ទិដ្ឋភាពនៅមុខសាកលវិទ្យាល័យភ្នំពេញកន្លងមក។ រូបថត ភ្នំពេញ ប៉ុស្ដិ៍
ភ្នំពេញៈ សាកលវិទ្យាល័យភូមិន្ទភ្នំពេញបានប្រកាសជ្រើសរើសនិស្សិតចូលរៀនថ្នាក់ក្រោយឧត្តមសិក្សាផ្នែករូបវិទ្យា ដែលក្នុងនោះមានការផ្តល់ជូនអាហារូបករណ៍ ១៦ កន្លែង ដល់និស្សិតផ្នែកបរិញ្ញាបត្រជាន់ខ្ពស់។
យោងតាមការប្រកាសនៅលើទំព័រហ្វេសប៊ុករបស់ក្រសួងអប់រំ យុវជន និងកីឡា នៅក្នុងថ្នាក់បណ្ឌិតរូបវិទ្យា សាកលវិទ្យាល័យនឹងផ្តោតលើទ្រឹស្តីកង់ទិក ទ្រឹស្តីទំនាញ រូបវិទ្យារូបធាតុ ផូតូនិក និងការអនុវត្ត និងរូបធាតុណាណូ និងការអនុវត្ត។ ចំពោះថ្នាក់បរិញ្ញាបត្រជាន់ខ្ពស់រូបវិទ្យា សាកលវិទ្យាល័យនឹងផ្តោតលើទ្រឹស្តីកង់ទិក ទ្រឹស្តីទំនាញ រូបវិទ្យារូបធាតុ ផូតូនិក និងការអនុវត្ត និងរូបធាតុណាណូ និងការអនុវត្ត និងថាមពលកកើតឡើងវិញ។
លោក អៀង សៀងហ័រ សាស្ត្រាចារ្យនៃសាកលវិទ្យាល័យភូមិន្ទភ្នំពេញ និងជាជំនួយការកម្មវិធីរូបវិទ្យាបានឱ្យដឹងថា នេះគឺជាការជ្រើសរើសនិស្សិតបរិញ្ញាបត្រជាន់ខ្ពស់រូបវិទ្យាថា្នក់អាហារូបករណ៍ជំនាន់ទី ៣ និងថ្នាក់បណ្ឌិតជំនាន់ទី ១ នៅសាកលវិទ្យាល័យភូមិន្ទភ្នំពេញ។ ការជ្រើសរើសនិស្សិតសម្រាប់ថ្នាក់ក្រោយឧត្តមសិក្សានេះនឹងតម្រូវឱ្យនិស្សិតទាំងអស់ប្រឡងមុខវិជ្ជាចំនួន ២ វិញ្ញាសាគឺមុខវិជ្ជារូបវិទ្យាទូទៅ និងរូបវិទ្យាកង់ទិក និងភាសាអង់គ្លេសសម្រាប់ថ្នាក់បរិញ្ញាបត្រជាន់ខ្ពស់ និងប្រឡងមុខវិជ្ជាមេកានិកទ្រឹស្តី និងរូបវិទ្យាកង់ទិកបូករួមនឹងការសម្ភាសបន្ថែមជាភាសាអង់គ្លេសសម្រាប់ថ្នាក់បណ្ឌិត។
កាលបរិច្ឆេទឈប់ទទួលពាក្យសម្រាប់ថ្នាក់បរិញ្ញាបត្រជាន់ខ្ពស់រូបវិទ្យា គឺនៅថ្ងៃទី ២២ តុលា ឆ្នាំ ២០២១ និងកាលបរិច្ឆេទប្រឡងនឹងធ្វើឡើងនៅថ្ងៃទី ២៨ ខែតុលា ឆ្នាំ ២០២១។ ចំណែកកាលបរិច្ឆេទឈប់ទទួលពាក្យសម្រាប់ថ្នាក់បណ្ឌិតរូបវិទ្យា គឺនៅថ្ងៃទី ១៥ វិច្ឆិកា ឆ្នាំ ២០២១ និងកាលបរិច្ឆេទប្រឡងនឹងធ្វើឡើងនៅថ្ងៃទី ២២ វិច្ឆិកា ឆ្នាំ ២០២១។
លោក អៀង សៀងហ័រ បានបញ្ជាក់ទៀតថា ការប្រឡងជ្រើសរើសនិស្សិតចំនួន ១៦ នាក់សម្រាប់ថ្នាក់បរិញ្ញាបត្រជាន់ខ្ពស់នឹងទទួលបានកញ្ចប់អាហារូបករណ៍សិក្សាមិនគិតថ្លៃ និងប្រាក់ឧបត្ថម្ភចំនួន ២០០ ដុល្លារសហរដ្ឋអាមេរិកក្នុង ១ ខែដែលជាជំនួយឧបត្ថម្ភរបស់ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត (SIDA)។
បេក្ខជនដែលចាប់អារម្មណ៍អាចទាញយកពាក្យសុំចុះឈ្មោះប្រឡងតាម shorturl.at/jovBO សម្រាប់ថ្នាក់អនុបណ្ឌិត និង shorturl.at/qABJS សម្រាប់ថ្នាក់បណ្ឌិត។ បេក្ខជនតម្រូវឱ្យដាក់ពាក្យដោយការស្គែនរាល់ឯកសារចាំបាច់ រួចផ្ញើមកព្រមទាំងបង់ថ្លៃចុះឈ្មោះប្រឡងតាម (Telegram & Mobile) ០៨៩ ៩៦៦ ២៣៤ (ធនាគារ ACLEDA)។
បើតាមលោក អៀង សៀងហ័រ និស្សិតទាំងអស់ត្រូវមានអាយុមិនលើសពី ៣៥ ឆ្នាំ ចំពោះបេក្ខជនទូទៅក្រៅពីមន្ត្រីរាជការ បេក្ខជនដែលមានចំណាប់អារម្មណ៍បន្តការសិក្សាថ្នាក់បរិញ្ញាបត្រជាន់ខ្ពស់ត្រូវមានសញ្ញាបត្របរិញ្ញាបត្ររូបវិទ្យា ដោយឡែក បេក្ខជនដែលមានចំណាប់អារម្មណ៍ថ្នាក់បណ្ឌិតត្រូវមានសញ្ញាបត្របរិញ្ញាបត្រជាន់ខ្ពស់រូបវិទ្យា។
ក្រសួងអប់រំ យុវជន និងកីឡាបានលើកឡើងថា៖ «កម្មវិធីបណ្តុះបណ្តាលថ្នាក់បណ្ឌិត និងបរិញ្ញាបត្រជាន់ខ្ពស់ "រូបវិទ្យា" ជាការចូលរួមចំណែកយ៉ាងធំធេងក្នុងបរិបទនៃការប្រកួតប្រជែងបដិវត្តន៍ឧស្សាហកម្ម 4.0»៕
រ៉ូ គីមឡុង
