ការត្រួតពិនិត្យរថយន្តដឹកលើសទម្ងន់កាលពីចុងខែមុន។ រូបថត ក្រសួងសាធារណការ
ភ្នំពេញៈ មន្ត្រីក្រសួងសាធារណការ និងដឹកជញ្ជូនបានឱ្យដឹងថារថយន្តធុនធ្ងន់ដែលសមត្ថកិច្ចឃាត់ ករណីដឹកលើសទម្ងន់កំណត់ចំនួន ២១៧ គ្រឿង ត្រូវបានម្ចាស់មកទទួលយកវិញ បន្ទាប់ពីលោកនាយករដ្ឋមន្ត្រី ហ៊ុន សែន បានអនុញ្ញាត ខណៈរថយន្តល្មើស ១២ គ្រឿងទៀត ម្ចាស់កំពុងបំពេញបែបបទ។
កាលពីថ្ងៃទី ៣០ ខែកញ្ញា ឆ្នាំនេះ លោកនាយករដ្ឋមន្ត្រី ហ៊ុន សែន សម្រេចឱ្យមន្ត្រីជំនាញប្រគល់រថយន្តធុនធ្ងន់ ២២៩ គ្រឿង ទៅដល់ម្ចាស់ក្រុមហ៊ុន ឬម្ចាស់រថយន្តវិញ ដើម្បីស្ដារសកម្មភាពធុរកិច្ច អាជីវកម្ម សេដ្ឋកិច្ច បន្ទាប់ពីរថយន្តធុនធ្ងន់ទាំងនោះត្រូវបានឃាត់ និងរក្សាទុកនៅស្ថានីយជញ្ជីងតាមបណ្តារាជធានី-ខេត្តមួយចំនួន រយៈពេល ១ ឆ្នាំករណីដឹកលើសទម្ងន់កំណត់។
លោក តាំង ពៅ ប្រធានលេខាធិការដ្ឋាននៃក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍នៅថ្ងៃទី ១០ តុលាថា បន្ទាប់ពីមានការអនុញ្ញាតនេះ ម្ចាស់ក្រុមហ៊ុន និងម្ចាស់រថយន្តទាំងនោះបានមកបំពេញបែបបទទទួលយករថយន្តរបស់ពួកគេជាបន្តបន្ទាប់។
លោកបន្តថា គិតត្រឹមថ្ងៃទី ៩ តុលា គឺមានរថយន្ត ២១៧ គ្រឿងត្រូវបានប្រគល់ឱ្យម្ចាស់វិញ។ ចំណែក ១២ គ្រឿងទៀត ម្ចាស់កំពុងបន្តបំពេញបែបបទដើម្បីទទួលយកទៅវិញដែរ។
លោកថា៖ «សល់តែប៉ុន្មានគ្រឿងទៀតទេ ដែលមិនទាន់បានមកយក ព្រោះពួកគាត់នៅឆ្ងាយ ហើយម្យ៉ាងទៀតមានឡាន មួយចំនួន វាខូច វាធ្វើមិនទាន់ចេញ ដោយសារទុកចោលយូរ តែឯកសារបំពេញរួចហើយ»។
ជាមួយគ្នានេះ លោក តាំង ពៅ បានឱ្យដឹងថា ពេលនេះ សមត្ថកិច្ចមិនទាន់បង្ក្រាបបានបទល្មើសថ្មីទាក់ទងនឹងការដឹកលើសទម្ងន់ទៀតទេ ព្រោះច្បាប់នេះកំពុងត្រូវបានផ្សព្វផ្សាយឱ្យទូលាយ។ ម្យ៉ាងទៀត ម្ចាស់អាជីវកម្មទាំងនោះ ក៏មិនទាន់ហ៊ានប្រព្រឹត្តសកម្មភាពអ្វីថ្មីក្នុងពេលនេះទៀតដែរ។
លោកបន្ថែមថា៖ «តាមការណែនាំរបស់ថ្នាក់ដឹកនាំក្រសួងទាំងអស់ គឺបន្ទាប់ពីយើងបានដោះលែងឡាន ហើយយើងនឹងមិនបន្ធូរដៃទេគឺនៅតែរឹតបន្តឹងទ្វេដង ហើយមកដល់ពេលនេះ យើងក៏មិនទាន់បានឃាត់រថយន្តល្មើសថ្មីដែរ ព្រោះការដោះលែងនេះ យើងបានផ្សព្វផ្សាយ ហើយមួយភ្លែតហ្នឹង ជឿថា គាត់មិនហ៊ានធ្វើទៀតទេ»។
បើតាមលោក តាំង ពៅ ចំពោះរថយន្តធុនធ្ងន់ដែលល្មើសច្បាប់ស្តីពីការដឹកលើសទម្ងន់កំណត់នឹងត្រូវអនុវត្តតាមច្បាប់ជាធរមាន ហើយចំពោះរថយន្តដែលធ្លាប់ល្មើស ហើយនៅតែប្រព្រឹត្តល្មើសទៀតនឹងត្រូវពិន័យទ្វេដងទៅតាមច្បាប់។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានរំពឹងថា ក្រោយពីមានការដោះលែងរថយន្តល្មើសទាំងនេះរដ្ឋាភិបាល ជាពិសេសក្រសួងសាធារណការខ្លួនឯងផ្ទាល់នឹងបន្តផ្សព្វផ្សាយច្បាប់ឱ្យបានទូលំទូលាយ។
លោករំពឹងថា ចាប់ពីពេលនេះទៅ ការអនុវត្តច្បាប់ស្តីពីបទល្មើសទាំងនេះនឹងធ្វើឡើងឱ្យបានតឹងរ៉ឹងបន្ថែមទៀត ហើយអ្នកដែលមិនរាងចាល គឺត្រូវទទួលទោសទណ្ឌឱ្យបានធ្ងន់ធ្ងរដោយគ្មានការលើកលែង។
លោកបន្តថា៖ «ចន្លោះពេលនេះគឺត្រូវមានវិធានការត្រឹមត្រូវណាស់...ខ្ញុំជឿជាក់ថា សាមីក្រសួងលោកនឹងមានវិធានការចំពោះករណីទាំងនេះ ព្រោះមិនអាចយកបញ្ហាកូវីដមកធ្វើជាលេសដដែលៗទេ»៕
វីដេអូ៖
