ឧបករណ៍ដាំស្រូវ ដែលជាស្នាដៃរបស់កូនខ្មែរ។ រូបថត ក្រសួងកសិកម្ម
ភ្នំពេញៈ សមាគមកសិកម្មឈ្លាសវៃ បាននិងកំពុងកែលម្អឧបករណ៍កែច្នៃដាំគ្រាប់ស្រូវ ចំនួន ៣ ប្រភេទដែលជាស្នាដៃកូនខ្មែរ ឱ្យកាន់តែងាយស្រួលប្រើ និងមានប្រសិទ្ធភាព សុវត្ថិភាព ដល់អ្នកប្រើប្រាស់។ ឧបករណ៍នេះអាចជួយសម្រាលកម្លាំងពលកម្មរបស់ប្រជាកសិករ និងកាត់បន្ថយការចំណាយបានច្រើនជាងការប្រើកម្លាំងដាំដុះធម្មតា។
លោក សាន បុនិកា នាយកប្រតិបត្តិសមាគមកសិកម្មឈ្លាសវៃ ថ្លែងថា សមាគមកសិកម្មឈ្លាសវៃ កំពុងបន្តផលិត ព្រមទាំងកែលម្អឱ្យកាន់តែងាយស្រួលប្រើប្រាស់ និងមានប្រសិទ្ធិភាពសុវត្ថិភាព ដល់អ្នកប្រើប្រាស់ថែមទៀត។
ឧបករណ៍កែច្នៃដាំដុះពូជស្រូវ ដែលជាស្នាដៃកូនខ្មែរនេះ មាន ៣ ប្រភេទផ្សេងៗគ្នាទី១ ខ្នាតតូចប្រើថ្ពក់ជាមួយគោយន្តមានឈ្មោះថា អង្គរតូច ទី២ គឺឈ្មោះអង្គរ ប្រើជាមួយគោយន្តដូចគ្នា ប៉ុន្តែវាមានបន្ថែមរទេះពីក្រោយ សម្រាប់ដឹកអ្វីៗផ្សេងទៀតបាន និងទី៣ គឺអង្គរធំ ប្រើសម្រាប់ភ្ជាប់ជាមួយត្រាក់ទ័រ។
លោកថ្លែងថា៖ «ឧបករណ៍កែច្នៃនេះ អាចសន្សំសំចៃពូជស្រូវបានច្រើន បើកសិករដាំដុះធម្មតា គាត់ប្រើពូជ ៣៥០ ទៅ ៤០០ គីឡូក្រាមក្នុងមួយហិកតា ឧបករណ៍កែច្នៃយើងប្រើតែពី ៨០ ទៅ ១២០ គីឡូក្រាម ក្នុងមួយហិកតាប៉ុណ្ណោះ តែទទួលបានទិន្នផលប្រហែល ឬប្រសើរជាងផង»។
ការដាំដុះគ្រាប់ស្រូវដោយប្រើឧបករណ៍កែច្នៃ ក៏អាចជួយសន្សំសំចៃជីផងដែរ គឺបើតាមធម្មតា ប្រើជីពី ៦ ទៅ ៨ បាវ ក្នុង ១ ហិកតា ការដាំដុះដោយឧបករណ៍នេះ ប្រើតែ ៤ ទៅ ៥ បាវប៉ុណ្ណោះក្នុងមួយហិកតា។
លោក មុនិកា បន្តថា ផលប្រយោជន៍មួយទៀត គឺសន្សំសំចៃការប្រើថាំផ្សិត និងថ្នាំសម្លាប់សត្វល្អិត។ វាជួយកាត់បន្ថយនូវផ្សិត ដែលដុះនៅក្នុងស្រូវ កាត់បន្ថយការប្រើប្រាស់ថ្នាំពុល ព្រោះមានចន្លោះគម្លាតច្បាស់លាស់ នាំឲ្យសត្វល្អិតពុំសូវមានមករំខាន។
លោកបញ្ជាក់ថា៖ «ឧបករណ៍កែច្នៃហ្នឹង អាចដាំបានលើដី៣ប្រភេទ គឺដីសើមអត់ទឹក ដីសើមមានទឹក និងដីមានទឹកលិចតែម្តង ហើយយើងកំពុងបន្តផលិត ដើម្បីធ្វើការនាំចេញទៅកាន់ប្រទេសឡាវ ប្រទេសហ្វីលីពីន និងម៉ាឡេស៊ី» ។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានសម្តែងការគាំទ្រ ចំពោះស្នាដៃកូនខ្មែរមួយនេះ។
តាមរយៈហ្វេសប៊ុករបស់លោក នៅថ្ងៃទី ៦ ខែកក្កដា បានលើកឡើងថា ដោយទទួលបានការគាំទ្រ ពីក្រសួង សមាគមកសិកម្មឈ្លាសវៃ (Agri Smart Association) ដែលត្រូវបានបង្កើតឡើង នៅអំឡុងឆ្នាំ ២០១៥ តាមរយៈការគាំទ្រថវិកាដោយ Brooklyn Bridge to Cambodia (BB2C) និងកម្មវិធីខ្សែសង្វាក់តម្លៃកសិកម្មកម្ពុជា អូស្ត្រាលី ហៅកាត់ថា CAVAC បានច្នៃបង្កើតឧបករណ៍ដាំគ្រាប់ស្រូវជាជួរ (Eli Rice Seeder) ដែលជាកម្មសិទ្ធិបញ្ញា របស់កូនខ្មែរ ប្រើសម្រាប់ព្រោះស្រូវជាជួរ ជំនួសកំលាំងពលកម្មមនុស្ស បង្កើនល្បឿនដាំដុះ កាត់បន្ថយបរិមាណគ្រាប់ពូជ ធ្វើឱ្យដំណាំស្រូវដុះលូតលាស់ល្អ និងទទួលបានទិន្នផលខ្ពស់។
លោក វេង សាខុន សរសេរលើហ្វេសប៊ុកលោកថា៖ «នៅក្នុងឱកាសអញ្ជើញចុះពិនិត្យការប្រមូលផលដំណាំស្រូវ នៅក្នុងស្រុកព្រៃកប្បាស ខេត្តតាកែវ កាលពីថ្ងៃទី ២១ ខែ កក្កដា ឆ្នាំ ២០២០ សម្តេចតេជោ ហ៊ុន សែន នាយករដ្ឋមន្ត្រី បានចាប់អារម្មណ៍ចំពោះឧបករណ៍នេះ និងកោតសរសើរ ដល់សមាគមកសិកម្មឈ្លាសវៃ ដែលបានគិតគូ និងផ្តួចផ្តើមគំនិត កែច្នៃឧបករណ៍កសិកម្មនេះឡើងដើម្បីជួយសម្រាលកម្លាំងរបស់ប្រជាកសិករ និងជួយជំរុញផលិតកម្មដំណាំស្រូវនៅកម្ពុជា» ។
លោកបន្តថា លោកនាយករដ្ឋមន្ត្រី បានផ្តល់ឧបករណ៍នេះ ជូនប្រជាកសិករ និងសហគមន៍កសិកម្ម ក្នុងខេត្តតាកែវចំនួន ១៣០ គ្រឿង ខេត្តពោធិ៍សាត់ចំនួន ៥០ គ្រឿង ខេត្តបាត់ដំបងចំនួន ៥០ គ្រឿង និងបន្ទាយមានជ័យចំនួន ៥០គ្រឿង ដើម្បីជំរុញល្បឿនស្តារដំណាំស្រូវឡើងវិញ បន្ទាប់ពីជំនន់ទឹកភ្លៀង។
តាមរបាយការណ៍ពីមន្ទីរកសិកម្ម រុក្ខាប្រមាញ់ និងនេសាទខេត្ត បានឱ្យដឹងថា នៅក្នុងឆ្នាំ ២០២១ នេះ កសិករដែលទទួលបានឧបករណ៍ជាអំណោយរបស់លោកនាយករដ្ឋមន្ត្រី បានប្រើប្រាស់សម្រាប់ទាំងផលិតកម្មដំណាំស្រូវ និងផលិតកម្មគ្រាប់ពូជស្រូវ។
បច្ចុប្បន្ន អគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់ និងនេសាទខេត្ត កំពុងសហការជាមួយសមាគមកសិកម្មឈ្លាសវៃ ក្នុងការផ្សព្វផ្សាយ និងជំរុញការប្រើប្រាស់ឧបករណ៍នេះ ឲ្យបានកាន់តែទូលំទូលាយថែមទៀត៕
វីដេអូ៖
