ទីតាំងសម្រាប់ព្យាបាលអ្នកជំងឺកូវីដ ១៩ នៅតាមផ្ទះ ១ កន្លែង នៅខណ្ឌជ្រោយចង្វារ រាជធានីភ្នំពេញ។ ហុង មិនា
ភ្នំពេញៈ ក្រសួងសុខាភិបាលប្រកាសអនុញ្ញាតឱ្យសេវាកម្មផ្នែកសុខាភិបាលឯកជនមានសិទ្ធិផ្តល់សេវាថែទាំ និងព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះ ដោយត្រូវអនុវត្តលក្ខខណ្ឌចាំបាច់ដែលកំណត់ដោយក្រសួង។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង នៅថ្ងៃទី ៣០ ខែសីហា បានចេញលិខិតជម្រាបជូនដល់លោក លោកស្រី ដែលជាម្ចាស់សេវាសុខាភិបាលឯកជន (មន្ទីរពេទ្យ មន្ទីរពហុព្យាបាល និងមន្ទីរសម្រាកព្យាបាល) ឱ្យបានដឹងថា ក្រសួងសុខាភិបាលនឹងអនុញ្ញាតឱ្យសេវាសុខាភិបាលឯកជនដែលមានច្បាប់អនុញ្ញាតពីក្រសួងសុខាភិបាលមានសិទ្ធិផ្តល់សេវាថែទាំ និងព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះ ដោយគោរពតាមលក្ខខណ្ឌចាំបាច់។
ក្នុងលិខិតលោករដ្ឋមន្ត្រីបញ្ជាក់ថា មូលដ្ឋានសុខាភិបាលឯកជនដែលមានច្បាប់អនុញ្ញាតពីក្រសួងសុខាភិបាល (មន្ទីរពេទ្យ មន្ទីរពហុព្យាបាល និងមន្ទីរសម្រាកព្យាបាល) ទើបក្រសួងអនុញ្ញាតបាន។ ចំណែកគ្រូពេទ្យ សេវាសុខាភិបាលឯកជនត្រូវមានគ្រូពេទ្យ និងបុគ្គលិកដែលបានបណ្តុះបណ្តាលត្រឹមត្រូវ សម្រាប់ផ្តល់សេវាថែទាំ ព្យាបាលអ្នកជំងឺកូវីដ ១៩ កម្រិតស្រាលតាមផ្ទះពីក្រុមគ្រូបង្គោលថ្នាក់ជាតិនៃក្រសួងសុខាភិបាល។
លោក ម៉ម ប៊ុនហេង បញ្ជាក់ក្នុងលិខិតថា៖ «ក្រុមគ្រូពេទ្យទាំងនោះត្រូវបានចាត់ដោយឡែកពីក្រុមគ្រូពេទ្យព្យាបាលអ្នកជំងឺធម្មតា ហើយក្រុមគ្រូពេទ្យទាំងនេះត្រូវធ្វើចត្តាឡីស័ករយៈពេល ១៤ ថ្ងៃ បន្ទាប់ពីបានថែទាំ ព្យាបាលអ្នកជំងឺកូវីដ ១៩»។
លក្ខខណ្ឌមួយទៀត ក្រសួងសុខាភិបាលបានប្រាប់ដល់សេវាសុខាភិបាលឯកជនត្រូវត្រៀមទុកជាមុនក្នុងករណីជំងឺវិវឌ្ឍន៍ធ្ងន់ធ្ងរ ដោយធានាឱ្យមានប្រព័ន្ធបញ្ជូនជំងឺតាមបទដ្ឋានបច្ចេកទេសត្រឹមត្រូវពីផ្ទះ ទៅសេវាសុខាភិបាលឯកជន ដែលមានច្បាប់អនុញ្ញាតឱ្យផ្តល់សេវាថែទាំ និងព្យាបាលអ្នកជំងឺកូវីដ ១៩ ឬសេវាសាធារណៈ ដែលបានព្យាបាលកូវីដ ១៩។
លោករដ្ឋមន្ត្រីបញ្ជាក់ថា៖ «ការផ្តល់សេវាថែទាំ ព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះត្រូវមានការអនុញ្ញាតពីអាជ្ញាធរមូលដ្ឋាន ចៅសង្កាត់ ឬមេឃុំ និងមន្ត្រីសុខាភិបាល នៃការិយាល័យសុខាភិបាលស្រុកប្រតិបត្តិ ដែលអ្នកជំងឺស្ថិតនៅ»។
ដើម្បីឱ្យសេវាសុខាភិបាលឯកជនទទួលបានការអនុញ្ញាត ក្រសួងសុខាភិបាលប្រាប់ទៅម្ចាស់សេវាសុខាភិបាលឯកជនត្រូវដាក់លិខិតស្នើសុំអនុញ្ញាតមកក្រសួងសុខាភិបាល តាមរយៈអនុគណៈកម្មការបច្ចេកទេស និងព្យាបាលដែលមានទូរស័ព្ទ និង តេឡេក្រាម ០១២ ៨៩១ ៥២៧ និង ០១២ ៦៩១ ១១២។
លោក ណក់ ពេជ្រពិជ័យ វេជ្ជបណ្ឌិតផ្នែកជំងឺទូទៅ និងជាប្រធានមន្ទីរសម្រាកព្យាបាលប្រសិទ្ធផលនៅថ្ងៃទី ៣០ សីហា ថ្លែងគាំទ្រចំពោះការអនុញ្ញាតរបស់ក្រសួងសុខាភិបាល។ ទោះយ៉ាងណា មន្ទីរសម្រាកព្យាបាលរបស់លោកនៅមិនទាន់សម្រេច ធ្វើការស្នើសុំសិទ្ធិនៅឡើយ ដោយសារមិនទាន់បានបែងចែកផ្នែកព្យាបាលឱ្យបានច្បាស់លាស់។
លោកលើកឡើងថា ការសម្រេចរបស់ក្រសួងសុខាភិបាល ដែលអនុញ្ញាតឱ្យវិស័យសុខាភិបាលឯកជនដែលមានលទ្ធភាពក្នុងការព្យាបាលអ្នកជំងឺកូវីដ ១៩ កម្រិតស្រាលឱ្យជួយព្យាបាលអ្នកជំងឺកូវីដ ១៩ នោះជារឿងល្អ ហើយក៏បង្ហាញអំពីការសហការគ្នារវាងវិស័យឯកជន និងវិស័យសុខាភិបាលរដ្ឋ។ នេះក៏ជាការជួយសម្រាលបន្ទុកខ្លះដល់សេវាសុខាភិបាលរបស់រដ្ឋ។
លោកថ្លែងថា៖ «ការពិតនៅពេទ្យរដ្ឋមិនថានៅប្រទេសយើង ឬក៏ប្រទេសថៃ វៀតណាម ឬប្រទេសក្នុងតំបន់យើងទេ គឺសុទ្ធតែពេញទាំងអស់មានការមមាញឹកទាំងអស់។ អ៊ីចឹងខាងឯកជនបានជួយសម្រាលខ្លះទៅក៏ល្អសម្រាប់អ្នកដែលគេមានលទ្ធភាព»។
លោកស្រី ហឿ អូន អ្នកគ្រប់គ្រងមន្ទីរសម្រាកព្យាបាលច្បារអំពៅថ្លែងនៅថ្ងៃទី ៣០ សីហាថា លក្ខខណ្ឌដែលក្រសួងសុខាភិបាលដាក់ចេញសម្រាប់អនុញ្ញាតឱ្យសេវាសុខាភិបាលឯកជនអាចចូលរួមក្នុងការព្យាបាលអ្នកជំងឺកូវីដ ១៩ នៅតាមផ្ទះ មិនមានបញ្ហាអ្វីចោទនោះទេ ព្រោះការធ្វើនេះដើម្បីសុវត្ថិភាពទាំងក្រុមគ្រូពេទ្យ និងអ្នកជំងឺ។
លោកស្រីថា នៅរសៀលថ្ងៃទី ៣០ ខែសីហា មន្ទីរសម្រាកព្យាបាលច្បារអំពៅ កំពុងតែរៀបចំបែបបទដើម្បីដាក់ស្នើទៅក្រសួងសុខាភិបាល។
លោកស្រីថ្លែងថា៖ «នេះជារឿងមួយដែលល្អ ព្រោះអាចជួយបម្រើសេវាថែមទៀតទៅអ្នកជំងឺយើង ដែលគាត់មានបំណងចង់ប្រើប្រាស់សេវាឯកជន។ យើងត្រូវតែគោរពតាមការណែនាំរបស់ក្រសួងសុខាភិបាល។ ខ្ញុំគិតថាយើងអាចធ្វើបាន ព្រោះយើងមានលទ្ធភាពទទួលព្យាបាលនៅនឹងកន្លែងហើយ អ៊ីចឹងគ្រាន់តែពង្រីកសេវាបន្ថែមទៀត គឺមិនជាបញ្ហាអ្វីទេ»៕
វីដេអូ៖
