លោក នេត្រ ភក្ត្រា បង្ហាញសៀវភៅរបាយការណ៍ដីពីថ្ងៃទី ២៣ កញ្ញា។ ហេង ជីវ័ន
កោះកុង/កែបៈ ខេត្ដចំនួន ៣ គឺកោះកុង កែប និងឧត្ដរមានជ័យបានបញ្ចប់ការកំណត់អត្តសញ្ញាណពលរដ្ឋរស់នៅយូរឆ្នាំលើដីតំបន់ការពារធម្មជាតិ និងតំបន់អភិរក្ស ដើម្បីស្នើសុំកាត់ឆ្វៀលតាមបញ្ជាលោកនាយករដ្ឋមន្ដ្រីកម្ពុជាដែលបានដាក់ចេញកាលពីថ្ងៃទី ៣ ខែកក្កដា ឆ្នាំមុន។ នេះបើតាមមន្ដ្រីជាន់ខ្ពស់ក្រសួងបរិស្ថាន។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឱ្យដឹងបែបនេះក្នុងពេលធ្វើជាអធិបតីប្រកាសឱ្យប្រើប្រាស់ និងផ្សព្វផ្សាយរបាយការណ៍ស្តីពីស្ថានភាពបរិស្ថានជាតិលើកទី ៤ និងលទ្ធផលនៃការវាយតម្លៃធនធានគម្របព្រៃឈើកម្ពុជាឆ្នាំ ២០១៨ នៅទីស្តីការក្រសួងបរិស្ថានកាលពីថ្ងៃទី ២៣ កញ្ញាឆ្នាំនេះ។
លោកថ្លែងថា តាមការអនុវត្តស្មារតីនៃកិច្ចប្រជុំគណៈរដ្ឋមន្ដ្រីពីថ្ងៃទី ៣ ខែកក្កដា ឆ្នាំ ២០២០ និងមតិណែនាំរបស់លោកនាយករដ្ឋមន្ដ្រី ហ៊ុន សែន កាលពីថ្ងៃទី ៥ ខែកក្កដា ឆ្នាំ ២០២០ គឺរយៈពេល ១ ឆ្នាំមកនេះក្រសួងបរិស្ថានបានសហការជាមួយក្រសួងកសិកម្មរុក្ខាប្រមាញ់ និងនេសាទ ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលខេត្ដបានពិនិត្យសិក្សាចងក្រងលើទិន្នន័យដីដែលពលរដ្ឋបានប្រើ និងអាស្រ័យផលក្នុងតំបន់ការពារធម្មជាតិ និងតំបន់អភិរក្សយូរឆ្នាំ។
លោកថ្លែងថា៖ «ការងារនេះគឺយើងបានធ្វើជាមួយរដ្ឋបាលខេត្ត ហើយខេត្ដដែលបានបញ្ចប់នូវកិច្ចការងារនេះមានដូចជា ខេត្ដកោះកុង កែប ឧត្ដរមានជ័យ និងខេត្ដមួយចំនួនទៀតបាននិងកំពុងពិនិត្យប្រជុំអន្តរក្រសួង ដើម្បីពិនិត្យលើសំណើសុំកាត់ឆ្វៀល»។
បើតាមលោក ភក្ត្រា អ្វីដែលក្រសួងបរិស្ថានពិនិត្យលើសំណើរបស់ខេត្ដគឺការសម្រួលព្រំដីក្នុងតំបន់ការពារធម្មជាតិ ដើម្បីកាត់ឆ្វៀលដីជូនពលរដ្ឋដែលកាន់កាប់ និងអាស្រ័យផលយូរឆ្នាំមកហើយ។
លោកថា លោកនាយករដ្ឋមន្ដ្រី ហ៊ុន សែន បានណែនាំឱ្យរក្សាទុកនូវដីបម្រុងចំនួន ១០ ភាគរយ សម្រាប់ប្រើជាផលប្រយោជន៍សហគមន៍ និងការរៀបចំហេដ្ឋារចនាសម្ព័ន្ធក្នុងតំបន់កាត់ឆ្វៀលនោះផងដែរ។
លោកថា កិច្ចការងារនេះជាផ្នែកមួយដែលក្រសួងបរិស្ថានកំពុងធ្វើជាមួយរដ្ឋបាលខេត្ដ ដើម្បីឱ្យរដ្ឋបាលខេត្ដពិនិត្យមើលក្នុងរយៈពេល ១០ ឆ្នាំ ឬ ២០ ឆ្នាំខាងមុខ ប្រសិនបើមានការចង់បង្កើតភូមិថ្មី ឬក៏ចំនួនពលរដ្ឋមានការកើនឡើង តើត្រូវរៀបចំយ៉ាងដូចម្ដេច? នេះគឺជាការគិតគូរទុកជាមុនពីពេលនេះទៅមុខ។
លោក វៅ សុខា អភិបាលរង និងជាអ្នកនាំពាក្យរដ្ឋបាលខេត្ដកែបថ្លែងនៅថ្ងៃទី ២៦ កញ្ញាថា រដ្ឋបាលខេត្ដកែបបានដាក់សំណើសុំកាត់ឆ្វៀលដីជូនពលរដ្ឋដែលអាស្រ័យផលក្នុងឧទ្យានជាតិកែបមកក្រសួងបរិស្ថានថ្ងៃទី ២២ ខែមករា ឆ្នាំនេះ។
លោកបានថ្លែងថា៖ «យើងបានដាក់សំណើទៅយូរដែរហើយ ប៉ុន្ដែអត់ទាន់ឃើញធ្លាក់មកវិញទេ។ មុនដំបូងសំណើនេះចូលដល់ទីស្ដីការគណៈរដ្ឋមន្ដ្រី។
ជារួមការស្នើសុំកាត់ឆ្វៀលនេះគឺអនុវត្ដតាមការណែនាំរបស់សម្ដេចតេជោនាយករដ្ឋមន្ដ្រីដោយពិនិត្យមើលលើពលរដ្ឋដែលបានរស់នៅជាក់ស្ដែងយូរឆ្នាំក្នុងតំបន់ឧទ្យានជាតិឬតំបន់ការពារ»។
តាមលិខិតស្នើសុំកាត់ឆ្វៀលរបស់រដ្ឋបាលខេត្ដបានឱ្យដឹងថា ទីតាំងភូមិស្រាស្តក្នុងក្រុងកែប បច្ចុប្បន្ននេះមួយចំនួនធំស្ថិតក្នុងតំបន់ឧទ្យានជាតិកែប។ ឆ្លងតាមការចុះអនុវត្តការងារពិនិត្យ និងសិក្សាជាក់ស្តែងក្នុងភូមិសាស្ត្រខេត្តកែប ក្រុមការងារសម្រេចបានលទ្ធផលដើម្បីស្នើសុំកាត់ឆ្វៀលដីជូនពលរដ្ឋក្នុងភូមិសាស្ដ្រ ភូមិកែប សង្កាត់កែប និងភូមិថ្មី សង្កាត់ព្រៃធំ លើក្បាលដីសរុបចំនួន ២៧៥ ក្បាលដី ស្មើនឹងជាង ១៧៦ ហិកតា។
លោក សុខ សុទ្ធី អភិបាលរងខេត្តបានឱ្យដឹងដែរថា ដីនៅកោះកុងជាង ៩០ ភាគរយគ្របដណ្តប់ដោយតំបន់ការពារ។ ការកាត់ឆ្វៀលដីក្នុងភូមិសាស្ដ្រខេត្ដកោះកុងមានផ្ទៃដីជាង ១៥ ម៉ឺនហិកតា ហើយជាទូទៅផ្តល់ជូនពលរដ្ឋប្រហែលជាង ៣ ម៉ឺនគ្រួសារដោយក្នុង ១ គ្រួសារអាចនឹងទទួលបានដីជាមធ្យមចន្លោះពី ៣ ទៅ ៥ ហិកតា។
លោក ឌី រ៉ាដូ អភិបាលរងខេត្ដឧត្ដរមានជ័យបានឱ្យដឹងថា ក្រោយបញ្ចប់ការពិនិត្យ ស្រាវជ្រាវ រដ្ឋបាលខេត្ដបានដាក់លិខិតស្នើសុំកាត់ឆ្វៀលដីជូនពលរដ្ឋមកក្រសួងបរិស្ថានរួចហើយ ប៉ុន្ដែលោកថាមិនបានចាំពីចំនួនដីដែលត្រូវកាត់ឆ្វៀលនោះទេ ដោយសារទិន្នន័យនៅមន្ដ្រីជំនាញ ហើយលោកកំពុងចុះបេសកកម្មនៅមូលដ្ឋាន។
លោកថ្លែងថា៖ «យើងបានដាក់លិខិតស្នើសុំកាត់ឆ្វៀលនេះទៅក្រសួងបរិស្ថានកាលពីដើមឆ្នាំ ២០២១។ ពេលនេះខ្ញុំមិនមានទិន្នន័យផ្ទៃដីស្នើសុំកាត់ឆ្វៀលនោះនៅក្នុងដៃទេ»។
លោកបានឱ្យដឹងដែរថា អ្វីដែលជាការសង្កេតនាពេលចុងក្រោយ បន្ទាប់ពីមានបទបញ្ជាពីលោកនាយករដ្ឋមន្ដ្រី ហ៊ុន សែន ឱ្យកាត់ឆ្វៀលដីជូនពលរដ្ឋគឺមានជនខិលខូចមួយចំនួនបាននិងកំពុងលួចទន្ទ្រានកាន់កាប់ដីព្រៃក្នុងតំបន់ការពារធម្មជាតិដោយខុសច្បាប់។ បញ្ហានេះក្រសួងបានចងក្រងឯកសារកំណត់អត្តសញ្ញាណអ្នកដែលទន្ទ្រានទាំងនោះ ដើម្បីបញ្ជូនទៅតុលាការ។
លោក ភក្ត្រា ក៏បានរំឭកឡើងវិញផងដែរនូវប្រសាសន៍របស់លោកនាយករដ្ឋមន្ដ្រី ហ៊ុន សែន ដែលបានលើកឡើងនៅថ្ងៃទី ៥ ខែកក្កដាឆ្នាំ ២០២០ បន្ថែមលើស្មារតីនៃកិច្ចប្រជុំគណៈរដ្ឋមន្ដ្រីនៅថ្ងៃទី ៣ ខែកក្កដាឆ្នាំ ២០២០ តាមរយៈការផូស្តនៅលើហ្វេសប៊ុកថា៖ «ជនឆ្លៀតឱកាសពីការបែងចែក និងទទួលដីធ្លីនឹងត្រូវមានទោស»។
បើតាមលោក ភក្ត្រា គ្រាន់តែនៅឧទ្យានជាតិព្រះមុនីវង្សបូកគោមួយពីថ្ងៃទី ៣ ខែកក្កដា ឆ្នាំ ២០២០ ដល់ថ្ងៃទី ៣១ ខែកក្កដា ឆ្នាំ ២០២១ មានការលួចទន្ទ្រានកាន់កាប់ដីព្រៃខុសច្បាប់ចំនួន ២០១ ករណីដែលមានផ្ទៃដីចំនួន ៦១៩ ហិកតា។
លោកថ្លែងថា៖ «ឥឡូវនេះក្រសួងបរិស្ថានបានដាក់លិខិតផ្លូវការទៅកាន់រដ្ឋបាលខេត្ដកំពត ដើម្បីស្នើឱ្យឯកឧត្ដមអភិបាលនៃគណៈអភិបាលខេត្ដដែលជាគណៈបញ្ជាការឯកភាពខេត្ដចេញដីកាដកហូតដីដែលរុករានទន្ទ្រានកាន់កាប់ទាំងនោះ និងដីមួយចំនួនដែលទន្ទ្រានកាន់កាប់នោះគឺយើងនឹងដាក់ពាក្យបណ្ដឹងទៅតុលាការដើម្បីអនុវត្ដតាមច្បាប់»៕
