លោកនាយករដ្ឋមន្ត្រី ហ៊ុន សែន ក្នុងពេលបំពេញការងារកន្លងមក។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រាប់ទៅអតិថិជនដែលរងគ្រោះដោយការដាក់ទុនវិនិយោគជាមួយក្រុមហ៊ុន Gold FX (GOLDFX INVESTMENT CO., LTD.) ដាក់ពាក្យបណ្តឹងទៅតុលារដើម្បីស្វែងរកយុត្តិធម៌ក្នុងករណីភាគីទាំង២មិនមានដំណោះស្រាយស្រុះស្រួលគ្នា។
លោកនាយករដ្ឋមន្ត្រី ហ៊ុន សែន បានសរសេរសារឆ្លើយតបទៅនឹងសាររបស់ ហ្វេសប៊ុក ឈ្មោះ លីន លីន នៅថ្ងៃទី ១៥ ខែ កញ្ញា ឆ្នាំ ២០២១ ថា៖ «ដោយសារតែបងប្អូនបានចូលមកនិយាយប្រាប់ខ្ញុំច្រើនដងហើយ ដែលល្មមដល់ពេលដែលខ្ញុំត្រូវឆ្លើយតបដោយខ្លឹមសារថា សូមបងប្អូនបន្តសម្រុះសម្រួលគ្នា ព្រោះបងប្អូនស្ម័គ្រចិត្តរកស៊ីជាមួយគ្នា ក្នុងករណីរកការស្រុះស្រួលមិនបានសុំដាក់ពាក្យបណ្តឹងទៅកាន់តុលាការ»។
ហ្វេសប៊ុក ឈ្មោះ លីន លីន បានសរសេររៀបរាប់ថា មកទល់ពេលនេះ ជនរងគ្រោះប្រមាណជាង ៤០០ នាក់ ដែលបានដាក់ប្រាក់វិនិយោគក្នុងក្រុមហ៊ុនហ្គោលអេហ្វអិកស៍អ៊ិនវេសម៉ិន (GOLDFX INVESTMENT CO.,LTD) នៅមិនទាន់បានទទួលដំណោះស្រាយសំណងប្រាក់ដើមសមស្របពីក្រុមហ៊ុនខាងលើនេះនៅឡើយទេ។
ហ្វេសប៊ុកនេះបន្តថា ក្នុងរយៈពេលជាង ៦ ខែមកនេះ បន្ទាប់ពីក្រុមហ៊ុនបានធ្វើឱ្យបាត់បង់ថវិការបស់អតិថិជនក្នុងការវិនិយោគ ក្រុមហ៊ុនក៏បានដាក់ចេញនូវឱសានវាទ ៣០ ថ្ងៃ (នៃថ្ងៃធ្វើការ) ដើម្បីហៅវិនិយោគិនទាំងអស់ឱ្យមកទទួលយកសំណង ៣០ ភាគរយ (សាមសិបភាគរយ) នៃប្រាក់ដើមសរុប ដែលក្រុមហ៊ុនបានកំណត់ជាឯកតោភាគី។
ហ្វេសប៊ុកដដែលបន្តថា ករណីការដោះស្រាយជូនសំណង៣០ភាគរយនៃប្រាក់ដើមសរុបនេះគឺក្រុមហ៊ុនមិនបានគោរពតាមការណែនាំរបស់ ន.ម.ក ដែលបានណែនាំឱ្យក្រុមហ៊ុន GoldFX ត្រូវដោះស្រាយទូទាត់ប្រាក់វិនិយោគឱ្យអតិថិជនទាំងអស់វិញជាបន្ទាន់ ដូចក្នុងសេចក្តីប្រកាសព័ត៌មានលេខ ០១៨/២១ ន.ម.ក/ស.ប្រ.ព ចុះថ្ងៃទី ១៦ ខែ កក្កដា ឆ្នាំ ២០២១។
ហ្វេសប៊ុកនេះសរសេរថា៖ «បច្ចុប្បន្ននេះ ក្រុមហ៊ុនបានចប់ឱសានវាទក្នុងការកំណត់ ៣០ ថ្ងៃហើយ ប៉ុន្តែក្រុមហ៊ុននៅតែបន្តហៅវិនិយោគិនឱ្យមកយកសំណង៣០ភាគរយនៃប្រាក់ដើមសរុបបន្តទៀត។ប៉ុន្តែជនរងគ្រោះមិនព្រមទទួលយកសំណងនេះជាដាច់ខាត»។
លោក ធូ ពន្លឺ តំណាងស្របច្បាប់ឱ្យក្រុម ១៨៦ ដែលជាក្រុមទើបតែបង្កើតថ្មី ដើម្បីទាមទារជាមួយក្រុមហ៊ុន Gold FX ប្រាប់ ភ្នំពេញ ប៉ុស្តិ៍ នៅថ្ងៃទី ១៥ ខែកញ្ញាថា ក្រុមនេះបានដាក់ពាក្យបណ្តឹងទៅនិយតកររួចរាល់ហើយ។ ប៉ុន្តែអ្វីដែលលោកនាយករដ្ឋមន្ត្រី ហ៊ុន សែន បានលើកឡើងនេះគឺជារឿងក្តៅ និងកំពុងតែតាមដានយ៉ាងយកចិត្តទុកដាក់ ដោយរង់ចាំមើលដំណោះស្រាយរបស់ក្រុមហ៊ុនជូនដល់ជនរងគ្រោះ វាល្អប្រសើរជាងបច្ចុប្បន្ននេះបែបណា។
លោកបន្តថា ចំពោះពាក្យពេចន៍ដែលលោកនាយករដ្ឋមន្ត្រីបានលើកឡើងថា ប្រសិនបើការសម្របសម្រួលណាមួយមិនរលូននោះ ឱ្យខាងក្រុមរបស់លោកប្តឹងទៅតុលាការនេះ ប្រហែលជាមិនអាចនោះទេ ព្រោះវាត្រូវការចំណាយពេលយូរ។ ដូច្នេះបានជាក្រុមរបស់លោកស្វែងរកអន្តរាគមន៍គ្រប់ច្រកល្ហកកុំឱ្យរង់ចាំយូរព្រោះថាក្រុមរបស់លោករង់ចាំអស់ពេលជិតកន្លះឆ្នាំមកហើយ។ ទោះជាយ៉ាងណា ជម្រើសចុងក្រោយ អាចនឹងបន្តដាក់ពាក្យបណ្តឹងទៅតុលការ។
លោកបន្តថា ដំណោះស្រាយរបស់ក្រុមហ៊ុន មានត្រឹមតែ ៣០ ភាគរយប៉ុណ្ណោះ ប៉ុន្តែក្រុមរបស់លោក គឺចង់បាន ១០០ ភាគរយមកវិញ ដោយមិនចង់បានប្រាក់ចំណេញនោះទេ។ជាមួយគ្នានេះក៏មានជនរងគ្រោះមួយចំនួនទៀតក៏បានទទួលសំណងនេះ រួចហើយ ប៉ុន្តែទទួលយកទាំងការបង្ខំចិត្ត ដោយសារកត្តាជីវភាព និងព្រួយបារម្ភដល់ថ្ងៃឱសានវាទ។
លោកថ្លែងថា៖«ចំពោះអ្នកដែលមិនទាន់ទទួលបានសំណងនៅសល់ប្រមាណជាង ៦០០ នាក់ទៀត ខ្ញុំមិនទាន់ច្បាស់ទេ ប៉ុន្តែអ្នកដែលចងក្រងស្របច្បាប់មានជាង ៣០០ នាក់។ ក្រៅពីនេះក៏គេបានប្តឹងទៅនិយតករកម្ពុជាដោយឯកជនដែរហើយអ្នកដែលជាជនរងគ្រោះទាំងអស់មានចំនួន ៤ ០០០ នាក់»។
លោក ហឿន ទិត្យ ដែលជាជនរងគ្រោះនិងជាតំណាងអតិថិជនផ្សេងទៀត បានប្រាប់ ភ្នំពេញ ប៉ុស្តិ៍ នៅថ្ងៃទី ១៥ ខែកញ្ញាថា លោកបានដកខ្លួននិងទទួលយកសំណងពីក្រុមហ៊ុនប្រមាណ ៣០ភាគរយរួចហើយ បើទោះបីលោកមិនពេញចិត្តនូវចំនួននេះក៏ដោយ ព្រោះវាអត់មានជម្រើសអ្វីផ្សេង ។
លោកបានបន្តថា ក្រុមហ៊ុនបានដាក់កំហិតត ៣០ ថ្ងៃ ហើយទាំងលោកនិងពលរដ្ឋមានការភ័យខ្លាចមិនបានលុយមកវិញ ក៏ចេះតែទៅទទួលយកទៅ។ សំណង ៣០ ភាគរយនេះ គឺលោកទទួលបានប្រាក់ តែ ២៤ ០០០ ដុល្លារប៉ុណ្ណោះ ដោយលោកដាក់វិនិយោគជាមួយក្រុមហ៊ុនចំនួន ៨ ម៉ឺនដុល្លារអាមេរិក។
លោកបានបញ្ជាក់ថា៖ «ខ្ញុំមិនចង់វែងឆ្ងាយ ហើយគិតថា មិនឈ្នះគេ ក៏សម្រេចចិត្តដកលុយទៅ ៣០ ភាគរយដោយខ្ញុំផ្តិតមេដៃ ឈប់ពាក់ព័ន្ធនឹងតវ៉ាអីទេ។ ខ្ញុំបាន ៣០ ភាគរយនេះ គ្រាន់តែសងទៅធនាគារវិញ មិនគ្រប់នោះទេ»។
បើតាម លោក ហឿន ទិត្យ ជនរងគ្រោះពីក្រុមហ៊ុន Gold FX នេះ ប្រមាណ ៥០ ភាគរយ ដែលបានយល់ព្រមទទួលនូវសំណងដែលក្រុមហ៊ុនផ្តល់ឱ្យ ខណៈផ្សេងទៀតក៏នៅតែបន្តតវ៉ាដើម្បីទទួលសំណងយ៉ាងហោចណាស់ក៏ក្បែរ ១០០ ភាគរយ ឬ ១០០ ភាគរយមកវិញដែរ។
ភ្នំពេញ ប៉ុស្តិ៍ បានទាក់ទងទៅលោក ឈៀង គ្រីស្តុហ្វ មន្ត្រីទំនាក់ទំនងអតិថិជនរបស់ក្រុមហ៊ុន Gold FX ប៉ុន្តែលោកបដិសេធធ្វើអត្ថាធិប្បាយ ដោយឱ្យភ្នាក់ងារភ្នំពេញប៉ុស្តិ៍ចុះទៅដល់ក្រុមហ៊ុន ទើបអាចឆ្លើយសំណួររបស់អ្នកសារព័ត៌មានបាន ។
ទោះជាយ៉ាងណា ភ្លាមៗក្រោយពីលោកនាយករដ្ឋមន្ត្រី ហ៊ុន សែន ឱ្យជនរងគ្រោះប្តឹងទៅកាន់តុលាការបើមិនពេញចិត្តដំណោះស្រាយនោះ ស្រាប់តែនៅថ្ងៃទី ១៥ ខែ កញ្ញា ឆ្នាំ ២០២១ ក្រុមហ៊ុន Gold FX បានចេញលិខិតជូនដំណឹងមួយដោយកំណត់កាលបរិច្ឆេទបិទបញ្ចប់ការធ្វើដំណោះស្រាយសាច់ប្រាក់ជូនអតិថិជនទាំងអស់ត្រឹមថ្ងៃទី ២៦ខែ តុលា ឆ្នាំ ២០២១។
សេចក្តីជូនដំណឹងនេះបន្តថា ការបិទបញ្ចប់ដំណោះស្រាយសាច់ប្រាក់នេះ ដើម្បីបន្តជំរុញឱ្យបានឆាប់រហ័សបន្ថែមទៀតក្នុងនីតិវិធីនៃបណ្ដឹងដែលមានស្រាប់តាមច្បាប់ក្នុងគោលបំណងទាមទារប្រាក់ដែលបានបាត់បង់មកវិញ និងចាប់ជនបង្កជាជនបរទេស បក្ខពួកជាជនបរទេសដទៃទៀតមកផ្តន្ទាទោសតាមនីតិវិធីច្បាប់ជាធរមាន។
សេចក្តីជូនដំណឹងដដែលបញ្ជាក់ទៀតថា ការសម្រេចបិទបញ្ចប់ដំណោះស្រាយសាច់ប្រាក់នេះ គឺជាកិច្ចឆ្លើយតបចំពោះអតិថិជនយ៉ាងច្រើនលើសលប់ដែលតែងតែបានផ្ដល់ការចូលរួមយ៉ាងសកម្មក្នុងនាមជាជនរងគ្រោះដូចគ្នា ក្នុងកិច្ចរកដំណោះស្រាយជាមួយក្រុមហ៊ុនដែលបានដាក់ចេញកន្លងមកហើយនៅតែរង់ចាំនូវដំណោះស្រាយជាផ្លូវច្បាប់ស្របតាមការប្រកាសជូនដំណឹងកន្លងមករបស់ក្រុមហ៊ុន៕
វីដេអូ៖
