ឧបករណ៍តេស្ដរហ័សដែលកំពុងប្រើប្រាស់បច្ចុប្បន្ន។ ហ៊ាន រង្សី
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានណែនាំដល់ម្ចាស់ ឬនាយករោងចក្រ សហគ្រាស ឱ្យត្រៀមឧបករណ៍ធ្វើតេស្តរហ័សរកមេរោគកូវីដ ១៩ ឱ្យបានគ្រប់គ្រាន់ សម្រាប់ធ្វើតេស្តជូនកម្មករនិយោជិតនៅទូទាំងប្រទេស ក្រោយពេលឈប់សម្រាកក្នុងពិធីបុណ្យភ្ជុំបិណ្ឌនៅសប្តាហ៍ក្រោយ។
លោក អ៊ិត សំហេង បានលើកឡើងថា ការធ្វើតេស្តរហ័សនេះគឺដើម្បីរក្សាបាននូវសកម្មភាពអាជីវកម្ម ផលិតកម្ម និងការផ្តល់សេវាកម្មក៏ដូចជាចូលរួមចំណែកប្រយុទ្ធ និងទប់ស្កាត់ការរីករាលដាលទ្រង់ទ្រាយធំនៃជំងឺកូវីដ ១៩ ដែលបណ្តាលមកពីមេរោគបំប្លែងថ្មីប្រភេទដែលតា (Delta) នៅតាមរោងចក្រសហគ្រាស ក្រោយពេលឈប់សម្រាកក្នុងពិធីបុណ្យភ្ជុំបិណ្ឌរយៈពេល ៣ ថ្ងៃ។
លោកបានថ្លែងថា៖ «ម្ចាស់ ឬនាយករោងចក្រ សហគ្រាស ត្រូវត្រៀមឧបករណ៍ធ្វើតេស្តរហ័សរកមេរោគកូវីដ ១៩ ឱ្យបានគ្រប់ចំនួនសម្រាប់ធ្វើតេស្តរកមេរោគកូវីដ ១៩ ដល់កម្មករនិយោជិតរបស់ខ្លួន ក្រោយពេលឈប់សម្រាកក្នុងពិធីបុណ្យភ្ជុំបិណ្ឌ។ ការធ្វើតេស្តរហ័សរកមេរោគនេះ គឺជាបន្ទុករបស់ម្ចាស់ ឬនាយករោងចក្រ សហគ្រាស»។
រដ្ឋមន្ត្រីរូបនេះបានបន្ថែមថា កម្មករនិយោជិតទាំងអស់ត្រូវចូលរួមធ្វើតេស្តរហ័សរកមេរោគកូវីដ ១៩ តាមការរៀបចំរបស់ម្ចាស់ ឬនាយករោងចក្រសហគ្រាស។
លោក អ៊ិត សំហេង បានបញ្ជាក់ថា៖ «ចំពោះកម្មករនិយោជិតណាដែលមិនព្រមចូលធ្វើតេស្តនឹងត្រូវចាត់ទុកថា បានល្មើសធ្ងន់ចំពោះវិធានខាងវិន័យសន្តិសុខ និងអនាម័យដូចមានចែងក្នុងមាត្រា ៨៣ នៃច្បាប់ស្តីពីការងារ និងបទប្បញ្ញត្តិជាធរមាន ដែលបើកសិទ្ធិឱ្យនិយោជកអាចបញ្ឈប់កម្មករនិយោជិតពីការងារបាន»។
ផ្ទុយមកវិញ ក្នុងករណីនិយោជកមិនបានធ្វើតេស្ដរហ័សរកមេរោគកូវីដ ១៩ ដល់កម្មករ-និយោជិត ក្រោយពេលឈប់សម្រាកហើយនេះ កម្មករនិយោជិតត្រូវជូនដំណឹងមកក្រសួងការងារ និងបណ្តុះបណ្តាលវិជ្ជាជីវៈតាមរយៈក្រុមតេឡេក្រាមឈ្មោះ «សម្រាប់កម្មករនិយោជិត https://t.me/KhmerWorkerChat»។
ទន្ទឹមនឹងនេះដែរ លោក អ៊ិត សំហេង ក៏បានអំពាវនាវទៅដល់កម្មករនិយោជិតដែលបានឈប់សម្រាកក្នុងពិធីបុណ្យភ្ជុំបិណ្ឌនេះ ត្រូវអនុវត្តឱ្យបានខ្ជាប់ខ្ជួននូវវិធានការ ៣ការពារ និង ៣កុំ ជាពិសេសត្រូវពាក់ម៉ាស់ លាងដៃញឹកញាប់ជាមួយនឹងសាប៊ូ រក្សាគម្លាតសុវត្ថិភាពបុគ្គលក្នុងពេលធ្វើដំណើរដោយរថយន្តរួម និងត្រូវយកតាមខ្លួននូវទឹកអាល់កុល ឬជែលលាងដៃ។
លោក ហ្វា សាលី ប្រធានសម្ព័ន្ធសហជីពជាតិបានគាំទ្រចំពោះចំណាត់ការរបស់ក្រសួងការងារ និងបណ្តុះបណ្តាលវិជ្ជាជីវៈក្នុងការធ្វើតេស្តរកមេរោគកូវីដ ១៩ ដល់កម្មករនិយោជិតពេលវិលត្រឡប់ពីឈប់សម្រាកពិធីបុណ្យភ្ជុំរួច។
លោកបានប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែកញ្ញា ថា៖ «ការធ្វើតេស្តរកមេរោគកូវីដ ១៩ ទៅដល់បងប្អូនកម្មករពេលត្រឡប់ចូលធ្វើការវិញនេះ គឺជារឿងដែលត្រឹមត្រូវបំផុត និងជាការការពារបានជាលក្ខណៈសហគមន៍តែម្តង។ ដូចនេះកាតព្វកិច្ចរបស់ក្រុមហ៊ុនគឺត្រូវតែធ្វើតាមសេចក្តីណែនាំរបស់ក្រសួងការងារ ចៀសវាងការធ្វេសប្រហែសណាមួយដែលអាចឈានទៅដល់ផ្ទុះរាលដាលកាន់តែធំឡើងៗទៀត»។
លោក ហ្វាសាលី បានបន្ថែមថា លោកមានការបារម្ភខ្លាំងពេលឃើញរាជរដ្ឋាភិបាលសម្រេចឱ្យកម្មករនិយោជិតឈប់សម្រាកថ្ងៃបុណ្យភ្ជុំនេះដែលជាហានិភ័យខ្ពស់សម្រាប់ពួកគាត់ពេលធ្វើដំណើរទៅស្រុកកំណើតដែលអាចនឹងនាំយកវីរុសកូវីដ ១៩ ពីកន្លែងរបស់គាត់ទៅស្រុកកំណើត ឬពីស្រុកកំណើតមកកន្លែងធ្វើការវិញដែរ។
លោកថា៖ «ខ្ញុំសុំអំពាវនាវដល់កម្មករនិយោជិតទាំងអស់ មេត្តាធ្វើយ៉ាងណាត្រូវការពារដោយត្រូវចៀសវាងដាច់ខាតនូវការជួបជុំមនុស្សច្រើន ប៉ុន្តែខ្ញុំគិតថា ការជួបជុំប្រាកដជាមានដោយសារបងប្អូនយើងមួយចំនួនហាក់មិនសូវបារម្ភ និងប្រុងប្រយ័ត្នពីវីរុសកូវីដ ១៩ នេះឡើយ»។
ពិធីបុណ្យភ្ជុំបិណ្ឌសម្រាប់ឆ្នាំនេះ មានរយៈពេល ៣ ថ្ងៃ ដែលនឹងឈានមកដល់នៅដើមខែក្រោយនេះ គឺចាប់ពីថ្ងៃទី ៥, ៦ និងថ្ងៃទី ៧។ ជាមួយគ្នានេះដែរទោះបីជារាជរដ្ឋាភិបាលបានសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌចាប់ពីបិណ្ឌ ៤ រហូតដល់ថ្ងៃភ្ជុំបិណ្ឌ ដោយសាររកឃើញអ្នកឆ្លងជំងឺកូវីដ ១៩ មួយចំនួនក្ដី ប៉ុន្តែមន្ត្រីរាជការ កម្មករ កម្មការិនី និងបុគ្គលិកក្រុមហ៊ុនត្រូវបានអនុញ្ញាតឱ្យឈប់សម្រាកពីការងារដូចធម្មតា។
លោក ហ៊ុន សែន បានថ្លែងកាលពីថ្ងៃទី ២៥ ខែកញ្ញា ថា រាជរដ្ឋាភិបាលមិនហាមឃាត់ការឈប់សម្រាក ៣ ថ្ងៃ របស់មន្ត្រីរាជការក៏ដូចជាកម្មករកម្មការិនីបុគ្គលិកនៅតាមក្រុមហ៊ុនដែលត្រូវទទួលបានការអនុញ្ញាតឱ្យឈប់សម្រាកដោយមានប្រាក់បៀវត្សរ៍នោះទេ។
លោកមានប្រសាសន៍ថា៖ «បងប្អូនអាចធ្វើដំណើរដើរលេងកម្សាន្តទៅតាមទីកន្លែងនានា ដោយមានវិធានការសុខាភិបាលទៅជាមួយនោះក៏ជាវិធីមួយ ដើម្បីបើកឱកាសឱ្យបងប្អូនបានសម្រាកនៅក្នុងរយៈកាលនៃបុណ្យភ្ជុំបិណ្ឌនេះ»៕
វីដេអូ៖
