វ៉ាក់សាំង Johnson & Johnson ដែលជាជំនួយរបស់សហរដ្ឋអាមេរិកមកដល់ព្រលានយន្តហោះអន្តរជាតិភ្នំពេញ កាលពីថ្ងៃទី ៣០ កក្កដា។ ហេង ជីវ័ន
ភ្នំពេញៈ រដ្ឋាភិបាលសហរដ្ឋអាមេរិកតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) នៅថ្ងៃទី ៩ សីហា បានប្រកាសផ្តល់ជំនួយបន្ថែមចំនួន ៤ លានដុល្លារ ជាជំនួយបន្ទាន់ដើម្បីប្រយុទ្ធប្រឆាំងនឹងជំងឺកូវីដ ១៩ សម្រាប់ប្រទេសកម្ពុជា។
តាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជានៅថ្ងៃទី ៩ ខែសីហា ឱ្យដឹងថា ជំនួយនេះនឹងផ្តល់ការគាំទ្រទាន់ពេលវេលា។ ពិសេសយោងលើអំណោយនាពេលថ្មីៗនេះរបស់សហរដ្ឋអាមេរិក ជាវ៉ាក់សាំង Johnson & Johnson ចំនួន ១ ០៦០ ១០០ ដូស ដែលត្រូវបានផ្តល់តាមរយៈយន្តការកូវ៉ាក់ក្នុងការបង្កើននូវភាពត្រៀមជាស្រេចរបស់កម្ពុជាក្នុងការធ្វើការចាក់វ៉ាក់សាំងកូវីដ។
ជំរុញការចាក់វ៉ាក់សាំងក្នុងចំណោមប្រជាជនដែលត្រូវចាក់ធ្វើអន្តរាគមន៍ផ្នែកសុខភាពសាធារណៈ ដើម្បីគ្រប់គ្រងជំងឺកូវីដ និងពង្រឹងផ្នែកមន្ទីរពិសោធន៍ ដើម្បីលើកកម្ពស់សមត្ថភាពក្នុងការធ្វើតេស្ត។ នេះបើតាមសេចក្តីប្រកាសព័ត៌មាន។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាថ្លែងថា ការលើកកម្ពស់សន្តិសុខ ផ្នែកសុខភាពសកល និងការត្រៀមទប់ទល់នឹងការផ្ទុះឡើងនៃជំងឺ មានសារៈសំខាន់ណាស់ មិនត្រឹមតែដើម្បីការពារសុខភាព និងសុវត្ថិភាពតែប៉ុណ្ណោះទេ តែថែមទាំងដើម្បីធានាវិបុលភាពនៃសេដ្ឋកិច្ច និងការពារសន្តិសុខរបស់ប្រទេសផងដែរ។ លោកថ្លែងថា៖ «យើងមានមោទនភាពក្នុងការផ្តល់ការគាំទ្រនេះ ដែលនឹងជួយប្រជាជនកម្ពុជា ក្នុងការការពារខ្លួនគេ អ្នកជិតខាង និងអនាគតនៃសេដ្ឋកិច្ចរបស់គេ»។
បើតាមលោក Murphy ជំនួយបន្ថែមនេះបានមកពីផែនការជួយសង្គ្រោះរបស់អាមេរិក គឺជាការបន្ថែមលើជំនួយចំនួនជាង ១១ លានដុល្លាររបស់អាមេរិកទាក់ទងនឹងជំងឺកូវីដ ១៩ ដល់កម្ពុជា តាំងពីជំងឺនេះបានផ្ទុះឡើងជាលើកដំបូង។
លោកបន្តថា ការគាំទ្រនេះបានដល់ប្រជាជនកម្ពុជាចំនួនជាង ១០ លាននាក់ ដោយមានជាសម្ភារលើកកម្ពស់ការយល់ដឹងពីហានិភ័យ តាមទូរទស្សន៍ ប្រព័ន្ធផ្សព្វផ្សាយសង្គម វិទ្យុ សារតាមទូរស័ព្ទដៃ និងផ្ទាំងផ្តល់ព័ត៌មាន។ ការគាំទ្រនេះថែមទាំងបានលើកកម្ពស់សមត្ថភាពផ្នែកមន្ទីរពិសោធន៍ ពង្រឹងជំនាញរបស់គ្រូពេទ្យក្នុងការមើលថែទាំអ្នកជំងឺ ហើយបានជួយបន្ធូរបន្ថយផលប៉ះពាល់លើសេដ្ឋកិច្ចពីមេរោគរាតត្បាតនេះ។
លោកបន្ថែមថា ការខិតខំទាំងនេះគឺជាការងារបន្តពីការងារដែលមានមកអស់រយៈពេលរាប់ទសវត្សរ៍មកហើយ ក្នុងការជួយសង្គ្រោះជីវិតមនុស្ស និងភាពជាអ្នកដឹកនាំរបស់សហរដ្ឋអាមេរិកក្នុងការដោះស្រាយវិបត្តិផ្នែកសុខភាពជាសកល។ តាំងពីឆ្នាំ ១៩៩២ មក សហរដ្ឋអាមេរិកបានចំណាយថវិកាអស់ជាង ១,៥៤ ពាន់លានដុល្លារនៅកម្ពុជា តាមរយៈទីភ្នាក់ងារជំនួយអាមេរិក USAID។
លោកបញ្ជាក់ថា ថវិកានេះរួមមានប្រាក់ចំនួនជាង ៣៧៧ លានដុល្លារជាជំនួយសម្រាប់ដោះស្រាយបញ្ហានៃការស្លាប់របស់ទារក ក្មេងអាយុក្រោម ៥ ឆ្នាំ និងមរណភាពមាតា ជំងឺគ្រុនចាញ់ របេង អេដស៍ កង្វះអនាម័យ កង្វះអាហារូបត្ថម្ភ ភាពក្រិន និងដើម្បីលើកកម្ពស់សមត្ថភាពរបស់ប្រទេសកម្ពុជា ក្នុងការធ្វើហិរញ្ញប្បទាន និងគ្រប់គ្រងផ្នែកភ័ស្តុភារ និងព័ត៌មានសម្រាប់ប្រព័ន្ធសុខាភិបាលរបស់ខ្លួន។
ជំងឺគ្មានស្គាល់ព្រំដែនកំណត់ទេ។ តាមរយៈការងាររបស់ទីភ្នាក់ងារជំនួយអាមេរិក USAID មជ្ឈមណ្ឌលកម្ចាត់ជំងឺឆ្លងអាមេរិក វិទ្យាស្ថានជាតិសុខភាពអាមេរិកអង្គភាពស្រាវជ្រាវវេជ្ជសាស្ត្ររបស់កងទ័ពជើងទឹកអាមេរិក និងអង្គការដទៃទៀត សហរដ្ឋអាមេរិក មានការប្តេជ្ញាចិត្តក្នុងការធ្វើជាដៃគូជាមួយប្រទេសកម្ពុជា ដើម្បីកម្ចាត់រោគរាតត្បាតកូវីដ ១៩ បន្ធូរបន្ថយផលប៉ះពាល់ធ្ងន់ធ្ងរផ្នែកសង្គម និងសេដ្ឋកិច្ច ហើយកសាងឡើងវិញនូវពិភពលោកមួយ ដែលមានការត្រៀមរៀបចំល្អជាងមុន ប្រឆាំងនឹងការផ្ទុះឡើងនៃជំងឺទៅអនាគត។
ភ្នំពេញប៉ុស្តិ៍ មិនអាចទាក់ទងអ្នកនាំពាក្យក្រសួងសុខាភិបាល សុំធ្វើអត្ថាធិប្បាយជុំវិញបញ្ហានេះបានទេនៅថ្ងៃទី ៩ សីហា។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា ស្វាគមន៍ចំពោះការប្រកាសផ្តល់ជំនួយបន្ថែមជាបន្តបន្ទាប់ ពីរដ្ឋាភិបាលសហរដ្ឋអាមេរិកដល់ប្រទេសកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩ ដែលកម្ពុជាកំពុងប្រឈមនាពេលនេះ។
លោក ផៃ ស៊ីផាន ថ្លែងថា៖ «កម្ពុជា និងសហរដ្ឋអាមេរិក បាននិងកំពុង [ពង្រឹង] ទំនាក់ទំនងល្អជាមួយនឹងកិច្ចសហប្រតិបត្តិការជំនួយនេះ បង្ហាញអំពីសហការប្រតិបត្តិការ និងការជួយសង្គ្រោះ នៅពេលដែលកម្ពុជាកំពុងប្រឈមវិបត្តិជំងឺកូវីដ ១៩ នេះ»។
បើតាមលោក ផៃ ស៊ីផាន កិច្ចសហប្រតិបត្តិការ និងការផ្តល់ជំនួយពីរដ្ឋាភិបាលអាមេរិកមកដល់កម្ពុជានឹងបន្តមានវត្តមានជាអចិន្រៃ្តយ៍ នៅពេលដែលកំពុងជួបបញ្ហាប្រឈមនេះ៕
វីដេអូ៖
