ផ្សិតដែលបេះចេញពីដែនជម្រកសត្វព្រៃសង្ឃរុក្ខាវ័ន ដែលមានតម្លៃចន្លោះពី ១៥ ០០០ រៀល ទៅ ២០ ០០០ ម៉ឺនរៀល ក្នុង ១ គីឡូក្រាម។ រូបថត ក្រសួងបរិស្ថាន
ឧត្តរមានជ័យ៖ ប្រជាពលរដ្ឋមួយចំនួននៅខេត្ដឧត្ដរមានជ័យ និងមួយចំនួនទៀតមកពីស្រុកថ្មពួក ខេត្ដបន្ទាយមានជ័យ អាចរកចំណូលបន្ថែមពីការលក់អនុផលព្រៃឈើពីក្នុងតំបន់ដែនជម្រកសត្វព្រៃសង្ឃរុក្ខាវ័ន បានចន្លោះពី ១៥ ០០០ រៀល ទៅ ២០ ០០០ ម៉ឺនរៀល ក្នុង ១ គីឡូក្រាម។
តាមរយៈបណ្តាញសង្គមហ្វេសប៊ុកក្រសួងបរិស្ថាននៅថ្ងៃនេះបានឲ្យដឹងថា មានប្រជាពលរដ្ឋមួយចំនួននៅខេត្តឧត្ដរមានជ័យ និងមួយចំនួនទៀតមកពីស្រុកថ្មពួកខេត្ដបន្ទាយមានជ័យ ចាប់ផ្តើមទទួលផលអនុផលព្រៃឈើពីក្នុងតំបន់ដែនជម្រកសត្វព្រៃសង្ឃរុក្ខាវ័ន ដែលមានការគ្រប់គ្រង ដោយសហគមន៍សង្ឃរុក្ខាវ័ន និងមន្ទីរបរិស្ថានខេត្ដឧត្ដរមានជ័យ អនុផលព្រៃឈើទាំងនោះរួមមាន ផ្សិតក្ងោក ផ្សិតទន្សោង និងមានផ្សិតផ្សេងៗជាច្រើនទៀត ដែលចាប់ផ្តើដុះនៅក្នុងខែកក្កដានេះ រហូតដល់ចុងខែសីហាខាងមុខ។
បើតាមការបង្ហាញរបស់ក្រសួងបរិស្ថាន ប្រជាពលរដ្ឋដែលបានចូលមកប្រមូលផលផ្សិតនៅក្នុងព្រៃនោះ ពួកគេក្នុងម្នាក់ៗ អាចដកផ្សិតបានពី ៥ ដល់ ១០ គីឡូក្រាម តាមស្ថានភាពជាក់ស្តែង ព្រោះការប្រទះឃើញផ្សិតនៅក្នុងព្រៃនេះ ផ្អែកទៅលើរបបទឹកភ្លៀងផងដែរ។
ពួកគាត់និយាយថា បើសិនជារកផ្សិតបានតិច គឺទុកសម្រាប់ហូបក្នុងគ្រួសារ ហើយបើរកបានច្រើន គឺទុកសម្រាប់ហូបខ្លះ និងសម្រាប់លក់ខ្លះ ដោយលក់បានក្នុង ១ គីឡូក្រាមបានចន្លោះពី ១៥ ០០០ រៀល ទៅ ២០ ០០០ ម៉ឺនរៀល។ ពួកគាត់រីករាយក្នុងការប្រមូលផលផ្សិត ហើយការដើរប្រមូលផ្សិតនេះ ពុំមែនដោយសារតែភាពក្រីក្របង្ខំឱ្យពួកគាត់មកបេះផ្សិតនោះទេ តែជាប្រពៃណីប្រចាំរដូវ ដែលពួកគាត់ត្រូវចូលមកប្រមូលផលនៅក្នុងព្រៃនេះ។
លើទំព័រហ្វេសប៊ុកក្រសួងបរិស្ថានសរសេរថា៖ «យ៉ាងណាក៏ដោយ អនុផលព្រៃឈើបានជួយទ្រទ្រង់ជីវភាពគ្រួសាររបស់ពួកគាត់ ហើយពួកគាត់ក៏ទទួលស្គាល់ដែរថា ការចូលរួមថែរក្សា ការពារ និងអភិរក្សធនធានធម្មជាតិ ពិសេសព្រៃឈើ បានល្អទើបពួកគាត់ទទួលផលដូចសព្វថ្ងៃនេះ។ មានតែការចូលរួមទាំងអស់គ្នាទេ ទើបធនធានធម្មជាតិរបស់យើងនៅគង់វង្ស និងផ្ដល់ផលឱ្យយើងបានរហូត»។
លោក ភួង លីណា ប្រធានមន្ទីរបរិស្ថានខេត្ដឧត្ដរមានជ័យបានឱ្យដឹងថា ដោយសារតែតំបន់នេះជាតំបន់ដែលត្រូវបានការពារ និងអភិរក្សធនធានធម្មជាតិ ដូច្នេះបងប្អូនប្រជាពលរដ្ឋដែលចូលមកប្រមូលផលផ្សិតទាំងនេះ គឺត្រូវទទួលបានការអនុញ្ញាតត្រឹមត្រូវ និងត្រូវទទួលបាននូវការការពារសុវត្ថិភាពពីក្រុមឆ្មាំការពារព្រៃផងដែរ។
លោកថ្លែងថា៖ «កិច្ចការពារអភិរក្ស និងថែរក្សាធនធានធម្មជាតិ វាច្បាស់ណាស់ អនុផលព្រៃឈើដ៏សម្បូណ៌បែប វានឹងប្រាកដកើតឡើង។ ដោយកាលពីឆ្នាំមុន ប្រជាពលរដ្ឋទទួលបានផលផ្សិតប៉ក់ ដែលលក់បានតម្លៃថ្លៃ ចំណែកផ្សិតក្ងោក ផ្សិតទន្សោង ផ្សិតធ្យូង និងផ្សិតផ្សេងៗទៀត ប្រជាពលរដ្ឋជុំវិញតំបន់នោះ ក្រៅពីទុកសម្រាប់ធ្វើម្ហូប ពួកគាត់អាចទុកសម្រាប់លក់ឱ្យឈ្មួញដែលមកប្រមូលទិញ ដល់ភូមិរបស់ពួកគាត់ផងដែរ»៕
វីដេអូ៖
