គ្រូពេទ្យចាក់វ៉ាក់សាំងបង្ការជំងឺកូវីដ ១៩ ជូនពលរដ្ឋក្នុងខណ្ឌទួលគោកពីខែសីហា។ ហុង មិនា
ភ្នំពេញៈ ថ្នាក់ដឹកនាំ មន្ត្រីរាជការ មន្ត្រីអង្គការសហប្រជាជាតិ និងប្រជាពលរដ្ឋដែលបានចាក់វ៉ាក់សាំងប្រភេទកូវីសែល ដូសទី១ និងដូសទី២ រួចហើយនោះ ក្រសួងសុខាភិបាលនឹងចាប់ផ្តើមដំណើរការ ការចាក់វ៉ាក់សាំងកូវីដ ១៩ ប្រភេទអាស្ត្រាហ្សេនីកា (AstraZeneca) ដូសទី៣ ឬដូសជំរុញទៅដល់ពួកគាត់ចាប់ពីថ្ងៃទី ៦ ខែកញ្ញាតទៅ នៅតាមទីតាំង និងកាលបរិច្ឆេទដែលបានកំណត់។
ជាមួយគ្នានេះដែរ ក្រសួងក៏បានប្រកាសពីការចាក់វ៉ាក់សាំងដូសជំរុញនេះ ទៅដល់មន្ត្រីរាជការ និងប្រជាពលរដ្ឋនៅក្រោមឱវាទរបស់រដ្ឋបាល រាជធានីភ្នំពេញ ខេត្តកណ្តាល និងខេត្តព្រះសីហនុផងដែរ។
លោកស្រី ឱ វណ្ណឌីន អ្នកនាំពាក្យក្រសួង សុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានឱ្យដឹងតាមរយៈសេចក្តីជូនព័ត៌មាននៅថ្ងៃទី ៣១ ខែសីហា ថា គ.វ.ក-១៩ នឹងផ្តល់ការចាក់វ៉ាក់សាំងដូសជំរុញ ដោយប្រើវ៉ាក់សាំងអាស្ត្រាហ្សេនីកា ជូនដល់ថ្នាក់ដឹកនាំមន្ត្រីរាជការ មន្ត្រីអង្គការសហប្រជាជាតិ មន្ត្រី និងបុគ្គលិកស្ថានទូតនានា មន្ត្រី និងបុគ្គលិកអង្គការជាតិ និងអន្តរជាតិ។
លោកស្រីបន្ថែមថា៖ «ការចាក់នេះក៏ផ្តល់ជូនប្រជាពលរដ្ឋរួមទាំងជនវ័យចាស់ដែលបានចាក់វ៉ាក់សាំងកូវីសែល (Covishield) ដូសទី១ និងដូសទី២ រួចរាល់ ព្រមទាំងស្វាមី ឬភរិយារបស់ពួកគាត់ ដែលបានចាក់រួចរាល់ដូចគ្នាផងដែរ ដែលដំណើរការចាក់នេះនឹងចាប់ផ្តើមពីថ្ងៃទី ៦ ខែកញ្ញានេះ»។
ក្រសួងសុខាភិបាលប្រកាសថា ចំពោះថ្នាក់ដឹកនាំរាជរដ្ឋាភិបាល ថ្នាក់ដឹកនាំព្រឹទ្ធសភា និងសមាជិកព្រឹទ្ធសភា ថ្នាក់ដឹកនាំរដ្ឋសភា និងសមាជិករដ្ឋសភា និងឥស្សរជនដែលមានតួនាទីជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ ព្រមទាំងស្វាមី ឬភរិយារបស់ពួកគាត់ ត្រូវទៅចាក់វ៉ាក់សាំងអាស្ត្រាហ្សេនីកាដូសជំរុញ នៅមន្ទីរពេទ្យកាល់ម៉ែត។
សម្រាប់ឥស្សរជនដែលជាអនុរដ្ឋលេខាធិការ អគ្គនាយក អគ្គនាយករង ឬមានឋានៈស្មើព្រមទាំងស្វាមី ឬភរិយារបស់ពួកគាត់ ត្រូវទៅចាក់វ៉ាក់សាំងដូសជំរុញនៅមន្ទីរពេទ្យព្រះអង្គឌួង។ ចំណែកមន្ទីរពេទ្យកុមារជាតិជាទីតាំងចាក់វ៉ាក់សាំងកូវីដ ១៩ ដូសជំរុញ សម្រាប់មន្ត្រីរាជការចាប់ពីថ្នាក់ប្រធាននាយកដ្ឋានចុះ និងមន្ត្រីជាប់កិច្ចសន្យាថ្នាក់ជាតិ។ រីឯមជ្ឈមណ្ឌលជាតិគាំពារមាតា និងទារក ជាទីតាំងចាក់វ៉ាក់សាំងដូសជំរុញទៅដល់មន្ត្រីរាជការ ចាប់ពីថ្នាក់ប្រធាននាយកដ្ឋានចុះមន្ត្រីជាប់កិច្ចសន្យាថ្នាក់ជាតិ ព្រមទាំងស្វាមី ឬភរិយារបស់ពួកគាត់។
សម្រាប់មន្ត្រីរាជការចាប់ពីថ្នាក់ប្រធាននាយកដ្ឋានចុះ និងមន្ត្រីជាប់កិច្ចសន្យាថ្នាក់ជាតិ ព្រមទាំងស្វាមី ឬភរិយារបស់ពួកគាត់ត្រូវទៅចាក់វ៉ាក់សាំងដូសជំរុញនៅមន្ទីរពេទ្យមិត្តភាពខ្មែរ-សូវៀត។ ចំពោះមន្ត្រីអង្គការសហប្រជាជាតិ មន្ត្រី បុគ្គលិកស្ថានទូត ស្ថានកុងស៊ុល ស្ថាប័នហិរញ្ញវត្ថុអន្តរជាតិនានា មន្ត្រី និងបុគ្គលិកអង្គការជាតិ អន្តរជាតិ និងដៃគូផ្សេងៗទៀត ព្រមទាំងស្វាមី ឬភរិយារបស់ពួកគាត់អាចទៅចាក់វ៉ាក់សាំងដូសជំរុញនេះនៅមន្ទីរពេទ្យកាល់ម៉ែត ចាប់ពីថ្ងៃទី ២៩ ខែកញ្ញា ដល់ថ្ងៃទី ២ ខែតុលា។
ទន្ទឹមនឹងនេះដែរ ក្រសួងសុខាភិបាលក៏បានអនុញ្ញាតឱ្យមានការរៀបចំចាក់វ៉ាក់សាំងអាស្ត្រាហ្សេនីកាដូសជំរុញនេះដល់មន្ត្រីរាជការ និងប្រជាពលរដ្ឋក្រោមឱវាទរដ្ឋបាលរាជធានីភ្នំពេញ ខេត្តកណ្តាល និងខេត្តព្រះសីហនុផងដែរ។
លោកស្រី ឱ វណ្ណឌីន បញ្ជាក់ថា រដ្ឋបាលរាជធានីភ្នំពេញនឹងរៀបចំចាក់វ៉ាក់សាំងដូសជំរុញទៅដល់មន្ត្រីរាជការ មន្ត្រីជាប់កិច្ចសន្យាក្រោមឱវាទ រដ្ឋបាលរាជធានីភ្នំពេញ និងប្រជាពលរដ្ឋទូទៅ ដែលបានចាក់វ៉ាក់សាំងកូវីសែល ដូសទី១ និងដូសទី២ រួចរាល់ ព្រមទាំងស្វាមី ឬភរិយារបស់ពួកគាត់ ដែលរដ្ឋបាលរាជធានីភ្នំពេញនឹងចេញសេចក្តីជូនព័ត៌មានពីទីតាំងនៃការចាក់វ៉ាក់សាំងនេះដែលនឹងចាប់ផ្តើមចាក់ចាប់ពីថ្ងៃទី ៦ ខែកញ្ញា រហូតដល់ថ្ងៃទី ២៨ ខែកញ្ញា។
ចំណែកខេត្តកណ្តាល និងខេត្តព្រះសីហនុវិញ រដ្ឋបាលខេត្តទាំង ២ នឹងចេញសេចក្តីជូនព័ត៌មានពីទីតាំងនៃការចាក់វ៉ាក់សាំងដូសជំរុញនេះសម្រាប់មន្ត្រីរាជការ មន្ត្រីជាប់កិច្ចសន្យា និងប្រជាពលរដ្ឋទូទៅ ដែលនឹងចាប់ផ្តើមចាក់ចាប់ពីថ្ងៃទី ៦ ខែកញ្ញា រហូតដល់ថ្ងៃទី ២៨ ខែកញ្ញា។
លោកស្រី ឱ វណ្ណឌីន ក៏បានបញ្ជាក់ផងដែរថា អ្នកដែលអាចចាក់វ៉ាក់សាំងដូសជំរុញដោយប្រើប្រាស់វ៉ាក់សាំងអាស្ត្រាហ្សេនីកាអំឡុងពេលនេះ ត្រូវគោរពទៅតាមលក្ខខណ្ឌមួយចំនួនដែលក្រសួងបានកំណត់។
លោកស្រីបញ្ជាក់ថា៖ «អ្នកដែលអាចចាក់ដូសជំរុញនេះបាន គឺអ្នកដែលបានចាក់វ៉ាក់សាំងកូវីសែល ដូសទី១ និងដូសទី២ រួចរាល់ ដែលមានគម្លាតចាប់ពី ៤ ទៅ ៦ ខែឡើង និងជាស្វាមី ឬភរិយានៃអ្នកដែលបានចាក់វ៉ាក់សាំងកូវីសែលខាងលើនេះ និងមានរយៈពេលគម្លាតដូចគ្នា បន្ទាប់ពីបានចាក់វ៉ាក់សាំងដូសមូលដ្ឋាន»។
ឯកសារដែលអ្នកចាក់ដូសជំរុញត្រូវភ្ជាប់ជាមួយនៅពេលទៅចាក់មាន បណ្ណចាក់វ៉ាក់សាំងកូវីដ ១៩ បណ្ណសម្គាល់ខ្លួនមន្ត្រីរាជការ ឬបណ្ណសម្គាល់មន្ត្រីជាប់កិច្ចសន្យា (ចំពោះមន្ត្រីរាជការថ្នាក់ជាតិ) អត្តសញ្ញាណប័ណ្ណសញ្ជាតិខ្មែរ ឬឯកសារដែលប្រើប្រាស់ក្នុងការចុះឈ្មោះកាលពីចាក់វ៉ាក់សាំងដូសទី១ សៀវភៅគ្រួសារ ឬសៀវភៅស្នាក់នៅ ឬសំបុត្រអាពាហ៍ពិពាហ៍ ដែលបញ្ជាក់ថា ជាស្វាមី ឬភរិយា នៃអ្នកដែលបានចាក់វ៉ាក់សាំងកូវីសែលរួច។
គួររំឭកផងដែរថា លោកនាយករដ្ឋមន្ត្រី ហ៊ុន សែន បានសម្រេចអនុវត្តនូវគោលនយោបាយចាក់វ៉ាក់សាំងកូវីដ ១៩ ដូសជំរុញដល់ប្រជាជនទូទៅដែលមានអាយុពី ១២ ឆ្នាំឡើងចាប់ផ្តើមពីខែសីហា ឆ្នាំ ២០២១ រហូតដល់អំឡុងពាក់កណ្តាលឆ្នាំ ២០២២។
ការចាក់ដូសជំរុញនេះ គឺនៅតែបន្តអនុវត្តតាមគោលការណ៍ស្ម័គ្រចិត្ត គោលការណ៍ឥតគិតថ្លៃ ការធ្វើអាទិភាវូបនីយកម្មនៃការចាក់វ៉ាក់សាំងកូវីដ ១៩ ដូសជំរុញទៅលើក្រុមមនុស្ស និងតាមទីតាំងភូមិសាស្ត្រ ការធានាប្រសិទ្ធភាព និងសុវត្ថិភាពនៃការចាក់វ៉ាក់សាំងដូសជំរុញ និងយន្តការអនុវត្តគោលនយោបាយ៕
វីដេអូ៖
