ភ្នំពេញៈ តំបន់ទំនាបនៃខេត្តខ្លះកំពុងទទួលរងការជន់លិចដោយជំនន់ទឹកភ្លៀង ស្របពេលដែលក្រសួងធនធានទឹក និងឧតុនិយមបានប្រកាសថា រាជធានី-ខេត្តចំនួន ១១ របស់កម្ពុជានឹងជួបប្រឈមជំនន់ទឹកភ្លៀង។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានប្រាប់ ភ្នំពេញ ប៉ុស្តិ៍ នៅថ្ងៃទី ៩ កញ្ញាថា ចាប់ពីពេលនេះដល់ថ្ងៃទី ១៤ ខែកញ្ញា ឆ្នាំនេះ តំបន់ទំនាបមួយចំនួនក្នុងរាជធានី-ខេត្តចំនួន ១១ រួមមាន រាជធានីភ្នំពេញ ខេត្តបាត់ដំបង,ពោធិ៍សាត់ កំពង់ធំ កំពង់ឆ្នាំង កំពង់ស្ពឺ កណ្តាល ស្វាយរៀង កោះកុង ព្រះសីហនុ និងខេត្តកំពត អាចនឹងរងការជន់លិចដោយជំនន់ទឹកភ្លៀង។
លោក យុត្ថា បានឱ្យដឹងថា នៅពេលនេះកម្ពុជាកំពុងទទួលរងនូវសម្ពាធទាប (ITCZ) ដែលអូសបន្លាយពីប្រទេសមីយ៉ាន់ម៉ា ថៃ ឡាវ និងវៀតណាម រួមទាំងខ្យល់មូសុងនិរតី ខ្យល់សមុទ្រ និងវិសម្ពាធទាប ២ ទៀតនៅប្រទេសហ្វីលីពីនកំពុងបំប្លែងខ្លួនជាព្យុះទី ១៣ មានឈ្មោះថា កុងសុង (CONSON)។
លោកបានបញ្ជាក់ថា៖ «យោងតាមការព្យាករអាកាសធាតុចាប់ពីពេលនេះតទៅ តំបន់មួយចំនួនក្នុងខេត្តបាត់ដំបង ពោធិ៍សាត់ កំពង់ធំ កំពង់ឆ្នាំង កំពង់ស្ពឺ កណ្តាល ស្វាយរៀង និងរាជធានីភ្នំពេញអាចប្រឈមនឹងជំនន់ទឹកភ្លៀង។ ចំណែកខេត្តជាប់មាត់សមុទ្រ ក៏នឹងប្រឈមការជន់លិចដោយជំនន់ទឹកភ្លៀងនៅផ្នែកមួយចំនួនផងដែរ»។
ជុំវិញករណីនេះ លោក គួច ចំរើន អភិបាលខេត្តព្រះសីហនុបានប្រកាសផ្អាកការធ្វើចរាចរណ៍តាមផ្លូវទឹកជាបណ្ដោះអាសន្ន ដោយហាមអ្នកនេសាទ និងម្ចាស់ទូកទេសចរណ៍ចាកចេញពីផែ ឬមាត់កំពង់ទូកបន្ទាប់ពិនិត្យឃើញខ្យល់ និងរលកសមុទ្រធំៗកើតឡើងដូចការព្យាកររបស់ក្រសួងធនធានទឹក និងឧតុនិយម។
លោកបានថ្លែងថា៖ «តាមព័ត៌មានដែលយើងទទួលបាន ពេលនេះ គឺមានខ្យល់ និងរលកសមុទ្រធំ អ៊ីចឹងខ្ញុំសម្រេចឱ្យផ្អាកការធ្វើដំណើរតាមផ្លូវទូក កាណូត ចូលទៅក្នុងលម្ហសមុទ្រ ដើម្បីការពារក្រែងមានគ្រោះថ្នាក់ជាយថាហេតុ»។
ជាមួយគ្នានេះ លោកបានអំពាវនាវដល់សមត្ថកិច្ចពាក់ព័ន្ធជូនដំណឹងដល់ពលរដ្ឋ ជាពិសេសប្រជានេសាទត្រូវធ្វើដំណើរទៅកន្លែងមានសុវត្ថិភាព ដើម្បីចៀសពីគ្រោះថ្នាក់។
ដោយឡែក ផ្ទះរបស់ពលរដ្ឋក្នុងភូមិថ្មធំ ឃុំរាម ស្រុកព្រៃនប់ ជិតអាកាសយានដ្ឋាន ខេត្តព្រះសីហនុ ពេលនេះជំនន់ទឹកភ្លៀងកំពុងជន់លិចដែលចំណុចខ្លះដល់កម្ពស់ត្រឹមចង្កេះ បន្ទាប់ពីមានភ្លៀងធ្លាក់ ៣ ថ្ងៃជាប់ៗគ្នា។ នេះបើតាមលោក ជា លីដា ជាពលរដ្ឋក្នុងតំបន់នោះបានប្រាប់ភ្នំពេញប៉ុស្តិ៍នៅថ្ងៃទី ៩ កញ្ញា។
លោកបានថ្លែងថា៖ «នៅពេលនេះផ្ទៃមេឃនៅតែអាប់អួហើយបើវាភ្លៀងទៀតនោះប្រហែលជាគ្រួសារខ្ញុំអាចនឹងបិទទ្វារផ្ទះទៅរស់នៅផ្ទះបងប្អូនបណ្ដោះអាសន្នសិន ដើម្បីការពារគ្រោះថ្នាក់ជាយថាហេតុ»។
យ៉ាងណាក្ដី លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានអះអាងថា ការជន់លិចនៅផ្នែកខ្លះនៃខេត្តនេះគឺបណ្ដាលមកពីឥទ្ធិពលនៃជ្រលងសម្ពាធទាប និងបាតុភូតនៃអាកាសធាតុផ្សេងទៀតដូចក្រសួងធនធានទឹក និងឧតុនិយមបានជូនដំណឹង។
លោកថា៖ «នៅពេលនេះមានភ្លៀងធ្លាក់ខ្លាំង និងខ្សោយតាមតំបន់ និងមានឃើញលិចខ្លះនៅតំបន់ទំនាបៗ ប៉ុន្តែមិនទាន់ប៉ះពាល់ធ្ងន់ធ្ងរដល់ជីវភាពរស់នៅរបស់ពលរដ្ឋនៅឡើយទេ។ ទោះយ៉ាងណា អាជ្ញាធរយើងកំពង់តាមដានបន្ត»។
ជុំវិញករណីជំនន់ទឹកភ្លៀងនេះដែរលោក ស៊ុន ម៉ម មេភូមិពោធិ៍ចាស់ ឃុំបេង ស្រុកបន្ទាយអម្ពិល ខេត្តឧត្តរមានជ័យបានប្រាប់ភ្នំពេញប៉ុស្តិ៍នៅថ្ងៃទី ៩ កញ្ញាថា កំណាត់ផ្លូវលំជនបទ ក្នុងភូមិលោក បានរងការខូចខាតជាខ្លាំង ដោយសារជំនន់ទឹកភ្លៀងហូរកាត់ក្នុងរយៈពេល ៣ ថ្ងៃកន្លងមកនេះ។
លោកបានបញ្ជាក់ថា៖ «២-៣ ថ្ងៃនេះ មានភ្លៀងធ្លាក់ខ្លាំងនៅជួរភ្នំដងរែក ហើយទឹកបានហូរចាក់ពីភ្នំមកជន់លិច និងហូរកាត់ផ្លូវក្នុងភូមិយើងខ្ញុំបណ្ដាលឱ្យខូចខាតផ្លូវសរុបប្រវែងជាង ១០០ ម៉ែត្រ និងប៉ះពាល់ដំណាំស្រូវប្រមាណ ៣០ ហិកតា។ ក៏ប៉ុន្តែមិនទាន់ប៉ះពាល់លំនៅឋានអ្នកភូមិនៅឡើយទេ»។
បើតាមលោក ម៉ម នៅក្នុងតំបន់នោះមានប្រព័ន្ធដៃអូរច្រើន ដែលអាចជួយសម្រួលដល់រំហូរទឹក មិនឱ្យជន់លិចយូរពោលគឺវាអាចនឹងស្រកទៅវិញលឿន ប្រសិនបើមេឃរាំងភ្លៀងក្នុងចន្លោះ ២-៣ ថ្ងៃក្រោយមក។
ចំណែកលោក សុខ សាន្តតារ៉ា អភិបាលស្រុកឆែបបានប្រាប់ ភ្នំពេញ ប៉ុស្តិ៍ដែរថា បន្ទាប់ពីមានភ្លៀងធ្លាក់ខ្លាំងជាប់ៗគ្នា ៥ ថ្ងៃមក ផ្ទះពលរដ្ឋមួយចំនួននៅភូមិឆែបលិច ឃុំមួយ ត្រូវបានជន់លិច ដោយផ្ទះខ្លះលិចត្រឹមស្មងជើង និងខ្លះទៀតលិចត្រឹមជង្គង់ និងលិចផ្លូវលំមួយចំនួនក្នុងឃុំមួយផងដែរ។
លោកថា៖ «តំបន់នេះលិចរាល់ឆ្នាំឱ្យតែមានភ្លៀងខ្លាំង ប៉ុន្តែទឹកក៏ឆាប់ស្រកវិញលឿនដែរ គឺមិនបង្កការខូចខាតផលដំណាំ ឬលំនៅឋានអ្នកភូមិទេ។ ទោះយ៉ាងណា ក្រុមការងាររដ្ឋបាលស្រុករបស់យើងកំពុងតាមដានបន្តនូវស្ថានភាពជំនន់ទឹកភ្លៀងនេះផងដែរ»។
ដោយឡែកនៅរាជធានីភ្នំពេញមន្ត្រីជំនាញនៃមន្ទីរធនធានទឹក និងឧតុនិយមកំពុងបន្តចុះស្ដារភក់ កាយសំរាម ចេញពីប្រឡាយមេ ១ កន្លែង នៅតាមបណ្តោយផ្លូវ ៣០ ម៉ែត្រ ក្នុងភូមិសាស្ត្រខណ្ឌសែនសុខ និងខណ្ឌឫស្សីកែវ ដើម្បីបើកផ្លូវទឹកឱ្យហូរទៅកាន់ស្ថានីយបូមទឹកកប់ស្រូវបានលឿន ដែលអាចកាត់បន្ថយការជន់លិចលំនៅឋាន និងផ្លូវសំខាន់ក្នុងខណ្ឌទួលគោក ខណ្ឌសែនសុខ និងខណ្ឌប្ញស្សីកែវ ។ នេះបើតាមលោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយម រាជធានីភ្នំពេញនៅថ្ងៃទី ៩ កញ្ញា៕
វីដេអូ៖