ភ្នំពេញៈ វិទ្យាស្ថានជាតិការទូត និងទំនាក់ទំនងអន្តរជាតិ និងវិទ្យាស្ថាន និងសហព័ន្ធសាលារៀនអឺរ៉ុបចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីរៀបចំវិទ្យាស្ថានជាតិការទូតជាទីតាំងផ្តល់សេវាប្រឡងយកសញ្ញាបត្រភាសារបស់ FEDE ជូនដល់សាធារណជន។
សញ្ញាបត្រភាសារបស់ FEDE (The FEDE Language Certificate) ជាសញ្ញាបត្រភាសា ដែលស្របតាមស្តង់ដាអន្តរជាតិរបស់ Common European Framework of Reference for Languages (CEFR) និងមានផ្តល់ជូនជា ៦ ភាសា រួមមាន ភាសាបារាំង អង់គ្លេស អាល្លឺម៉ង់ អេស្ប៉ាញ អ៊ីតាលី និងព័រទុយហ្កាល់។
វិទ្យាស្ថានជាតិការទូត និងទំនាក់ទំនងអន្តរជាតិបញ្ជាក់ក្នុងហ្វេសប៊ុកកាលនៅថ្ងៃទី ២៤ ខែកញ្ញាថា MoU នេះ ចុះហត្ថលេខាដោយលោក ទាន សំណាង ប្រធានវិទ្យាស្ថានជាតិការទូត និងលោកស្រី Claude Vivier Le Got ប្រធានសហព័ន្ធសាលារៀនអឺរ៉ុប កាលពីថ្ងៃទី ២៣ ខែកញ្ញា តាមប្រព័ន្ធវីដេអូ ក្រោមវត្តមានលោក ឆែម គាតរិទ្ធី រដ្ឋមន្រ្តីប្រតិភូអមនាយករដ្ឋមន្ត្រី៕