.jpg)
នគរបាលពិនិត្យសុខភាពជនជាប់ចោទនៅតុលាការកំពួល។ រូបថត គឹម សារុំ
ភ្នំពេញៈ នៅក្នុងសវនាការជម្រះក្ដី នៃតុលាការកំពូលនៅថ្ងៃទី ២៣ ខែកញ្ញា ស្រ្តីរងគ្រោះម្នាក់បានស្នើដល់អង្គជំនុំជម្រះតម្កល់ទោសបុរសជនជាប់ចោទម្នាក់ ដែលតុលាការថ្នាក់ក្រោមសម្រេចដាក់ពន្ធនាគារ ១៤ ឆ្នាំ ពីបទប៉ុនប៉ងឃាតកម្ម។
ស្ត្រីរងគ្រោះឈ្មោះ សាន្ត ចិន្តា អាយុ ២៥ ឆ្នាំ ត្រូវបានជនជាប់ចោទកាត់ដៃត្រឹមកដៃម្ខាង និងជើងម្ខាង ត្រូវវះកាត់ដោយសារដាច់សសៃជង្គុង និងនៅលើខ្លួនមានស្បែកជ្រួញដោយទឹកអាស៊ីត។
ស្ត្រីរងគ្រោះថ្លែងទៅកាន់អង្គជំនុំជម្រះថា៖ «ខ្ញុំស្នើសុំដល់តុលាការកំពូលមេត្តារកយុត្តិធម៌ដល់ខ្ញុំទៅតាមអ្វីដែលជនជាប់ចោទប្រព្រឹត្តមកលើរូបខ្ញុំ។ ជនជាប់បានធ្វើអំពើឃោរឃៅបំផុតហើយខ្ញុំនៅតែខ្លាចជនជាប់ចោទនឹងធ្វើបាបដល់ក្រុមគ្រួសារខ្ញុំនៅពេលចេញពីពន្ធនាគារ»។
ស្ត្រីរងគ្រោះបន្តថា៖ «រហូតដល់ពេលនេះខ្ញុំនៅតែភ័យខ្លាច។ ខ្ញុំមិនចង់ទាមទារអីទេខ្ញុំគ្រាន់តែសុំតុលាការរក្សាសំណង ៨០០ លានរៀល និងទោស ១៤ ឆ្នាំដដែល»។
ចំណែកជនជាប់ចោទបាននិយាយប្រាប់ចៅក្រមនៅតុលាការកំពូលនៅថ្ងៃទី ២៣ កញ្ញាដែរថា គេគ្មានបំណងសម្លាប់ជនរងគ្រោះទេ គ្រាន់តែគំរាមប៉ុណ្ណោះ។
លោក អ៊ុក គឹមសិទ្ធិ តំណាងមហាអយ្យការបានសន្និដ្ឋានថា ជនជាប់ចោទបានគេចខ្លួនក្រោយប្រព្រឹត្តបទល្មើសហើយត្រូវតុលាការខេត្តតាកែវជម្រះកំបាំងមុខ។
លោកថ្លែងថា៖ «ជនរងគ្រោះបានសុំតុលាការកំពូលឱ្យរក្សាទោស ១៤ ឆ្នាំ។ ប៉ុន្តែតុលាការកំពូលពិចារណាតែលើសំណងរដ្ឋប្បវេណីទេ»។
លោកបញ្ជាក់ថា បណ្តឹងសារទុក្ខរបស់ជនជាប់ចោទមានមូលហេតុត្រឹមត្រូវ។ ចំពោះទណ្ឌកម្មទោសដែលសាលាឧទ្ធរណ៍បន្ថយពី ១៤ ឆ្នាំ មកត្រឹម ១០ ឆ្នាំ គឺលោកសុំតម្កល់នៅ ១០ ឆ្នាំដដែល។ រីឯសំណងជំងឺចិត្តដែលសាលាឧទ្ធរណ៍បន្ថយពី ៨០០ លានមកត្រឹម ៤០០ លានរៀលសូមក្រុមប្រឹក្សាជំនុំជម្រះនឹងពិចារណា។
លោក មួង សុគន្ធ ជាមេធាវីការពារសិទ្ធិឱ្យស្ត្រីរងគ្រោះសន្និដ្ឋានថាបើតាមពិនិត្យលើរូបកាយរបស់កូនក្តីលោក គឺមានស្ថានភាពជំងឺពិបាកភ្នែកមើលណាស់។ ជនជាប់ចោទបានធ្វើទារុណកម្មយ៉ាងព្រៃផ្សៃបំផុតលើនារីរងគ្រោះ។ លោកបន្តថា៖ «ខ្ញុំសូមតុលាការកំពូលពិចារណាតាមច្បាប់»។
យោងតាមអង្គហេតុរបស់តុលាការកំពូលបង្ហាញថា ជនជាប់ចោទបានបង្កហេតុកាលពីថ្ងៃទី ២៧ ខែ កុម្ភះ ឆ្នាំ ២០១៩ ភូមិព្រះម្លប់ ឃុំកណ្តឹង ស្រុកបាទីខេត្តតាកែវ។ ក្រោយប្រព្រឹត្តជនជាប់ចោទត្រូវសមត្ថកិច្ចតាមចាប់បាននៅភូមិចំលងរមាំងលើ ឃុំអូរសំរិល ស្រុកសំឡូត ខេត្តបាត់ដំបងកាលពីថ្ងៃទី ៥ ខែ កញ្ញា ឆ្នាំ ២០២០៕
