មន្ត្រីបង្ហាញផ្លែមៀនដល់លោកនាយករដ្ឋមន្ត្រី ហ៊ុន សែន នៅក្នុងពិធីមួយ នាពេលកន្លងមក។ រូបថត ក្រសួងព័ត៌មាន
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាឱ្យប្រមូលទិញផ្លែមៀនពីប្រជាកសិករ នៅតាមបណ្តាខេត្តជាប់ព្រំដែនកម្ពុជា-ថៃទាំងអស់ ដែលកំពុងជួបប្រទះបញ្ហាប្រឈម ក្នុងការនាំចេញទៅលក់នៅក្រៅប្រទេស ដោយផ្លែមៀនដែលទិញបាន គឺធ្វើការចែកចាយជូនដល់កងកម្លាំងទូទាំងខេត្តបាត់ដំបង។
ការប្រកាសយ៉ាងដូច្នេះបន្ទាប់ពីពេលថ្មីៗនេះ ផ្លែមៀនប៉ៃលិន [តាង៉ែន] ប្រមាណជាង ៤០ តោន បានខូចបែកស្អុយ ដោយសារតែជាប់គាំងនៅច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង ព្រោះតែអាជ្ញាធរថៃបិទព្រំដែនហាមឃាត់ការឆ្លងកាត់យកទៅលក់។
លោក ហ៊ីង ប៊ុនហៀង នាយករងខុទ្ទកាល័យលោក ហ៊ុន សែន ដែលទទួលបញ្ជាក្នុងការប្រមូលទិញផ្លែមៀនទាំងនេះពីប្រជាកសិករបានប្រាប់ ភ្នំពេញ ប៉ុស្តិ៍ នៅថ្ងៃទី ១៧ សីហាថា ការប្រមូលទិញផ្លែមៀនទាំងនេះនឹងទិញស្របទៅតាមតម្លៃទីផ្សារ ដែលប្រជាកសិករបានលក់ក្នុងពេលបច្ចុប្បន្ន។ ក្នុងនោះលោកថា ការទទួលទិញផ្លែមៀននេះ ក៏មិនកំណត់ចំនួននោះដែរ ដោយប្រជាកសិករមានផ្លែមៀនប៉ុន្មាន គឺទទួលទិញទាំងអស់។
លោកបញ្ជាក់ថា៖ «យើងយកទៅឱ្យកងទ័ពហូប ក្រុមនគរបាល និងកងកម្លាំងប្រយុទ្ធប្រឆាំងជំងឺកូវីដ ១៩ ទូទាំងខេត្តបាត់ដំបងតែម្តង។ ជាជំហានដំបូង យើងចែកជូនដល់កងកម្លាំងយើង នៅក្នុងខេត្តបាត់ដំបងសិន»។
លោកបានបន្តថា បើសិនជាក្នុងករណីចំនួននៃការប្រមូលទិញផ្លែមៀនពីប្រជាកសិករ លើសពីតម្រូវការសម្រាប់ខេត្តបាត់ដំបង់ទាំងមូល នោះក្រុមការងារនឹងបន្តទិញផ្លែមៀនទាំងនេះទៅចែកជូនកងកម្លាំងជួរមុខនៅតាមបណ្តាខេត្តនានាផ្សេងទៀត នៅតាមព្រំដែនកម្ពុជាថៃ។
កសិករក្នុងខេត្តបាត់ដំបងកំពុងរៀបចំផ្លែមៀនរបស់ខ្លួនដែលទើបបេះពីដើម។ រូបថត សហការី
លោក សួន ជុំ សមាជិកក្រុមប្រឹក្សាភិបាលនៃសហគមន៍មៀនប៉ៃលិនបានលើកឡើងថា លោក និងសមាជិកដទៃទៀតបានដឹងពីព័ត៌មាននេះហើយ និងមានក្តីសប្បាយចិត្តជាខ្លាំង ដែលប្រមុខរដ្ឋាភិបាលបានជួយដោះស្រាយបញ្ហាដែលប្រជាពលរដ្ឋបានជួបប្រទះ។
បន្ថែមពីនេះលោកថា បើសិនជាអាចលោកចង់ឱ្យរដ្ឋាភិបាលកំណត់ទីតាំងមួយជាក់លាក់ ដើម្បីឱ្យប្រជាកសិករប្រមូលកសិផលរបស់ខ្លួនទៅលក់ទីកន្លែងរួមតែមួយនោះតែម្តង ដើម្បីបង្កភាពងាយស្រួល និងចៀសវាងការខូចខាត។
លោកបញ្ជាក់ថា៖ «មៀនប៉ៃលិននៅក្នុងខែនេះ គឺទើបតែចាប់ផ្តើម ហើយមៀនដែលប្រឈមនឹងលក់ចេញហ្នឹងគឺវាមានបណ្ដុំទាំង ៣ ខេត្តហ្នឹង ដែលធ្វើការនាំចេញបន្តិចម្នាក់ៗ។ ខែនេះ វាផ្តើមអ៊ីចឹងម្នាក់ៗប្រមូលបាន ១០ ទៅ ២០ តោនទេ។ តែចាំមើលតែ ១០ ទៅ ២០ ថ្ងៃខាងមុខនេះ គឺនឹងមានការប្រមូលផ្តុំក្នុងទំហំធំ»។
បើតាមលោក សួន ជុំ បច្ចុប្បន្ន តម្លៃទីផ្សារផ្លែមៀនដែលឈ្មួញមកទិញដល់កន្លែង គឺមានតម្លៃចាប់ពី ២ ០០០ រៀលដល់ ២ ៥០០ រៀលក្នុង ១ គីឡូក្រាម អាស្រ័យទៅលើគុណភាពនៃផ្លែមៀននីមួយៗ ខណៈដែលឈ្មួញនាំផ្លែមៀនទាំងនេះ ទៅលក់បន្តនៅប្រទេសថៃ គឺមានតម្លៃចាប់ពី ២៥ បាត ឬស្មើប្រមាណ ៣ ០០០ រៀលក្នុង ១ គីឡូ។
សូមជម្រាបថា តាមរយៈការទទួលទិញផ្លែមៀនរបស់រដ្ឋាភិបាល គឺប្រជាកសិករដែលមានផលិតផលផ្លែមៀនអាចទំនាក់ទំនងមកក្រុមការងាររបស់លោក ហ៊ីង ប៊ុនហៀង តាមរយៈលេខទំនាក់ទំនង ០៩៧ ៧៧៧ ៣៧៣៧ លោក សេង ឌីលីន ០៨៨ ៩០៣ ៧៧៧៧។ ការចាប់ផ្តើមទទួលទិញផ្លែមៀនពីប្រជាកសិករ គឺចាប់ពីថ្ងៃទី ១៨ ខែសីហា ឆ្នាំ ២០២១ នេះតទៅ។
តាមសេចក្តីប្រកាសព័ត៌មានរដ្ឋបាលខេត្តបាត់ដំបងបានឱ្យដឹងថា ការទទួលទិញផ្លែមៀនក្នុងពេលនេះ ដោយសារប្រមុខរដ្ឋាភិបាលមានទឹកចិត្តគាំទ្រផលិតផលក្នុងស្រុកដូចជាផ្លែមៀន (តាង៉ែន) ដែលបច្ចុប្បន្នកំពុងជួបបញ្ហាទីផ្សារក្នុងការលក់ដូរ ជាពិសេសការនាំចេញទៅប្រទេសថៃ ។ ដូច្នេះរដ្ឋបាលខេត្តបានកំណត់យកទីលានបាល់ទាត់វាលបែកចាន ជាប់នឹងទីបញ្ជាការដ្ឋានយោធភូមិភាគទី ៥ ស្ថិតនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ជាទីតាំងទទួលទិញផ្លែមៀនពីប្រជាកសិករ៕
វីដេអូ៖
