បទល្មើសព្រៃឈើដែលសមត្ថកិច្ចបង្ក្រាបនៅឆ្នាំនេះ ។ រូបថត GRK news
ភ្នំពេញៈ កម្ពុជាបានដាក់ចេញនូវវិធានការចាំបាច់នានានៅតាមវិស័យពាក់ព័ន្ធសំខាន់ៗមួយចំនួន ដូចជាការបញ្ឈប់ការកាប់បំផ្លាញព្រៃឈើ និងធានានូវការគ្រប់គ្រងព្រៃឈើប្រកបដោយនិរន្តរភាព ដើម្បីចូលរួមចំណែកកាត់បន្ថយការបញ្ចេញឧស្ម័នក្នុងពិភពលោក និងកាត់បន្ថយការប្រែប្រួលអាកាសធាតុ។
ការដាក់ចេញផែនការសកម្មភាពនេះត្រូវបានលើកឡើងក្នុងកិច្ចប្រជុំពិគ្រោះយោបល់ក្រុមការងារបច្ចេកទេសប្រែប្រួលអាកាសធាតុ ដើម្បីពិនិត្យនិងពិភាក្សាអំពីយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន កាលពីថ្ងៃទី ២៩ ខែកញ្ញា តាមរយៈវីដេអូពីចម្ងាយ ដែលមានការចូលរួមពីទីប្រឹក្សាជាតិ និងអន្តរជាតិដែលទទួលបន្ទុកលើវិស័យនីមួយៗ ក្រសួង ស្ថាប័នពាក់ព័ន្ធ តំណាងទូត ដៃគូអភិវឌ្ឍន៍ សង្គមស៊ីវិល វិស័យឯកជន ស្ថាប័នសិក្សា និងអ្នកពាក់ព័ន្ធផ្សេងៗចំនួន ១០៥ រូប។
លោក វ៉ាន់ មុនីនាថ អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព បានលើកឡើងក្នុងកិច្ចប្រជុំថា សកម្មភាពប្រែប្រួលអាកាសធាតុ គឺជាការងារមួយដែលត្រូវការផែនការរយៈពេលវែង គោលដៅច្បាស់លាស់ និងប្រកបដោយមហិច្ឆតា។
លោកបន្តថា៖ «ហេតុនេះហើយការរៀបចំបង្កើតយុទ្ធសាស្ត្រអភិវឌ្ឍន៍រយៈពេលវែងដែលបញ្ចេញឧស្ម័នតិច នឹងក្លាយជាជោគជ័យថ្មីមួយទៀតសម្រាប់ប្រទេសកម្ពុជា ដើម្បីឈានដល់អព្យាក្រឹតភាពកាបូនក្នុងរយៈពេល ២-៣ ទសវត្សរ៍ខាងមុខនេះ ក្នុងគោលដៅសម្រេចបាននូវកំណើនសេដ្ឋកិច្ចខ្ពស់ សង្គម និងបរិស្ថាន»។
លោកបានបន្តថា ប្រទេសកម្ពុជា បន្តរងផលប៉ះពាល់យ៉ាងធ្ងន់ធ្ងរពីការប្រែប្រួលអាកាសធាតុដូចជា របបទឹកភ្លៀងដែលមិនអាចទាយទុកជាមុនបាននិងគ្រោះរាំងស្ងួតញឹកញាប់ ដែលផ្តល់ផលប៉ះពាល់ដល់វិស័យកសិកម្ម ជលផល ហេដ្ឋារចនាសម្ព័ន្ធ ធនធានធម្មជាតិ និងបរិស្ថាន ហើយជំងឺកូវីដ ១៩ បង្កផលវិបាកយ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ ជាពិសេសប្រជាពលរដ្ឋដែលងាយរងគ្រោះបំផុត។
លោកបានបញ្ជាក់ថា ការរួមបញ្ចូលគ្នានៃរោគរាតត្បាត និងព្រឹត្តិការណ៍អាកាសធាតុធ្ងន់ធ្ងរនេះ បង្ហាញយើងថា ប្រទេសកម្ពុជា ត្រូវរៀបចំផែនការមាគ៌ាអភិវឌ្ឍន៍ដែលមានភាពធន់នឹងកាត់បន្ថយផលប៉ះពាល់ពីបញ្ហាទាំងនេះ។
លោកថា៖ «ថ្វីដ្បិតតែប្រទេសកម្ពុជារួមចំណែកតិចតួចក្នុងការបញ្ចេញឧស្ម័នផ្ទះកញ្ចក់ក៏ដោយ ក៏យើងចង់ដឹកនាំជាគំរូ និងចូលរួមចំណែក ដើម្បីកាត់បន្ថយការបញ្ចេញឧស្ម័នក្នុងពិភពលោក និងកាត់បន្ថយការប្រែប្រួលអាកាសធាតុស្របតាមធនធាន និងសមត្ថភាពរបស់យើង»។
លោក មុនីនាថ បានឱ្យដឹងទៀតថា តាមរយៈមហិច្ឆតាទាំងនេះប្រទេសកម្ពុជា បានរៀបចំ និងដាក់ជូនរបាយការណ៍បច្ចុប្បន្នភាព (Updated NDC) ទៅលេខាធិការដ្ឋាននៃអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ UNFCCC នៅថ្ងៃទី ៣១ ខែ ធ្នូ ឆ្នាំ ២០២០។ បន្ថែមពីនេះ កម្ពុជាបាននិងកំពុងរៀបចំ និងប្រមូលធាតុចូលបន្ថែមលើយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន ដើម្បីដាក់ជូនលេខាធិការដ្ឋាន (UNFCCC) មុនកិច្ចប្រជុំ COP26 ដែលគ្រោងរៀបចំនៅក្នុងខែវិច្ឆិកា ឆ្នាំ ២០២១ ខាងមុខនេះ។
លោកបន្តថា៖ «ដើម្បីសម្រេចបានគោលដៅនេះ យើងនឹងត្រូវការវិស័យព្រៃឈើ និងការប្រើប្រាស់ដី ដែលដើរតួយ៉ាងសំខាន់ក្នុងការផ្តល់នូវអាងស្រូប កាបូនជាមួយនឹងការផ្តល់អាទិភាពលើការបញ្ឈប់ការកាប់បំផ្លាញព្រៃឈើ និងធានានូវការគ្រប់គ្រងព្រៃឈើប្រកបដោយនិរន្តរភាព»។
បើតាមលោក មុនីនាថ នៅមានវិស័យដ៏សំខាន់ៗជាច្រើនទៀត ដែលអាចរួមចំណែក ក្នុងការកាត់បន្ថយប្រែប្រួលអាកាសធាតុដូចជាវិស័យថាមពល វិស័យកសិកម្ម និងវិស័យសំណល់ជាដើម។
លោកថា៖ «យើងត្រូវការរថយន្តអគ្គិសនី និងការដឹកជញ្ជូនសាធារណៈបន្ថែមទៀតនៅក្នុងទីក្រុង»។ ចំណែកនៅក្នុងវិស័យកសិកម្ម យើងត្រូវបង្កើនផលិតភាពនៃវិស័យកសិកម្ម ដើម្បីធានាបាននូវការកាត់បន្ថយការកាប់បំផ្លាញព្រៃឈើដោយឆ្ពោះទៅរកការអនុវត្តការដាំដុះដែលបញ្ចេញឧស្ម័នមេតានតិច។ រីឯនៅក្នុងវិស័យសំណល់ គន្លឹះសំខាន់គឺកាត់បន្ថយការបង្កើតសំណល់ ពង្រីកការប្រមូលសំណល់ដោយការធ្វើប្រព្រឹត្តិកម្មប្រកបដោយប្រសិទ្ធភាពនូវសំណល់សរីរាង្គ និងគ្រប់គ្រងទីលានចាក់សំរាមឱ្យបានល្អដោយការស្រូវយកឧស្ម័នពីទីលានចាក់សំរាម។
លោកបានសង្កត់ធ្ងន់ថា កិច្ចប្រជុំថ្ងៃនេះ នឹងពិនិត្យមើលសកម្មភាព សេណារីយ៉ូផ្សេងៗ និងធាតុចូលនានា ពីអ្នកជំនាញ ទីប្រឹក្សាជាតិ អន្តរជាតិ និងជាពិសេសពីក្រសួងស្ថាប័នពាក់ព័ន្ធនានា ដើម្បីពិនិត្យអំពីស្ថានភាពសេដ្ឋកិច្ច សង្គម និងបរិស្ថាន ស្របតាមបរិបទនៃប្រទេសកម្ពុជា ដើម្បីសម្រេចបាននូវកំណើនសេដ្ឋកិច្ចខ្ពស់ ដោយកាត់បន្ថយការបញ្ចេញឧស្ម័ន ដើម្បីទទួលបាននូវអព្យាក្រឹតកាបូន។
គួរបញ្ជាក់ផងដែរថា កម្ពុជា ជាប្រទេសមួយក្នុងចំណោមប្រទេសចំនួន ៧០ ដែលបានដាក់របាយការណ៍នេះទាន់ពេលវេលា និងទទួលបាននូវការកោតសរសើរខ្ពស់អំពីខ្លឹមសារនៃរបាយការណ៍ ឆ្លុះបញ្ចាំងពីការប្តេជ្ញាចិត្តខ្ពស់របស់រាជរដ្ឋាភិបាលកម្ពុជាក្នុងការចូលរួមជាមួយពិភពលោកក្នុងការប្រយុទ្ធប្រឆាំងនឹងការប្រែប្រួលអាកាសធាតុដែលជាបញ្ហាសកល៕
.jpg)
