ព្រះមហាក្សត្រ នរោត្តម សីហមុនី។ រូបថត Royal Du Cambodge
ភ្នំពេញៈ ព្រះមហាក្សត្រកម្ពុជា ព្រះករុណាព្រះបាទសម្តេច ព្រះបរមនាថ នរោត្តម សីហមុនី ផ្ញើព្រះរាជសារជូនប្រធានាធិបតីប្រទេសហុងគ្រី លោក Ja''no Sa''der ខណៈលោកនាយករដ្ឋមន្ត្រី ហ៊ុន សែន ផ្ញើលិខិតជូននាយករដ្ឋមន្ដ្រីប្រទេសហុងគ្រីលោក វ៉ិចទ័រ អរបាន (Viktor Orba''n) ដើម្បីអបអរសាទរខួបលើកទី ៦៥ នៃការបង្កើតទំនាក់ទំនងការទូតរវាងប្រទេសទាំង ២។
ព្រះរាជសារដែលចេញផ្សាយដោយក្រសួងការបរទេសកាលពីយប់ថ្ងៃទី ១៩ ខែកញ្ញា ឱ្យដឹងថា ព្រះមហាក្សត្របានសម្តែងការអបអរសាទរយ៉ាងកក់ក្តៅបំផុតជូនចំពោះលោក Jano Sader និងជូនពរដល់ប្រជាជនហុងគ្រីជួបតែសេចក្តីសុខសេចក្តីចម្រើន និងសុខុមាលភាព។ ក្នុងព្រះរាជសារ ព្រះអង្គមានព្រះរាជបន្ទូលថា ចំណងទំនាក់ទំនង និងមិត្តភាពរវាងកម្ពុជា និងហុងគ្រីបានឆ្លងកាត់ផ្លូវដែលមានភាពរលូន និងភាពល្អប្រសើរអស់ជាច្រើនទសវត្សរ៍មកហើយតាមរយៈការបង្ហាញឱ្យឃើញនូវលទ្ធផលគួរឱ្យកត់សម្គាល់ និងជាប្រវត្តិសាស្ត្រ។
ព្រះអង្គបន្តថា កិច្ចសហប្រតិបត្តិការរវាងប្រទេស និងប្រជាជននៃប្រទេសទាំង ២ កាន់តែមានភាពជិតស្និទ្ធក្នុងវិស័យធំៗដែលបានឆ្លុះបញ្ចាំងតាមរយៈការជឿទុកចិត្តខាងនយោបាយ និងការគាំទ្រគ្នាទៅវិញ-ទៅមកទាំងក្នុងតំបន់ និងពិភពលោក គុណតម្លៃ និងផលប្រយោជន៍រួម និងជំនួយ។
ព្រះអង្គមានព្រះរាជបន្ទូលថា៖ «ខ្ញុំជឿជាក់ថា ចំណងមិត្តភាព និងកិច្ចសហប្រតិបត្តិការជាប្រពៃណី និងប្រវត្តិសាស្ត្រប្រកបដោយភាពរីករាយរវាងប្រទេសយើងទាំង ២ នឹងត្រូវបានពង្រឹង និង [ពង្រីក] បន្ថែមទៀត ដើម្បីផលប្រយោជន៍រួមរបស់ប្រជាជនយើងទាំង ២»។
ព្រះអង្គបន្ថែមថា ព្រះអង្គទន្ទឹងរង់ចាំដំណើរទស្សនកិច្ចផ្លូវរដ្ឋរបស់ព្រះអង្គទៅកាន់ប្រទេសហុងគ្រី «ដ៏ស្រស់ស្អាតមានវិបុលភាព និងសន្តិភាព» នៅពេលវេលាមួយដ៏សមស្រប និងមានភាពងាយស្រួល ដែលនឹងមកដល់សម្រាប់ព្រះអង្គ និងលោក Jáno sÁder។ ក្នុងខណៈនេះបញ្ហាប្រឈមនៃជំងឺកូវីដ ១៩ នៅតែបង្កការគំរាមកំហែង និងកង្វល់ «យ៉ាងធំ» ដល់មនុស្សជាតិ និងសហគមន៍ក្នុងពិភពលោក «ទាំងមូល»។
ដោយឡែកយោងតាមលិខិតដែលចេញផ្សាយ ដោយក្រសួងការបរទេសនៅថ្ងៃជាមួយគ្នា ដែលលោកនាយករដ្ឋមន្ត្រី ហ៊ុន សែន ផ្ញើទៅនាយករដ្ឋមន្ត្រីហុងគ្រី លោក ហ៊ុន សែន បញ្ជាក់ថា៖ «តាងនាមរាជរដ្ឋាភិបាល ប្រជាជនកម្ពុជា និងរូបខ្ញុំផ្ទាល់ ខ្ញុំមានសេចក្តីសោមនស្សរីករាយ សូមសម្តែងនូវអំណរសាទរយ៉ាងកក់ក្តៅជូនចំពោះឯកឧត្តម និងតាមរយៈឯកឧត្តម សូមប្រសិទ្ធិពរជ័យមង្គលបវរមហាប្រសើរ ជូនប្រជាជនហុងគ្រីជាបងប្អូនក្នុងឱកាសដ៏ប្រពៃនៃខួបលើកទី៦៥ ឆ្នាំនៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងហុងគ្រី»។
លោកសរសេរថា ទំនាក់ទំនងមិត្តភាពកម្ពុជា និងហុងគ្រី គឺផ្អែកលើការជឿទុកចិត្តគ្នា និងកិច្ចសហប្រតិបត្តិការ «យ៉ាងជិតស្និទ្ធ»។ ប្រទេសទាំង ២ មានការយល់ឃើញ រួមចំពោះបញ្ហាប្រឈម ដែលសហគមន៍អន្តរជាតិកំពុងជួបប្រទះពេលបច្ចុប្បន្ន និងតែងបានផ្តល់ការគាំទ្រគ្នាទៅវិញទៅមកក្នុងវេទិកាផ្សេងៗ។
លោក ហ៊ុន សែន បន្តថាពេលកន្លងមកថ្មីៗ ការផ្លាស់ប្តូរទស្សនកិច្ចរបស់ថ្នាក់ដឹកនាំនៃប្រទេសទាំង ២ សបញ្ជាក់ឱ្យឃើញអំពីសញ្ញាណនៃការជឿទុកចិត្តផ្នែកនយោបាយទៅវិញទៅមក ដែលពិតជាបានឆ្លុះបញ្ចាំងនូវទំនាក់ទំនងរវាងប្រទេសទាំង ២។
លោកសរសេរថា៖ «ខ្ញុំត្រៀមខ្លួនរួចជាស្រេចក្នុងការធ្វើការយ៉ាងជិតស្និទ្ធជាមួយឯកឧត្តម ដើម្បីបន្តពង្រឹងកិច្ចសហប្រតិបត្តិការរបស់យើងក្នុងវិស័យផ្សេងៗដើម្បីផលប្រយោជន៍រួមរបស់ប្រជាជនយើងទាំង ២»។
កាលពីឆ្នាំ ២០២០ រដ្ឋមន្ត្រីការបរទេស និងពាណិជ្ជកម្មហុងគ្រី លោក ភីធើ ស៊ីចាតូ ក្នុងដំណើរទស្សនកិច្ចរបស់លោកមកកម្ពុជារយៈពេល ១ ថ្ងៃ គឺនៅថ្ងៃទី ៣ ខែវិច្ឆិកា បានបើកសម្ពោធការិយាល័យស្ថានទូតរបស់ខ្លួនប្រចាំកម្ពុជាជាផ្លូវការ និងបានចុះហត្ថលេខាលើឯកសារសហប្រតិបត្តិការរួមមាន កិច្ចព្រមព្រៀងស្តីពីសេវាដឹកជញ្ជូនតាមផ្លូវអាកាសរវាងរាជរដ្ឋាភិបាលកម្ពុជា និងហុងគ្រី។ អនុស្សរណៈនៃការយោគយល់គ្នាស្តីពីការគ្រប់គ្រងធនធានទឹក រវាងក្រសួងធនធានទឹក និងឧតុនិយមរបស់កម្ពុជា ជាមួយក្រសួងមហាផ្ទៃហុងគ្រី។ អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្មរវាងក្រសួងកសិកម្មរុក្ខាប្រមាញ់ និងនេសាទរបស់កម្ពុជាជាមួយក្រសួងកសិកម្មហុងគ្រី។
ទំនាក់ទំនងការទូតរវាងប្រទេសកម្ពុជា និងហុងគ្រីបានចាប់ផ្ដើមតាំងពីដំបូងនៅថ្ងៃទី ២០ កញ្ញា ឆ្នាំ ១៩៥៦ ប៉ុន្តែទំនាក់ទំនងនេះត្រូវបានរំខានក្នុងរបបខ្មែរក្រហមពីឆ្នាំ ១៩៧៥ ដល់ ១៩៧៩។ បន្ទាប់ពីខ្មែរក្រហមដួលរលំនៅឆ្នាំ ១៩៧៩ ប្រទេសទាំង ២ បានភ្ជាប់ទំនាក់ទំនងការទូតឡើងវិញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ ភ្នំពេញ ប៉ុស្តិ៍ នាថ្ងៃទី ២០ កញ្ញា ថា ទំនាក់ទំនងរវាងកម្ពុជា និងហុងគ្រី គឺជាទំនាក់ទំនងកេរដំណែលប្រវត្តិសាស្ត្រ ដែលមានតាំងពីសម័យសង្គ្រាមត្រជាក់ ហើយនៅតែរក្សាទំនាក់ទំនងជាលក្ខណៈប្រពៃណីនេះបានល្អ និងមានការគោរព និងគាំទ្រគ្នាទៅវិញទៅមក។ ហុងគ្រីតែងតែគាំទ្រកម្ពុជាក្នុងក្របខ័ណ្ឌសហភាពអឺរ៉ុបកន្លងមក។
លោកថ្លែងថា៖ «ក៏ប៉ុន្តែ ក្នុងទិដ្ឋភាពសេដ្ឋកិច្ច ការផ្លាស់ប្តូរពាណិជ្ជកម្មរវាងប្រទេសទាំង ២ វាអត់ទាន់ដល់កម្រិតមួយដែលគួរឱ្យចាប់អារម្មណ៍ទេ។ ដោយឡែក ការផ្លាស់ប្តូររវាងប្រជាជន និងប្រជាជន ជាពិសេសគឺភ្ញៀវទេសចរ រវាងប្រទេសទាំង ២ ហ្នឹងក៏អត់មានទៅមកច្រើនជាមួយគ្នាដែរ»៕
