សៀមរាប រដ្ឋបាលក្រុងសៀមរាបកាលពីថ្ងៃទី ២២ ខែ កញ្ញា ឆ្នាំ ២០២១ បានប្រគល់អំណោយជាអង្ករដល់ប្រជាពលរដ្ឋជិត ៧ ០០០ គ្រួសារ តាមរយៈយុទ្ធនាការបន្ទាន់មួយឱ្យក្រុមការងារនៃបណ្តាភូមិ-សង្កាត់ក្នុងតំបន់ក្រហម។
លោក នួន ពុទ្ធារ៉ា អភិបាលក្រុងសៀមរាបបានឱ្យដឹងថាដោយសារវិបត្តិជំងឺកូវីដ ១៩ បានអូសបន្លាយ ធ្វើឱ្យប៉ះពាល់ដល់ជីវភាពរស់នៅប្រចាំថ្ងៃ ជាពិសេសស្ថិតក្នុងស្ថានភាពនៃការបិទខ្ទប់នេះ គឺប៉ះពាល់ធ្ងន់ធ្ងរដល់បងប្អូនប្រជាពលរដ្ឋក្នុងមូលដ្ឋាន។
ការផ្តល់ស្បៀងអាហារ គឺជាអំណោយរបស់រដ្ឋបាលខេត្តជូនដល់បងប្អូនពលរដ្ឋចំនួន ៦ សង្កាត់ដែលរស់នៅតំបន់បិទខ្ទប់ ហើយការឧបត្ថម្ភនេះ ក្នុង ១ គ្រួសារទទួលបានអង្ករ ១០ គីឡូក្រាម ។ បើតាមលោក ពុទ្ធារ៉ា អំណោយនេះ មិនមែនជាដំណោះស្រាយនោះទេ ប៉ុន្តែគ្រាន់តែជាការចែករំលែកការលំបាកប៉ុណ្ណោះ។
យោងតាមសេចក្តីសម្រេចរបស់រដ្ឋបាលខេត្តសៀមរាប បានកំណត់ភូមិសាស្ត្រមួយចំនួនជាតំបន់ក្រហមបណ្តោះអាសន្នរយៈពេល ១ សប្តាហ៍ ដោយគិតចាប់ពីថ្ងៃទី ១៧ ដល់ថ្ងៃទី ២៣ ខែ កញ្ញា ឆ្នាំ ២០២១ រួមមាន សង្កាត់ស្លក្រាម ស្វាយដង្គំ គោកចក សង្កាត់ជ្រាវ ភូមិតាវៀននៃសង្កាត់សាលាកំរើក ភូមិព្រៃធំនិងភូមិស្រងែក្នុងសង្កាត់ស្រងែនៃក្រុងខេត្តសៀមរាប ដើម្បីធានាដល់ប្រសិទ្ធភាពនៃការគ្រប់គ្រងការឆ្លងរាលដាលជំងឺកូវីដ ១៩ នៅក្នុងភូមិសាស្ត្រកំណត់ជាតំបន់ក្រហម និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត។
លោក លីវ សុខុន ប្រធានមន្ទីរព័ត៌មានខេត្តសៀមរាបបានឲ្យដឹងថា បច្ចុប្បន្នយើងកំពុងប្រជុំទាក់ទងជាមួយនឹងការរៀបចំក៏ដូចជាការអនុវត្តយុទ្ធសាស្ត្របន្តព្រោះថា ការបិទខ្ទប់រហូតមកដល់ថ្ងៃទី ២៣ នេះ គឺត្រូវអស់ឱសានវាទ ៧ ថ្ងៃមុន ដោយគិតពីថ្ងៃទី ៧ កញ្ញាមកដល់ថ្ងៃទី ២៣ កញ្ញា ម៉ោងថ្ងៃត្រង់នេះ។ ដូច្នេះពេលនេះយើងកំពុងពិនិត្យ ដើម្បីវាយតម្លៃចំពោះការអនុវត្តរយៈពេល ៧ ថ្ងៃនេះថា តើស្ថានភាពមានការធូរស្រាលហើយឬនៅ? ឬយើងត្រូវបន្តការបិទខ្ទប់បន្តទៀត។
លោកលើកឡើងថា អំឡុងពេលនៃកិច្ចប្រជុំនេះឃើញថាចំនួនករណីឆ្លងនៅមានច្រើននៅឡើយ។ ដូច្នេះអង្គប្រជុំកំពុងរកវិធីថា តើគួរបិទជាសង្កាត់ឬជាភូមិវិញ។ ប៉ុន្តែយើងមិនទាន់បានសម្រេចនៅឡើយទេ ដោយសារអង្គប្រជុំមិនទាន់ចប់។
លោកបន្តថា បើយោងតាមរបាយការណ៍ សង្កាត់ធំៗរបស់ក្រុងដែលជាដង្ហើមសេដ្ឋកិច្ចដ៏ធំនោះក៏កំពុងស្ថិតក្រោមការបិទខ្ទប់ដែរ។
លោកបន្ថែមថាចំពោះរយៈពេលបិទខ្ទប់ចំនួន ៧ ថ្ងៃ គឺមានរយៈពេលខ្លីពេកដើម្បីតាមដានស្ថានការកូវីដ ១៩ ដែលតាមស្តង់ដាសុខាភិបាលគឺត្រូវការពេលពី ១៤ ទៅ ២១ ថ្ងៃទើបអាចគ្រប់គ្រងសភាពការណ៍បាន៕
សៀវ គួយអ៊ី