ពិធីរាប់បាត្រក្នុងពិធីបុណ្យកាន់បិណ្ឌ នៅវត្តព្រែកលៀបក្នុងខណ្ឌជ្រោយចង្វារ កាលពីខែកញ្ញា ឆ្នាំ ២០២០។ ហុង មិនា
ភ្នំពេញៈ រដ្ឋមន្ត្រីក្រសួងធម្មការ និងសាសនាលោក ឈិត សុខុន បានធ្វើការណែនាំទៅដល់គ្រប់មន្ទីរធម្មការ និងសាសនា រាជធានី-ខេត្តទាំងអស់ត្រូវយកចិត្តទុកដាក់រៀបចំពិធីកាន់បិណ្ឌ ភ្ជុំបិណ្ឌ និងបុណ្យកឋិនទាននៅឆ្នាំនេះ ដោយត្រូវអនុវត្តនូវវិធានការការពារនានារបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំ និង៣ការពារដើម្បីកុំឱ្យមានការឆ្លងរាលដាលជំងឺកូវីដ ១៩។
លោកបានឱ្យដឹងថា បុណ្យកាន់បិណ្ឌ ភ្ជុំបិណ្ឌជាបុណ្យ ប្រពៃណីព្រះពុទ្ធសាសនាដ៏សំខាន់របស់ពុទ្ធសាសនិកជនខ្មែរគ្រប់ៗរូប។ ពិធីបុណ្យនេះ ប្រារព្ធឡើងដើម្បីឧទ្ទិសកុសលជូនវិញ្ញាណក្ខន្ធនៃអ្នកមានគុណទាំងឡាយ មាន មាតាបិតា ជីដូនជីតា គ្រូឧបជ្ឈាយាចារ្យ បុព្វបុរសជាតិ និងបងប្អូនជនរួមជាតិ ដែលបានលាចាកលោកនេះទៅកាន់លោកខាងមុខ។
លោក ឈិត សុខុន បន្តថា៖ «ពិធីបុណ្យនេះ ក៏ជាឱកាសដ៏ល្អសម្រាប់ការជួបជុំឪពុកម្តាយ បងប្អូនញាតិមិត្ត សាច់សាលោហិត ដែលរស់នៅទីផ្សេងៗគ្នាអាចស្វែងយល់បានពីសុខទុក្ខ និងដំណើរប្រព្រឹត្តទៅក្នុងជីវភាពរស់នៅប្រចាំថ្ងៃរវាងគ្នានឹងគ្នាទៅវិញទៅមកព្រមទាំងអាចបង្កើនបាននូវសាមគ្គីភាពដ៏ទូលំទូលាយផង»។ ឆ្នាំនេះ ពិធីបុណ្យកាន់បិណ្ឌ ភ្ជុំបិណ្ឌ នឹងប្រព្រឹត្តនៅថ្ងៃទី ២២ ខែកញ្ញា ដល់ថ្ងៃទី ៦ ខែតុលា។
ជាមួយគ្នានេះដែរ លោករដ្ឋមន្ត្រីក៏បានលើកឡើងផងដែរថា សម្រាប់បុណ្យកឋិនទាននៅឆ្នាំនេះនឹងប្រព្រឹត្តឡើងត្រូវនឹងថ្ងៃទី ២២ ខែតុលា ដល់ថ្ងៃទី ១៩ ខែវិច្ឆិកា។
បុណ្យកឋិនទានជាកាលទានមួយដ៏ថ្លៃថ្លា មានលក្ខណពិសេសនៅក្នុងព្រះពុទ្ធសាសនា ដែលក្នុង ១ ឆ្នាំមានតែម្តង មានរយ:ពេលកំណត់តែ ២៩ ថ្ងៃ ដោយវត្ត ១ ទទួលបានតែអង្គកឋិន ១ ជាទានមានផលានិសង្សខ្ពស់ទាំងទាយកទាយិកា និងទាំងបដិគ្គាហក: ជាទីជ្រះថ្លានឹងចំណូលចិត្តរបស់ពុទ្ធបរិស័ទខ្មែរ ដែលតែងតែប្រារព្ធធ្វើឡើងរៀងរាល់ឆ្នាំ។
លោក ឈិត សុខុន បន្ថែមថា ក្រៅពីនេះតាមរយ:កឋិនទានវត្តនីមួយៗក៏មានលទ្ធភាពអាចនឹងទទួលបាននូវសម្ភារ ថវិកាសម្រាប់បម្រើការកសាងទីសេនាសនៈនៅក្នុងវត្តមានព្រះវិហារ កុដិ សាលា និងជួយឧបត្ថម្ភដល់ការកសាងសមិទ្ធផលសង្គម និងវិស័យសង្គមកិច្ចថែមទៀតផង។
លោកមានប្រសាសន៍ថា៖ «ដើម្បីរៀបចំបុណ្យកាន់បិណ្ឌ និងកឋិនទានឱ្យដំណើរការ និងប្រព្រឹត្តទៅស្របតាមទំនៀមទម្លាប់ និងប្រពៃណីព្រះពុទ្ធសាសនាគ្រប់មន្ទីរធម្មការ និងសាសនា និងគ្រប់វត្តអារាមទាំងអស់ត្រូវចូលរួមបដិបត្តិតាមសេចក្តីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ដើម្បីទប់ស្កាត់ការឆ្លងរាលដាលជំងឺកូវីដ ១៩ នេះ»។
គ្រប់មន្ទីរធម្មការ និងសាសនា រាជធានី-ខេត្ត ត្រូវយកចិត្តទុកដាក់បង្កលក្ខណៈឱ្យបានល្អប្រសើរ ប្រគេនព្រះសង្ឃជូនពុទ្ធបរិស័ទ ប្រារព្ធពិធីកាន់បិណ្ឌ ភ្ជុំបិណ្ឌ និងកឋិនទានស្របតាមប្រពៃណី ព្រះពុទ្ធសាសនា ដោយក្នុងនោះត្រូវ អនុវត្តនូវវិធានការពាក់ម៉ាស់ វាស់កម្ដៅ រក្សាអនាម័យ លាង ដៃសាប៊ូ ឬអាល់កុល ជែល និងរក្សាគម្លាតសុវត្ថិភាពសង្គម បុគ្គល និងវិធានការ ៣កុំ ៣ការពារ។
លោកឡើងទៀតថា៖ «គ្រប់វត្តអារាមត្រូវរៀបចំសម្អាតបូជនីយដ្ឋានស្តូប កន្លែងតម្កល់អដ្ឋិធាតុបងប្អូនជនរួមជាតិដែលបានបាត់បង់ជីវិតក្នុងរបបប្រល័យពូជសាសន៍ និងតុបតែង លម្អដោយបំភ្លឺភ្លើងពណ៌ លើកទង់ជាតិ ទង់សាសនា ទង់ព្រះមហាក្សត្រ បដាពាក្យស្លោក ដើម្បីអបអរសាទរតាមប្រពៃណីព្រះពុទ្ធសាសនា»។
អ្នកស្រី នាង សុខលី ជាពុទ្ធសាសនិក ១ រូបរស់នៅទីក្រុងភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ៦ កញ្ញាថា អ្នកស្រីបានខកខានទៅវត្តប្រារព្ធពិធីបុណ្យនានាជាង ១ ឆ្នាំហើយ ដោយសារតែការបារម្ភពីការឆ្លងជំងឺកូវីដ ១៩ ហើយ កូនៗរបស់អ្នកស្រីមិនឱ្យគាត់ទៅវត្តក្នុងអំឡុងពេលមានការឆ្លងរាលដាលវីរុសកូវីដ ១៩ ទេ។
អ្នកស្រីថា៖ «ខ្ញុំមិនទាន់ដឹង ថាតើឆ្នាំនេះខ្ញុំបានទៅវត្តឬអត់ទេតែខ្ញុំចង់ទៅ ដោយសារខ្ញុំខានទៅយូរហើយ ហើយណាមួយខ្ញុំតាមដានព័ត៌មានដូចជាការឆ្លងជំងឺកូវីដនេះក៏បានធ្លាក់ចុះច្រើនដែរហើយ។ ចាំ មើលជិតដល់ថ្ងៃបុណ្យសិន ចាំខ្ញុំសម្រេចថា ទៅឬអត់»៕
វីដេអូ៖
