ព្រះវិហារ/ស្ទឹងត្រែងៈ ប្រព័ន្ធ​ផ្លូវជាតិ និង​ផ្លូវលំ​ជនបទ​មួយ​​ចំនួន​ក្នុង​ខេត្តព្រះវិហារ​បាន​រង​ការជន់លិច និង​ខូចខាត​ដោយ​កន្លែង ខណៈ​ទឹក​ស្ទឹងសែន​ជន់​ឡើង​ជិត​ដល់​កម្រិត​ប្រកាសអាសន្ន​ដោយសារ​ភ្លៀង​ធ្លាក់​ខ្លាំង​ ៤-៥ ​ថ្ងៃ​ចុងក្រោយ​នេះ​។

ស្រដៀង​គ្នា​នេះ​ទឹកទន្លេ​ទាំង​ ៣ ​នៃ​ខេត្តស្ទឹងត្រែង ក៏បាន​ឡើង​ជិត​ដល់​ចំណុច​ប្រកាសអាសន្ន​​ផងដែរ​។ នេះ​បើតាម​មន្ត្រី​មូលដ្ឋាន និង​មន្ត្រី​ជំនាញ​នៃ​ខេត្ត​ទាំង​ ២​។

លោក​ សំ លាងទ្រី ប្រធាន​មន្ទីរ​សាធារណការ និង​ដឹកជញ្ជូន​ខេត្តព្រះវិហារ​បាន​ប្រាប់ ​​ភ្នំពេញ​ ប៉ុស្តិ៍​ នៅ​ថ្ងៃទី​ ១៤ ខែ កញ្ញា ឆ្នាំ​ ២០២១ ​ថា ភ្លៀង​ធ្លាក់​ខ្លាំង​ជាប់ៗ​គ្នា​នា​ប៉ុន្មាន​ថ្ងៃ​កន្លងមកនេះ​បានធ្វើឱ្យ​កំណាត់​ផ្លូវជាតិ​លេខ ៩៥, ៩៤,៩២ និង​​កំណាត់​ផ្លូវ​ 2pvh4 ក្នុង​ខេត្ត​​ព្រះវិហារ​បាន​រង​ការជន់លិច​​ខូចខាត​ជាច្រើន​កន្លែង​ដែល​​បង្ក​ការលំបាក​ដល់​ការធ្វើ​ដំណើរ​របស់​ពលរដ្ឋ​។

លោក ​លាង ទ្រី បាន​ថ្លែងថា​៖ «​មាន​កន្លែង​ខ្លះ​ទឹក​ជន់លិច និង​ហូរ​កាត់​បណ្ដាលឱ្យ​រង​ការខូចខាត​បង្ក​ការលំបាក​ដល់​ការធ្វើ​ដំណើរ​របស់​ប្រជាពលរដ្ឋ ប៉ុន្តែ​ស្ថានភាព​នៃ​ជំនន់​ទឹកភ្លៀង​នោះ​មិនទាន់​ធ្ងន់ធ្ងរ​នៅឡើយ​ទេ​»​។

បើតាម​លោក លាង ទ្រី កំណាត់​ផ្លូវ​ដែល​ខូចខាត​តិចតួច​ត្រូវ​បាន​បាន​ជួសជុល​កែសម្រួល​វិញ​ភ្លាមៗ ដោយ​ការចាក់ដី និង​ថ្ម បន្ថែម​ពីលើ​ដើម្បី​សម្រួល​ដល់​ការធ្វើដំណើរ​របស់​ពលរដ្ឋ ខណៈ​ទីតាំង​ខ្លះ​ត្រូវ​កាយ​ផ្ដាច់​ផ្លូវ និង​ដាក់លូ​កាត់​ទទឹងផ្លូវ ដើម្បី​បង្វែរ​ផ្លូវទឹក​ឱ្យ​ហូរ​ចាក់​ទៅតាម​ប្រព័ន្ធ​អូរ ប្រឡាយ​ដើម្បី​​កាត់បន្ថយ​ការជន់លិច​ខូច​ផ្លូវ​ និង​លំនៅឋាន​ពលរដ្ឋ​។

ជាមួយ​គ្នា​នេះ លោក ចាប កុយ ប្រធាន​មន្ទីរ​ធនធានទឹក និង​ឧតុនិយម​ខេត្តព្រះវិហារ​បាន​ប្រាប់ ​ភ្នំពេញ ​ប៉ុស្តិ៍​ ដែរ​ថា នៅពេលនេះ​កម្ពស់​ទឹកស្ទឹងសែន​បាន​ហក់​ឡើង​ដល់ ១០,៨០ ​ម៉ែត្រ ជិត​​ដល់​កម្រិត​ប្រកាសអាសន្ន​ ១១ ​ម៉ែត្រ ដែល​ទាមទារ​ឱ្យ​អ្នករស់នៅ​ជាប់មាត់ទឹក​បង្កើន​ការប្រុងប្រយ័ត្ន​ខ្ពស់ ចំពោះ​គ្រោះទឹកជំនន់ ខណៈ​មេឃ​នៅពេល​នេះ​​កំពុង​បន្ត​ធ្លាក់ភ្លៀង​ក្នុង​កម្រិត​ពី​តិច​ទៅ​មធ្យម​នៅឡើយ​។

លោក​បាន​បញ្ជាក់ថា​៖ «​ប្រសិនបើ​ភ្លៀង​នៅតែ​ធ្លាក់​ខ្លាំង​ក្នុង​រយៈពេល​ ២-៣ ​ថ្ងៃ​ទៀត នោះ​កម្ពស់​ទឹកស្ទឹង​សែន​នឹង​ហក់​ឡើងដល់​កម្រិត​ដែល​ត្រូវ​ប្រកាសអាសន្ន​ហើយ ព្រោះ​នៅពេលនេះ​កម្ពស់​ទឹក​នៅ​ខ្វះ​តែត្រឹម​ ២ ​តឹក​ទៀត​ប៉ុណ្ណោះ​​នឹង​ឈានដល់​កម្រិត​ប្រកាសអាសន្ន ​គឺ​ ១១ ​ម៉ែត្រ​ហើយ​»​។

លោក កុយ បាន​បន្តទៀត​ថា ក្នុង​ពេល​នេះ តំបន់​មួយចំនួន​នៃ​ស្រុក​ជាំក្សាន្ត ស្រុក​ជ័យសែន និង​ស្រុក​ឆែប​បាន​រង​ការជន់លិច​ជា​បណ្ដើរៗ​ហើយ​។ ថ្វីបើ​យ៉ាង​ដូច្នេះ​ក្ដី អាជ្ញាធរ​ពាក់ព័ន្ធ​នៅ​ទូទាំង​ខេត្ត​បាន​ត្រៀម​នូវ​កម្លាំង និង​មធ្យោបាយ ឧបករណ៍​សម្ភារ​សម្រាប់​ជួយ​អន្តរាគមន៍​ពលរដ្ឋ​ពី​តំបន់​រងគ្រោះ​រួចជាស្រេច​ហើយ​។

លោក ជា គឹមសេង អភិបាលស្រុក​ជាំក្សាន្ត​បាន​ប្រាប់​ ភ្នំពេញ ​ប៉ុស្តិ៍​ នៅ​ថ្ងៃទី​ ១៤ ខែកញ្ញា ដែរ​ថា ដោយសារ​ជំនន់​ទឹកភ្លៀង ប្រជាកសិករ​មួយចំនួន​បាន​​សម្រេចចិត្ត​ដក​ដំឡូងមី​របស់​ពួកគេ​លក់​មុន​រដូវកាល​ប្រមូលផល​ ដើម្បី​ចៀសវាង​ការខូចខាត​។

លោក​បាន​ថ្លែងថា​៖ «​ចំពោះ​ដំណាំ​ស្រូវ នៅពេល​នេះ​មាន​ការលូតលាស់​ល្អ ប៉ុន្តែ​ដំណាំ​ដំឡូងមី​មិនអាច​ទ្រាំ​នឹង​ទឹក​លិច​បានយូរ​ទេ គឺ​មើម​របស់​វា​ងាយ​នឹង​ស្អុយរលួយ ប្រសិនបើ​មិន​ដក​វា​លក់​មុន​រដូវកាល​ប្រមូលផល​ទេនោះ​ការខាតបង់​នឹង​កាន់តែច្រើន​»​។

ចំណែក​នៅឯ​ខេត្តស្ទឹងត្រែង​វិញ កម្ពស់​ទឹកទន្លេ​មេគង្គ ទន្លេសេសាន និង​ទន្លេ​សេកុង បាន​ហក់​ឡើង​គួរឱ្យ​កត់សម្គាល់​ផងដែរ បន្ទាប់ពី​ឥទ្ធិពល​នៃ​ព្យុះ​ត្រូពិក Conson បាន​ធ្វើឱ្យ​ភ្លៀង​ធ្លាក់​ខ្លាំង​​ជាប់ៗ​គ្នា​ជាច្រើន​ថ្ងៃ​មកនេះ​។

លោក ប៉ាង ប៉េង ប្រធាន​មន្ទីរ​ធនធាន​ទឹក និង​ឧតុនិយម​ខេត្ត​ស្ទឹងត្រែង​បាន​ប្រាប់ ​ភ្នំពេញ ​ប៉ុស្តិ៍​ថា កម្ពស់​ទឹកទន្លេ​មេគង្គ​នៅ​ព្រឹក​ថ្ងៃទី​ ១៤ ខែកញ្ញា មាន​កម្ពស់​ ៧,៦៣ ​ម៉ែត្រ ធៀប​នឹង​ថ្ងៃទី​ ១៣ ​ខែកញ្ញា ទឹកបាន​ហក់​ឡើង​ ០,៨៩ ​ម៉ែត្រ ខណៈ​កម្រិត​ប្រកាសអាសន្ន​ទឹក​មាន​កម្ពស់​ ១០,៧០ ​ម៉ែត្រ​។ ស្រដៀង​គ្នា​នេះ​​ទឹក​ទន្លេសេសាន​នៅ​ថ្ងៃទី​ ១៤ ខែកញ្ញា​​មាន​កម្ពស់​ ៦,៧៨ ​ម៉ែត្រ គឺ​កើនឡើង​ ០,៨៧ ​ម៉ែត្រ​បើ​ធៀប​នឹង​ថ្ងៃទី​ ១៣ ខែ​​កញ្ញា ខណៈ​កម្រិត​កម្ពស់​ទឹក​ដែល​ត្រូវ​ប្រកាសអាសន្ន​ ១០,៥០ ​ម៉ែត្រ​។ ចំណែក​​ទន្លេសេកុង​វិញ ទឹក​មាន​កម្ពស់​ ៩,៥២ ​ម៉ែត្រ គិត​ត្រឹម​ព្រឹក​ថ្ងៃទី ​១៤ ខែកញ្ញា គឺ​ឡើង​​ ៣,៦២ ​ម៉ែត្រ​បើ​ធៀប​នឹង​ថ្ងៃទី​ ១៣ ខែកញ្ញា ខណៈ​កម្ពស់​ទឹក​ត្រូវ​ប្រកាសអាសន្ន​មាន​កម្រិត​ ១១,៥០ ​ម៉ែត្រ​។

លោក​បាន​បញ្ជាក់ថា​៖ «​នៅពេលនេះ យើង​បាន​សង្កេតឃើញ​កម្ពស់​ទឹកទន្លេ​ទាំង​ ៣ ​ក្នុង​ខេត្តស្ទឹងត្រែង​មាន​ការហក់​ឡើងជា​បន្ត​បន្ទាប់​គួរឱ្យ​បារម្ភ​ បើទោះជា​វា​មិនទាន់​ជន់​ឡើងដល់​កម្រិត​ប្រកាសអាសន្ន​ក៏ដោយ​។ ​ដូច្នេះ​សូម​បងប្អូន​ប្រជាពលរដ្ឋ​រស់នៅ​តាម​ដង​ទន្លេ​ទាំង​ ៣ ​ក្នុង​ខេត្ត​ស្ទឹងត្រែង​ត្រូវ​ត្រៀមលក្ខណៈ​លើកកម្ពស់​ការប្រុងប្រយ័ត្ន​»​។

បើតាម​ការព្យាករ​អាកាសធាតុ​របស់​ក្រសួង​ធនធានទឹក និង​ឧតុនិយម​នៅ​ថ្ងៃទី​ ១៤ ខែកញ្ញា ប្រទេស​កម្ពុជា ​នឹង​ទទួលរង​នូវ​ឥទ្ធិពល​ពី​ប្រព័ន្ធ​សម្ពាធ​ទាប ITCZ ដែល​អូសបន្លាយ​កាត់​លើ​ប្រទេស​មីយ៉ាន់ម៉ា ថៃ ឡាវ និង​វៀតណាម​។

បន្ទាប់ពី​នេះ​នៅ​ថ្ងៃទី​ ១៧ ដល់​ថ្ងៃទី​ ២១ នឹង​ទទួលរង​ឥទ្ធិពល​ពី​ជ្រលង​សម្ពាធ​ទាប​ឥណ្ឌា និង​ខ្យល់មូសុង​និរតី​ខ្សោយ ដែល​ធ្វើឱ្យ​មាន​ភ្លៀង​ធ្លាក់​ជា​បន្តបន្ទាប់​ទៀត​ក្នុង​កម្រិត​ពី​ខ្សោយ​ទៅ​មធ្យម​​លាយឡំ​ដោយ​ផ្គរ​រន្ទះ និង​ខ្យល់​កន្ត្រាក់​ក្នុង​ក្របខ័ណ្ឌ​ទូទាំង​ប្រទេស​៕

វីដេអូ៖