.jpg)
ស្ថានភាពទឹកជំនន់ក្នុងភូមិសាស្ត្រខេត្តបន្ទាយមានជ័យ ថ្ងៃទី ២៤ ខែកញ្ញា។ រូបភាព គណៈកម្មាធិការជាតិគ្រប់គ្រងគ្រោះមហន្តរាយ
លោក គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) នាថ្ងៃទី ២៤ ខែកញ្ញានេះ បានណែនាំទៅដល់កងប្រតិបត្តិការរុករក និងសង្គ្រោះគ្រោះមហន្តរាយទាំង ១៦ កង ឱ្យត្រៀមលក្ខណៈ ២៤ ម៉ោងលើ ២៤ ម៉ោង នៅគ្រប់រាជធានី-ខេត្ត ក្នុងការសង្គ្រោះប្រជាពលរដ្ឋក្នុងករណីមានគ្រោះមហន្តរាយកើតឡើង ដោយសារ ជំនន់ទឹកភ្លៀង។
គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា លោក គន់ គីម ក៏បានឱ្យកងប្រតិបត្តិការរុករក និងសង្គ្រោះគ្រោះមហន្តរាយលេខ ៧០៤ របស់យោធភូមិភាគទី៤ ធ្វើការចល័តក្នុងការត្រៀមជួយសង្រ្គោះប្រជាពលរដ្ឋ ក្នុងនោះលោកក៏បានបញ្ជាឱ្យកងកម្លាំងចេញដំណើរពីខេត្តសៀមរាប ឆ្ពោះទៅគោលដៅខេត្តបន្ទាយមានជ័យ ដើម្បីត្រៀមសង្គ្រោះប្រជាពលរដ្ឋរងគ្រោះដោយជំនន់ទឹកភ្លៀងផងដែរ។
ទន្ទឹមនឹងនេះដែរ លោក អ៊ុំ រាត្រី អភិបាលខេត្តបន្ទាយមានជ័យ ក៏បានដឹកនាំកម្លាំងទាំង ៣ប្រភេទ ធ្វើរោងជម្លៀសប្រជាពលរដ្ឋមកទីទួលសុវត្ថិភាពនៅក្រុងសិរីសោភ័ណ និងបានចុះពិនិត្យមើលស្ថានភាពទឹក ព្រមទាំងពិនិត្យមើលស្ថានភាពប្រជាពលរដ្ឋចំនួន ២០គ្រួសារឡើងមកទីទួលសុវត្ថិភាពក្បែរផ្លូវវាងក្រុងនេះផងដែរ។
លោកបានអំពាវនាវ ដល់ថ្នាក់ដឹកនាំមន្ត្រីមូលដ្ឋានអាជ្ញាធរដែនដី កងកម្លាំងមានសមត្ថកិច្ចទាំងអស់ ត្រូវត្រៀមលក្ខណៈ ទាំងសម្ភារ កម្លាំង ដើម្បីត្រៀមចុះជួយសង្គ្រោះប្រជាពលរដ្ឋ ក្នុងករណីកើតមានគ្រោះទឹកជំនន់ធ្ងន់ធ្ងរជាយថាហេតុណាមួយកើតឡើង។
ប្រជាជនដែលបានជម្លៀសមកទីទួលសុវត្តិភាព កំឡុងពេលជួបគ្រោះទឹកជំនន់ក្នុងភូមិសាស្ត្រខេត្តបន្ទាយមានជ័យ ថ្ងៃទី ២៤ ខែកញ្ញា។ រូបភាព គណៈកម្មាធិការជាតិគ្រប់គ្រងគ្រោះមហន្តរាយ
លោក អ៊ុំ រាត្រី ថា៖ «សូមពុកម៉ែ ប្រជាពលរដ្ឋ ប្រុងប្រយ័ត្នខ្ពស់ ដើម្បីការពារទ្រព្យសម្បត្តិ និងសុវត្ថិភាពផ្ទាល់ខ្លួន និងសូមរក្សាអនាម័យ និងគោរពវិធានការ ៣ការពារ និង៣កុំឱ្យបានខ្ជាប់ខ្ជួនដើម្បីការពារពីការឆ្លងវីរុសកូវីដ ១៩ ទោះបីស្ថិតក្នុងភាពលំបាកដោយគ្រោះទឹកជំនន់នេះក៏ដោយ»។
ជាមួយគ្នានេះដែរ អាជ្ញាធរខេត្តបន្ទាយមានជ័យ និងអាជ្ញាធរក្រុងសិរីសោភ័ណ បានដឹកនាំកងកម្លាំងទាំងបីប្រភេទមាននគរបាលក្រុង អាវុធហត្ថក្រុង និងកម្លាំងប្រតិបត្តិការសឹករងខេត្ត បានចុះរៀបចំទួលសុវត្ថិភាព សាងសង់រោង ត្រៀមសម្រាប់ទទួលបងប្អូនប្រជាពលរដ្ឋ ដែលរងគ្រោះដោយសារទឹកជំនន់ នៅក្នុងក្រុងសិរីសោភ័ណ ខណៈទឹកស្ទឹងបានបន្តកើនឡើងជាបន្តបន្ទាប់ ផ្លូវលំមួយចំនួននៅក្នុងក្រុងទឹកហូរកាត់ជាច្រើនកន្លែង។
ក្នុងការចុះពិនិត្យមើលក្រុមការងាររៀបចំទួលសុវត្ថិភាពនោះដែរ លោក អ៊ុំ រាត្រី ក៏បានដាក់បទបញ្ជាដល់អភិបាលក្រុង-ស្រុក ទាំងអស់ត្រូវយកចិត្តទុកដាក់ឱ្យបានខ្ពស់ ធ្វើការចុះពិនិត្យ តាមដានជាប្រចាំនូវស្ថានភាពទឹក បើក្នុងករណីចាំបាច់ត្រូវធ្វើការជម្លៀសប្រជាពលរដ្ឋភ្លាមៗ ទៅរកទីទួលសុវត្ថិភាព ដែលបានរៀបចំជាស្រេចនោះឱ្យទាន់ពេលវេលា៕
វីដេអូ៖
