលស្គាល់ពីក្រសួងសុខាភិបាល»។
លោកបន្តថា៖ «ក្រោយការស៊ើបអង្កេត និងសាកសួរ ជាលទ្ធផលយើងអាចសនិ្នដ្ឋានបានថា នៅលើទីផ្សារធំៗ ជាពិសេសឱសថស្ថាន គឺមិនមានការដាក់តាំងលក់ឧបករណ៍តេស្តរកអង់ទីគ័រការពារជំងឺកូវីដ ១៩ ទេ»។
ក្រោយត្រួតពិនិត្យ មន្ដ្រីជំនាញបានធ្វើការណែនាំទៅដល់អាជីវករ និងឱសថស្ថានទាំងអស់បើសិនជាទទួលបានព័ត៌មាន ឬឃើញមានការលក់ដូរ ឧបករណ៍តេស្តរកអង់ទីគ័ការពារជំងឺកូវីដ ១៩ ត្រូវរាយការណ៍មកសមត្ថកិច្ចជំនាញ ឬក្រសួងសុខាភិបាល ដើម្បីចាត់វិធានការច្បាប់ ចំពោះជនលក់ដូរឧបករណ៍តេស្តរកអង់ទីគ័រការពារជំងឺកូវីដ ១៩ នេះ។
ក្រសួងសុខាភិបាលកាលពីថ្ងៃទី ២១ ខែមិថុនាបានប្រកាសហាមឃាត់ការចែកចាយលក់ និងធ្វើតេស្តរហ័សរកអង់ទីគ័រការពារជំងឺកូវីដ ១៩ ដោយប្រើប្រាស់ឧបករណ៍ធ្វើតេស្តរហ័សដែលគ្មានលេខបញ្ជិកា និងគ្មានការទទួលស្គាល់ពីក្រសួងសុខាភិបាល។ ក្រសួងក៏បានព្រមានចាត់វិធានការតឹងរ៉ឹង ចំពោះសេវាសុខាភិបាលឯកជនណាដែលនៅតែឆ្លៀតប្រើប្រាស់ឧបករណ៍ជាប់បម្រាមទាំងនេះ។
ការប្រកាសហាមឃាត់ និងព្រមាននេះ ធ្វើឡើងបន្ទាប់ពីមានគណនីហ្វេសប៊ុកចំនួន ៤ គឺ ១ បងប្រុសទីពីរ,២ LengKuchnika Pol,៣Srey Nit,៤TMS-Trust Medical Services បាននិងកំពុងផ្សព្វផ្សាយលក់ឧបករណ៍តេស្ដរហ័សរកអង់ទីគ័រការពារជំងឺកូវីដ ១៩ ទាំងនេះ ដោយគ្មានចុះលេខបញ្ជិកា និងពុំមានការទទួលស្គាល់ពីក្រសួងសុខាភិបាល។ ក្រសួងបានឱ្យដឹងថា ក៏មានសេវាសុខាភិបាលឯកជនមួយចំនួនទៀតក៏កំពុងយកឧបករណ៍ទាំងនេះទៅធ្វើតេស្តជូនពលរដ្ឋយ៉ាងអនាធិបតេយ្យផងដែរ។
ក្រសួងសុខាភិបាលបញ្ជាក់ថា៖ «តេស្តរហ័សរកអង់ទីគ័រការពារកូរីដ ១៩ ដែលកំពុងចរាចរខាងលើនេះគឺពុំមានការចុះបញ្ជិកាពីក្រសួងសុខាភិបាលនៅឡើយ ហើយក៏ពុំទាន់មានការទទួលស្គាល់ពីអង្គការសុខភាពពិភពលោក (WHO) នៅឡើយដែរ ហើយលទ្ធផលដែលបានមកពីការប្រើប្រាស់តេស្តទាំងនេះ គឺមិនអាចជឿជាក់បានឡើយ»។
លោកស្រី លី អៃឡែន តំណាងអង្គការ WHO ប្រចាំកម្ពុជា ថ្លែងប្រាប់អ្នកសារព័ត៌មានកាលពីថ្ងៃទី ២៣ ខែមិថុនាថា គ្មានការចាំបាច់ទេក្នុងការធ្វើតេស្ដរកអង់ទីគ័រ ក្រោយពេលចាក់វ៉ាក់សាំងការពារជំងឺកូវីដ ១៩ រួច ដោយសាររហូតមកដល់ពេលនេះអង្គការ WHO មិនបានផ្ដល់អនុសាសន៍ឱ្យអនុវត្ដវិធីសាស្ដ្រស្វែងរកអង់ទីគ័របន្ទាប់ពីការចាក់វ៉ាក់សាំងការពារជំងឺកូវីដ ១៩ នេះទេ។
លោកស្រីថ្លែងថា គ្រប់វ៉ាក់សាំងដែលបានប្រើប្រាស់រហូតមកដល់ពេលនេះ គឺសុទ្ធតែបានទទួលស្គាល់ដោយអង្គការសុខភាពពិភពលោកដែលជាវ៉ាក់សាំងអនុញ្ញាតឱ្យប្រើប្រាស់នៅក្នុងគ្រាអាសន្ន និងបានធ្វើតេស្ដបញ្ជាក់តាមលក្ខណៈវិទ្យាសាស្ដ្រ និងឆ្លងកាត់ការបញ្ជាក់ជាច្រើនទាក់ទងទៅនឹងសុវត្ថិភាព និងប្រសិទ្ធភាពនៃវ៉ាក់សាំង៕
វីដេអូ៖
