បាញ់ថ្នាំសម្លាប់មេរោគនៅក្នុងថ្នាក់រៀនមួយនៅក្នុងរាជធានីភ្នំពេញ។ ហេង ជីវ័ន
ភ្នំពេញៈ អភិបាលរាជធានីភ្នំពេញលោក ឃួង ស្រេង បញ្ជាក់ថា រដ្ឋបាលរាជធានីនឹងមិនអនុញ្ញាតឱ្យគ្រឹះស្ថានសិក្សាណាមួយ ដែលមិនគោរពត្រឹមត្រូវតាមគោលការណ៍ប្រតិបត្តិស្ដង់ដា (SOP) បើកដំណើរការសាលាឡើងវិញក្នុងបរិបទ កូវីដ ១៩ របស់ក្រសួងអប់រំនោះទេ ខណៈសាលារដ្ឋ និងឯកជននៅទូទាំងប្រទេសកំពុងត្រៀមបើកដំណើរការឡើងវិញ។
ការថ្លែងបែបនេះ ខណៈលោក និងមន្ត្រីពាក់ព័ន្ធមួយចំនួនបានចុះពិនិត្យការសម្អាតអនាម័យនៅវិទ្យាល័យជាស៊ីមសន្ធរមុខ នៅខណ្ឌទួលគោក នាព្រឹក ថ្ងៃទី ១៣ ខែកញ្ញា។ លោកបញ្ជាក់ថា ការឆ្លងរាលដាលនៃជំងឺកូវីដ ១៩ ក្នុងរាជធានីភ្នំពេញមានការថមថយគួរឱ្យកត់សម្គាល់។ ប៉ុន្តែរដ្ឋបាលរាជធានីភ្នំពេញនៅតែប្រុងប្រយ័ត្នជាប់ជាប្រចាំពីការឆ្លងរាលដាលឡើងវិញនៃវីរុសកូវីដ ១៩។
លោកថ្លែងថា៖ «រដ្ឋបាលរាជធានីភ្នំពេញបានសម្រេចបើកសាលាឡើងវិញ ស្របតាមអនុសាសន៍របស់សម្តេចនាយករដ្ឋមន្ត្រី [ហ៊ុន សែន] ចាប់ពីក្មេងអាយុពី ១២ ឆ្នាំឡើងទៅ ដែលទទួលបានការចាក់វ៉ាក់សាំង ហើយការបើកនេះ យើងបើកជាជំហានៗ ដែលមានន័យថា សាលាណាដែលគោរពតាមគោលការណ៍ប្រតិបត្តិស្ដង់ដារបស់ក្រសួងអប់រំ យើងនឹងអនុញ្ញាតឱ្យបើកដំណើរការ»។
លោក ឃួង ស្រេង បន្ថែមថា៖ «ក្នុងករណី ដែលសាលាមានការខ្វះខាតមិនទាន់គ្រប់គ្រាន់ចូលក្នុងគោលការណ៍ SOP របស់ក្រសួងអប់រំទេ យើងក៏នឹងមិនទាន់អនុញ្ញាតឱ្យបើកទេ ហើយយើងនឹងធ្វើការណែនាំឱ្យមានការបំពេញបន្ថែមទៀត»។
ទាក់ទងនឹងការមិនអនុញ្ញាតនេះ ទាំងសាលារដ្ឋ ទាំងសាលាឯកជន លោកអភិបាលបានបញ្ជាក់ជាមុនថា លោកមានការព្រួយបារម្ភនូវអ្វីដែលអាចនឹងមានការចោទមកសាលារាជធានីភ្នំពេញថា មានការរើសអើងលើសាលា។ ប៉ុន្តែលោកថា ការធ្វើដូចនេះ គឺអាស្រ័យលើការគោរពតាមគោលការណ៍ ស្តង់ដា SOP របស់ក្រសួងអប់រំ យុវជន និងកីឡាតែប៉ុណ្ណោះ។
លោក ឃួង ស្រេង ថ្លែងថា៖ «ខ្ញុំសុំឱ្យម្ចាស់គ្រឹះស្ថានឯកជន និងរដ្ឋ ត្រូវសហការជាមួយនឹងក្រុមការងារយើងខ្ញុំដែលនឹងចុះត្រួតពិនិត្យទៅតាមសាលាទាំងអស់ ទាំងសាលារដ្ឋ និងឯកជន។ ប្រសិនបើសាលាណា ដែលគោរពបានតាមស្តង់ដា SOP របស់ក្រសួងអប់រំ យើងនឹងបើកឱ្យដំណើរការជាបណ្តើរៗ»។
លោកអភិបាលបញ្ជាក់ថា នៅថ្ងៃទី ១៥ ខែកញ្ញា ការបើកឡើងវិញនូវគ្រឹះសា្ថនសិក្សា គឺមិនមែនដូចការបើកសាលាទាំងអស់ដូចបើកបវេសនកាលទេ គឺ បើកបណ្តើរៗ។ តែបើកសាលា ដែលគោរពតាមគោលការណ៍ប្រតិបត្តិស្តង់ដារបស់ក្រសួងអប់រំ និងការបំពេញបានទៅតាមកាតព្វកិច្ចនីមួយៗរបស់លោកគ្រូ អ្នកគ្រូ អាណាព្យាបាល និងសិស្សផ្ទាល់តែម្តង។
ក្នុងរាជធានីភ្នំពេញ ស្ថានភាពនៃការឆ្លងរាលដាលនៃជំងឺកូវីដ ១៩ ហាក់មានសុវត្ថិភាព ទោះបីជាការឆ្លងនៅតែមានមែន។ ប៉ុន្តែចំនួនមានការធ្លាក់ចុះច្រើន ហើយការស្លាប់ក៏ថយចុះខ្លាំងដែរ គឺពី ៣០ នាក់មកនៅ ៥ នាក់ក្នុង ១ ថ្ងៃហើយអ្នកដែលស្លាប់ គឺជាអ្នកដែលមានអាយុច្រើន និងមានជំងឺប្រចាំកាយ។
ជាមួយគ្នានេះ សម្រាប់លោកគ្រូ អ្នកគ្រូ ដែលមានបញ្ហាសុខភាពមិនទាន់បានចាក់វ៉ាក់សាំងកូវីដ ១៩ នឹងស្នើឱ្យពួកគាត់ធ្វើការបង្រៀនតាមប្រព័ន្ធអនឡាញ។ ចំណែកអ្នកដែលបានចាក់វ៉ាក់សាំង ២ ដងរួច និងទទួលបានដូសជំរុញហើយទៀត ពួកគាត់នឹងត្រូវបានលើកទឹកចិត្តឱ្យមកបង្រៀននៅក្នុងថ្នាក់បាន។
លោក ឃួង ស្រេង ថ្លែងថា៖ «សម្រាប់សិស្ស ដែលមិនទាន់បានចាក់វ៉ាក់សាំង ក៏អនុញ្ញាតឱ្យមករៀនដែរ តែឱ្យនៅឆ្ងាយពីគេ។ ការដែលយើងធ្វើដូចនេះ គឺមិនមែនជាការរើសអើងទេ តែជាការការពារទៅដល់ពួកគាត់ ដោយសារវាមិនប្រាកដថា គាត់ចម្លងមកគេទេ។ តែអាចគាត់ឆ្លងពីគេ ដោយសារពួកគាត់មិនមានប្រព័ន្ធការពារ ពីព្រោះពួកគាត់មិនទាន់បានចាក់វ៉ាក់សាំង»។
រដ្ឋបាលរាជធានីភ្នំពេញបានប្រកាសអនុញ្ញាតឱ្យដំណើរការឡើងវិញនូវគ្រឹះស្ថានសិក្សាសាធារណៈ និងឯកជន សម្រាប់កម្រិតអនុវិទ្យាល័យ និងវិទ្យាល័យទាំងអស់ក្នុងភូមិសាស្ត្ររាជធានី-ភ្នំពេញដែលមានហានិភ័យទាប ចាប់ពីថ្ងៃទី ១៥ ខែកញ្ញាតទៅ។
នៅតាមបណ្តាខេត្តផ្សេងៗទៀតក៏បានត្រៀមរួចរាល់ផងដែរក្នុងដំណើរការបើកសាលាឡើងវិញនេះ ដែលភាគច្រើន គឺនឹងបើកឡើងវិញនៅថ្ងៃទី ១៥ ខែកញ្ញាដូចគ្នា។
ការរៀបចំបើកដំណើរការសាលារៀនឡើងវិញនេះត្រូវបានធ្វើឡើង បន្ទាប់ពីលោក ហ៊ុន សែន បានស្នើទៅរដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន ឱ្យមានការត្រួតពិនិត្យ និងវាយតម្លៃក្នុងការបើកឡើងវិញ៕
វីដេអូ៖
