ភ្នំពេញៈរដ្ឋមន្ត្រីក្រសួងទេសចរណ៍ លោក ថោង ខុន នៅថ្ងៃទី២៩ ខែកក្កដានេះ បានចេញលិខិតជូនដំណឹង ដល់ប្រធានមន្ទីរទេសចរណ៍រាជធានី-ខេត្ត ឱ្យផ្អាកសកម្មភាពទេសចរណ៍ទូទាំងប្រទេសរយៈពេល ១៤ថ្ងៃ គិតចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា ឆ្នាំ២០២១ ដើម្បីចូលរួមអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលជំងឺកូវីដបំប្លែងថ្មី។
ក្រសួងបានគូសបញ្ជាក់ថា ៖«មន្ទីរទេសចរណ៍រាជធានី -ខេត្ត ត្រូវចាត់តាំងក្រុមការងារដើម្បីតាមដានត្រួតពិនិត្យកិច្ចការ នេះឱ្យបានម៉ត់ចត់ ដោយមិនត្រូវអនុញ្ញាតឲ្យមានសកម្មភាពទេសចរណ៍ណាមួយនៅតាមរមណីយដ្ឋានទេសចរណ៍ គោលដៅទេសចរណ៍ សហគមន៍ទេសចរណ៍ និងកន្លែងដែលមានសក្តានុពលទេសចរណ៍ដែលមាននៅក្នុងមូលដ្ឋាន របស់ខ្លួនក្នុងរយៈពេលនៃការផ្អាកជាបណ្តោះអាសន្ននេះ ជាដាច់ខាត»។
ទន្ទឹមនេះដែរ សេចក្តីជូនដំណឹងរួមគ្នារវាង អាជ្ញាធរជាតិអប្សរា និងគ្រឹះស្ថានអង្គរ ចុះថ្ងៃទី ២៩ ខែកក្កដានេះ សម្រេចបិទការទស្សនាប្រាសាទនានា និងផ្អាកការលក់សំបុត្រ ចូលទស្សនា នៅក្នុងរមណីយដ្ឋានអង្គរ រយៈពេល ១៤ថ្ងៃ ចាប់ពីថ្ងៃទី ៣០ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១។
សេចក្តីជូនដំណឹងបន្តថា ការផ្អាកជាបណ្តោះអាសន្ននេះ ដោយអនុលោមតាមសេចក្ដីសម្រេចរបស់រាជរដ្ឋាភិបាល ស្តីពីការបិទខ្ទប់ភូមិសាស្ត្រខេត្តជាប់ព្រំដែនរួមមាន ខេត្តកោះកុង ខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្ត បន្ទាយមានជ័យ ខេត្តឧត្តរមានជ័យ ខេត្តព្រះវិហារ និងខេត្តសៀមរាប ដើម្បីទប់ស្កាត់ការឆ្លងរាលដាលក្នុង សហគមន៍នៃមេរោគកូវីដ១៩ ប្រភេទដែលតា (Delta)។
«ក្រសួង ស្ថាប័នជាតិ អន្តរជាតិ អាជ្ញាធរដែនដី មន្ទីរ-អង្គភាព សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ សមាគមដឹកជញ្ជូនភ្ញៀវទេសចរ ក្រុមហ៊ុន ទេសចរណ៍ ភ្ញៀវទេសចរជាតិ-អន្តរជាតិ សាធារណជន ត្រូវទទួលជាព័ត៌មាន»។
ជាមួយគ្នានេះដែរ ឧទ្យានជាតិគិរីរម្យ នៅខេត្តកំពង់ស្ពឺ បានជូនដំណឹងដល់សាធារណជន ស្តីពីការផ្អាកការចូលទស្សនាជាបណ្ដោះអាសន្នរយៈពេល១៤ ថ្ងៃ ចាប់ពីថ្ងៃទី ២៩ ខែកក្កដានេះ តទៅ ស្របតាមវិធានការ ដែលរដ្ឋាភិបាលបានដាក់ចេញ សំដៅទប់ស្កាត់ការរីករាលនៃជំងឺកូវីដ ១៩ បំប្លែងថ្មី ប្រភេទ Delta។
ប្រធានមន្ទីរទេសចរណ៍ខេត្តបាត់ដំបង លោក អ៊ុចអ៊ុ ភីនីស្សារ៉ា បានថ្លែងថា ពាក់ព័ន្ធសារាចរណែនាំនេះដែរ គណៈកម្មការថ្នាក់ខេត្ត បានបើកកិច្ចប្រជុំជាបន្ទាន់មួយ ដើម្បីដាក់ចេញវិធានការនានាក្នុងមូលដ្ឋានខេត្ត ទាំងតំបន់ទេសចរណ៍ និងសកម្មភាពអាជីវកម្មផ្សេងទៀត។
រដ្ឋលេខាធិការក្រសួងទេសចរណ៍លោក តុប សុភ័ក ប្រាប់ភ្នំពេញប៉ុស្តិ៍ថា ជាជំហ៊ានដំបូងមន្ទីរទេសចរណ៍រាជធានី-ខេត្ត បានអនុវត្តតាមសារាចរណែនាំរបស់រាជរដ្ឋាភិបាលរួចហើយ ខណៈក្រសួងបានធ្វើសេចក្តីណែនាំបន្ថែមទៀត ដល់វិស័យទេសចរណ៍ដែលពាក់ព័ន្ធ។
លោកថា៖«សារាចរណែនាំរបស់រដ្ឋាភិបាល បានប្រគល់ទៅឱ្យអាជ្ញាធរមូលដ្ឋានខេត្តនិមួយៗចាត់ចែង។ ដោយឡែកសម្រាប់ក្រសួងទេសចរណ៍ យើងធ្វើលិខិតជូនដំណឹងបន្ថែមដល់់មន្ទីរទេសចរណ៍ខេត្ត ព្រោះរមណីយដ្ឋានទេសចរណ៍ វាមានគោលដៅទេសចរណ៍ផ្សេងទៀត ដូចជាសហគមន៍ទេសចរណ៍ ទេសចរណ៍ដែលមានកន្លែងសក្តានុពល ដែលភ្ញៀវទេសចរណ៍ទៅលេងកម្សាន្តមិនរាប់ចូលក្នុងរមណីយដ្ឋានទេចរណ៍ទេ ដូច្នេះយើងនឹងមានការណែនាំដល់ពួកគាត់»។
ដើម្បីធានាបាននូវប្រសិទ្ធភាពនៃការអនុវត្តវិធានការប្រយុទ្ធ និង ទប់ស្កាត់ការឆ្លងរាលដាលនៃជំងឺកូវីដ១៩ ជាពិសេស ក្នុងបរិបទដែលកម្ពុជាកំពុងប្រឈមនឹងការឆ្លងរីករាលដាលនៃជំងឺកូវីដ១៩ បណ្តាលមកពីមេរោគបំប្លែងខ្លួនថ្មីប្រភេទដែលតា រាជរដ្ឋាភិបាល បានសម្រេចចេញនូវការពង្រឹងវិធានការប្រយុទ្ធនឹងទប់ស្កាត់ការរាលដាលនេះនៅទូទាំងប្រទេសសម្រាប់រយៈពេល ១៤ថ្ងៃ ចាប់ពីម៉ោង ២៣និង ៥៩ នាទីយប់ថ្ងៃទី ២៩ ខែកក្កដានេះ ដល់ថ្ងៃទី១២ ខែសីហា ឆ្នាំ ២០២១៕
វីដេអូ៖