ភ្ញៀវទេសចរមើលទិដ្ឋភាពទឹកទន្លេចតុមុខនៅមុខព្រះបរមរាជវាំងកាលពីថ្ងៃម្សិលមិញ។ ហេង ជីវ័ន
ភ្នំពេញៈ ក្រសួងធនធានទឹក និងឧតុនិយម ប្រកាសឱ្យមានការប្រុងប្រយ័ត្ន ចំពោះទឹកទន្លេមេគង្គ ដែលអាចនឹងហក់ឡើងក្នុងរយៈពេលពី ៣ ទៅ ៤ ថ្ងៃខាងមុខ ដោយសារ តែឥទ្ធិពលព្យុះ ដែលនឹងបណ្តាល ឱ្យជន់លិចតំបន់ទំនាបអមមាត់ទន្លេមេគង្គលើ នៅខេត្តស្ទឹងត្រែង ខេត្តក្រចេះ ខេត្តកំពង់ចាម និងខេត្តត្បូងឃ្មុំ។
សេចក្តីប្រកាសព័ត៌មានរបស់ក្រសួងធនធានទឹក និងឧតុនិយម កាលពីម្សិលមិញបានឱ្យដឹងថា ការហក់ឡើងនូវទឹកទន្លេមេគង្គ គឺបណ្តាលមកពីឥទ្ធិពលព្យុះទី ៧ ដែលមានឈ្មោះថា សេម ប៉ាកា (CEM-PAKA) ដែលអាចធ្វើឱ្យមានភ្លៀងធ្លាក់ក្នុងកម្រិតបង្គួរទៅច្រើន បណ្តាលឱ្យជនលិចតំបន់ទំនាបអបមាត់ទន្លេមេគង្គប៉ែកខាងលើ។
យ៉ាងណាក្តីក្រសួងបញ្ជាក់ថា ការហក់ឡើងនេះ មិនទាន់ដល់កម្រិតកម្ពស់ដែលត្រូវឱ្យមានការប្រុងប្រយ័ត្ននៅឡើយនោះទេ។
ក្នុងសេចក្តីប្រកាសក្រសួងធនធានទឹកសរសេរថា៖ «ក្នុងរយ:ពេលកន្លងមកព្យុះទី ៧ ឈ្មោះ សេម ប៉ាកា (CEMP-AKA) និងបណ្តាឥទ្ធិពលនៃព្យុះផ្សេងៗទៀត និងប្រព័ន្ធនានា ដែលមានឥទ្ធិពលមកលើអាងទន្លេមេគង្គ បានធ្វើឱ្យមានភ្លៀងធ្លាក់ក្នុងកម្រិតពីបង្គួរទៅច្រើន ក្នុងអាងទន្លេមេគង្គភាគខាងលើមានប្រទេស ចិន ថៃ និងប្រទេសឡាវ ព្រមទាំងនៅតំបន់ខ្ពង់រាប ភាគឦសានប្រទេសកម្ពុជា»។
ស្ថានភាពបែបនេះបានធ្វើឱ្យទឹកទន្លេមេគង្គហក់ឡើង ហើយនឹងបន្តឡើងនៅក្នុងរយៈពេលពី ៣ ទៅ ៤ ថ្ងៃខាងមុខទៀត ដែលអាចបណ្តាលឱ្យជន់លិចតំបន់ទំនាបអបមាត់ទន្លេមេគង្គលើ នៅក្នុងខេត្តស្ទឹងត្រែង ខេត្តក្រចេះ ខេត្តកំពង់ចាម និងខេត្តត្បូងឃ្មុំ។
សេចក្តីប្រកាសរបស់ក្រសួងធនធានទឹកបញ្ជាក់ថា៖ «សូមឱ្យសាធារណជន អាជ្ញាធរដែនដីពាក់ព័ន្ធ ពិសេសបងប្អូនប្រជាពលរដ្ឋដែលរស់នៅអបសងខាងទន្លេមេគង្គ និងតំបន់ទំនាបនានា ជ្រាបជាព័ត៌មាន និងរួសរាន់ប្រមូលកសិផល ឱ្យបានទាន់ពេលវេលា និងបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានជាយថាហេតុ»។
ទិដ្ឋភាពទឹកទន្លេមេគង្គ នៅទន្លេ ៤ មុខ មុខព្រះបរមរាជវាំង ក្នុងរាជធានីភ្នំពេញ នៅថ្ងៃទី ២៦ ខែកក្កដា ឆ្នាំ ២០២១។ហេង ជីវ័ន
លោក អ៊ុក ធាវី ប្រធានមន្ទីរព័ត៌មាន និងជាអ្នកនាំពាក្យរដ្ឋបាលខេត្តស្ទឹងត្រែង ថ្លែងពីម្សិលមិញថា រដ្ឋបាលខេត្តនឹងចេញសេចក្តីជូនដំណឹងប្រាប់ពលរដ្ឋដែលនៅតាមដងទន្លេឱ្យមានការប្រុងប្រយ័ត្ន និងត្រៀមខ្លួនទុកជាមុន។
ជាមួយគ្នានោះនិងប្រាប់ដល់អាជ្ញាធរឱ្យចុះទៅផ្សព្វផ្សាយបន្ថែមដើម្បីពញ្ញាក់ស្មារតីដល់ពលរដ្ឋកុំឱ្យមានការធ្វេសប្រហែស ព្រោះនេះជារដូវភ្លៀងទឹកអាចឡើងគ្រប់ពេលវេលា ជាពិសេសនៅពេលមានចំហាយព្យុះបោកបក់មកពីក្រៅ។
លោកប្រធានមន្ទីរបញ្ជាក់ថា ការប្រកាសប្រាប់នោះទៀតសោធ មិនមែនតែទន្លេមេគង្គទេ ជារួមគឺដងទន្លេទាំង ៤ ដែលមានទន្លេមេគង្គ ទន្លេសេកុង សេសាន និងស្រែពក។
លោកថ្លែងថា៖ «ជាទូទៅទឹកនៅខាងខេត្តស្ទឹងត្រែង គឺជារៀងរាល់ឆ្នាំភាគច្រើនអាចនឹងឡើងនៅដើមខែសីហា ឬចុងខែសីហា អាហ្នឹងករណីធម្មតា ប៉ុន្តែក្នុងរយៈពេលប៉ុន្មានថ្ងៃនេះមានខ្យល់ព្យុះ មកពីខាងក្រៅធ្វើឱ្យភ្លៀងធ្លាក់រាល់ថ្ងៃដែលបានបណ្តាលឱ្យទឹកទន្លេមេគង្គកើនឡើងបន្តិច ប៉ុន្តែមិនជាខ្លាំងទេ»។
លោកស្រី ណៃ ធីតា ប្រធានមន្ទីរព័ត៌មាន និងជាអ្នកនាំពាក្យរដ្ឋបាលខេត្តក្រចេះក៏បានថ្លែងពីម្សិលមិញដែរថា សម្រាប់ខេត្តក្រចេះមានការជូនដំណឹងជាប្រចាំទៅដល់ប្រជាពលរដ្ឋឱ្យមានការប្រុងប្រយ័ត្ន ដោយសារតែខែនេះជារដូវវស្សា។
លោកស្រីថ្លែងថា៖ «ប្រជាពលរដ្ឋនៅតាមទន្លេគាត់មានលក្ខណៈត្រៀមបង្ការរួចជាស្រេច ហើយមកដល់ថ្ងៃនេះទឹកទន្លេមេគង្គ គឺអត់ទាន់មានឡើងដល់កម្រិតត្រូវប្រកាសអាសន្នអីទេ មានន័យថា ទឹកនៅឆ្ងាយណាស់ពីកម្រិតប្រកាសអាសន្ន» ។
ចំណែកលោក ឃន ប្រុស នាយករដ្ឋបាលខេត្តកំពង់ចាមថ្លែងពីម្សិលមិញថា ខេត្តកំពង់ចាមអត់ទាន់មានអ្វីត្រូវប្រកាសអាសន្ននោះទេ ដោយសារតែទឹកទន្លេមេគង្គ គឺនៅបាតទន្លេនៅឡើយ។
លោកបានបញ្ជាក់ថា បើទឹកមានឡើង ក៏មិនមែនជាទឹកជំនន់ធ្ងន់ធ្ងរអ្វីនោះដែរ គ្រាន់តែជាជំនន់ទន្លេមេគង្គដែលតែងតែឡើងហើយក៏ស្រកទៅវិញតាមធម្មតា។
លោកបានបញ្ជាក់ថា៖ «មិនមែនជាគ្រោះទឹកជំនន់ទេ នេះគេហៅថា ជំនន់ទន្លេមេគង្គ អ៊ីចឹងពេលដល់រដូវវា គឺវាឡើង ហើយនៅពេលផុតរដូវគឺវាស្រកទៅវិញបាត់អស់ វាមានរដូវវាឡើង រដូវវាស្រក អ៊ីចឹងរដូវឡើងយូរបំផុតមានរយៈពេល ១ ខែគឺផុតហើយ។ ទឹកទន្លេមេគង្គចាប់ផ្តើមឡើងពីខែហ្នឹងទៅ ឥឡូវហ្នឹងវាឡើង ១ តឹក ២ តឹកហ្នឹង»៕
វីដេអូ៖
