លោកនាយករដ្ឋមន្រ្តី ហ៊ុន សែន។ រូបថត SPM
លោកនាយករដ្ឋមន្រ្តី ហ៊ុន សែន បានសម្រេចធ្វើការបិទខ្ទប់ខេត្តចំនួន ៨ ដែលនៅជាប់នឹងព្រំប្រទល់ប្រទេសកម្ពុជា-ថៃ រយៈពេល ១៤ ថ្ងៃ ដើម្បីទប់ស្កាត់ការឆ្លងរាលដាលជំងឺកូវីដ១៩ ក្នុងសហគមន៍នៃមេរោគកូវីដ១៩ ប្រភេទដែលតា (Delta)។
យោងតាមសេចក្តីសម្រេចរបស់លោកនាយករដ្ឋមន្រ្តី ហ៊ុន សែន ដែលបានចេញនាយប់ថ្ងៃទី ២៨ ខែកក្កដា នេះដោយបានសម្រេចបិទខ្ទប់ភូមិសាស្រ្តខេត្តចំនួន ៨ ដែលមានខេត្ត កោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ និងខេត្តសៀមរាប។
ការបិទខ្ទប់ភូមិសាស្ត្រខេត្តទាំងនេះ ជាបណ្តោះអាសន្នសម្រាប់រយៈពេល ១៤ ថ្ងៃ គិតចាប់ពីវេលាម៉ោង ២៣:៥៩ នាទី នាថ្ងៃទី២៩ ខែកក្កដា រហូតដល់ថ្ងៃទី១២ ខែសីហា សំដៅទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគកូវីដ១៩ ប្រភេទដែលតា (Delta)។
សេចក្តីសម្រេចបានបញ្ជាក់ថា៖ «ភូមិសាស្ត្រដែលត្រូវបានបិទខ្ទប់ អាចត្រូវបានបែងចែកជា តំបន់ក្រហម និង/ឬ តំបន់លឿងទុំ និង/ឬ តំបន់លឿង អាស្រ័យតាមកម្រិតនៃការឆ្លងរាលដាលនៃជំងឺនេះ នៅក្នុងភូមិសាស្ត្របិទខ្ទប់នីមួយៗ»។
ការកំណត់ភូមិសាស្ត្រណាមួយក្នុងតំបន់បិទខ្ទប់ ជា «តំបន់ក្រហម», «តំបន់លឿងទុំ» ឬ«តំបន់លឿង» ត្រូវធ្វើឡើងដោយសេចក្តីសម្រេចរបស់អភិបាលនៃគណៈអភិបាលខេត្តនៃខេត្តដែលត្រូវបានបិទខ្ទប់។
លោកនាយករដ្ឋមន្រ្តី ហ៊ុន សែន បានបញ្ជាក់ក្នុងសេចក្តីសម្រេចថា ចំពោះភូមិសាស្ត្រដែលមានការឆ្លងរាលដាលក្នុងសហគមន៍នៃមេរោគកូវីដ១៩ ប្រភេទដែលតា (Delta) ឬភូមិសាស្ត្រដែលមានការផ្ទុះឆ្លងរាលដាលលឿនខុសពីប្រក្រតី ឬមានការសង្ស័យពាក់ព័ន្ធនឹងមេរោគកូវីដ១៩ ប្រភេទដែលតា (Delta), អភិបាលខេត្តនៃខេត្តដែលត្រូវបានបិទខ្ទប់ ត្រូវកំណត់ភូមិសាស្ត្រ នោះជា «តំបន់ក្រហម» ឬ «តំបន់លឿងទុំ» អាស្រ័យទៅតាមកម្រិតនៃការឆ្លងរាលដាលនៃមេរោគប្រភេទដែលតា (Delta) នេះ៕
វីដេអូ៖
