សកម្មភាពស្ដារប្រឡាយកប់ស្រូវរបស់អាជ្ញាធរខណ្ឌពោធិ៍សែនជ័យ ដើម្បីបញ្ចៀសទឹកជំនន់ ពីថ្ងៃទី ៤ កញ្ញា ។ រូបថត សហការី
ភ្នំពេញៈចាប់ពីថ្ងៃទី ៦ ខែកញ្ញានេះទៅ តំបន់ទំនាបមួយចំនួនក្នុងរាជធានីភ្នំពេញ ខេត្តព្រះសីហនុ កោះកុង និងបណ្ដាខេត្តជាប់បឹងទន្លេសាបមួយចំនួនអាចនឹងរងការជន់លិច។ នេះបើតាមការព្យាករអាកាសធាតុរបស់ក្រសួងធនធានទឹក និងឧតុនិយមដែលបានចេញផ្សាយកាលពីថ្ងៃទី ៣ ខែកញ្ញា ឆ្នាំនេះ។
តាមរយៈការព្យាករនេះ ប្រទេសកម្ពុជាកំពុងទទួលឥទ្ធិពលអាកាសធាតុនៅក្នុងតំបន់មួយចំនួនព្រមៗគ្នារួមមាន ជ្រលងសម្ពាធទាបឥណ្ឌា ប្រព័ន្ធសម្ពាធទាប (ITCZ) ខ្យល់សមុទ្រ និងសម្ពាធទាប ១០០៦ ហិតូប៉ាស្កាល់ ធ្វើឲ្យតំបន់វាលទំនាបកណ្ដាល តំបន់ផ្ទៃរងទឹកភ្លៀងជាប់ជួរភ្នំក្រវាញ និងជួរភ្នំដងរែក រួមទាំងតំបន់មាត់សមុទ្រផង មានភាពអួអាប់ និងមានភ្លៀងធ្លាក់ក្នុងកម្រិតពីបង្គួរទៅខ្លាំង មានលាយឡំនឹងផ្គររន្ទះ និងផ្លេកបន្ទោរកើតឡើង ជាពិសេសក្នុងអំឡុងពេលពីថ្ងៃទី ៦ ដល់ថ្ងៃទី ១១ ខែកញ្ញា ឆ្នាំ ២០២១។
ក្រសួងធនធានទឹកបានបញ្ជាក់ថា យោងលើស្ថានភាពបែបនេះ តំបន់ទំនាបមួយចំនួនអាចប្រឈមនឹងជំនន់ទឹកភ្លៀងដែលទាមទារឲ្យមានការប្រុងប្រយ័ត្នខ្ពស់ ជាពិសេសនៅខេត្តបាត់ដំបង ពោធិ៍សាត់ កំពង់ធំ កំពង់ឆ្នាំង កំពង់ស្ពឺ
ព្រះសីហនុ កោះកុង កណ្តាល និងរាជធានីភ្នំពេញ។
ជាមួយនឹងការជូនដំណឹងរបស់ក្រសួងធនធានទឹកនិងឧតុនិយមនេះ អាជ្ញាធររាជធានី-ខេត្តមួយចំនួនបាននិងកំពុងត្រៀមបង្ការនិងឆ្លើយតបចំពោះហានិភ័យដែលអាចបង្កឡើងដោយគ្រោះជំនន់ទឹកភ្លៀងនេះ។ ក្នុងនោះនៅរាជធានីភ្នំពេញ អាជ្ញាធរពាក់ព័ន្ធបានរួមសហការគ្នាជីកកាត់ផ្លូវឆេកូនិងផ្លូវទំនប់ Royal Phnom Penh Golf Club ជាបណ្តោះអាសន្ន ដើម្បីបើកផ្លូវទឹកឲ្យហូរទៅកាន់បឹងកប់ស្រូវ ដើម្បីបង្ការកុំឲ្យទឹកជំនន់លិចនៅផ្លូវជាតិលេខ ៤ មុខសាលាក្តីខ្មែរក្រហម ខណៈ
ភ្លៀងនៅតែបន្តធ្លាក់។
ចំណែកនៅខេត្តកណ្ដាល អាជ្ញាធរបានជូនដំណឹងពីការបិទទ្វារទឹកត្រង់ចំណុចលូមុខ ៤ និងកាត់ផ្ដាច់កំណាត់ផ្លូវទំនប់ពីចំណុចប្រឡាយលេខ ៩០ ដល់ប្រឡាយលេខ ៩២ ស្ថិតក្នុងភូមិតាឡុង ឃុំបឹងខ្យាង ស្រុកកណ្ដាលស្ទឹង ដើម្បីបង្ការទប់ស្កាត់ការជនប៉ះពាល់ដល់ការសាងសង់ផ្លូវរត់ខ្សែទី១នៃគម្រោងសាងសង់ព្រលានយន្តហោះអន្តរជាតិភ្នំពេញថ្មី។នេះបើតាមលោក គង់ សោភណ្ឌ អភិបាលខេត្តកណ្ដាល។
លោកបានថ្លែងថា ដោយសារភ្លៀងធ្លាក់ខ្លាំងជាបន្តបន្ទាប់ធ្វើឲ្យទឹកហូរជន់លិចក្នុងបរិវេណការដ្ឋាននៃគម្រោងសាងសង់ព្រលានយន្តហោះអន្តរជាតិភ្នំពេញថ្មី ។ ហេតុដូច្នេះ ក្រុមការងារបច្ចេកទេសចាំបាច់ត្រូវបិទទ្វារទឹក និងកាយផ្ដាច់កំណាត់ផ្លូវទំនប់លេខ ៥៤ ក្នុងភូមិសាស្ត្រខាងលើជាបណ្ដោះអាសន្ន ដើម្បីឲ្យការសាងសង់ផ្លូវរត់ខ្សែទី ១ នៃគម្រោងដ៏ធំនេះប្រព្រឹត្តទៅដោយជោគជ័យតាមការគ្រោងទុក។
ដោយឡែកនៅខេត្តព្រះសីហនុលោក ជួន ណារិន្ទ ស្នងការនគរបាលខេត្តនេះបានដាក់បទបញ្ជាតឹងរ៉ឺងដល់កម្លាំងនគរបាលចរាចរណ៍ទាំងផ្លូវគោក និងផ្លូវទឹកព្រមទាំងកម្លាំងអធិការដ្ឋាននគរបាលក្រុងកោះរ៉ុងឲ្យផ្សព្វផ្សាយ និងពង្រឹងគោលដៅផែដើមទី និងចុងទី លើប្រព័ន្ធសុវត្ថិភាពជលយានយន្តទាំងអស់រួមទាំងតាមដានការប្រែប្រួលអាកាសធាតុ និងត្រៀមអន្តរាគមន៍សង្រ្គោះ ពេលមានហេតុការណ៍កើតឡើងជាយថាហេតុលើផ្ទៃសមុទ្រ។
លោក ណារិន្ទ បានថ្លែងថា៖«បើតាមការជូនដំណឹងរបស់ក្រសួងធនធានទឹក និងឧតុនិយម នៅអំឡុងពេលប៉ុន្មានថ្ងៃនេះ ខេត្តព្រះសីហនុ អាចនឹងមានជំនន់ទឹកភ្លៀង និងខ្យល់បក់បោកខ្លាំង រលកសមុទ្រធំៗ ពិសេសនៅតាមប្រជុំកោះ ដូច្នេះសូមបងប្អូនប្រជាពលរដ្ឋ ភ្ញៀវជាតិ និងអន្តរជាតិ និងប្រជានេសាទទាំងអស់យកចិត្តទុកដាក់ស្តាប់ការណែនាំពីមន្ត្រីជំនាញទាំងអស់ ដើម្បីចៀសផុតពីឧបទ្ទវហេតុផ្សេងៗដែលអាចកើតមានជាយថាហេតុ»។
ជាមួយគ្នានេះ លោកបានប្រកាសឲ្យពលរដ្ឋទូរស័ព្ទជាបន្ទាន់ទៅកាន់ស្នងការដ្ឋាននគរបាលខេត្តព្រះសីហនុតាមប្រព័ន្ធHotlineទាន់ហេតុការណ៍ 0977 778 0008 ទៅអធិការដ្ឋាននគរបាលស្រុក កោះរ៉ុងតាមរយៈលេខ 011 200 331, 016 436 69 ឬទៅកាន់ការិយាល័យនគរបាលចរាចរណ៍ផ្លូវទឹកតាមរយៈលេខលេខ 081 500 619 ទៅកាន់ការិយាល័យនគរបាលទេសចរណ៍តាមរយៈលេខ 081 500 61 ក្នុងករណីជួបគ្រោះថ្នាក់អ្វីកើតឡើងក្នុងអំឡុងពេលដើរកម្សាន្ត និងស្នាក់នៅក្នុងខេត្តព្រះសីហនុ ។
រីឯ នៅខេត្តកំពង់ឆ្នាំង នៅមិនទាន់ជួបប្រឈមបញ្ហាគ្រោះជំនន់ទឹកភ្លៀងនៅឡើយទេ បើទោះជាតំបន់ខ្លះមានភ្លៀងធ្លាក់ក្នុងកម្រិតពីបង្គួរទៅខ្លាំងក៏ដោយ។
លោក ដោក ប៊ុនថុន ប្រធានមន្ទីរធនធានទឹកនិងឧតុនិយមខេត្តកំពង់ឆ្នាំង បានប្រាប់ភ្នំពេញប៉ុស្តិ៍ថា នៅតំបន់ផ្សារត្រាច ក្នុងស្រុកសាមគ្គីមានជ័យ ជាទូទៅតែងរងនូវជំនន់ប្រសិនបើមានភ្លៀងធ្លាក់ខ្លាំងច្រើនថ្ងៃជាប់គ្នា ប៉ុន្តែវានឹងស្រកទៅវិញយ៉ាងឆាប់រហ័សដោយសារស្ថានភាពដីក្នុងភូមិសាស្ត្រស្រុកជលគិរីជាដីល្បាយខ្សាច់។ ចំណែកឯស្រុកកំពង់លែង ដែលជាប់នឹងតំបន់បឹងទន្លេសាបវិញ ក៏ដូច្នោះដែរ ដោយសារតែពេលនេះ កម្ពស់ទឹកបឹងទន្លេសាបនៅមានកម្រិតទាប ។
ទោះជាយ៉ាងណា លោក ប៊ុន ថុន បានថ្លែងថា៖ «ក្រុមការងារយើងបានផ្សព្វផ្សាយដល់ពលរដ្ឋនៅតាមមូលដ្ឋានឲ្យត្រៀមបម្រុងទុករួចជាស្រេចនូវគ្រឿងចក្រ ប្រេងឥន្ធនៈ និងឧបករណ៍សម្ភារសម្រាប់ការឆ្លើយតបជាបន្ទាន់ក្នុងករណីមានគ្រោះជំនន់ទឹកភ្លៀងកើតឡើង»។
កាលពីសប្ដាហ៍មុន ឃុំមួយចំនួនក្នុងស្រុកភ្នំព្រឹក ខេត្តបាត់ដំបង និងស្រុកម៉ាឡៃ ខេត្តបន្ទាយមានជ័យ បានរងការជន់លិច ដោយសារជំនន់ទឹកភ្លៀង ប៉ុន្តែនៅពេលនេះ ទឹកបានស្រកចុះវិញហើយ។ នេះបើតាមការអះអាងរបស់អាជ្ញាធរមូលដ្ឋាន។
លោក ហេង បារាំង អធិការស្រុកភ្នំព្រឹកបានប្រាប់ភ្នំពេញប៉ុស្ដិ៍ថា នៅពេលនេះទឹកបានហូរស្រកចុះទៅស្ទឹងបវេល អស់ហើយ មិនមានការលង់លិចទៀតទេ ព្រោះមេឃបានរាំងភ្លៀង ៣ ថ្ងៃមកហើយ៕
