ពលរដ្ឋ និងប៉ូលិសប្រឈមមុខគ្នាពីថ្ងៃទី ១២ កញ្ញា រឿងដីធ្លីនៅស្រុកកណ្តាលស្ទឹង។ រូប FB
កណ្តាលៈ សមត្ថកិច្ចកំពុងសាកសួរពលរដ្ឋ ៣០ នាក់ នៅស្នងការដ្ឋាននគរបាលខេត្ដកណ្ដាល បន្ទាប់ពីឃាត់ខ្លួនពេលប៉ះទង្គិចជាមួយកងកម្លាំងសមត្ថកិច្ចក្នុងរឿងវិវាទដីធ្លីកាលពីថ្ងៃទី ១២ កញ្ញា នៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី ក្នុងភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង បណ្តាលឱ្យកងកម្លាំងសមត្ថកិច្ចរងរបួសជាង ១០ នាក់។ សង្គមស៊ីវិលស្នើឱ្យអាជ្ញាធរដោះស្រាយតម្លាភាព យុត្តិធម៌ និងសន្តិវិធី។
សេចក្ដីប្រកាសព័ត៌មានរបស់រដ្ឋបាលខេត្តកណ្តាលនៅថ្ងៃទី ១២ កញ្ញា អះអាងថា កាលពីវេលាម៉ោង ១០-១២ ព្រឹក ថ្ងៃទី ៣០ កញ្ញា មានក្រុមមនុស្សប្រមាណ ១០០ នាក់ បានមកប្រមូលផ្តុំគ្នាប្រើអំពើហិង្សា និងជេរប្រមាថ ដោយបានដុតកៅស៊ូកង់ និងសម្ភារផ្សេងៗ។
ប្រើដំបង គប់ដុំថ្ម បាញ់ចម្ពាមកៅស៊ូ គប់ដបសាំង មកលើកងកម្លាំងមានសមត្ថកិច្ច ដែលកំពុងឈរជើងបំពេញការងាររក្សាសន្តិសុខ និងសណ្តាប់ធ្នាប់ក្នុងទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី ស្ថិតនៅភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង បណ្តាលឱ្យកងកម្លាំងសមត្ថកិច្ចរងរបួសចំនួន ១៣ នាក់។
រដ្ឋបាលខេត្ដបញ្ជាក់ថា ស្ថិតក្នុងស្ថានភាពប្រើអំពើហិង្សា កងកម្លាំងបានបង្ខំចិត្តបំបែកក្រុមបាតុករដោយប្រើរថយន្តបាញ់ទឹកឧស្ម័នបង្ហូរទឹកភ្នែក ដើម្បីការពារខ្លួន និងបំបែកក្រុមបាតុករ ព្រមទាំងបានឃាត់ខ្លួនសមាជិកក្រុមបាតុករ ៣០ នាក់ ស្រី ២០ នាក់ ដើម្បីនាំយកមកសាកសួរនៅស្នងការដ្ឋាននគរបាលខេត្តកណ្តាល។
លោក គង់ សោភ័ណ្ឌ អភិបាលខេត្តកណ្ដាលប្រាប់ ភ្នំពេញ ប៉ុស្ដិ៍ នៅថ្ងៃទី ១៣ កញ្ញាថា រដ្ឋបាលខេត្ដបានដាក់កម្លាំងប្រមាណ ៤០០ នាក់ ដើម្បីទប់ស្កាត់កុំឱ្យមានបញ្ហាកើតឡើងនៅចំណុចទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មីនេះ។ ប៉ុន្ដែប្រជាពលរដ្ឋមានកំហឹងទើបប្រើប្រាស់ហិង្សាមកលើសមត្ថកិច្ចបណ្ដាលឱ្យកងកម្លាំងសមត្ថកិច្ចរងរបួសចំនួន ១៣ នាក់ ក្នុងនោះមួយចំនួនរបួសធ្ងន់កំពុងសម្រាកនៅមន្ទីរពេទ្យ។
លោកថា៖ «យើងមានឡានបាញ់ទឹក បាញ់សម្ញែង បន្ទាប់មកបងប្អូនប្រជាពលរដ្ឋក៏បំបែកហ្វូងទៅផ្ទះរៀងៗខ្លួន។ នរណាដែលក្លៀវក្លាជាងគេ ក៏ត្រូវបានគេឃាត់ខ្លួន។ ចំពោះពលរដ្ឋដែលបានឃាត់ខ្លួន យើងកំពុងឱ្យខាងសមត្ថកិច្ចសាកសួរទៅតាមនីតិវិធី ហើយតុលាការគេអាចសួរនាំរកអ្នកដៃដល់ដែរ»។
លោក គង់ សោភ័ណ្ឌ បញ្ជាក់ថា រដ្ឋបាលខេត្ដកណ្ដាលប្រកាន់ជំហរដោះស្រាយបញ្ហាដីធ្លីជូនប្រជាពលរដ្ឋនៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មីដោយយោងទៅតាមគោលការណ៍ច្បាប់។ ទី១ ដោះដូរដីរបស់ប្រជាពលរដ្ឋជាមួយនឹងដីរដ្ឋ និងទី២ រដ្ឋនឹងទិញដីទៅតាមតម្លៃ ដែលរដ្ឋបានកំណត់ជាគោលការណ៍រួចហើយ គឺតម្លៃ ៨ ដុល្លារ ក្នុង ១ ម៉ែត្រការ៉េ។
លោកស្រី ឃឹម សូម៉ាលី តំណាងប្រជាពលរដ្ឋដែលមានបញ្ហាដីធ្លីជាង ៣០០ គ្រួសារ នៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មីនេះឱ្យដឹងថា ក្នុងពេលកើតហេតុ ករណីហិង្សាជាមួយសមត្ថកិច្ច គឺពលរដ្ឋប្រមាណជិត ២០០ នាក់ កំពុងនាំគ្នាចូលទៅហាមកុំឱ្យគ្រឿងចក្ររបស់ក្រុមហ៊ុនចូលទៅឈូសឆាយដីរបស់ពួកគាត់ ដែលមិនទាន់បានដោះស្រាយ។ ប៉ុន្ដែត្រូវបានសមត្ថកិច្ចប្រមាណ ៤០០ នាក់ យករនាំងដែកមករារាំងមិនឱ្យពលរដ្ឋចូលទៅទើបបង្កជាហិង្សា។
លោកស្រីប្រាប់ថា៖ «ករណីហិង្សានេះមុនដំបូងកើតឡើងមកពីសមត្ថកិច្ចយករនាំងដែកមកដាក់រារាំងពលរដ្ឋ មិនឱ្យពួកខ្ញុំចូលទៅហាមគ្រឿងចក្រ មិនឱ្យឈូសឆាយដីពួកខ្ញុំ។ ដូច្នេះប្រជាជនក៏មានកំហឹងក៏មានការប៉ះទង្គិចគ្នាកើតឡើង»។
បើតាមលោកស្រី សូម៉ាលី ក្នុងចំណោមប្រជាពលរដ្ឋជិត ៤០០ គ្រួសារ ដែលមានបញ្ហាដីធ្លីនៅទីតាំងគម្រោងសាងសង់អាកាសយានដ្ឋាននេះមានប្រជាពលរដ្ឋប្រមាណ ១៦ គ្រួសារបានទទួលយកការដោះស្រាយជាមួយរដ្ឋបាលខេត្ដក្នុងតម្លៃដី ១ ម៉ែត្រការ៉េ ៨ ដុល្លារ។
លោកស្រីឱ្យដឹងថា តម្លៃទីផ្សារដីនៅទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី បច្ចុប្បន្នជាមធ្យម ១ ម៉ែត្រការ៉េតម្លៃជាង ១០០ ដុល្លារ។ ដូច្នេះពួកគាត់មិនអាចទទួលយកការដោះស្រាយគោលនយោបាយតម្លៃ ៨ ដុល្លារក្នុង ១ ម៉ែត្រការ៉េបានទេ។ លោកស្រីអះអាងថា ពលរដ្ឋទាមទារឱ្យដោះស្រាយក្នុងតម្លៃ ១ ម៉ែត្រការ៉េ ៨០ ដុល្លារ ឬអាចចរចានៅក្នុងតម្លៃនេះ។
លោក ធួន វណ្ណៈ អាយុ ៤៥ ឆ្នាំ ពលរដ្ឋម្ចាស់ដីមិនទាន់បានដោះស្រាយក្នុងគម្រោងសាងសង់អាកាសយានដ្ឋាននេះឱ្យដឹងថា ក្នុងពេលប៉ះទង្គិចជាមួយសមត្ថកិច្ច ប្រជាពលរដ្ឋមួយចំនួនត្រូវបានសមត្ថកិច្ចវាយ និងមានម្នាក់បានរងរបួសធ្ងន់បាក់ជើង។
លោកថា៖ «ពួកយើងមិនបានចេញទៅតវ៉ាទេ ប៉ុន្ដែសមត្ថកិច្ចបានចូលមកដល់ក្នុងផ្ទះយកកុំព្យូទ័រ ម៉ាស៊ីនថតចម្លងខ្នាតតូច ម៉ូតូ និងគោយន្តរបស់យើង។ សមត្ថកិច្ចខ្លះមកធាក់បំបែកទ្វារកញ្ចក់ និងវាយបំបាក់ចម្រឹងផ្ទះរុះរើពេញផ្ទះដើម្បីស្វែងរកប្រជាពលរដ្ឋ»។
លោក អំ សំអាត នាយករងអង្គការការពារសិទ្ធិមនុស្ស លីកាដូ ថ្លែងថា អង្គការសង្គមស៊ីវិលធ្វើការផ្នែកសិទ្ធិមនុស្សមានការបារម្ភកាន់តែខ្លាំងលើវិវាទដីធ្លីនេះដែលអាចនឹងបន្តកើតឡើងនូវអំពើហិង្សា និងការចាប់ខ្លួនជាបន្តទៀតនៅពេលខាងមុខ។
លោកថ្លែងថា៖ «ករណីនៃការប៉ះទង្គិចនេះគឺយើងមានការបារម្ភកាន់តែខ្លាំងលើករណីដីធ្លីដែលបានកើតឡើងលើគម្រោងអភិវឌ្ឍន៍ ព្រលានយន្តហោះថ្មី។ ករណីនៃការប៉ះទង្គិចគ្នាបានកើតឡើងជាបន្តបន្ទាប់ ហើយទ្រង់ទ្រាយនៃការប៉ះទង្គិចកាន់តែធំ និងធ្ងន់ធ្ងរឡើងរហូតមានអំពើហិង្សា និងឃាត់ ឬការចាប់ខ្លួនមនុស្សប្រហែល ៣០ នាក់»។
លោកបន្តថា៖ «យើងជាអង្គការសិទ្ធិមនុស្សកំពុងបន្តតាមដាន និងឃ្លាំមើលលើករណីនេះយ៉ាងយកចិត្តទុកដាក់បំផុតហើយទទូចឱ្យមានការដោះស្រាយប្រកបដោយតម្លាភាពយុត្តិធម៌ និងសន្តិវិធី ដើម្បីកុំឱ្យមានអំពើហិង្សាបង្កឱ្យមានផលប៉ះពាល់ដល់គ្រប់ភាគី និងមានការឃាត់ ឬចាប់ខ្លួនប្រជាពលរដ្ឋតទៅទៀត»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស (អាដហុក) ឱ្យដឹងថា អាដហុកបានទទួលពាក្យបណ្ដឹងសុំជួយស្វែងរកដំណោះស្រាយពីប្រជាពលរដ្ឋលើបញ្ហាដីធ្លីនេះ។
លោកថ្លែងថា៖ «បើយើងពិនិត្យមើលតាមផ្លូវច្បាប់ គឺប្រជាពលរដ្ឋជាម្ចាស់ដីមានប្លង់កម្មសិទ្ធិស្របច្បាប់ ដូច្នេះទោះបីជាការដកហូតយកដីនោះទៅប្រើប្រាស់ជាសម្បត្ដិ សាធារណៈរបស់រដ្ឋក៏ត្រូវតែទូទាត់ សំណងជូនប្រជាពលរដ្ឋតាមតម្លៃ ទីផ្សារមិនអាចធ្វើការបង្ខិតបង្ខំទេ។
លោក ឈឿន សុចិត្ត ស្នងការនគរបាលខេត្តកណ្តាលមិនអាចទាក់ទងសុំអត្ថាធិប្បាយបានទេ។
រដ្ឋបាលខេត្តកណ្តាលបញ្ជាក់ថា៖ «រដ្ឋបាលខេត្ដកណ្ដាលពិតជាមាន ការសោកស្តាយចំពោះទង្វើជ្រុលនិយមរបស់ក្រុមមនុស្សដែលបានប្រព្រឹត្តខុសច្បាប់ដែលអំពើនេះអាចនាំឱ្យប៉ះពាល់សណ្ដាប់ធ្នាប់សន្តិសុខ និងការបំផ្លាញផលប្រយោជន៍ដ៏ធំរបស់ប្រទេសជាតិ»។ រដ្ឋបាលខេត្តអំពាវនាវឱ្យពលរដ្ឋមកដោះស្រាយតាមសន្តិវិធី៕
វីដេអូ៖
