សត្វក្រៀលជាប្រភេទសត្វងាយរងគ្រោះ ច្រើនរស់នៅ រកស៊ី និងធ្វើសម្បុកពងកូនតាមតំបន់ដីសើម និងតំបន់ វាលស្មៅ។ រូបថត WCS
មណ្ឌលគិរី៖ អង្គការ WCS កំពុងធ្វើការយ៉ាងជិតស្និទ្ធជាមួយសហគមន៍មូលដ្ឋាន ក្នុងដែនជម្រកសត្វព្រៃកែវសីមា ដើម្បីធ្វើការអប់រំផ្សព្វផ្សាយ បង្កើនការយល់ដឹង អំពីការការពារ សម្បុកពងកូនរបស់សត្វក្រៀល បន្ទាប់ពីបានរកឃើញសម្បុកសត្វក្រៀលមួយដែលមានពងចំនួន ២ ជាលើកដំបូង ប៉ុន្តែត្រូវបានគេលួចបាត់។
សត្វក្រៀលជាប្រភេទសត្វងាយរងគ្រោះ ច្រើនរស់នៅ រកស៊ី និងធ្វើសម្បុកពងកូនតាមតំបន់ដីសើម និងតំបន់ វាលស្មៅ។ របាយសត្វក្រៀល មាននៅភាគខាងជើងនៃប្រទេសឥណ្ឌា តំបន់អាស៊ីអាគ្នេយ៍ និងភាគខាងជើង នៃប្រទេសអូស្ត្រាលី។
នៅក្នុងប្រទេសកម្ពុជា សត្វក្រៀលមានវត្តមានច្រើនបំផុតនៅតាមតំបន់ការពារទេសភាពភាគខាងជើង ដែលអង្គការ WCS កំពុងអនុវត្តសកម្មភាពអភិរក្សនៅទីនោះ ដើម្បីការពារសម្បុកពងកូនរបស់សត្វប្រភេទនេះ តាមរយៈកម្មវិធីតាមដាន និងការពារសម្បុក។
WCS បានបង្ហាញអំពីសម្បុកពងកូនរបស់សត្វក្រៀល ដែលបានរកឃើញលើកដំបូងនៅក្នុងដែនជម្រកសត្វព្រៃកែវសីមា។
កាលពីពាក់កណ្តាលខែកក្កដា កន្លងទៅ ក្រុមការងារស្រាវជ្រាវសត្វព្រៃប្រចាំដែនជម្រកសត្វព្រៃកែវសីមា នៃអង្គការ WCS បានទទួលព័ត៌មានពីសហគមន៍តាមទូរស័ព្ទ ដែលបានរាយការណ៍ថា ពួកគាត់បានឃើញសត្វក្រៀល និងសម្បុករបស់វាមានពង ២ នៅទីនោះ។
២ ថ្ងៃបន្ទាប់មក ក្រុមការងារបានទៅដល់ទីនោះ ដើម្បីចាប់ផ្តើមផែនការការពារសម្បុក ក៏ប៉ុន្តែគួរឱ្យសោកស្តាយពងទាំង ២ នោះ ត្រូវគេលួចបាត់។
ដោយផ្អែកលើហេតុការណ៍នេះ អង្គការ WCS បានបង្កើនកិច្ចប្រឹងប្រែងរបស់ខ្លួន ដោយសហការយ៉ាងជិតស្និទ្ធ ជាមួយសហគមន៍មូលដ្ឋាន ដើម្បីធ្វើការអប់រំផ្សព្វផ្សាយ បង្កើនការយល់ដឹងអំពីការការពារសម្បុកសត្វ និងសារៈសំខាន់របស់សត្វប្រភេទនេះនៅក្នុងប្រទេសកម្ពុជា៕
វីដេអូ៖
