ក្រុមនិស្សិតតាមបណ្ដាប្រទេសផ្សេងៗទទួលបានអាហារូបករណ៍កម្មវិធី Chevening របស់អង់គ្លេស។ រូបថត ស្ថានទូតអង់គ្លេស
ភ្នំពេញៈ រដ្ឋាភិបាលអង់គ្លេសប្រកាសផ្តល់អាហារូបករណ៍កម្មវិធី Chevening ថ្នាក់បរិញ្ញាបត្រជាន់ខ្ពស់រយៈពេល ១ ឆ្នាំដល់និស្សិតកម្ពុជា ដែលមានបំណងបន្តការសិក្សានៅប្រទេសនេះ ដើម្បីអភិវឌ្ឍអ្នកដឹកនាំ សម្រាប់ពេលអនាគតនៅកម្ពុជា។
ស្ថានទូតអង់គ្លេសប្រចាំកម្ពុជាបញ្ជាក់ក្នុងសេចក្តីប្រកាសព័ត៌មានដែល ភ្នំពេញ ប៉ុស្តិ៍ ទទួលបាននៅថ្ងៃទី ២ សីហាថា អាហារូបករណ៍ Chevening ផ្តល់ជូនដល់និស្សិតគ្រប់មជ្ឈដ្ឋានដែលមានការប្តេជ្ញាចិត្ត មានជំនាញច្បាស់លាស់។ មានឆន្ទៈធ្វើការផ្លាស់ប្តូរជាវិជ្ជមាន និងអាចបង្ហាញថា ថ្នាក់បរិញ្ញាបត្រជាន់ខ្ពស់របស់ចក្រភពអង់គ្លេសអាចជួយពួកគេឱ្យសម្រេចនូវគោលបំណងទាំងអស់នោះ។
អាហារូបករណ៍ Chevening ផ្តល់ការគាំទ្រផ្នែកហិរញ្ញវត្ថុ ១០០ ភាគរយដល់និស្សិតជយលាភីទៅសិក្សាថ្នាក់បរិញ្ញាបត្រជាន់ខ្ពស់នៅសាកលវិទ្យាល័យ ក្នុងប្រទេសអង់គ្លេស។ និស្សិតអាចទទួលបាននូវបទពិសោធពីស្ថាប័នអប់រំនាំមុខគេមានជំនាញវិជ្ជាជីវៈ និងវប្បធម៌សម្បូរបែបច្រើនទៀត។
អាហារូបករណ៍ Chevening ត្រូវបានបង្កើតឡើងក្នុងឆ្នាំ ១៩៨៣ ហើយមកដល់ពេលនេះ និស្សិតជាង ៥ ម៉ឺននាក់នៅទូទាំងពិភពលោកត្រូវបានផ្តល់ឱកាសអភិវឌ្ឍជំនាញរបស់ខ្លួនតាមរយៈអាហារូបករណ៍ Chevening នេះនៅប្រទេសអង់គ្លេស។
សម្រាប់ឆ្នាំសិក្សា ២០២២-២០២៣ រដ្ឋាភិបាលអង់គ្លេសនឹងផ្តល់អាហារូបករណ៍ Chevening ចំនួន ១ ៥០០ កន្លែងនឹងផ្តល់ដល់និស្សិតមកពីបណ្តាប្រទេសនានាទូទាំងពិភពលោក។ «នេះជាការបង្ហាញពីការប្តេជ្ញាចិត្តរបស់រាជរដ្ឋាភិបាលចក្រភពអង់គ្លេសចំពោះការអភិវឌ្ឍអ្នកដឹកនាំនៅថ្ងៃស្អែកនៅតាមបណ្តាប្រទេសនានា រួមទាំងព្រះរាជាណាចក្រកម្ពុជាផងដែរ»។
លោកស្រី Tina Redshaw ឯកអគ្គរាជទូតអង់គ្លេសប្រចាំកម្ពុជាបានថ្លែងក្នុងសេចក្តីប្រកាសព័ត៌មាននេះថា៖ «ប្រសិនជាអ្នកជាបុគ្គលម្នាក់មានការតាំងចិត្តក្នុងការផ្លាស់ប្តូរ ទោះបីជាការផ្លាស់ប្តូរនោះនៅក្នុងប្រទេស ឬក៏ជាសកលក៏ដោយហើយប្រសិនជាអ្នកចង់ទទួលបានលទ្ធផលល្អទៅលើអ្វីដែលអ្នកកំពុងធ្វើ ហើយបើអ្នកមានក្តីស្រមៃចង់ជំរុញលើកទឹកចិត្តនរណាម្នាក់នោះអាហារូបករណ៍ Chevening ជាឱកាសដ៏ល្អតែមួយគត់ សម្រាប់អ្នកក្នុងការសម្រេចគោលបំណងនោះ»។
លោកស្រីថ្លែងថា បទពិសោធដែលទទួលបានតាមរយៈអាហារូបករណ៍ Chevening គឺមិនមែនគ្រាន់តែជាការសិក្សាថ្នាក់បរិញ្ញាបត្រជាន់ខ្ពស់នោះទេ តែជាការសិក្សាដ៏ស្វិតស្វាញ និងបំពេញនូវបទពិសោធជីវិតជានិស្សិតនៅសាកលវិទ្យាល័យនៃប្រទេសអង់គ្លេស និងផ្តល់ឱ្យអ្នកបានជួបនិស្សិត និងមនុស្សជាច្រើនមកពីជុំវិញពិភពលោក។
លោកស្រី Tina Redshaw ថ្លែងថា៖ «បណ្តាញអតីតនិស្សិតរបស់យើងគឺជាអ្នកមានឥទ្ធិពល។ ពួកគាត់បានចែករំលែកបទពិសោធដូចៗគ្នាដែលអ្នកនឹងទទួលបានការចែករំលែកនោះផងដែរ។ នៅពេលដែលអ្នកត្រឡប់មកប្រទេសរបស់អ្នក បន្ទាប់ពីបញ្ចប់ការសិក្សា អ្នកនឹងមានអារម្មណ៍ថាអ្នកមានសមត្ថភាពគ្រប់គ្រាន់ ដើម្បីចាប់ផ្តើមធ្វើការផ្លាស់ប្តូរជាវិជ្ជមានប្រកបដោយវិជ្ជាជីវៈ និងទំនាក់ទំនងល្អក្នុងសង្គម»។
អាហារូបករណ៍នេះចាប់ផ្តើមទទួលពាក្យពីថ្ងៃទី ៣ ខែសីហា ដល់ថ្ងៃទី ២ ខែវិច្ឆិកា។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងពីម្សិលមិញថា ដៃគូអភិវឌ្ឍន៍ រួមមានប្រទេសអង់គ្លេសបាននិងកំពុងដើរតួនាទីសំខាន់មួយក្នុងការចូលរួមលើកកម្ពស់គុណភាពមូលធនមនុស្សកម្ពុជាតាមរយ:គ្រប់រូបភាព ដូចជាការផ្តល់ឱកាសអាហារូបករណ៍ដែលមានតួនាទីសំខាន់មួយក្នុងការចូលរួមលើកកម្ពស់គុណភាពមូលធនមនុស្សសម្រាប់អភិវឌ្ឍសេដ្ឋកិច្ចកម្ពុជាលើគ្រប់វិស័យនាពេលបច្ចុប្បន្ន និងអនាគត។
លោកថ្លែងថា ឱកាសអាហារូបករណ៍ឆ្លើយតបទៅនឹងការអប់រំពលរដ្ឋសកលដែលមានបំណងចូលរួមពង្រឹងសមត្ថភាពសិស្ស-និស្សិតគ្រប់កម្រិតឱ្យក្លាយជាពលរដ្ឋសកលដែលមានចរិយាសម្បទា វិជ្ជាសម្បទា បំណិនសម្បទា និងគុណតម្លៃឆ្លើយតបនឹងបរិបទជាតិ តំបន់ និងពិភពលោក។
លោក សុវាចា ថ្លែងថា៖ «ក្រសួងអប់រំយុវជន និងកីឡា ស្វាគមន៍ និងថ្លែងអំណរគុណចំពោះកិច្ចសហការវិជ្ជមានពីគ្រប់ភាគីពាក់ព័ន្ធក្នុងការផ្តល់ឱកាសអាហារូបករណ៍ ដើម្បីចូលរួមចំណែកការងារកំណែទម្រង់អប់រំ យុវជន និងកីឡា»៕
.jpg)
