សៀមរាបៈ ក្នុងរយៈពេល ២ ថ្ងៃសាលាដំបូងខេត្តសៀមរាបបានចោទប្រកាន់ និងចេញដីកាបង្គាប់ឱ្យឃុំខ្លួនមនុស្សចំនួន ៦ នាក់ពីបទមិនគោរពវិធានការទប់ស្កាត់ការឆ្លងជំងឺកូវីដ ១៩ នៃច្បាប់ស្តីពីវិធានទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
លោក សុវណ្ណ ច័ន្ទន៍គ្រឹះស្នា ចៅក្រមស៊ើបសួរ សាលាដំបូងខេត្តសៀមរាប បានចេញដីកាដាច់ដោយឡែកពីគ្នាបង្គាប់ឱ្យឃុំខ្លួនមនុស្សចំនួន ៦ នាក់ដែលជាម្ចាស់ហាង និងជាមេការហាង ដែលបានបំពាននឹងវិធានការរដ្ឋបាលបណ្តាលឱ្យមានការចម្លងជំងឺកូវីដ ១៩ ដល់អ្នកដទៃ។
លោកបានលើកឡើងថា៖ «បញ្ជាឱ្យភ្នាក់ងារមានសមត្ថកិច្ចនៃកម្លាំងសាធារណៈ ធ្វើការនាំជនត្រូវចោទដែលមានឈ្មោះ តាំង ម្លិះ, លាង គា, សាន ឆេងគី, ប្រាក់ សារ៉ន,អាន សត្ថា និង សាយ ឡាស្កាហ៍ ទៅពន្ធនាគារ ឬមណ្ឌលឃុំខ្លួនខេត្តសៀមរាប ដោយអនុវត្តឱ្យបានត្រឹមត្រូវតាមនីតិវិធីច្បាប់»។
ជនជាប់ចោទទាំង ៦ នាក់នេះត្រូវបានចោទពីបទ «មិនគោរពវិធានការរដ្ឋបាល ដែលបានបណ្តាលឱ្យមានការចម្លងជំងឺកូវីដ ១៩ ដល់អ្នកដទៃ» ដែលបទល្មើសមានចែងឱ្យផ្តន្ទាទោសតាមមាត្រា ១០ កថាខណ្ឌ ២ និង ៣ នៃច្បាប់ស្តីពីវិធានទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
យោងតាមមាត្រា ១០ កថាខណ្ឌ ២ នៃច្បាប់ពីវិធានទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតបានចែងថា៖ «ត្រូវផ្តន្ទាទោសដាក់ពន្ធនាគារពី ២ ឆ្នាំទៅ ៥ ឆ្នាំ និងពិន័យជាប្រាក់ពី ២ លានរៀល ទៅ ១០ លានរៀល ដែលអំពើនេះបានបណ្តាលឱ្យមានការចម្លងជំងឺកូវីដ ១៩ ដល់អ្នកដទៃ»។
ចំណែកកថាខណ្ឌ ៣ នៃច្បាប់ដដែលនេះបានចែងថា៖ «ត្រូវផ្តន្ទាទោសដាក់ពន្ធនាគារពី ២ ឆ្នាំដល់ ៥ ឆ្នាំ និងពិន័យជាប្រាក់ពី ៥ លានរៀលដល់ ២០ លានរៀល ដែលអំពើនេះបណ្តាលឱ្យប៉ះពាល់ធ្ងន់ធ្ងរដល់សុខភាពសាធារណៈ»។
ការចាប់ខ្លួនរហូតមានការចោទប្រកាន់ និងឃុំខ្លួនជនទាំង ៦ នាក់នេះ គឺក្រោយការឆ្លងរាលដាលជំងឺកូវីដ ១៩ ក្នុងសហគមន៍ដែលមានប្រភពនៅស្រុកជីក្រែង កាលពីដើមខែមិថុនា ឆ្នាំ ២០២១ កន្លងមក ហើយសមត្ថកិច្ចបានបើកការស្រាវជ្រាវយ៉ាងយកចិត្តទុកដាក់រហូតកំណត់បាននូវមុខសញ្ញា ដែលជាដើមហេតុបង្កឱ្យឆ្លងជំងឺកូវីដ ១៩ រាលដាលធ្ងន់ធ្ងរក្នុងស្រុកជីក្រែង ស្រុកសូទ្រនិគម និងក្រុងសៀមរាប ព្រមទាំងស្រុកមួយចំនួនទៀតផង។
រដ្ឋបាលខេត្តសៀមរាបបានឱ្យដឹងនៅថ្ងៃទី ២៦ ខែកក្កដាថា រដ្ឋបាលខេត្ត បានដាក់ចេញវិធានការរដ្ឋបាលនានា ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ ១៩ ក្នុងនោះមានការបិទជាបណ្តោះអាសន្ននូវការជួបជុំប្រមូលផ្តុំគ្នាពិសាគ្រឿងស្រវឹងគ្រប់ប្រភេទ និងមណ្ឌលកម្សាន្តមនុស្សពេញវ័យជាដើម។
ប្រភពដដែលបានបញ្ជាក់ថា៖ «ចំពោះបុគ្គលទាំងឡាយណា ដែលល្មើសនឹងវិធានការទប់ស្កាត់នឹងត្រូវផ្តន្ទាទោសតាមច្បាប់ ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងៗទៀត»។
ជាមួយគ្នានេះ រដ្ឋបាលខេត្តបានអំពាវនាវដល់ម្ចាស់អាជីវកម្មទាំងអស់ចូលរួមអនុវត្ត និងសហការជាមួយរាជរដ្ឋាភិបាល និងអាជ្ញាធរគ្រប់ថ្នាក់ ដើម្បីកាត់ផ្តាច់ជំងឺកូវីដ ១៩ ចេញពីសហគមន៍ ដែលនឹងធ្វើឱ្យស្ថានភាពសេដ្ឋកិច្ច សង្គមវិលទៅរកប្រក្រតីភាពឡើងវិញ។
ទន្ទឹមនឹងនេះដែរ អភិបាលខេត្តសៀមរាបលោក ទៀ សីហា បានដាក់បន្តអនុវត្តនូវវិធានការរដ្ឋបាលជាបណ្តោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រខេត្តទាំងមូលរយៈពេល ២ សប្តាហ៍ចាប់ពីពេលនេះរហូតដល់ថ្ងៃទី ៧ ខែសីហា។
លោក ទៀ សីហា បានឱ្យដឹងថា លោកបានសម្រេចបន្តដាក់ចេញវិធានការរដ្ឋបាលជាបណ្តោះអាសន្នរាល់ការធ្វើចរាចរណ៍ សកម្មភាពការងារមុខរបរ ឬអាជីវកម្មនៅចន្លោះពីម៉ោង ១០ យប់ដល់ម៉ោង ៤ ព្រឹក និងការប្រមូលផ្តុំមនុស្ស ឬការជួបជុំគ្នា ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្នុងខេត្តសៀមរាបទាំងមូល៕